Read Jinghpaw Common Language Bible 2009 ZEHKARIA 8 Bible Online

ZEHKARIA 8 - Jinghpaw Common Language Bible 2009 bible

ZEHKARIA 8

¹Chyahtum Chyalai N-gun rawng ai dai MADU gaw Zehkaria hpe ndai mungga jaw wu ai:

²“Nye a amyu masha ni hpe grai wa tsaw ra ai hte ngai hpe shi a gumlau hpyen ni hte masin pawt shangun hkra re ai tsaw ra myit a majaw, ngai gaw Yerusalem hpe karum la na matu marit nga ni ai.

³Nye a chyoi pra ai mare Yerusalem de ngai nhtang wa nna dai mare e wa nga nga na nngai. Dai mare gaw sadi dung ai mare zawn gumhkawng wa nna Chyahtum Chyalai N-gun rawng ai dai MADU a kawng gaw chyoi pra ai kawng ngu na ra ai.

⁴Asak grai kaba sai gumgai dingla ni mung shanhte hkawm ai shaloi, dawhkrawng lang nna mare na dam lada ai shara ni hkan lang mi bai nga na ma ai.

⁵Numsha, lasha hte ma ni mung nmaw lam hta bai ginsup ai hte hpring nga na mara ai.

⁶“Dai gaw ya naw ngam nga ai masha amyu baw a matu n mai byin ai zawn rai nga ti mung nye a matu chyawm gaw mai byin nga ai.

⁷Nye a amyu masha ni hpe shanhte woi la hkrum ai mungdan ni kaw na hkye mawai la na nngai;

⁸shanhte hpe Yerusalem hta nga shangun na matu, sinpraw sinna maga hkan nga nga ai shanhte hpe bai woi la na nngai. Shanhte gaw nye a amyu masha ni tai nna, ngai gaw shanhte a Karai Kasang tai nga let shanhte hpe sadi sahka hte teng man ai hku up hkang nga na nngai.

⁹“Nden marai shaja mu! Nye a Nawku Htingnu hpe bai gaw gap na matu npawt nhpang jahkrat hpang ai aten e myihtoi ni tsun ai ga hpe sha, ya nanhte na nga myit dai.

¹⁰Dai aten a shawng e, kadai mung nchyang hkan tam lu na n rai; masha rai tim, dusat yam nga rai tim, tinang a gumlau hpyen ni a lata kaw na shim nga lu ai n rai, ngai mahtang amyu masha ni langai hte langai hpe hpyen shangun da we ai.

¹¹Rai ti mung, ya chyawm gaw ndai naw ngam nga ai amyu baw hpe shawng na hte n bung ai hku ngai di na nngai.

¹²Shanhte gaw ngwi pyaw sim sa ai hte nsi naisi gat hkai lu na mara ai; shanhte a sabyi ru ni hta asi si wa na mara ai; lamu ga mung nsi naisi shatut ya nna dai yang e marang law nga na ra ai. Dai rai nna naw hkrung nga ai nye a amyu masha ni hpe ndai shaman chyeju yawng ngai jaw na mawe ai.

¹³Yuda hte Israela amyu masha ni e! Lai sai aprat e, maigan masha ni langai hte langai ning ngu tsun let dagam lai wa masai: ‘Nanhte a ntsa e hkrat bun ai tsin-yam tsindam nan Yuda hte Israela a ntsa e mung hkrat bun u ga law! Rai ti mung, ngai nanhte hpe hkye hkrang la na nngai, shaloi dai maigan masha ni langai hte langai gaw, ‘Yuda hte Israela ntsa e jaw ai shaman chyeju nan nanhte hkam la lu myit ga law!,’ nga nna tsun na mara ai. Dai re ai majaw nden marai shaja mu; hkum hkrit nga myit.”

¹⁴Chyahtum Chyalai N-gun rawng ai dai MADU gaw, “Nanhte a nji nwa ni ngai hpe pawt bu shangun yang, ngai gaw shanhte hpe ru yak tsin-yam tsindam jaw na matu shatawng shada nngai; nye a myit hpe mung n galai kau nngai; nye a shatawng shada ai amu ni hpe mung galaw shapraw nngai.

¹⁵Rai ti mung, ya chyawm gaw Yerusalem hte Yuda mung na amyu masha ni hpe shaman chyeju jaw ya na shatawng shada nga nngai majaw hkum hkrit nga myit.

¹⁶Ndai gaw nanhte galaw ang myit dai amu ni rai nga ai: langai hte langai teng man ai ga tsun nga mu. Tara daw dan ai rung ni hta kaja wa teng man rap ra ai hte ngwi pyaw sim sa lam jaw ya lu ai hku matsan dum hkat nga mu.

¹⁷Langai hte langai hpe machyi hkra shangun ai lam hkum maw mawn myit. Dagam dala ga hte sakse hkum hkam myit. Ngai gaw masu magaw ai, n teng n man ai hte kashun kashe du daw sai hkaw amu galaw shapraw ai hpe n dawng nngai.”

¹⁸Chyahtum Chyalai N-gun rawng ai dai MADU gaw Zehkaria hpe ndai mungga jaw wu ai:

¹⁹“Shata mali, shata manga, shata sanit hte shata shi hta lusha gam ai gaw kabu gara ai lusha poi tai wa nna, Yuda amyu masha ni a matu kabu pyaw hpa lam tai wa nga ai. Dai re ai majaw nanhte sim sa lam hpe tsaw ra lu na rai myit dai.”

²⁰Chyahtum Chyalai N-gun rawng ai dai MADU gaw, “Mare kahtawng law law hkan na amyu masha ni Yerusalem mare de sa wa na aten du wa nga ai.

²¹Mare langai na masha ni gaw kaga masha ni hpe, ‘Anhte gaw Chyahtum Chyalai N-gun rawng ai dai MADU hpe nawku nna shi a shaman chyeju hpe hpyi ga ai. Anhte hte rau sa wa ga!,” ngu nna tsun na ra ai.

²²Amyu masha ni hte n-gun ja ai amyu baw ni gaw Yerusalem de sa nna Chyahtum Chyalai N-gun rawng ai dai MADU hpe nawku nna shi kaw na shaman chyeju hpyi la na mara ai.

²³Dai nhtoi hte yang, maigan masha marai shi gaw Yuda masha langai hpang de sa nna, ‘Karai Kasang gaw nanhte hte rau rai nga ai hpe anhte na saga ai majaw nanhte hte rau anhte rau hkawm sa mayu ga ai,” ngu nna tsun na mara ai.