Read Jinghpaw Common Language Bible 2009 MAHTE 16 Bible Online

MAHTE 16 - Jinghpaw Common Language Bible 2009 bible

MAHTE 16

¹Shaloi, Hparishe ni hte Saduke ni Yesu kaw sa du nna, shi hpe chyam dinglik yu let, Karai Kasang kaw na shangun dat ai wa re n re ai lam chye lu na matu lamik kumla madun dan mi ga, hpyi ma ai.

²Rai ti mung Yesu gaw, “Shana de jan shang wa ten hta lamu hkyeng yang, ‘lamu san na ra ai, nga nna nanhte tsun ga myit dai.”

³Bai, jahpawt manap jau e lamu hkyeng nna sin nga ai rai yang, ‘Lamu marang wa na ra ai, nga nna nanhte tsun ga myit dai.” Shing rai, lamu a man hpe yu nna lamu marang a lam hpe nanhte chye tau tsun lu myit dai, rai ti mung ndai prat na aten a kumla ni hpe n chye htai ginhka la myit dai.

⁴Ndai prat na masha ni gaw gade wa n hkru n kaja nna karai kata ai masha ni rai nga ma hka! Nanhte gaw ngai kaw lamik kumla langai mi hpyi myit dai; rai ti mung, Yona a lamik kumla hta kaga, hpa lamik kumla mung, nanhte hpe ngai n dan na nme ai,” ngu nna tsun wu ai. Shaloi shi shanhte hpe kau da nna pru mat wa ai.

⁵Ya sape ni gaw nawng wora hkran de rap du yang, muk la gun na hpe malap kau ma ai.

⁶Shaloi Yesu gaw, “Hparishe ni hte Saduke ni a matsi hpe sadi maja let koi gam nga mu,” ngu nna tsun mu ai.

⁷Sape ni mahtang, “Anhte muk n gun nga ga ai majaw, shi ning nga nna tsun ai rai na re,” nga nna shada da tsun nga ma ai.

⁸Shing nga tsun nga ai hpe Yesu chye wu ai rai nna, “Ai n kam ai ni e, nanhte muk n gun ai lam hpe nanhte shada da hpa rai tsun bawng nga myit ta?

⁹Nanhte garai n chye na nga myit ni? Ngai muk manga hpe garan nna masha hkying manga hpe daw ai shaloi, nanhte ka gade naw lahkawn la lu ai hpe nanhte n dum da mu ni?

¹⁰Masha hkying mali dai muk sanit hpe sha lu nna, nanhte ka gade naw lahkawn la lu ai hpe nanhte n sawn yu ai hte n dum da mu ni?

¹¹Muk a lam ngai nanhte hpe n tsun nga nngai gaw, nanhte hpa rai n dum nga myit ta? Hparishe ni hte Saduke ni a matsi hpe nanhte dai koi gam nga mu! ngu nna she ngai tsun made ai,” ngu mu ai.

¹²Dai shaloi sape ni gaw, muk hta bang ai baw matsi hpe tsun ai n rai, Hparishe ni hte Saduke ni a sharin shaga ai lam koi gam na she, shi tsun nga ai hpe, shanhte chye na ma ai.

¹³Ya, Yesu gaw Kesare Hpilip mare a ginwang hkan e du wa yang, “Dai Masha Kasha hpe, masha ni kadai wa rai nga ai, nga nga ma ta?,” ngu nna shi a sape ni hpe san mu ai.

¹⁴Shanhte gaw, “Nkau mi, Hkalup Sara Yawhan; kaga ni gaw, Elia; bai kaga ni gaw, Yeremia; shing n rai myihtoi langai ngai re ai, nga ma ai,” ngu mu ai.

¹⁵Bai shi gaw, “Nanhte mahtang ngai hpe kadai wa rai nga ai, nga nga myit ta?,” ngu wu ai.

¹⁶Simun Petru gaw htan nna, “Nang gaw Meshia ngu ai ahkrung nga ai Karai Kasang a Kasha rai nga ndai,” ngu wu ai.

¹⁷Dai rai nna Yesu gaw, “Yawhan a kasha Simun e, nang a lu ndai; ndai lam hpe yu maya masha langai mi hku nna nang n chye lu ndai; Sumsing lamu e nga ai nye Wa gaw dai hpe madun dan da ndai.

¹⁸Bai, nang hpe ngai tsun de ga, lunghkrung ngu ai lachyum pru ai Petru rai nga ndai hte dai lunghkrung ngu ai npawt nhpang ntsa e nye a hpung hpe ngai de da na we ai rai nna, si hkrung si htan pyi gaw dai hpe dang kau lu na n rai.

¹⁹Sumsing lamu na mungdan a sumsaw ni ngai nang hpe ap ya na de ai rai nna, dinghta ga hta nang jep hkum da mada gaw, sumsing lamu hta mung Karai Kasang gaw jep hkum da na ra ai. Ga ntsa e nang ahkang jaw majaw gaw, sumsing lamu hta e mung ahkang jaw na ra ai,” ngu nna shi hpe htan wu ai.

²⁰Dai hpang Yesu gaw shi Meshia rai nga ai lam, kadai hpe mung n tsun dan mu ga, sape ni hpe ginhtim da mu ai.

²¹Dai aten kaw nna Yesu gaw, sape ni hpe tsun dan magang mu ai gaw, “Ngai Yerusalem mare de sa nna agyi salang ni, hkinjawng agyi ni hte tara sara ni a lata hta e nni nkri law law hkrum nna, sat kau ai hkrum nhtawm, masum ya nhtoi hta ngai bai sharawt la ai hkrum na ring ngai,” ngu mu ai.

²²Dai rai nna Petru gaw, Yesu hpe shaga la nna, “Dai nang hta n byin u ga,” ngu nna shi hpe jet kau wu ai.

²³Yesu mahtang kayin nna Petru hpe, “Satan e, ngai kaw na sit mat wa u! Nang myit ai lam gaw, Karai Kasang kaw na n rai, masha kaw na sha nang myit nga ndai majaw, nye a matu myit kataw shara nang rai nga ndai,” ngu nna tsun wu ai.

²⁴Dai hpang Yesu gaw sape ni hpe, “Ngai hpang de sa wa mayu ai wa kadai rai ti mung, tinang hkum hpe nyet kau lu na rai nna, shi a wudang hpai let, ngai kaw hkan nang ru ga,

²⁵Tinang a asak hpe hkye la mayu ai wa kadai mung, dai sum mat na lu ai; nye a jaw e tinang a asak sum mat ai wa gaw, dai hpe lu la na ru ai.

²⁶Bai, masha gaw mungkan ting hpe awm dawm madu lu da nna tinang a asak sum mat a yang gaw, shi a matu hpa akyu nga lu ta? Masha gaw, hpa gawng malai hkungga hte wa tinang a asak hpe shaw la lu na a ta?

²⁷Hpa majaw nga yang, dai Masha Kasha gaw Kawa a hpung shingkang hte shi a lamu kasa ni hte nawng, du na ra ai; dai shaloi e, tinang galaw ai hte maren langai hte langai hpe htang na ra ai.

²⁸Ngai nanhte hpe teng teng tsun made ga, nang e tsap nga ai ni nkau mi, dai Masha Kasha gaw Hkawhkam hku du sa wa ai hpe garai n mu mu gaw, si ai n hkrum na ma ai,” ngu mu ai.