Read Jinghpaw Common Language Bible 2009 ZEHKARIA 3 Bible Online

ZEHKARIA 3 - Jinghpaw Common Language Bible 2009 bible

ZEHKARIA 3

¹Dai MADU gaw ngai hpe kaga shingran hta Hkinjawng Kaba Yawshu dai MADU a lamu kasa a man e tsap nga ai hpe madun dan nga ai. Yawshu a makau e, shi hpe mara shagun na matu Satan wa tsap nga ai.

²Dai MADU a lamu kasa gaw Satan hpe, “Satan e, dai MADU nang hpe daw dan u ga! Yerusalem hpe tsaw ra ai dai MADU gaw nang hpe daw dan u ga! Ndai masha wa gaw wan hta na gare shaw la ai wan nhtaw langai zawn rai nga ai,” ngu nna tsun wu ai.

³Yawshu gaw agang chyalang re ai hpun palawng bu hpun nna dai yang e tsap nga ai.

⁴Dai lamu kasa gaw shi a sumsing lamu na ali ama ni hpe, “Ndai masha wa bu hpun nga ai agang chyalang re ai hpun palawng raw kau ya mu,” ngu nna tsun wu ai. Dai hpang, shi gaw Yawshu hpe, “Ngai na a yubak mara hpe la kau ya se ai rai nna hpun na hpun palawng nnan nang hpe jaw na nngai,” ngu nna tsun wu ai.

⁵Shi gaw Yawshu a baw hta san seng ai bunghkaw hkaw ya na matu ali ama ni hpe hkang dat wu ai. Shanhte mung hkang dat ai hte maren galaw ya ma ai, dai hpang dai MADU a lamu kasa dai yang e tsap nga yang, shanhte shi hpe bu hpun palawng nnan jahpun ya ma ai.

⁶Dai hpang lamu kasa mung Yawshu hpe,

⁷Chyahtum Chyalai N-gun Rawng ai dai MADU ning nga tsun nu ai ga tsun dan wu ai: “Ngai nang hpe lit jaw ai amu ni hpe hkan galaw nna nye a tara ni hpe madat mara ndai rai yang, nye a Nawku Htingnu hte de a wang ni hpe matut nna woi hpareng lu na rai ndai. Ngai gaw nye a man e nga nga ai lamu kasa ni a hpyi nem ai ga ni hpe na ya ai zawn, na a hpyi nem ai ga ni hpe mung na ya na nngai.

⁸Dai rai nna Hkinjawng Kaba rai nga ai Yawshu e, madat u, shi a hkinjawng manang ni e, nanhte gaw htawm hpang du na ra ai aten a matu mai kaja ai a kumla rai nga myit dai; ngai gaw nye a shangun ma rai nga ai Lakung ngu shaga hkrum ai wa hpe madun dan na nngai!

⁹Man sanit rawng ai nlung langai mi hpe Yawshu a man e ngai tawn da nngai. Dai hta nlung laika tawk ka da na nngai; shing rai lani jan hta sha, ndai mungdan na yubak mara hpe htawm kau na we ai.

¹⁰Dai nhtoi du ai shaloi, nanhte langai hte langai gaw nanhte a sabyi sun ni hte lakum hpun tu ai grup yin shara hta tinang htingbu ni hpe shaga la nna ngwi pyaw sim sa ai hte shim lum ai hte nga lu na rai myit dai.”