Read Jinghpaw Common Language Bible 2009 MAHTE 20 Bible Online

MAHTE 20 - Jinghpaw Common Language Bible 2009 bible

MAHTE 20

¹“Sumsing lamu a Mungdan gaw, sabyi sun madu langai mi hkrum katut ai mabyin masa hte bung nga ai. Kalang mi na sabyi sun madu langai mi gaw, shi a sabyi sun hta amu galaw na masha saw bang na matu jahpawt jau jau e pru sa wa ai.

²Dai wa gaw, lani mi hta gumhpraw lap mi jaw na, ngu nna amu galaw ai ni hte bawng jahkut nhtawm, sabyi sun de shanhte hpe shangun dat mu ai.

³Bai jahpawt hkying jahku daram hta, gat hkan shi bai pru sa nna hpa n galaw ai kaman tsap nga ai masha ni hpe mu hkrup jang, shi gaw,

⁴‘Nanhte mung dai sun de sa wa masu, ging ram ai hte maren ngai nanhte hpe jaw na made ai,’ ngu nna shanhte hpe tsun mu ai.

⁵Shing rai nna shanhte sa galaw ma ai. Dai hpang, shani hkying shi lahkawng hta mung, shana de hkying masum hta mung, shi pru sa nna dai hte maren di mu ai.

⁶Ya, shana de hkying manga daram hta bai pru sa yang, naw tsap nga ai masha kaga ni hpe shi mu hkrup nna, ‘Nanhte hpa rai nme nang e shani tup kaman sha tsap nga myit ta?,’ ngu nna shanhte hpe san mu ai.

⁷Shanhte gaw, ‘Kadai mung anhte hpe n saw mi ai,’ ngu mu ai. Shi gaw, ‘Nanhte mung dai sun de sa wa masu,’ ngu mu ai.

⁸“Ya shana de rai jang, dai sun madu gaw amu galaw ai ni hpe shaga la nhtawm, ‘Hpang jahtum shang ai ni kaw nna shawng nnan shang ai ni du hkra shabrai jaw u,’ ngu nna shi a hpareng wa hpe tsun da wu ai.

⁹Shana de hkying manga hta amu shang galaw ai ni hpe gumhpraw lap lap hpra gu hkra jaw mu ai.

¹⁰Shing rai shawng shang ai ni shabrai la na matu du jang shanhte grau nna lu la na ga ai, nga nna myit ma ti mung, shanhte mung gumhpraw lap lap sha lu la shajang ma ai.

¹¹Shabrai lu la ma ai hpang shanhte gaw,

¹²‘Hpang jahtum shang ai ndai ni gaw, hkying hkum mi sha galaw ai ni she rai yang nang shanhte hpe anhte shani tup jan ja ai hte pu ba hkam sai ni hte maren shabrai jaw ndai!,’ ngu nna sun madu hpe aput angun ma ai.

¹³“Shi mahtang shanhte hta na langai mi hpe, ‘Jinghku wa e, madat yu u, ngai nang hpe maw sha de ai n rai: nang gaw lani mi na bungli galaw shabrai lap mi hte amu galaw na matu myit hkrum da nit dai n rai ni?

¹⁴Ya nang hte seng ai shabrai la nna nta wa su. Hpang jahtum saw bang ai ndai wa hpe nang hte maren jaw na ngai ra nga nngai.

¹⁵Ngai madu ai gumhpraw hpe ngai di mayu ai hte maren di lu na ahkang nga ai n rai ni? Ngai myit mai ai majaw nang manawn nga nni?,’” ngu nna htan wu ai.

¹⁶Dai hpang Yesu gaw, “Dai rai nna, hpang hkrat ai ni shawng na mara ai; shawng ai ni mahtang hpang hkrat na mara ai,” ngu nna tsun hpungdim wu ai.

¹⁷Yesu gaw Yerusalem de lung wa nga yang, dai sape shi lahkawng hte hpe hkrai shi hte htep shaga woi la nna lam hkawm wa let, shanhte hpe tsun mu ai gaw,

¹⁸“Madat mu, anhte Yerusalem mare de lung wa nga ga ai; dai Masha Kasha gaw Hkinjawng agyi ni hte Tara Sara ni a lata hta ap kau ai hkrum na ra ai. Shanhte gaw shi hpe si na lam daw dan na hte,

¹⁹maigan masha ni a lata de ap kau na mara ai rai nna, shanhte gaw shi hpe asawng asang di nna anu kayat ai hte wudang hta jen da na mara ai; rai ti mung masum ya nhtoi hta e bai jahkrung sharawt la ai hkrum na ra ai,” ngu nna tsun mu ai.

²⁰Dai shaloi e, Zebedi a kasha yan a kanu gaw, shi a kasha yan hte rau, Yesu kaw sit sa nna shi ra sharawng ai lam galaw ya na matu hpyi wu ai.

²¹Yesu gaw, “Nang hpa mi ra nga n ta?,” nga nna san wu ai. Dai num gaw, “Nang Hkawhkam tai nna up nga ai shaloi, ndai nye a kasha yan lahkawng hpe na a hkra maga langai mi, pai maga langai mi dung nga lu na ahkang jaw na lam ngai hpe ga sadi jaw rit,” ngu wu ai.

²²Yesu gaw dai kasha yan hpe, “Nanhte hpa hpyi nga ai hpe nanhte n chye myit dai; ngai lu magang nga ai nni nkri gawm hpe nanhte lu lu na rai nga myit ni?,” ngu nna htan wu ai. Shan gaw, “An rai lu na ga ai,” ngu mu ai.

²³Bai Yesu gaw, “Nye a gawm hpe nanhte kaja wa lu na marin dai; rai ti mung, nye a hkra maga hte pai maga de kadai dung nga lu na ngu ai hpe gaw ngai lata la na ahkang n lu nngai: dai shara ni gaw nye a Wa lajang da ya ai ni a matu mara she rai nga ai,” ngu nna shanhte hpe tsun mu ai.

²⁴Ndai lam hpe kaga ngam ai sape marai shi na mu yang shanhte dai shan nau hpe yu pawt da mu ai.

²⁵Dai rai nna Yesu gaw, shanhte yawng hte hpe shaga la nna, “Maigan amyu ni a up hkang ai du ni gaw, mung masha ni a ntsa e daru magam hte reng sha nga ma ai mung, ningbaw ningla ni gaw atik anang re ai ahkang aya jai lang nga ma ai hpe mung, nanhte chye nga myit dai.

²⁶Nanhte hta chyawm gaw shing rai na n rai, nanhte hta na grau kaba mayu ai wa kadai rai ti mung, nanhte a ali ama tai u ga.

²⁷Nanhte hta na baw tai mayu ai wa kadai rai ti mung nanhte a mayam tai u ga.

²⁸Hpa majaw nga yang, dai Masha Kasha wa pyi, masha kaga wa hpe yam sha na nga nna du sa ai n rai; masha kaga hpe galaw daw na matu mara, shi a asak hpe gawng malai jahpu shatai na nga nna du sa ai,” ngu mu ai.

²⁹Ya, Yesu hte shi a sape ni Yerihko mare na pru wa ma yang, masha wunawng wuwa kaba hkan nang ma ai.

³⁰Shaloi myi kyaw ai masha lahkawng dai lam makau e dung nga ma ai rai nna, Yesu lai sa wa ai hpe na ma yang, shanhte gaw, “Dawi a Kasha Wa e, an hpe matsan dum la mi law!,” ngu nna jahtau ma ai.

³¹Shawa masha ni gaw, shan atsin sha nga mat mu ga, daru jet kau mu ai; rai ti mung shan gaw, “Dawi a Kasha Wa e, an hpe matsan dum la mi law!,” ngu nna grau jahtau ma ai.

³²Shaloi Yesu hkring tsap let, shan hpe shaga la nna, “Ngai nan a matu hpa di ya na, nan ra nga myit ta?,” ngu mu ai.

³³Shan gaw, “Madu e, nang an hpe myi bai mu shangun ya na ra ga ai,” ngu mu ai.

³⁴Shaloi Yesu shan hpe matsan dum nna shan a myi hpe ahtawk ya mu ai; shaloi jang shan myi mu wa nna shi kaw hkan nang ma ai.