Read Jinghpaw Common Language Bible 2009 MAHTE 24 Bible Online

MAHTE 24 - Jinghpaw Common Language Bible 2009 bible

MAHTE 24

¹Ya Yesu gaw dai Nawku Htingnu kaw na pru nhtawm hkawm sa wa nga yang, sape ni gaw dai Nawku Htingnu na nta ni hpe madun dan na matu shi kaw sit sa ma ai.

²Shi mahtang shanhte hpe, “Rai sa, ndai nta ni yawng hte hpe nanhte mada mu ai n rai ni? Ngai nanhte hpe teng teng tsun made ga, ndai nta ni gaw, nlung langai mi gaw langai mi a ntsa e n mara mat ai du hkra hten run mat na mara ai,” ngu nna shanhte hpe tsun mu ai.

³Yesu gaw Tsanlun Bum ntsa e dung nga yang, shi a sape ni hkrai shi kaw sit sa nna, “Dai hte gaw galoi me byin wa na rai ta? Nang bai du na aten hte mungkan ga htum mat na aten hpe madun dan ai hku nna hpa baw lamik kumla ni byin pru wa na ra ta? Anhte hpe tsun dan mi,” ngu mu ai.

⁴Yesu gaw, “Kadai mung nanhte hpe n hkalem lu myit ga, sadi nga mu.

⁵Masha law law wa nye a mying hte paw pru nna, ‘Ngai gaw Meshia rai nngai,’ nga nna law law hpe lam shadam na maru ai.

⁶Nanhte gaw ni ai, tsan ai shara hkan na majan gasat ai shiga nsen ni na lu na marin dai; rai ti mung myit hkum ru myit. Shing re ai lam ni gaw byin lu na ra ai, rai ti mung, dai ni gaw jahtum nhtoi du sai ngu ai lachyum garai n rai nga ai.

⁷Masha amyu mi hte amyu mi, mung mi hte mung mi, shada da majan byin na mara ai.

⁸Ndai yawng mayawng chyawm gaw, shawng na ma shangai machyi ai hte bung nga ai.

⁹“Dai hpang masha ni gaw, nanhte hpe rim la nna ari jaw na hte sat kau na matu ahkang aya lu ai ni a lata de ap kau na marin dai. Nye a mying a majaw, masha amyu baw shagu nanhte hpe n dawng n wawm na mara ai.

¹⁰Dai shaloi e, masha law law wa myit kataw nna lam dam wa ai hte shada da ap kau ai hte shada da n dawng n wawm na mara ai.

¹¹Masu ai myihtoi law law mung paw pru nna, masha law law hpe lam shadam na mu ai.

¹²N hkru n kaja ai lam shing rai chyam bra wa nna, masha law law a tsaw ra myit kawp mat na ra ai.

¹³Rai ti mung jahtum du hkra shakut sharang ai wa gaw hkye hkrang la ai hkrum na ra ai.

¹⁴Dai mungdan a Kabu Gara Shiga a lam hpe, masha amyu baw shagu a matu mara sakse tai u ga, mungkan ting hta e hkaw dan lu na rai nga ai; dai hpang e jahtum nhtoi gaw du na ra ai.

¹⁵“Myihtoi Daniela tsun dan ai dai ‘Jahten Shabya ai,’ hkrit kajawng matsat na zawn re ai arai hpe nanhte mu na marin dai. Dai gaw, dai chyoi pra ai shara hta tsap nga na ra ai. (Laika hti ai wa, ndai lam hpe ngu mayu ai hpe sadi let chye na ra na re.)

¹⁶Dai shaloi e Yuda mung hta e nga ai ni gaw, bum lang de hprawng mat wa mu ga.

¹⁷Nta numgaw e nga ai wa gaw shi a nta na arai ni hpe shang la na, hkum yu wa nu ga.

¹⁸Hkauna pa e nga ai wa mung, shi a hpun nba wa la na, hkum n htang wa u ga.

¹⁹Dai nhtoi hte hta, na-um nasin re ai num ni hte chyu chyu ai ma lu ai kanu ni a matu nachying yak la ai aten rai na ra ai.

²⁰Dai rai nna nanhte a rawt hprawng na nhtoi gaw kashung ta hte Bansa Nhtoi hta e n ang u ga, Karai Kasang kaw akyu hpyi nga mu.

²¹Hpa majaw nga yang, mungkan ga nnan lat kaw nna dai ni du hkra galoi mung garai n byin yu ai hte hpang de mung galoi n byin lu na ru tsang kaba hta grau sawng ai rai na ra ai.

²²Karai Kasang gaw dai nhtoi ni hpe shayawm kau nu ai; shi shing n di yang gaw, kadai mung hkrung nga lu na ra ai n rai. Rai ti mung shi a lata la ai masha ni a matu mara, Karai Kasang gaw dai nhtoi ni hpe shayawm kau na ru ai.

²³“Dai shaloi e masha langai ngai, ‘Yu mu, nang e, shing n rai htawra kaw e Meshia nga nga ai,’ nga nna nanhte hpe tsun myit yang gaw, nanhte hkum kam myit.

²⁴Hpa majaw nga yang, masu ai Meshia hte masu ai myihtoi ni paw pru na mara ai; shanhte gaw byin mai ai rai yang, Karai Kasang e lata la tawn sai masha ni hpe pyi lam shadam kau lu hkra lamik kumla kaba hte mauhpa amu ni galaw dan na mara ai.

²⁵Madat mu! ndai lam garai n byin kaw nna ngai nanhte hpe tsun hkap da ni ai.

²⁶“Shing n rai, nanhte gaw, ‘Yu mu! shi gaw nam mali hkan e nga nga ai!,’ nga nna tsun ma ti mung, nanhte dai de hkum pru sa myit. Bai, ‘Shi nang e makoi nga ai!,’ nga nna shanhte tsun yang, dai hpe hkum kam myit.

²⁷Hpa majaw nga yang, sinpraw maga kaw nna sinna maga du hkra lamu ting hpe htoi shangun ai myihprap gala ai zawn dai Masha Kasha du sa na ra ai.

²⁸“Mang taw ai shara shagu hkan e, langda ni mung hpawng nga na mara ai.

²⁹“Bai, dai ru tsang ai nhtoi ni a hpang kalang ta nan jan gaw nip mat wa nna, shata mung n htoi mat na ra ai; shagan ni mung lamu de nna di hkrat mat na mara ai rai nna, lamu gang hkau na n-gun atsam ni gaw tinang a hkawm kayin nga ai lam ni kaw na htawt kamawng kau ai hkrum na mara ai.

³⁰Dai shaloi e, Masha Kasha a kumla ni gaw sumsing lamu hta e dan pru na ra ai rai nna, shaloi jang ga ntsa na masha ni yawng gaw, dai Masha Kasha daru magam hpung shingkang kaba hte nawng lamu a sumwi ni hta jawn nna du sa ai hpe mu nna sharung shayawt na mara ai.

³¹Dai hpang Masha Kasha gaw, pahtau kaba hpe dum shangun nhtawm, shi a lamu kasa ni hpe lamu ga man mali de shangun dat nna, mungkan maga mi kaw nna maga mi du hkra shi a lata la tawn sai ni hpe jahpawng la na maru ai.

³²“Maihpang hpun gaw nanhte hpe lam langai mi sharin ya myit ga. De a lakung lakying ni tsit majawm wa nna, lap ni prut magang wa ai shaloi nlum ta ni wa ra ai hpe nanhte chye nga myit dai.

³³Dai hte maren, nanhte gaw dai byin wa ai lam yawng hte hpe mu myit dai shaloi, dai ahkying aten gaw ni ra ai rai nna, dai Masha Kasha du na jin jin rai sai hpe chye na nga mu.

³⁴Ya pra nga ai ni yawng garai n si mat ma yang, dai lam yawng mayawng hte byin wa na ra ai hpe dum chye nga mu.

³⁵Sumsing lamu hte ginding aga lai mat wa ti mung, nye a ga gaw n lai mat na li ai.

³⁶“Rai ti mung, dai du na ra ai shani hte ahkying hpe chyawm gaw kadai mung n chye lu ai; lamu kasa ni hte Kasha wa pyi dai hpe n chye lu ai; Wa hkrai sha dai hpe chye lu ai.

³⁷Dai Masha Kasha a bai sa du ai gaw Noa lakhtak hta byin ai lam hte bung na ra ai.

³⁸Sha-u garai n ing ai nhtoi ni hta masha ni gaw Noa hte nta masha ni sanghpaw li de shang wa ai nhtoi du hkra, lu lu sha sha, num la num ya, rai nga ma ai.

³⁹Shanhte gaw sha-u ing wa nna yawng hte hpe magawn mat wa ai ten du hkra n dum shami rai nga nga ma ai. Dai hte maren dai Masha Kasha a bai du sa ai ten hta byin na ra ai.

⁴⁰Dai shaloi e marai lahkawng hkauna pa langai mi hta e rau sha amu galaw nga ma yang, langai mi woi la hkrum nna, langai mi gaw jahti kau da ai hkrum na ra ai.

⁴¹Numsha lahkawng htum rin langai mi hta rau rin nga na mara ai rai nna, langai mi gaw woi la ai hkrum nna langai mi gaw jahti kau da ai hkrum na ra ai.

⁴²“Dai rai nna, nanhte a Madu gaw gara shani e du sa na hpe nanhte n chye myit dai majaw, amaja nga mu.

⁴³Nta madu gaw lagut sa na ahkying hpe chye wu taw gaw, shi amaja nga na ra ai rai nna shi a nta de lagut shang shangun na wu ai n rai-dai hpe dum nga mu.

⁴⁴Dai rai nna nanhte galoi mung jin jin rai nga mu: hpa majaw nga yang, nanhte n myit mada ai ahkying hta e dai Masha Kasha du sa na ra ai.

⁴⁵“Dai rai yang, sadi dung nna hpaji rawng ai mayam gaw kadai wa rai nga a ta? Dai wa gaw kaga mayam ni hpe up hkang na hte aten du jang lusha garan jaw na matu shi a madu e san da hkrum ai wa rai nga ai.

⁴⁶Shi a madu bai du wa yu yang, shing rai galaw nga la ai mayam gaw gade wa a lu na a hka!

⁴⁷Nanhte hpe ngai teng teng tsun made ga, dai madu gaw shi a arai mahkra a ntsa e, shi hpe san tawn da na wu ai.

⁴⁸Rai ti mung dai mayam gaw n kaja ai mayam rai nga a yang gaw, ‘Nye a Madu wa na naw na la nga ai,’ nga nna shi a kraw hta e tsun nga ai hte,

⁴⁹shi a manang mayam ni hpe anu ajin di nhtawm, chyaru nang ai ni hte rau lu rau sha rai nga na ra ai.

⁵⁰Dai hpang lani mi na shi n myit mada ai, n chye ai aten langai mi hta, shi a madu bai du wa na ra ai rai nna,

⁵¹shi a madu gaw shi hpe azat aza di kau nhtawm, sawt ai ni hkam la ga ai ari shi hpe mung garan hkam la shangun na ra ai rai nna, dai yang e shi gaw hkrap ngu hkrap ngoi ai hte wa udik urin ai rai na ra ai.