Read Jinghpaw Common Language Bible 2009 MAHTE 15 Bible Online

MAHTE 15 - Jinghpaw Common Language Bible 2009 bible

MAHTE 15

¹Dai shaloi e, Yerusalem mare de na Hparishe ni hte tara Sara nkau mi Yesu kaw sa du nna,

²“Na a sape ni gaw hpa majaw anhte a ji wa ni matsun hkrat wa ai ahtung alai ni hpe tawt lai kau nga ma ta? Shanhte gaw lata atsawm sha n kashin ai nan, muk sha ma ai!,” ngu mu ai.

³Shi shanhte hpe htan nna tsun mu ai gaw, “Taw, nanhte wa gaw, hpa majaw Karai Kasang hkang da ai ga matsun hpe tawt kau nna tinang a htung lai ni hpe hkan nga myit ta?

⁴Hpa majaw nga yang, Karai Kasang gaw, ‘Na nwa hte nnu hpe hkungga lara di u; bai tinang a kanu kawa hpe matsa mawa ga tsun ai wa gaw, teng teng si u ga,’ nga nna tsun nga ai.

⁵Rai ti mung, nanhte mahtang gaw, marai langai ngai hta tinang a kanu kawa hpe karum madi shadaw na matu arung arai lama ma lu ti mung, ‘Dai gaw Karai Kasang hpe sak nawng kau ai arai rai mat sai,’ nga nna tsun jang,

⁶dai wa gaw kanu kawa hpe karum madi shadaw n ra mat sai, ngu nna nanhte sharin shaga myit dai. Shing nga nna nanhte gaw tinang a htung lai hkan lu na matu Karai Kasang hkang da ai tara hpe shinggan kau myit dai.

⁷Sawt ai ni e! Nanhte hte seng nna Karai Kasang gaw Esaia a n-gup hku nna,

⁸‘Ndai amyu gaw tinang a nten hte ngai hpe hkungga lara rai ma ti mung, tinang a myit masin gaw ngai hte kaja wa tsan gang nga malu ai.

⁹Shanhte ngai hpe kaman lila nawku da mi ai, hpa majaw nga yang, shanhte gaw masha e galaw la ai ga matsun ni hpe nye a tara ni hpe zawn sharin shaga nga ma ai nga nna tsun ai ga gaw gade teng nga a hka!,’” ngu nna tsun mu ai.

¹⁰Shaloi shawa masha ni hpe shi hpang de shaga la nna tsun mu ai gaw, “Madat mara nna chye na la mu!

¹¹N-gup de shang wa ai arai gaw, masha hpe awu asin di kau lu ai n rai, dai n-gup hta na pru ai mahtang gaw, masha hpe awu asin di kau nga ai,” ngu mu ai.

¹²Shaloi shi a sape ni shi kaw sit sa nna, “Ya tsun ai ga Hparishe ni na jang, shanhte myit na machyi ma ai hpe nang chye nga n ni?,” ngu nna shi hpe san mu ai.

¹³Yesu gaw, “Sumsing lamu e nga ai nye Wa n hkai da ai hpun yawng hte gaw, ru hte nawng baw kau ai hkrum na ra ai.

¹⁴Dai rai nna shanhte a majaw, myit hkum ru nga myit. Shanhte gaw myi kyaw ai wa hpe lam madun ai myi kyaw ai ni rai nga ma ai: myi kyaw ai wa gaw, myi kyaw ai wa hpe lam madun a yang gaw, shan lahkawng gaw nhkun kata de di hkrat na mara ai,” ngu mu ai.

¹⁵Shaloi Petru gaw, “Ndai ga shadawn anhte hpe htai dan mi,” ngu nna htan wu ai.

¹⁶Yesu gaw, “Nanhte ya du hkra masha kaga ni hta jan nna bawnu n zen nga myit dai,

¹⁷N-gup de shang ai arai yawng hte gaw, kan kata du nhtawm, hkum tsan ai shara de kabai kau ai hkrum nga ai hpe, nanhte n chye na myit ni?

¹⁸Rai ti mung, n-gup hta na pru wa ai arai ni mahtang gaw myit masin hta na byin pru wa ai rai nna, dai hte gaw masha hpe awu asin di kau wu ai.

¹⁹Hpa majaw nga yang, myit masin hta na masha sat na, num shaw na, n kaja ai arawn alai lam ni hkan galaw na, lagu na, n teng n man ai sakse hkam na ngu ai n hkru ai myit mang lam ni byin wa ai.

²⁰Dai hte gaw masha hpe awu asin di kau ai lam rai nga ai; lata n kashin ai hte sha ai mahtang gaw, masha hpe awu asin di kau wu ai n rai,” ngu mu ai.

²¹Ya, Yesu gaw dai yang na pru nna, Turu hte Sidon mare ni a makau mayang na ginwang hkan e sa du ma ai.

²²Dai buga shara e nga ai Hkanan amyu numsha langai mi, shi kaw sit sa nna, “Dawi a Kasha Madu e, ngai hpe matsan dum e law; nye a shayi sha nat e zingri nna grai machyi sawng nga ai,” nga nna jahtau let tsun wu ai.

²³Rai ti mung Yesu gaw ga hkaw mi pyi n htan wu ai. Shi a sape ni mung shi kaw sit sa nna, “Shi hpe shabawn kau u; shi anhte a hpang e hkan nang nna marawn jahtau bu nga ai,” ngu nna shadut mu ai.

²⁴Shaloi Yesu gaw, “Israela dap na dam mat wa ai sagu ni a matu sha ngai hpe shangun dat nngai,” ngu wu ai.

²⁵Dai numsha mahtang, sit sa wa nna, shi hpe nawku let, “Madu e, ngai hpe karum la e law,” ngu wu ai.

²⁶Yesu gaw, “Kasha ni a shahpa hpe la nhtawm gwi ni hpe jaw kau na gaw n jaw nga ai,” ngu nna htan wu ai.

²⁷Dai num sha mahtang, “Rai nga ai Madu e, gwi ni gaw tinang a Madu a sha ku hta na hkrat ai ayun ayaw ngam ni hpe sha mai nga ai,” nga ai.

²⁸Dai rai nna Yesu gaw, “Nang gaw kam sham myit kaba ai numsha rai nga ndai! Nang ra sharawng ai hte maren byin wa lit ga,” ngu nna shi hpe htan wu ai. Dai ahkying kaw nna nan, shi a shayi sha mai mat lu ai.

²⁹Bai, Yesu gaw dai shara kaw na pru mat wa nna Galile nawng makau hku hkawm sa wa ai. Dai hpang kawng langai mi a ntsa de lung wa nna dai yang e dung nga ai.

³⁰Shaloi masha wunawng wuwa kaba shi kaw du sa ma ai hte, lagaw hten ai, myi kyaw ai, hkum hkrang hten ai ni, n chye shaga ai hte ana amyu myu kap ai machyi masha kaga law law hpe shanhte lahku sa ma ai rai nna Yesu a lagaw nhpang e shayu tawn da ma ai. Yesu mung shanhte hpe shamai shatsai ya mu ai.

³¹Dai rai nna, n chye shaga ai ni shaga lu ma ai, hkum hkrang hten ai ni mai tsai wa lu ma ai, lagaw hten ai ni hkawm sa lu ma ai hte, myi kyaw ai ni myi mu lu ma ai hpe, shawa masha ni mu ma yang shanhte mau mahka nga ma ai rai nna, Israela Karai Kasang hpe shakawn kungdawn shajang ma ai.

³²Shaloi Yesu gaw shi a sape ni hpe shaga la nna, “Ndai masha hpung ni hpe ngai matsan dum nga nngai: Ya masum ya tup shanhte ngai hte rau nga nga masai rai nna, shahpa mung n nga ma salu ai; lam hkan e hku gwi n hkrum mu ga, kawsi nga ma yang, ngai shanhte hpe n shabawn dat mayu nngai,” ngu mu ai.

³³Sape ni mahtang, “Ndai daram wa law la ai shawa masha ni hpe daw jaw na matu shahpa law hkra ndai nam mali hta e kanang na lu la na ga ta?,” ngu nna shi hpe tsun mu ai.

³⁴Yesu gaw, “Nanhte kaw muk gade wa nga nga a ta?,” ngu nna shanhte hpe san mu ai. Shanhte gaw, “Muk tawng sanit hte nga kaji loi mi nga nga ai,” ngu mu ai.

³⁵Shaloi shawa masha ni hpe ga hta dung nga na, shi hkang da mu ai.

³⁶Dai hpang dai muk sanit hte nga ni hpe shi la nna, Karai Kasang kaw chyeju shakawn ngut jang ahkyep alep di nhtawm sape ni hpe jaw mu ai: sape ni mahtang shawa masha ni hpe gam jaw mu ai.

³⁷Shanhte yawng sha nna hkru kat ma ai. Dai hpang sape ni gaw, ngam ai adaw ahkyep ni hpe lahkawn la ma yang, ka kaba sanit hpring dem rai nga ai.

³⁸Dai sha ai ni gaw, numsha hte ma kaji ni hpe n hti shalawm yang, lasha hkrai hkying mali rai nga ma ai.

³⁹Dai shawa masha ni hpe shi shabawn dat nhtawm, li hta shang nna Magadan ginwang hkan e sa du ai.