Read Jinghpaw Common Language Bible 2009 ZEHKARIA 13 Bible Online

ZEHKARIA 13 - Jinghpaw Common Language Bible 2009 bible

ZEHKARIA 13

¹Chyahtum Chyalai N-gun rawng ai dai MADU gaw, “Dai aten du jang, Dawi a amyu matu mara ni hte Yerusalem mare masha ni a yubak mara hte hpara sumla nawku ai htung lai len jasan jaseng kau na hka hpawk langai pru wa na ra ai.

²Dai aten hta hpara sumla ni a amying hpe dai mungdan hta na yeng seng kau na nngai; shaloi kadai mung htawm hpang prat e, dai ni hpe galoi mung dum nga na ma ai n rai. Myihtoi tai na matu tsun ai ni kadai hpe mung ngai seng kau nna, hpara sumla ni hpe nawku na ra sharawng myit ni hpe la kau ya na we ai.

³Dai hpang, marai langai ngai myihtoi htoi nga ai shaloi, dai MADU a aga hte tsun nga ti mung masu magaw ga tsun nga nu ai majaw, shi si lu na lam shi a kanu yan kawa nan shi hpe tsun dan na rai ma ai. Kaja wa shi myihtoi htoi jang, shi a kanu yan kawa nan shi hpe galun sat kau na rai nu ai.

⁴Dai aten du jang, myihtoi kadai mung shi a shingran hta gumrawng lu na n rai; myihtoi langai zawn galaw lu na n rai, amyu masha ni hpe masu hkalem na nga, myihtoi hpun palawng hpun lu na n rai.

⁵Shing rai galaw na malai shi gaw, ‘Ngai gaw myihtoi n rai, yi hkauna galaw sha ai wa she rai nngai. Nye a prat tup lamu ga hta hkai lu hkai sha amu galaw nngai,’ ngu nna tsun na ra ai.

⁶Dai hpang, marai langai ngai mahtang, ‘Na a sinda na nma hkang ni gaw hpa rai ta?,’ ngu nna shi hpe san jang, shi gaw, ‘Manang langai a nta hta hkrum ai nma ni rai nga ai,’” ngu nna htan na ra ai.

⁷Chyahtum Chyalai N-gun rawng ai dai MADU gaw, “Nhtu e, hprang u; nye a matu amu galaw ai sagu rem wa hpe htim anut u! Shi hpe sat kau u, shaloi sagu ni bra ayai mat na mara ai.

⁸Mungdan ting na nye a amyu masha ni hpe ngai htim gasat na nngai; shaloi htam masum na htam lahkawng si htum mat na mara ai.

⁹Ngai gaw dai naw hkrung nga ai htam mi hpe wan hte jasan jaseng la ai gumhpraw zawn shanhte hpe jasan jaseng nna chyam yu na nngai; ngai gaw aja hpe chyam yu ai zawn shanhte hpe chyam yu na nngai. Dai shaloi shanhte ngai kaw hpyi wa nna, ngai mung shanhte hpe htan ya na nngai. Shanhte gaw nye a amyu masha ni rai nga ma ai lam ngai shanhte hpe tsun dan na nngai, ngai gaw shanhte a Karai Kasang rai nga nngai hpe shanhte yin la na mara ai,” ngu nna tsun ai.