Read Jinghpaw Common Language Bible 2009 MALAHKI LAIKA 1 Bible Online

MALAHKI LAIKA 1 - Jinghpaw Common Language Bible 2009 bible

MALAHKI LAIKA 1

¹Ndai gaw Israela amyu masha ni hpe htawn tsun dan na matu, dai MADU Malahki hpe jaw ya ai mungga rai nga ai.

²Dai MADU gaw shi a amyu masha ni hpe, “Ngai nanhte hpe tut nawng tsaw ra nga ni ai,” ngu nna tsun wu ai. Rai ti mung, shanhte gaw, “Anhte hpe na a tsaw ra myit gara hku madun yu nit ni?,” ngu nna bai htang tsun ma ai. Dai MADU gaw, “Esaw yan Yaku gaw kahpu kanau yan rai ma ai, rai ti mung ngai gaw Yaku hte shi a matu mara ni hpe mahtang tsaw ra ni ai.

³Esaw hte shi a matu mara ni hpe chyawm gaw n dawng nngai. Ngai gaw Esaw nga ai bum ga hpe katsi katsang shara shatai kau nna, dai lamu ga hpe nam gwi ni a lata de tawn kau da ya ni ai,” ngu nna htan wu ai.

⁴Esaw a matu mara Edom masha ni gaw, “Anhte a kahtawng ni jahten sharun kau hkrum sai, rai ti mung dai ni hpe anhte bai gaw gap na ga ai,” ngu nna lama tsun ai rai yang, dai MADU gaw, “Shanhte bai de da mu ga-dai ni hpe ngai bai run kau ya na we ai. Amyu masha ni gaw shanhte hpe, ‘Dai n hkru ai mungdan’ hte ‘Dai MADU tut nawng pawt nga ai amyu,’” ngu nna shaga na ra ai.

⁵Dai Israela amyu masha ni gaw shanhte a myi ni hte nan dai lam mu na mara ai, shanhte gaw, “Dai MADU gaw Israela mung a shinggan de du hkra pyi chyalai n-gun rawng nga ai!,” ngu nna tsun na mara ai.

⁶Chyahtum Chyalai N-gun rawng ai dai MADU gaw hkinjawng ni hpe, “Kasha gaw shi a kawa hpe shagrau hkungga ai; shangun ma wa gaw shi a madu hpe shagrau hkungga nga ai. Ngai gaw na a nwa rai nga nngai-hpa majaw nang ngai hpe n shagrau hkungga a ni? Ngai gaw na a madu rai nga nngai-hpa majaw nang ngai hpe n hkungga a ni? Nang gaw ngai hpe n kaw n law di nga ndai, shing rai tim, nang gaw, “Anhte nang hpe kaning rai n kaw n law di kau saga ta?,” nga nna san myit dai.

⁷Dai gaw nye a tawn hkungri ntsa hta manu n dan ai lusha hkungga nawng ya ai hku rai myit dai. Nanhte gaw, ‘Anhte nang hpe hkungga na kaning rai hprai kau saga ta?,’ nga nna san myit dai. Nye a tawn hkungri hpe n sawn n sang di ai hpe madun ai hku ngai nanhte hpe tsun dan na made ai.

⁸Ngai hpe shagu hkungga nawng ya na nga, myi kyaw ai, shing n rai machyi ai shing n rai lagaw hten ai dusat langai nanhte la sa myit dai shaloi, dai gaw ra rawng ai lam hpa mung n nga ai ngu nanhte myit nawn da myit ni? Dai zawn re ai dusat, mungdu wa hpe jaw chyam yu mu! Shi nanhte hpe ra sharawng ai hte myi man tau ya na rai wu ni?

⁹Ya chyawm gaw, hkinjawng ni e, Karai Kasang anhte hta mai kaja nga na matu hpyi shakut mu. Shi gaw nanhte a akyu hpyi ga hpe htan ya na n rai. Dai gaw nanhte a shut ai lam tai na ra ai.

¹⁰Chyahtum Chyalai N-gun rawng ai dai MADU gaw, “Nye a tawn hkungri ntsa e akyu n rawng ai wan n sa shachyi lu myit ga, nanhte hta na marai langai ngai Nawku Htingnu chyinghka ni hpe la kau wu ga, ngai ra sharawng nga nngai. Ngai nanhte hpe n ra nngai; nanhte ngai hpang de la sa ai shagu hkungga ni hpe ngai hkap la na n rai.

¹¹Mungkan a jahtum shara mi kaw nna kaga shara mi de du hkra nga ai masha ni ngai hpe shagrau sha-a ma ai. Shanhte gaw ngai hpe manam pyaw ai baw hpe shara shagu hkan nat ai hte hkam la mai ai shagu hkungga ni nawng ya ma ai. Shanhte yawng gaw ngai hpe shagrau sha-a nga ma hka!

¹²Rai ti mung, nanhte mahtang nye a tawn hkungri gaw hpa manu n dan ai nga nna nanhte tsun ai hte nanhte n sawn n sang di ai lusha hpe de a ntsa e nawng ya let ngai hpe kaya jahkrum myit dai.

¹³Nanhte gaw, ‘Ndai lam yawng mayawng a majaw anhte kade sha hki ba saga a hka!,’ ngu nna tsun let ngai hpe ladi sharawt dan myit dai. Lagu la ai, shing n rai lagaw hten ai, shing n rai machyi ai dusat langai ngai nanhte la sa nna ngai hpe nawng ya myit yang, nanhte kaw na dai hpe ngai hkap la na re ngu, myit nawn da myit ni?

¹⁴Ngai hpe jaw ya na nga, ga sadi tawn da sai dai kaja ai dusat langai shi a yam nga hpung hta rawng nga ninglen, ngai hpe dai ra rawng ai dusat hpe masu hkalem nawng jau ya ai wa gaw dagam dala hkrum nga ai. Ngai gaw galu kaba ai hkawhkam rai nga nngai, masha amyu baw ni yawng a masha ni ngai hpe hkrit kamyin nga ma ai.”