Read Jinghpaw Common Language Bible 2009 MAHTE 13 Bible Online

MAHTE 13 - Jinghpaw Common Language Bible 2009 bible

MAHTE 13

¹Dai shani jang, Yesu gaw dai nta na pru nhtawm, sharin shaga na matu nawng makau e sa dung nga ai.

²Shi hpang de zuphpawng sa wa ai shawa masha wunawng wuwa nau law wa ai majaw, li langai mi hta shi shang dung nga ai rai nna, shawa masha ni mahkra gaw hkin-gau hta e tsap nga ma ai.

³Shaloi, lam law law hpe ga shadawn ni hte shi shanhte hpe tsun mu ai gaw, “Kalang mi na masha langai mi gaw, nli gat na matu pru sa wa ai.

⁴Nli hpe shi gat dat wu yang, nkau mi gaw lam makau e hkrat nna, u ni dai hpe hta sha kau mu ai.

⁵Nkau mi gaw ga n law ai lungrawk hta e hkrat wa ai: ga n htat ai majaw ya jang tu pru wa ti mung,

⁶jan pru nna katen jang krau mat wa ai rai nna, ru n jung lu ai majaw hkraw mat wa ai.

⁷Nli tum nkau mi gaw, ju hpun nhpang e hkrat nna, ju hpun ni tu kaba wa ai hte, dai hpe lim kau mu ai.

⁸Rai ti mung nkau mi gaw ga kaja hta hkrat wa nna, asi si wa ai; nkau mi dang latsa, nkau mi kru shi, nkau mi sumshi mayat wa ai.”

⁹“Na tu ai wa gaw na la u ga!,” nga nna ga hpungdim wu ai.

¹⁰Shaloi sape ni shi kaw sit sa wa nna, “Madu e, nang masha ni hpe ga shaga ai shaloi, hpa majaw ga shadawn ni lang nna tsun shaga n ta?,” ngu nna shi hpe san mu ai.

¹¹Yesu gaw, “Sumsing Lamu a Mungdan a makoi magap da ai sung htum ai lam ni hpe chye lu na ahkang nanhte hpe jaw da sai; rai ti mung kaga ni gaw dai ahkang n lu ma ai.

¹²Hpa majaw nga yang, lu ai wa kadai hpe mung naw jat jaw na rai nna, shi hta law htam wa na rai nga ai; rai ti mung n lu ai wa kaw na chyawm gaw shi lu ai kachyi mi hpe pyi naw la kau ya na ra ai.

¹³Shanhte hpe ga shadawn hku ngai hpa majaw tsun ra a ta? nga yang, shanhte yu ti mung n mu ma ai; madat ti mung n na ma ai; shing n rai n chye na ma ai.

¹⁴Shing rai myihtoi Esaia shanhte hpe sha-ang lakap nna tsun ai myihtoi ga gaw: ‘Ndai masha ni na lana n chye na na mu ai; yu layu e n mu na mu ai.

¹⁵Hpa majaw nga yang, shanhte a myit masin ni ayup akup rai nga nna, shanhte a na ni hpe pat kau nhtawm, myi ni hpe myi di tawn ma ai. Dai n rai taw gaw, shanhte a myi ni mu lu nna, shanhte a na ni na lu na hte, shanhte a myit masin ni mung chye na wa ai rai yang gaw, shanhte ngai hta kam hpa nna, shingbyi wa na mara ai. Ngai mung shanhte hpe shamai ya na mawe ai,’ nga nna Karai Kasang tsun ai hpe Esaia htawn tsun ai ga dik wa sai,” ngu mu ai.

¹⁶“Nanhte a myi mu lu nna, nanhte a na na lu nga malit dai majaw a lu myit dai.

¹⁷Nanhte hpe ngai teng teng tsun made ga, nanhte mu lu ai arai ni hpe myihtoi ni law law hte ding hpring ai masha ni law law wa grai mu mayu ma ti mung, n mu ma ai; nanhte na lu ai lam ni hpe mung, na mayu ti mung n na lu ma ai.

¹⁸“Dai rai nna, nli gat ai ga shadawn a lachyum hpe madat la mu.

¹⁹Dai mungdan a lam na la ai ni kadai rai ti mung, dai hpe n chye na ai ni gaw, lam makau e hkrat ai nli tum hte bung ma ai. N hkru ai wa sa du nna shanhte hta gat bang tawn ai nli tum hpe shaw la kau ya wu ai rai nga ai.

²⁰Lungrawk hta gat ai nli tum gaw, dai mungga hpe na nna, shaloi jang kabu gara ai myit hte hta la wu ai.

²¹Rai ti mung kraw hta e ru sung sung n jung ai majaw, shanhte na na n grin ma ai. Shing rai dai mungga a majaw ru tsang ai hte zingri zingrat hkrum jang kalang ta htak mat ai ni hte bung nga ai.

²²Ju hpun hta hkrat ai nli tum ni gaw, dai ga hpe na la ti mung, ndai prat na myit tsang ai hte sut gan marin myit gaw, dai mungga hpe lim kau nna asi n si lu ai hte bung nga ma ai.

²³Ga kaja hta gat ai nli tum ni chyawm gaw, dai mungga hpe na la nna, chye na hkap la ai ni hpe ngu ai rai nga ai. Shanhte gaw kaja wa teng teng asi si nna, nkau mi dang latsa, nkau mi kru shi, nkau mi sumshi jat wa ai hpe ngu ai rai nga ai,” ngu mu ai.

²⁴Ga shadawn kaga mung, shi shanhte hpe tsun mu ai gaw; “Sumsing Lamu a Mungdan gaw hkauna hta nli kaja gat ai wa hte bung nga ai.

²⁵Lana mi hta, masha ni yup nga yang, gumlau wa gaw sa nna, dai mam hta e tsing gat bang da nhtawm pru mat wa ai.

²⁶Ya dai mam tu wa nna asi si jang, tsing mung dan pru wa ai.

²⁷Shaloi nta madu wa a mayam ni sa du nna, ‘Madu e, na a hkauna hta nli kaja nang gat nit dai n rai ni? Dai rai yang, tsing ni kanang na du sa wa ma ta?,’ ngu mu ai.

²⁸Shi gaw, ‘Gumlau wa dai hpe galaw nu ai,’ ngu nna shanhte hpe tsun mu ai. Dai rai nna shanhte gaw, ‘Anhte sa nna dai hpe magang kau na nang hkraw nga n ni?,’ shi hpe ngu mu ai.

²⁹Shi mahtang, ‘N rai,’ nanhte tsing baw kau myit yang gaw, mam nkau mi hpe tsing hte rau baw shalawm kau na myit dai.

³⁰Dai majaw, dai lahkawng yan nmut ta du hkra, rau tu kaba wa mu ga; nmut ta du jang, tsing hpe shawng dan mahkawng nna, nhtan nhtawm wan hta nat kau mu; dai mam hpe chyawm gaw, nye a dum hta e mahkawng da mu, ngu nna mam dan ai ni hpe ngai tsun na mawe ai,’” ngu mu ai.

³¹Ga shadawn kaga mung Yesu shanhte hpe kahtap tsun mu ai gaw, “Sumsing Lamu a Mungdan gaw, masha langai mi e la nna shi a yi hta hkai ai chyinghkrang tum hte bung nga ai.

³²Dai gaw tum baw shagu hta kaji htum rai nga ti mung, kaba wa jang kaga hpun bawng ni hta grau kaba wa lu ai rai nna, hpun tai wa ai hte ntsa malen u ni mung, de a lakung lakying ni hta utsip tsip lu ma ai,” ngu mu ai.

³³Ga shadawn kaga mung shi shanhte hpe naw tsun mu ai gaw, “Sumsing Lamu a Mungdan gaw numsha langai mi matsi loi mi la nna muk shadung dang mi hta bang dat wu yang, mahkra hte hpe shawawm dat lu ai hte bung nga ai,” ngu mu ai.

³⁴Yesu gaw shawa masha ni hpe ndai lam mahkra ga shadawn hku tsun dan mu ai. Ga shadawn hte n rai yang shi shanhte hpe hpa mung n tsun dan ga ai.

³⁵Ndai hkaw tsun ai lam gaw, “Nye a n-gup ga shadawn hte ngai hpaw nna, Ginding aga nnan lat kaw nna makoi da ai ga hpe ngai htai dan na nngai,” nga nna Esaia tsun ai myihtoi ga dik wa na matu rai nga ai.

³⁶Dai hpang Yesu gaw shawa masha ni kaw na pru mat wa nna nta hta e shang mat wa ai. Shaloi shi a sape ni shi kaw sit sa wa nna, “Hkauna hta e tu ai tsing ga shadawn a lam, anhte hpe htai dan mi,” ngu mu ai.

³⁷Yesu gaw, “Nli kaja gat ai wa gaw, dai Masha Kasha rai nga ai.

³⁸Hkauna gaw mungkan ga rai nga ai. Kaja ai nli gaw Karai Kasang a Mungdan a kashu kasha ni rai nga ma ai; Tsing gaw dai n hkru ai wa a kashu kasha ni rai nga ma ai.

³⁹Dai hpe gat ai gumlau wa gaw, nat rai nga ai; nmut ta gaw lamu ga htum na aten rai nga ai, mam dan ai ni gaw, lamu kasa ni rai nga ma ai.

⁴⁰Dai tsing ni hpe lahkawn shinggyin la nna wan hta nat kau ai zawn, lamu ga aprat htum ai shani hta e byin na ra ai.

⁴¹Dai Masha Kasha gaw, shi a lamu kasa ni hpe shangun dat na rai nna shanhte gaw shi a mungdan kata na, masha ni hpe myit kataw shangun ai ni yawng hte, n hkru n shawp ai amu galaw ai ni yawng hte hpe lata shaw la nhtawm,

⁴²wan htung hta kabai bang da na maru ai rai nna, dai yang e hkrap ngu hkrap ngoi ai hte wa udik rai na mara ai.

⁴³Dai shaloi, ding hpring ai ni gaw shanhte a Kawa a Mungdan hta e ajan zawn htoi kabrim na mara ai; na tu ai wa gaw na la u ga.

⁴⁴“Sumsing Lamu a Mungdan gaw, ga dachyawk hta e makoi da nna masha langai mi e mu hkrup ai hte bai makoi da ai sutgan hte bung nga ai. Kabu gara ai myit hte shi wa nhtawm, shi lu malu hte hpe dut kau nna, ga dachyawk dai hpe mari la wu ai.

⁴⁵“Bai, Sumsing Lamu a Mungdan gaw, hpaga la langai mi kaja reng ai hkachyi ni hpe hkan tam nna,

⁴⁶laklai nna kaja reng dik ai hkachyi langai mi hpe mu hkrup jang, shi nhtang wa nhtawm, shi a lu malu hpe dut kau nna dai hkachyi hpe mari la kau ai hte bung nga ai.

⁴⁷“Bai, Sumsing Lamu a Mungdan gaw, nga hkan ai ni nawng hta e kabai bang nna, nga amyu myu hpe magawn la ai sumgawn hte bung nga ai.

⁴⁸Dai sumgawn hta nga hpring chyat hkra lu jang, garawt la mu ai rai nna, dung nga let, kaja ai baw hpe shanhte a mung hta bang da nna n kaja ai baw hpe kabai kau mu ai.

⁴⁹Dai hte maren lamu ga aprat htum ai ten hta mung byin na ra ai. Lamu Kasa ni pru sa nna, ding hpring ai ni a kata na, n hkru ai ni hpe karan da na mu ai rai nna,

⁵⁰shanhte hpe wan htung hta kabai bang kau na maru ai; dai yang e shanhte hkrap ngu hkrap ngoi hte wa udik rai na mara ai.

⁵¹“Ndai lam mahkra hte hpe, nanhte chye da mu ni?,” ngu nna Yesu shanhte hpe san mu yang, shanhte gaw, “Chye nga ga ai,” ngu mu ai.

⁵²Bai shi gaw, “Dai rai nna sumsing lamu a Mungdan hta e sape langai mi tai wa sai tara sara shagu gaw, tinang a sut dek hta na nnan baw mung, dingsa baw mung shapraw ai nta madu wa hte bung nga ai,” ngu nna shanhte hpe htan mu ai.

⁵³Ya Yesu gaw dai ga shadawn ni hpe tsun ngut jang, dai shara kaw na shi pru mat wa ai rai nna,

⁵⁴shi a buga mare de du wa ai. Tara jawng ni hta shi hkaw tsun sharin shaga mu yang, na la ai ni yawng mau mat ai hte, “Ndai wa gaw ning re ai hpaji byeng-ya hte lamik kumla daru magam atsam kanang na lu wu hka!

⁵⁵Shi gaw laksama wa a kasha re ai, n rai ni? Shi a kanu Mari mying ai hte, shi a kanau ni, Yaku, Yosep, Simun hte Yuda rai nga ma ai n rai ni?

⁵⁶Shi a kajan ni yawng mung, anhte hte rau nga nga ma ai, n rai ni? Shing re ai wa she re ai mi, ndai wa gaw ndai nlang hte hpe kanang na lu la wu hka?,” nga nna,

⁵⁷shi a lam myit kataw wa ma ai hte shi hpe n hkap la ma ai. Yesu mahtang, myihtoi gaw tinang a buga hta n rai yang she arawng lu nga ai, ngu nna shanhte hpe tsun mu ai.

⁵⁸Shanhte kam sham ai myit n rawng nga ma ai majaw, dai shara e lamik kumla law law wa shi n galaw nu ai.