Read Jinghpaw Common Language Bible 2009 MAHTE 19 Bible Online

MAHTE 19 - Jinghpaw Common Language Bible 2009 bible

MAHTE 19

¹Ya Yesu gaw ndai lam ni tsun ngut jang, shi Galile mung na pru wa nhtawm Yawdan hka wora hkran Yuda mung de sa du ai.

²Masha wunawng wuwa kaba shi kaw hkan nang ma ai rai nna shi dai yang e shanhte hpe shamai shatsai ya mu ai.

³Hparishe nkau mi Yesu kaw sa du nna shi hpe mara rim na matu mahkam hkam ai hku maw let, “Hpa mara a majaw mi rai rai, masha langai mi tinang a madu jan hpe jahka kau na anhte a tara hta ahkang jaw da nga a ni?,” ngu nna san yu mu ai.

⁴Yesu gaw, “Shawng ningpawt e hpan da ai Wa gaw, lasha yan numsha hpe hpan da nu ai.

⁵‘De a majaw lasha gaw shi a kanu yan kawa hpe kau da nhtawm madu jan hte kanawn nna, shan lahkawng gaw hkum shan langai sha tai lu na mara ai,’ nga nna Karai Kasang tsun ai hpe Chyum Laika hta n hti yu myit ni?

⁶Dai majaw shan gaw lahkawng rai nga ma ai n rai, hkum shan langai sha rai nga ma ai. Dai rai nna Karai Kasang matut da nu ai hpe masha gaw n jahka kau u ga,” ngu nna htan mu ai.

⁷Hparishe ni gaw, “Dai rai yang gaw, jahka ai laika jaw nna shi hpe shabawn kau lu na, nga nna Mawshe hpa majaw hkang da nga a hka?,” ngu mu ai.

⁸Yesu gaw, “Nanhte hpe sharin shaga na matu myit ja ai hte yak la nga myit dai majaw, tinang a madu jan hpe jahka kau na ahkang, Mawshe nanhte hpe jaw da manit dai rai nga ai. Rai ti mung shawng ningpawt e hpan da ai aten hta shing n nga ai.

⁹Nanhte hpe ngai tsun made ga, tinang a madu jan hpe, sadi n dung nna arawn alai hten run mat ai mara hta lai nna, kaga hpa baw mara a majaw mung jahka kau nhtawm, num kaga hpe hkungran la ai wa kadai mung, num shaw ai wa rai nga ai,” ngu nna shanhte hpe tsun mu ai.

¹⁰Dai rai nna shi a sape ni gaw, “Tinang a madu jan hte madu wa a lapran dai hku rai nga yang gaw, n hkungran yang mahtang grau mai nga ai,” ngu mu ai.

¹¹Yesu shanhte hpe htan mu ai gaw, “Ndai sharin shaga ai lam gaw, masha shagu hta akyu jashawn lu nga ai n rai, rai ti mung Karai Kasang kaw na karum ai lam lu la ai ni sha n hkungran ai hkam nga lu ma ai.

¹²Hpa majaw nga yang, masha nkau mi gaw kanu a hkritung nna la jasi tai mat ma ai; nkau mi gaw masha a lata hte la jasi tai mat ma ai; bai nkau mi gaw sumsing Mungdan a akyu hpe tau nna dinghku n de ma ai.”

¹³Masha nkau mi gaw, ma kaji ni a ntsa e lata mara da nna akyu hpyi ya mu ga nga nna, Yesu hpang de shanhte hpe woi sa mu ai. Sape ni mahtang shanhte hpe hkap daru kau mu ai.

¹⁴Yesu chyawm gaw, “Ma ni ngai hpang de sa maru ga, shanhte hpe hkum ban shadang myit, hpa majaw nga yang, sumsing lamu a Mungdan gaw dai zawn re ai ma ni a Mungdan rai nga ai,” ngu mu ai.

¹⁵Shaloi shanhte a ntsa e shi a lata mara ya nhtawm, dai shara na pru mat wa ma ai.

¹⁶Kalang mi na masha langai mi Yesu hpang de sa du nna, “Sara e, nhtum nwai asak lu la hkra kaja ai hpa baw ngai galaw ra na rai ta?,” ngu nna san yu wu ai.

¹⁷Yesu gaw, “Nang gaw mai kaja ai amu hte seng ai lam, hpa rai ngai hpe san yu n ta? Kaja ai wa Langai mi sha nga ai. Nang nan asak hkrung ai de shang mayu n yang gaw jep ai tara hpe hkan sa u,” ngu nna shi tsun wu ai.

¹⁸“Dai wa gaw gara tara hpe mahtang rai ta?,” ngu wu ai. Yesu gaw, “Masha hkum sat, masha num hkum shaw, hkum lagu, n teng n man ai sakse hkum hkam;

¹⁹na nnu yan nwa hpe hkungga lara di u; na a htingbu wa hpe na a hkum hte maren tsaw ra nga u,” ngu wu ai.

²⁰Dai shabrang wa gaw, “Dai yawng mayawng hte hpe ngai naw kaji ai ten kaw nna pyi hkan shatup se ai; hpa mahtang ngai naw ra nga a ta?,” ngu nna shi hpe htan wu ai.

²¹Shaloi Yesu gaw, “Nang ding hpring mayu n yang gaw, wa su, nang lu ai arai ni mahkra dut kau nna, matsan mayan ni hpe garan jaw u; shing rai jang sumsing lamu ntsa e sutgan ni lu na rin dai; ngai kaw mung sa nna hkan nang rit,” ngu nna shi hpe tsun wu ai.

²²Dai shabrang wa gaw dai ga na jang, myit yawn let byawn hprang rai wa mat ai; hpa majaw nga yang, shi arai law law lu su ai wa rai nga ai.

²³Dai rai nna Yesu gaw shi a sape ni hpe, “Ngai nanhte hpe teng teng tsun made ga, lu su ai masha ni a matu sumsing lamu a Mungdan hta shang na nachying wa yak la nga ai.

²⁴Bai, ngai nanhte hpe tsun made ga, samyit na hku gawla-uk gale na gaw naw loi na re, sutgan lu su ai wa Karai Kasang a Mungdan hta shang na mahtang grau yak la nga ai,” ngu tsun wu ai.

²⁵Sape ni dai ga na ma yang, nachying myit mau mat ma ai hte, “Dai rai yang gaw, kadai wa mi hkye hkrang la hkrum lu a ta?,” ngu nna san mu ai.

²⁶Yesu shanhte hpe azi mada yu nna, “Masha a atsam hte kadai wa hpe mung hkye hkrang la na matu dang di lu ai n rai; Karai Kasang mahtang gaw yawng mayawng hpe dang di lu nga ai,” ngu wu ai.

²⁷Shaloi Petru htan nna, “Yu u, anhte gaw, arai yawng mayawng hpe kau da nna, nang kaw hkan saga ai, dai rai nna anhte hpa lu la na rai nga ga ta?,” ngu wu ai.

²⁸Yesu gaw, “Ngai nanhte hpe teng teng tsun made ga, Mungkan Ga Ningnan bai shangai ai ban prat e, dai Masha Kasha gaw shi a hpung shingkang a tingnyang hta dung nga ai shaloi nanhte nye a sape ni shi lahkawng mung, tingnyang shi lahkawng hta dung lawm nna, Israela amyu shi lahkawng hpe up nga lu na marin dai.

²⁹Nye a majaw nta ni, kahpu kanau ni, kajan ni, kanu kawa, kashu kasha ni hte yi hkauna ni hpe kau da ai wa kadai rai ti mung, htam latsa n ga akyu lu la nna htani htana asak a sali wunli hkam la na ru ai.

³⁰Rai ti mung ya shawng nga ai ni law law wa hpang hkrat na mara ai; ya hpang hkrat nga ai ni law law wa shawng na mara ai.