Read Jinghpaw Common Language Bible 2009 ZEHKARIA 9 Bible Online

ZEHKARIA 9 - Jinghpaw Common Language Bible 2009 bible

ZEHKARIA 9

¹Ndai gaw dai MADU a mungga rai nga ai: Shi gaw Hadrak mung hte Damasku mare hpe ari jaw na matu daw dan nu ai. Israela amyu bawsang ni sha n rai, Suri mung a mare daju hpe mung dai MADU madu da nga ai.

²Hadrak mung a lamu ga jarit hta nga ai Hamat hte kung kyang ai hpaji rawng ai Turu hte Sidon mare ni mung shi hte seng nga ai.

³Turu gaw shi a matu ngang ai hpyen dap ni hpe gap da nna, ja gumhpraw law law hpe ga nhpu zawn sumpum tawn ma ai!

⁴Rai ti mung, dai Madu gaw shi lu ai arai magup la kau ya nna, shi a sut gan panglai kata de kabai bang kau ya na ra ai; dai mare mung ga de du hkra hkru mat ai hte dap sumpum tai mat na ra ai.

⁵Ashkelon mare gaw shing re ai hpe mu nna hkrit mat na mara ai. Gaza mare mung dai hpe mu nna, nni nkri kaba hkrum sha na ra ai. Dai rai nna Ekron mare hte shi a myit mada ai lam ni kamawng mat na ra ai. Gaza mare gaw shi a hkawhkam mat mat nhtawm Ashkelon mare gaw katsi katsang kau da ai hkrum na ra ai.

⁶Ashdod mare hta mung kayau kaya re ai masha amyu baw ni shanu nga na mara ai. Dai MADU gaw, “Ndai gumrawng gumtawng ai Hpilisti masha ni yawng hpe ngai shagrit kau na we ai.

⁷Shanhte gaw sai rawng ai shan lusha galoi mung sha lu na ma ai n rai, kaga hkum pat da ai lusha mung sha lu na n rai. Naw hkrung nga ai ni gaw nye a amyu masha daw chyen mi tai wa nhtawm Yuda amyu bawsang na amyu lakung langai zawn tai na mara ai. Ekron chyawm gaw Yebusi masha ni zawn nye a amyu masha daw chyen mi tai na mara ai.

⁸Nye a mungdan hpe ngai makawp maga na nngai, dai lamu ga hku hpyen hpung ni ga lai lu na ma ai n rai. Nye a amyu masha ni hpe dip gamyet sha na matu gumshem magam ni hpe galoi mung ahkang jaw na nngai n rai. Nye a amyu masha ni kade wa nni nkri hkrum sha nga masai hpe ngai mu se ai,” ngu nna tsun ai.

⁹Ziun amyu masha ni e, kabu gara nga mu, kabu gara nga mu! Yerusalem amyu masha ni e, kabu gara jahtau garu nga mu! Yu mu, nanhte a hkawhkam wa gaw nanhte hpang de sa wa nga ai! Shi gaw padang ninglaw hte awng dang ai lam lu la nga ai, rai ti mung shagrit shanem ai myit hte lawze ntsa e jawn nga ai- lawze kasha langai a ntsa e, lawze kanu a kasha a ntsa e jawn nga ai.

¹⁰Dai MADU gaw, “Hpyen leng ni hpe Israela kaw na la kau nhtawm Yerusalem na gumra ni hpe seng kau na nngai; majan hta lang ai ndan ni hpe jahten kau na nngai. Nanhte a hkawhkam wa gaw masha amyu baw ni a lapran e ngwi pyaw sim sa shangun nna, shi gaw panglai kaw nna panglai du hkra, Uhprat hka nu kaw nna ginding aga a jahtum du hkra up na ra ai,” ngu nna tsun ai.

¹¹Dai MADU gaw, “Nanhte tawn da ai nye a ga shaka ngu ai dazik dawk da ai shagu hkungga ni a asai a majaw, Ngai gaw na a amyu masha ni hpe bawng dung hkrum ai ni hpe hka n rawng ai nhkun kaw nna shalawt dat na nngai.

¹²Ya aten myit mada shara nga sai bawng dung masha ni e, nhtang wa marit; shim lum ai nanhte a shara de nhtang wa marit. Ya chyawm gaw, ngai nanhte hpe tsun made ga, nanhte hkrum sha manit dai nni nkri yawng a matu chyeju htam lahkawng bai htang jaw na made ai.

¹³Ngai gaw Yuda hpe hpyenla langai a ndan zawn, Israela hpe pala ni zawn lang na nngai. Ngai gaw Ziun masha ni hpe nhtu zawn lang nna Grik masha ni hpe gasat na nngai.”

¹⁴Dai MADU gaw shi a amyu masha ni a ntsa e dan pru nna; shi gaw shi a pala ni hpe myihprap gala ai zawn gap dat na ra ai. Tsaw Htum ai dai MADU gaw pahtau dum dat na ra ai; shi gaw dingda maga de na nbung laru hta hkawm sa wa na ra ai.

¹⁵Chyahtum Chyalai N-gun rawng ai dai MADU gaw shi a amyu masha ni hpe makawp maga na ra ai, shanhte gaw gumlau hpyen ni hpe jahten kau na mara ai. Shanhte gaw majan pa e chyaru nang ai wa zawn jahtau garu nna, shanhte a gumlau hpyen ni a asai jahkaw kau ya na mara ai; dai gaw tawn hkungri ntsa e nga ai jarung kaw na ru hkaw dat ai shagu hkungga asai zawn lwi hkrat wa na ra ai.

¹⁶Dai nhtoi du jang, MADU gaw shi a amyu masha ni hpe, sagu rem wa gaw sagu hpung hpe hkrithpa shara kaw na hkye la ai zawn hkye la na ra ai. Shanhte gaw shi a mungdan hta lung seng janmau zawn htoi tu na mara ai.

¹⁷Dai mungdan gaw kade sha mai kaja nna tsawm htap nga na rai a hka! Shabrang ni mung dai mung na nsi naisi hte sabyi ntsin a majaw n-gun ja nna kaba wa na mara ai.