Read Jinghpaw Common Language Bible 2009 MAHTE 21 Bible Online

MAHTE 21 - Jinghpaw Common Language Bible 2009 bible

MAHTE 21

¹Ya shanhte gaw Yerusalem de ni wa nna Tsanlun Bum makau na Bethpage kahtawng de du wa ma ai. Dai kaw nna Yesu gaw sape lahkawng hpe shanhte a shawng de shangun dat nna,

²“Nan a shawng de na kahtawng de shang masu, kalang ta nan gaw dun tawn da ai lawze kanu hte de a makau e kasha hpe nan mu na myit dai; dai yan hpe raw nhtawm, ngai hpang de dun wa marit.

³Masha langai ngai nan hpe lama ma tsun a yang gaw, ‘Dai Madu ndai yan hpe lang ra ai da!,’ ngu nna shi hpe htan mu; shaloi dai yan hpe kalang ta ya dat na mara ai,” ngu nna shan hpe tsun dat mu ai.

⁴Ndai lam gaw, myihtoi wa tsun da ai ga dik wa u ga majaw byin wa ai rai nga ai.

⁵Myihtoi gaw, “Ziun mare hpe tsun mu: Yu u, nanhte a hkawhkam wa gaw nanhte hpang de du sa wa ra ai! Shi gaw shagrit shanem ai myit hte, lawze kanu a kasha a ntsa e jawn nga ai; rai sa, lawze kanu a kasha ntsa e jawn nga ai,” nga ai.

⁶Shing rai dai sape yan sa nhtawm, Yesu shan hpe hkang dat mu ai hte maren galaw ma ai rai nna,

⁷shan gaw lawze kanu hte kasha hpe dun wa ma ai; dai yan a ntsa e tinang a hpun nba ni hpe mara nna, Yesu gaw de a ntsa e jawn wu ai.

⁸Dai masha wunawng kaba ni gaw, shanhte a hpun nba ni hpe dai lam ntsa e hpyan nep da ma ai; kaga hte gaw, hpun lakung lakying ni kran la nna dai lam hkan nep ma ai.

⁹Yesu a shawng e sa wa ai ni hte hpang e hkan nang ai masha wunawng ni gaw, “Dawi a Kasha a hpung shingkang hpe shakawn mu! Madu a mying nsang hte du sa ai wa gaw a nga ai law! Karai Kasang a hpung shingkang hpe shakawn kungdawn nga mu law!,” nga nna jahtau garu ma ai.

¹⁰Yerusalem mare hta shang bang wa yang, mare ting kabring kabrawng rai wa nna, “Ndai wa gaw kadai rai nga a ta?,” nga nna san shajang ma ai.

¹¹Shawa masha ni mahtang, “Ndai wa gaw, Galile mung Nazaret mare na Yesu ngu ai myihtoi wa rai nga ai,” nga nna htan ma ai.

¹²Yesu gaw Nawku Htingnu de shang nna, dai Nawku Htingnu kata e rai dut rai mari rai nga ai ni yawng hpe shaden shapraw kau mu ai rai nna, gumhpraw galai byan ya ai ni a ku ni hte hkrudu dut ai ni a punghkum ni hpe kanawng kadawng shagum kau ya nhtawm,

¹³“Nye a nta hpe akyu hpyi ai nta ngu na mu ai, nga nna Karai Kasang tsun ai hpe Chyum Laika ni hta ka da nga ai. Rai ti mung nanhte gaw, dai hpe damya lungpu shatai nga myit dai,” ngu nna shanhte hpe tsun mu ai.

¹⁴Myi kyaw ai ni hte lagaw hten ai ni gaw, dai htingnu kata de shi kaw du ma ai rai nna, shi shanhte hpe shamai shatsai ya mu ai.

¹⁵Hkinjawng agyi ni hte Tara sara ni chyawm gaw, shi galaw ai mauhpa amu ni hte, “Dawi a Kasha hpe shakawn kungdawn mu law!,” nga nna Nawku Htingnu kata hta jahtau ai ma ni hpe mu mu yang, shanhte masin pawt ma ai.

¹⁶Shing rai shanhte gaw Yesu hpe, “Ndai ni hpa tsun nga ai hpe nang na da wu ni?,” ngu nna san mu ai. Yesu gaw, “Ngai na nga nngai, Dai Madu gaw “Ma ni hte chyu chyu ai ma chyangai ni hpe mahkawn shakawn ga majing hte daw jau na matu sharin ya da nu ai, nga ai ga Chyum Laika hta nanhte galoi mung n hti yu myit ni?,” ngu nna shanhte hpe tsun mu ai.

¹⁷Yesu gaw, shanhte hpe kau da nna, dai mare na pru wa nhtawm, Behtani kahtawng de sa du nna, dai yang e, lani mi hkring manam kau da wu ai.

¹⁸Ya hpang jahpawt e, dai mare de bai wa yang, shi kawsi nga ai.

¹⁹Shaloi lam makau e tu ai maihpang hpun langai mi hpe mu wu yang, dai de shi sa wu ai, rai ti mung dai hpun hta lap ni hta kaga hpa n mu wu ai. Dai majaw shi gaw, “Ya kaw nna prat dingsa e, nang hta asi bai n si n ga!,” ngu nna dai hpun hpe tsun wu ai. Maihpang hpun mung kalang ta shaloi jang hkraw nyip mat wa ai.

²⁰Sape ni dai hpe mu jang, mau mat ma ai rai nna, “Dai maihpang hpun gaw kaning rai nna jahkring sha hkraw nyip mat wa a hka?,” ngu nna san mu ai.

²¹Yesu gaw, “Ngai nanhte hpe teng teng tsun made ga, nanhte hta kam shut ai myit n lawm ai sha kam sham myit yang gaw, ndai maihpang hpun hpe ngai galaw ai zawn nanhte galaw lu na myit dai. Dai hta n ga, ndai bum hpe, ‘Nang baw mat nna, nawng hta e htawt bang mat u,’ ngu nna nanhte tsun mu yang dai byin na ra ai.

²²Nanhte gaw kam sham ai myit hte akyu hpyi myit yang, nanhte hpyi mahpyi mahkra lu la na marin dai,” ngu nna shanhte hpe tsun mu ai.

²³Yesu gaw Nawku Htingnu de bai du wa nna sharin shaga nga yang, hkinjawng agyi ni hte, mung masha ni a agyi salang ni, shi kaw sit sa nna, “Nang gaw hpa ahkang hte ndai hte hpe galaw nga n ta? Ndai ahkang nang hpe kadai jaw a ta?,” ngu mu ai.

²⁴Yesu gaw, “Nanhte hpe ngai ga san langai mi san yu made ga, dai ga san hpe nanhte mahtai jaw myit yang gaw, hpa ahkang hte ndai hte hpe ngai galaw nga nngai ngu ai lam, nanhte hpe tsun dan na made ai.

²⁵Yawhan hkalup jaw ai ahkang aya gaw Karai Kasang kaw na rai ni? Masha kaw na rai ni?,” ngu nna san mu ai. Shanhte mahtang shada da bawng nna, “Anhte kaning ngu tsun na rai ta? ‘Karai Kasang kaw na re,’ ngu nna anhte tsun gaw yang, shi anhte hpe, ‘Dai rai yang, nanhte Yawhan hpe hpa rai n kam myit ta?,’ nga nna htan na ra ai.

²⁶Bai, ‘Masha kaw na re,’ ngu yang, mung masha ni hpe anhte hkrit shara nga ga ai, hpa majaw nga yang, Yawhan myihtoi rai nga ai hpe yawng hte kam nga ma ai,” nga shajang ma ai.

²⁷Dai rai nna, shanhte Yesu hpe, “Anhte n chye ga ai,” ngu nna htan mu ai. Shi mung, “Ndai amu ni hpe hpa ahkang hte galaw nngai gaw, ngai mung nanhte hpe n tsun dan na nngai,” ngu nna shanhte hpe tsun mu ai.

²⁸“Ya, nanhte kaning ngu myit da mu ta? Kalang mi na masha langai mi shadang sha lahkawng lu ai. Kasha alat hpang de shi sa nna, ‘Sha e, dai ni sabyi sun de bungli sa galaw su,’ ngu wu ai.

²⁹Kasha alat wa gaw, ‘Ngai n sa mayu nngai,’ nga ai rai ti mung myit bai galai nna, ‘Ngai sa na nngai,’ nga nna sabyi sun de sa wa ai.

³⁰Dai hpang kawa gaw kasha shadoi wa kaw sa nna dai hte maren tsun wu ai. Shi gaw, ‘Rai sa, ngai sa na nngai,’ nga ai, rai ti mung, shi n sa mat ai.

³¹Dai yan hta na kadai wa mahtang kawa a ra ai lam hpe hkan galaw ma ta?,” ngu nna san mu ai. Shanhte gaw, “Kasha kaba ai wa rai nga ai,” ngu mu ai. Dai rai nna Yesu gaw, “Ngai nanhte hpe teng teng tsun made ga, kang hta ai ni hte shawa num ni, nanhte a shawng e, Karai Kasang a Mungdan hta shang ma ai.

³²Hpa majaw nga yang, hkalup sara Yawhan gaw nanhte kaw sa nna teng man ai lam hpe hkap la na matu madun dan nga ai hpe nanhte n kam sham myit dai, rai ti mung kang hta ai ni hte shawa num ni chyawm gaw shi hpe kam sham ma ai.

³³“Ga shadawn kaga langai mi hpe mung naw madat la mu. Kalang mi na sun madu langai mi gaw sabyi sun langai mi hkai sharam da nna, de a grup yin e nhpan kum da ai hte, dai hta e sabyi shup na htung htu da nhtawm, langchyi langai mi mung gap da nu ai. Dai hpang, sun galaw sha ai masha ni hpe shap ya nna kaga mungdan de bu hkawm sa mat wa ai.

³⁴Ya sabyi ngai ai ten du jang, shi lu la ang ai sabyi mangai a asi sa la na matu, sun galaw ai ni hpang de, shi mayam ni hpe shangun dat mu ai.

³⁵Sun galaw ai ni mahtang shi a mayam ni hpe rim la nna, langai mi hpe anu kayat, langai mi hpe sat kau mu ai hte langai mi hpe nlung hte kabai sat kau mu ai.

³⁶Bai, Shawng na hta grau law hkra mayam kaga ni hpe shangun dat mu ti mung, shanhte gaw shawng na hte maren dai ni hpe di mu ai.

³⁷Yawng a hpang jahtum, ‘Ngai sha hpe mahtang shanhte hkungga na ma ai,’ nga nna shi a kasha hpe shanhte hpang de shangun dat wu ai.

³⁸Rai ti mung, sun galaw ai ni dai kasha hpe hkap mu jang, ‘Ndai wa gaw sun madu a kasha rai nna sali wunli dagraw na wa rai nga ai, sa marit shi hpe sat kau nna shi a sali wunli anhte la kau ya gaw,’ nga nna shada da bawng dup la ma ai.

³⁹Shing rai shanhte shi hpe rim la nna, sun shinggan de shapraw nhtawm, sat kau mu ai.

⁴⁰“Dai rai nna sun madu wa bai du wa yang, ndai sun galaw ai ni hpe shi kaning di na mu ta?,” ngu nna san mu ai.

⁴¹Shanhte gaw, “Dai n hkru ai masha ni hpe shi teng teng sat kau na mu ai rai nna, sabyi mangai aten hta jaw ra ai asi hkrak hkrak jaw lu ai sun galaw masha kaga ni hpe, dai sun htawt shap ya na ru ai,” ngu nna shi hpe htan mu ai.

⁴²Yesu shanhte hpe tsun mu ai gaw, “Wahpang galaw ai ni akyu n rawng ai ngu nna lata kau ai nlung gaw, ningjut jahtum na ahkyak dik ai nlung tai wa sai. Dai gaw, Madu a majaw byin wa sai rai nna, anhte a man e mauhpa amu nan rai nga ai, nga ai ga hpe, nanhte dai laika hta lang mi pyi n hti yu myit ni?

⁴³“Dai rai nna ngai nanhte hpe tsun made ga, Karai Kasang a Mungdan hpe nanhte kaw na shaw la kau nna asi atsawm sha shapraw ya lu ai amyu hpe jaw kau na ru ai.”

⁴⁴(Dai nlung hta hkrat ai wa gaw achyen achya rai mat hkra daw hten na ra ai; gade a ntsa e mung dai nlung hkrat bun yang gaw dai wa gaw ayun ayaw mani mat na ra ai, ngu wu ai.)[3]

⁴⁵Hkinjawng agyi ni hte Hparishe ni chyawm gaw shi a ga shadawn ni hpe na mu yang, shi shanhte a lam tsun nga ai ngu ai hpe shanhte chye na mu ai.

⁴⁶Dai majaw shanhte gaw, shi hpe rim la na lam tam ma ai. Rai ti mung Yesu hpe myihtoi rai nga ai ngu nna kam nga ai shawa masha ni hpe hkrit da mu ai.