Read Jinghpaw Common Language Bible 2009 MAHTE 11 Bible Online

MAHTE 11 - Jinghpaw Common Language Bible 2009 bible

MAHTE 11

¹Ya, Yesu gaw shi a sape shi lahkawng hte hpe hkang da ngut yang, ni nawn ai mare kahtawng ni hta sharin shaga nna, mungga hkaw dan na matu, shi dai shara kaw na pru sa wa ai.

²Hkristu galaw dat ai amu bungli a lam ni hpe Yawhan gaw htawng hta e na wu yang, shi a sape nkau mi hpe shi hpang de shangun dat nna,

³“Nang gaw dai du sa na ra ai wa rai nga nni? shing n rai kaga langai ngai hpe anhte naw myit mada lu na rai nga a ni?,” ngu nna shi hpe san dat wu ai.

⁴Yesu htan let shanhte hpe tsun dat mu ai gaw, “Na mana, mu mamu hte maren wa nna Yawhan hpe tsun dan mu:

⁵Myi kyaw ai ni myi mu lu ma ai, lagaw hten ai ni hkawm sa lu ma ai, manggang kap ai ni san pra wa lu ma ai, na lahpang ai ni na lu ma ai, si mat ai ni sharawt la ai hkrum ma ai, matsan mayan ni a matu Kabu Gara Shiga hkaw dan nga ai.

⁶Ngai hta myit kataw ai lam n mu ai wa kadai mung, a lu nga ai,” ngu mu ai.

⁷Ya, shanhte wa mat ai hpang, Yesu gaw Yawhan a lam hte lakap nna shawa masha ni hpe tsun mu ai gaw, “Nanhte dai nam mali de Yawhan kaw sa ai shaloi, nanhte hpa hpe mu la na myit mada nna sa myit ta? Mani tsawm ai bu hpun palawng bu hpun ai wa hpe rai ni? Nbung e kanga ai mai-aw hpe rai ni?

⁸Mani tsawm ai bu hpun palawng bu hpun ai ni gaw Hkawhkam htingnu hta nga ma ai.

⁹Dai n rai yang gaw, hpa sa yu na pru sa myit ta? Myihtoi langai ngai hpe sa yu na matu rai ni? Rai sa; nanhte gaw myihtoi hta grau kaba ai wa hpe mu lu manit dai.

¹⁰Hpa majaw nga yang, chyum laika hta: ‘Karai Kasang gaw, na a man e, na lam lajang magang na, nye a kasa hpe na a shawng de ngai shangun dat na we ai,’ nga nna tsun ai lam ka da nga ai.

¹¹Nanhte hpe ngai teng teng tsun made ai gaw, numsha kaw na shangai shaprat da sai shinggyim masha ni hta Hkalup Sara Yawhan hta grau kaba ai masha langai mi mung garai n paw pru yu ai, rai ti mung, Sumsing lamu a Mungdan hta kaji dik ai wa gaw, shi hta grau kaba nga ai.

¹²Hkalup Sara Yawhan hkaw tsun hpang ai ten kaw nna, ya ndai shani du hkra, sumsing lamu a Mungdan gaw kashun kashe dang lu n-gun lang ai ni gaw dai mungdan hpe kashun shing nyen la na matu shakut nga ma ai.

¹³Yawhan paw pru ai aten ladaw du hkra, myihtoi ni yawng hte Mawshe a Tara gaw dai mungdan a lam tsun shana lai wa masai.

¹⁴Shanhte a mungga hpe nanhte madat la nna kam sham mayu myit yang gaw, ndai Yawhan gaw du sa na ra ai ngu nna tau tsun tawn ai Elia nan rai nga ai.

¹⁵Na tu ai wa gaw na la u ga!

¹⁶Ya, ndai prat na amyu hpe ngai hpa hte shadawn lu na mawe ta? shanhte gaw,

¹⁷‘Anhte nanhte a matu hkungran poi hte seng ai sumpyi dum timung, nanhte n ka myit dai! Makoi mayang ai poi hte seng ai yawn hkyen mahkawn ni mahkawn ti mung nanhte n hkrap myit dai!,’ nga nna gat hkan e dung nga let hpung mi gaw hpung mi hpe marawn gintan hkat nga ai ma ni hte bung nga ma ai.

¹⁸Yawhan du sa nna lu sha gam let sabyi n lu ai sha nga ai shaloi, ‘Shi nat kap ai wa rai nga ai,’ nga nna masha shagu tsun ma ai.

¹⁹Dai Masha Kasha du sa nna, lu let sha let nga ai shaloi, ‘Yu mu ndai wa gaw, sha marim ai wa, sabyi lu shalai ai wa, kang hta ai ni hte yubak kap ai ni a jinghku wa rai nga ai,’ nga nna bai tsun ma ai. Rai ti mung, Karai Kasang a hpaji byeng-ya chyawm gaw teng man nga ai lam hpe, dai hpaji ni a majaw byin wa ai akyu ni e sakse hkam ya nga ma ai,” ngu mu ai.

²⁰Mauhpa lamik kumla ni law malawng galaw dan sai mare ni, shanhte a yubak mara kaw na myit malai n lu ma ai majaw, dai mare ni hpe ning ngu daru kau mu ai.

²¹“O, Kurazin e, nang dingnye lu ndai! O, Betsaida e, nang dingnye lu ndai! Hpa majaw nga yang, nan hta dan ai mauhpa magam bungli ni hpe Turu hte Sidon mare yan hta dan yu taw gaw moi moi me lachyit nba hpun, dap hta galwi rai nna myit malai lu boi na masai.

²²Dai majaw, nan hpe ngai tsun nngai gaw, dai tara dara ai nhtoi hta e, Turu hte Sidon yan gaw, nan hta naw chyamai na mara ai.

²³Nang mung Kurazin e, lamu du hkra shagrau sharawt ai hkam la lu na ra ai ngu nna nawn da wu ni? Katsan ga du hkra jahkrat kau ai nang hkrum na rin dai. Hpa majaw nga yang, nang hta dan ai mauhpa magam bungli ni hpe, Sodom hta e shabyin taw gaw, dai mare gaw dai ni du hkra naw agrin nga na rai nga ai.

²⁴Dai majaw ngai nanhte hpe tsun made ai gaw, tara dara ai nhtoi hta e, Sodom mung gaw, nang hta naw chyamai na ra ai.

²⁵Dai aten hta Yesu gaw, Sumsing Lamu Mungdan hte ginding aga a Madu Wa e, hpaji byeng-ya rawng ai ni hte myit kung hpan ai ni hpe n chye shangun hkra makoi magap da nhtawm, hpaji kata ai ni hpe madun dan ndai majaw, ngai nang hpe shakawn kungdawn nngai.

²⁶Rai sa, Wa e, ndai hku byin ai lam gaw, na a myit ra ai lam hte maren rai nga lit dai.

²⁷Nye Wa gaw arai yawng mayawng ngai hpe ap ya ni ai; Wa hta kaga, dai Kasha hpe kadai mung n chye lu ai: dai Kasha hte, dai Kasha shadan dan mayu ai ni hta kaga kadai n chye lu ai.

²⁸Lit li gun nna hki ba la ai ni yawng hte e, ngai kaw wa marit; ngai nanhte hpe ban sa shangun na made ai.

²⁹Ngai gaw myit sumnung ai hte myit gyip nga nngai rai nna, nye a kandang hpe hpai mu, nye a lam sharin la mu: dai rai yang, nanhte a myit masin ban sa ai hkrum na malit dai.

³⁰Hpa majaw nga yang, nye a kandang hpai loi ai hte, nye a lit mung tsang nga li ai, ngu mu ai.