Read Jinghpaw Common Language Bible 2009 MAHTE 17 Bible Online

MAHTE 17 - Jinghpaw Common Language Bible 2009 bible

MAHTE 17

¹Ya kru ya na jang, Yesu gaw Petru, Yaku hte shi a kanau Yawhan hte hpe shaga la nhtawm, tsaw ai bum ntsa e kaga lak shanhte hpe woi lung mu ai.

²Shaloi, shanhte a man e shi a ahpraw nsam galai mat wa ai hte, shi a myi man gaw, jan zawn htoi kabrim wa nna, shi a hpun palawng ni nhtoi zawn hpraw tu wa lu ai.

³Dai hpang sape ni marai masum gaw, Mawshe yan Elia dan pru nna Yesu hte rau ga tsun nga ai hpe mu ma ai.

⁴Dai shaloi Petru gaw, “Madu e, ndai yang e anhte nga na mai nga ai! Nang hkraw n yang gaw, ndai kaw sum masum - na a matu langai mi, Mawshe a matu langai mi, Elia a matu langai mi, ngai gap na nngai,” ngu nna tsun wu ai.

⁵Petru ga naw shaga nga yang, htoi tu ai sumwi gaw shanhte a ntsa e ka-up mu ai hte dai sumwi hta na nsen ngoi pru nna, “Ndai wa gaw ngai sharawng awng ai, ngai tsaw ra ai ngai sha rai nga ai; shi a ga madat mara mu,” nga ai.

⁶Sape ni dai hpe na jang, shanhte nachying hkrit gari mat nna, shanhte a myi man ga de dagup nga ma ai.

⁷Shaloi Yesu wa nna shanhte hpe ahtawk let, “Rawt mu, hkum hkrit nga myit,” ngu wu ai.

⁸Shing rai shanhte sharawt mada yu mu yang, Yesu hta kaga, kadai hpe mung n mu manu ai.

⁹Ya dai bum na shanhte yu wa ma yang, Yesu gaw, “Dai Masha Kasha si ai ni kaw na sharawt la ai garai n hkrum hkrum gaw, ndai nanhte mu lu ai shingran hpe, kadai hpe mung hkum tsun dan myit,” ngu nna shanhte hpe hkang dat mu ai.

¹⁰Shaloi shi a sape ni gaw, “Dai rai yang gaw, ‘Elia shawng sa du na ra ai,’ nga nna tara sara ni hpa majaw tsun nga ma ta?,” ngu nna shi hpe san mu ai.

¹¹Shi htan nna, “Elia gaw kaja wa shawng numshawn du sa nna, yawng mayawng hte hpe lajang shajin da lu na ra ai gaw teng nga ai.

¹²Rai ti mung, ngai nanhte hpe tsun made ai gaw, Elia du boi sai rai nna shanhte shi hpe n chye mu ai majaw, shanhte myit ra ai hte maren di kau manu ai. Dai Masha Kasha mung, shanhte a lata hta dai hte maren nni nkri hkrum na ra ai,” ngu mu ai.

¹³Dai shaloi she, sape ni gaw, Hkalup Sara Yawhan hte lakap nna shi tsun nga ai re ai hpe chye na mu ai.

¹⁴Ya shanhte, shawa masha ni hpang de du wa ma yang, masha langai mi shi kaw sit sa nna, lahput hput di let,

¹⁵“Madu e, ngai sha hpe matsan dum la ya e law! Shi ma mu mu ai rai nna wan hta mung, hka hta mung law law lang htan malap kadawng bang bang re ai.

¹⁶Na sape ni hpang de ngai shi hpe woi sa we ai rai ti mung, shanhte n shamai ya lu ma ai,” ngu wu ai.

¹⁷Yesu htan nna, “Nanhte gaw makam masham n rawng ai hte nhtan shai ai amyu she rai nga myit hka! Nanhte hte rau ngai galoi du hkra nga lu na rai ta? Galoi du hkra, ngai nanhte hpe sharang nga lu na rai ta? Dai la kasha ma hpe ngai hpang de woi sa wa marit,” ngu wu ai.

¹⁸Yesu gaw dai nat hpe daru kau wu ai rai nna, dai ma gaw shaloi jang mai mat lu ai.

¹⁹Dai hpang sape ni hkrai sha Yesu hpang de sit sa wa nna, “Anhte gaw dai nat hpe hpa majaw n shaden kau lu gaw ta?,” ngu mu ai.

²⁰Yesu gaw, “Nanhte ai n kam myit dai majaw, n di lu myit dai; nanhte hpe ngai teng teng tsun made ai gaw, kam sham ai myit chyinghkrang tum daram nanhte hta rawng nga ai rai yang gaw, ndai bum hpe, ‘Nang kaw nna wora de htawt sit mat u!,’ ngu nna nanhte tsun mu yang, dai htawt sit mat na ra ai: nanhte n di lu na amu hpa mung n nga na re,” ngu nna shanhte hpe tsun mu ai.

²¹“Rai ti mung, ndai baw nat hpe gaw akyu hpyi nna lusha gam ai hte sha n rai yang gaw, kaga hpa lam hku nna n shaden kau lu ai,” ngu mu ai.

²²Ya, Galile mung hta shanhte yawng wa zup ma yang, Yesu gaw, “Dai Masha Kasha hpe masha ni a lata hta ap kau ai hkrum na ten ni magang wa ra ai.

²³Shanhte shi hpe sat kau na maru ai rai nna, masum ya nhtoi hta e shi hpe hkrung sharawt la ai hkrum na ra ai,” ngu nna shanhte hpe tsun mu ai. Dai rai nna shanhte nachying myit yawn nga ma ai.

²⁴Yesu hte sape ni Kaperna-um mare de du wa ma yang, Nawku Htingnu alu lahkawn ai ni gaw Petru kaw sa du nna, “Nanhte a Sara gaw Nawku Htingnu alu bang ga a ni? ngu nna san mu ai.

²⁵Petru gaw, “Bang ga ai,” ngu wu ai. Ya Petru a nta hta shang bang wa yang, Yesu shi hpe shawng hkap tsun wu ai gaw, “Simun e, nang gara hku myit da wu ta? Ga ntsa Hkawhkam ni kang hte hkan se kadai kaw na hta ma ta? Mungchying sha ni kaw na hta ma ni? Shing n rai maigan masha ni kaw na hta ma ni?,” ngu wu ai.

²⁶Petru gaw, “Maigan masha ni kaw na hta ma ai,” ngu wu yang, Yesu gaw, “Dai rai taw gaw, mungchying sha ni n bang ra ai lachyum rai nga ai.

²⁷Rai ti mung, an a majaw shanhte myit n kataw mu ga, nawng de sa nna nga myek jahkrat bang u; shawng lu ai nga hpe shaw la nhtawm, nga n-gup gang mahka dat yang, Shekela pa mi nang mu na ndai; dai hpe la nna, ngai hte na a matu shanhte hpe ya u,” ngu nna shi hpe tsun wu ai.