Read Jinghpaw Common Language Bible 2009 MAHTE 22 Bible Online

MAHTE 22 - Jinghpaw Common Language Bible 2009 bible

MAHTE 22

¹Yesu gaw, ga shadawn ni hpe lang nna masha ni hpe tsun mu ai gaw,

²“Sumsing lamu a Mungdan gaw, kasha a hkungran poi shachyip da ai Hkawhkam langai mi hte bung nga ai.

³Dai poi de shaga da sai ni hpe bai shaga la na, shi a mayam ni hpe shangun dat mu ai; rai ti mung shaga da sai ni n sa hkraw ma ai.

⁴Dai rai nna shi gaw, mayam kaga ni hpe bai shangun dat nna, ‘Nye a lusha poi gaw ya jin jin rai sai, nye a usu ni hte kawn da ai yam nga ni hpe sat kau ngut sai, yawng mayawng jin jin rai sai, hkungran poi de sa marit!, ngu nna shaga da sai ni hpe sa tsun mu,’ ngu dat mu ai.

⁵Rai ti mung shaga da hkrum ai manam ni gaw, dai ga hpe hpa n nawn mu ai rai nna, langai wa gaw shi hkauna de, kaga wa gaw shi a gat rai dut ai de sa mat wa ma ai.

⁶Naw nga ai ni mahtang gaw, shi a mayam ni hpe rim la nna anu kayat ai hte sat kau ma ai.

⁷Hkawhkam wa chyawm gaw grai masin pawt bu nga ai rai nna, shi a hpyen la ni hpe shangun dat nhtawm, masha sat ai ni hpe sat kau mu ai hte shanhte a mare hpe nat shagrawm kau ya mu ai.

⁸Dai hpang shi a mayam ni hpe shaga la nna, ‘Nye a kasha a hkungran lusha poi jin jin rai sai, rai ti mung ngai shaga da ai ni dai hte ging dan nga ma ai n rai,

⁹Ya lam nmaw kaba ni de nanhte sa nna mu hkrup mahkrup masha ni hpe dai hkungran lusha poi de shaga bang masu,’ ngu nna tsun mu ai.

¹⁰Dai rai nna, dai mayam ni gaw nmaw lam ni de pru sa nna mu hkrup ai ni yawng hte hpe, n kaja ai ni rai ti mung, kaja ai ni rai ti mung, shaga jahpawng da mu ai rai nna dai hkungran gawk hta masha ni hpring chyat rai nga ma ai.

¹¹“Ya Hkawhkam wa gaw dung nga ai manam ni hpe kawan yu na, shang wa yang, hkungran poi sa ai hpun palawng n bu n hpun ai la langai mi hpe shi mu hkrup wu ai.

¹²Dai rai nna shi gaw, ‘Jinghku wa e, hkungran poi sa ai hpun palawng n bu n hpun ai mi, nang kaning rai nang de shang lu n ta?,’ ngu nna san wu ai. Rai ti mung dai masha chyawm gaw n chye htan ai hte atsin sha rai nga ai.

¹³Shaloi dai Hkawhkam wa gaw, shi a ali ama ni hpe, ‘Shi a lagaw lata gyit hkang nna shinggan de na nsin de jahkrat bang kau mu,’ ngu wu ai. Dai yang e hkrap ngu hkrap ngoi ai hte wa udik ai hte nga ra na ra ai.”

¹⁴Dai hpang Yesu gaw, “Shaga la hkrum ai ni law ma ti mung, lata la hkrum ai ni mahtang n law ma ai,” ngu mu ai.

¹⁵Hparishe ni pru mat wa nna Yesu hpe mara shagun lu hkra gara hku ga san ni san na lam bawng ban ma ai.

¹⁶Dai hpang shanhte a sape ni nkau mi hte Herod a hpung kaw na masha nkau mi hpe Yesu hpang de shangun dat mu ai. Shanhte gaw, “Sara e, nang gaw teng man ai lam hpe sha tsun nga ndai hpe anhte chye ga ai. Nang gaw masha a myi man n tau ai sha, masha a matu Karai Kasang a myit ra ai lam hpe teng man ai hku sharin shaga ndai.

¹⁷Dai rai nna nang myit ai hku anhte hpe tsun dan mi: Kehta Hkawhkam kaw hkanse mai bang a ni? N mai bang a ni? Tara hte nhtan shai a ni? Anhte hpe tsun dan mi,” ngu mu ai.

¹⁸Yesu mahtang, shanhte a n hkru n kaja ai hku maw mawn ai lam hpe chye ya mu ai majaw, “Sawt ai ni e nanhte ngai hpe hpa rai chyam yu nga myit ta?

¹⁹Dai hkanse bang na gumhpraw dengga lap mi ngai hpe madun yu marit!,” ngu mu ai. Shaloi shanhte gumhpraw lap mi, shi kaw la pru wa ma ai.

²⁰Dai rai nna shi gaw, “Gade a sumla hte mying masat laika kap nga a ta?,” ngu nna san mu ai.

²¹Shanhte gaw, “Kehta a sumla hte masat laika kap nga ai,” ngu nna htan mu ai. Shaloi shi gaw, “Dai rai yang gaw, Kehta hte seng ai hpe gaw Kehta hpe ya mu; Karai Kasang hte seng ai hpe gaw, Karai Kasang hpe ya mu,” ngu nna shanhte hpe tsun mu ai.

²²Dai ga hpe na la ma yang, shanhte mau mat ma ai rai nna, shi kaw na pru nhtawm wa mat ma ai.

²³Dai shani nan Saduke nkau mi gaw Yesu kaw sit sa wa ma ai. Shanhte gaw si mat wa ai masha ni bai hkrung rawt wa ai ngu ai hpe n kam ai ni rai ma ai.

²⁴Shanhte gaw, “Sara e, masha langai ngai kasha garai n kap ai si mat wa ai rai yang, shi a kanau gaw karat hpe lu la na rai nna, shan kasha lu ai hte kahpu a matu htinggaw shachyaw u ga, nga nna Mawshe htet da mi ai.

²⁵Ning re ai yan nau ni marai sanit anhte hte rau nga nga ma ai. Shawng na kahpu kaba wa hkungran nna matu mara n kap ai si mat wa sai; shing rai kanau wa gaw gaida bai hta wu ai.

²⁶Dai hte maren, hpang na wa mung, masum ngu na wa mung, dai sanit du hkra shi hpe hta da mu ai.

²⁷Mahkra a hpang jahtum e dai numsha mung si mat wa ai.

²⁸Ya, si mat wa ai ni bai hkrung rawt wa ai shani, dai marai sanit hta na gade a madu jan mahtang shi rai na rai ta? Hpa majaw nga yang, mahkra shi hpe hta manu ai,” ngu nna san mu ai.

²⁹Yesu htan let, shanhte hpe tsun mu ai gaw, “Nanhte gaw, Chyum Laika hpe mung, Karai Kasang a n-gun atsam hpe mung n chye ai majaw lam dam mat manit dai.

³⁰Hpa majaw nga yang, si mat ai ni bai hkrung rawt ai shaloi, shanhte gaw lamu kasa ni zawn rai nna, num la num ya ai lam n galaw na ma ai.

³¹Ya, si ai ni bai hkrung rawt wa na lam hte seng nna, nanhte hpe Karai Kasang tsun dan ai ga nanhte n hti yu myit ni? Shi gaw, ‘Ngai gaw Abraham a Karai Kasang, Isak a Karai Kasang, Yaku a Karai Kasang rai nga nngai,’ nga nna tsun ai.

³²Karai Kasang chyawm gaw, si nga ai ni a Karai Kasang n rai, ahkrung nga ai ni a Karai Kasang she rai nga ai,” nga ai.

³³Shawa masha ni dai hpe na ma yang, shi a sharin shaga ai lam hpe mau mat ma ai.

³⁴Ya, Yesu gaw Saduke ni hpe jasim kau mu ai hpe Hparishe ni na ma yang, shanhte shi kaw sa zup ma ai.

³⁵Shanhte hta na tara sara langai mi shi hpe ga san langai mi san ai hte mara tam lu hkra chyam yu na nga,

³⁶shi gaw, “Sara e, jep ai Tara hta na grau kaba ai tara gaw gara mahtang rai nga a ta?,” ngu nna san mu ai.

³⁷Yesu gaw, “ ‘Dai Madu na a Karai Kasang hpe na a myit kraw lawang mahkra hte, na a myit masin mahkra hte, na a myit mang mahkra hte nang tsaw ra lu na rai ndai.”

³⁸Ndai gaw kaba dik ai hte ahkyak dik ai shawng na hkang da ai ga rai nga ai.

³⁹Hpang na ahkyak dik ai hkang da ai ga mung dai hte bung nna, ‘Na a htingbu wa hpe, na a hkum hte maren nang tsaw ra lu na rai ndai,’ nga nna rawng nga ai.

⁴⁰Ndai hkang da ai ga lahkawng yan gaw, Mawshe a jep ai Tara mahkra hta, myihtoi ni a sharin shaga ai lam ni a npawt madung rai nga ai,” ngu wu ai.

⁴¹Ya Hparishe nkau mi hpawng nga ma yang, Yesu shanhte hpe,

⁴²“Nanhte gaw Meshia a lam kaning ngu myit nga myit ta? Shi gaw gade a kasha rai nga a ta?,” ngu nna san mu ai. Shanhte gaw, “Dawi a Kasha rai nga ai,” ngu mu ai.

⁴³Bai Yesu gaw, “Dai rai yang gaw, Dawi Hkawhkam gaw Chyoi Pra ai Wenyi e shadut ai hte Meshia hpe ‘Madu’ nga nna kaning rai shaga lu a ta? Hpa majaw nga yang, Dawi gaw,

⁴⁴‘Dai Madu Karai Kasang gaw nye a Madu hpe tsun wu ai gaw: Na a gumlau ni hpe, na a lagaw npu e ngai tawn da ai ten du hkra, nye a hkra maga de naw adung nga u,’ nga nna tsun nga ai.

⁴⁵Shing nga Dawi gaw Meshia hpe Madu nga ai rai yang gaw, kaning rai nna Meshia gaw shi a kasha rai na rai nga a ta?,” ngu nna shanhte hpe tsun mu ai.

⁴⁶Kadai wa mung, ga hkaw mi pyi shi hpe n htan lu ma ai hte dai shani kaw nna htawm hpang de kadai wa mung shi hpe hpa ga san ni mung n san wam mat ma ai.