Read Jinghpaw Common Language Bible 2009 MAHTE 27 Bible Online

MAHTE 27 - Jinghpaw Common Language Bible 2009 bible

MAHTE 27

¹Jahpawt jau jau e hkinjawng agyi ni hte mung masha ni a salang ni yawng hte gaw, Yesu hpe sat kau na lam ni bawng ban ma ai.

²Dai hpang shi hpe gyit nhtawm Roma mung gyi Pilat hpang de sa ap kau mu ai.

³Ya Yesu hpe ap kau ai Yuda gaw, Yesu daw dan hkrum ai hpe mu chye jang, shi myit malai lu nna, gumhpraw lap sumshi hpe hkinjawng ni hte salang ni hpang de la sa nna,

⁴“Ngai gaw mara n lu ai masha langai mi hpe si na matu ap kau we ai majaw, yubak kap ni ai,” ngu mu ai. Shanhte gaw, “Dai anhte hte hpa seng nga a ta? Dai na a amu she rai lit dai!,” ngu mu ai.

⁵Shaloi dai gumhpraw hpe Nawku Htingnu hta e shi kabai tawn da nna pru mat wa nhtawm, shi dai shi dau si mat ai.

⁶Hkinjawng agyi ni dai gumhpraw hpe hta la nna, “Ndai gaw asai jahpu rai nga ai majaw, Nawku Htingnu alu sut dek hta bang tawn da na anhte a tara hta ahkang n jaw ai,” nga ma ai.

⁷Shanhte dai hte seng nna bawng hkut la ngut jang, di bu sama a ga dachyawk mari la nna tsasam masha ni a lupwa shatai mu ai.

⁸Dai majaw, dai ni du hkra, “Sai ga dachyawk,” ngu nna tsun shalai da mu ai.

⁹Shaloi nna Myihtoi Yeremia tsun ai, “Shanhte gaw dai wa a matu manu jahpu hku nna Israela amyu masha ni myit hkrum daw dan ya ai gumhpraw lap sumshi hpe la nna,

¹⁰dai Madu ngai hpe hkang da ni ai hte maren, di bu sama a ga dachyawk mari na matu lang kau mu ai,” nga ai ga dik wa ang sai.

¹¹Ya, Yesu gaw Roma munggyi a man e tsap nga ai: munggyi gaw, “Nang Yuda ni a Hkawhkam rai nga n ni?,” ngu nna shi hpe san wu ai. Yesu htan nna, “Nang tsun ai hte maren rai nga nngai,” ngu wu ai.

¹²Rai ti mung Hkinjawng agyi ni hte salang ni shi hpe mara shagun ai lam ni hpe shi hpa mung n htan ya mu ai.

¹³Dai rai nna Pilat gaw, “Nang hpe shanhte gade daram mara shagun nga ma ai lam hpe nang n na n ni?,” ngu nna shi hpe tsun mu ai.

¹⁴Rai ti mung Yesu gaw ga hkaw mi mung n htan wu ai. Shing re ai a majaw munggyi gaw ja ja wa mau mat nga ai.

¹⁵Roma munggyi wa gaw Shalai wa ai Poi shagu hta e, shawa masha ni hpyi ai bawng masha langai ngai hpe dat ya ai htung lai nga lu ai.

¹⁶Dai aten hta e Baraba ngu ai, kajai gumhkawng ai bawng dung ai wa langai mi nga ai.

¹⁷Dai rai nna shawa masha ni zuphpawng nga ma yang, Pilat gaw, “Nanhte a matu ngai kadai wa hpe mahtang dat ya na nanhte ra nga myit ta? Baraba hpe rai kun? Shing n rai Meshia ngu ai Yesu hpe rai kun?,” ngu nna shanhte hpe san mu ai.

¹⁸Yuda agyi salang ni manawn masham n ju n dawng ai majaw, shanhte Yesu hpe ap kau mu ai hpe Pilat atsawm sha chye ya mu ai.

¹⁹Ya Pilat gaw tara jeyang ai gawk e naw dung nga yang, shi a madu jan gaw masha langai mi hpe shi kaw shangun dat nna, “Dai ding hpring ai wa hpe hpa mung hkum di u, hpa majaw nga yang, mana na nye a yupmang hta e shi a majaw, ngai nni nkri law law wa hkrum sha ni ai,” ngu nna shiga langai mi htet dat wu ai.

²⁰Hkinjawng agyi ni hte salang ni chyawm gaw, shawa masha ni hpe alau nna, Baraba hpe dat nhtawm Yesu hpe sat kau na hpyi na matu shawa masha ni hpe shadut mu ai.

²¹Rai ti mung Pilat gaw, “Ndai yan hta na kadai mahtang hpe ngai nanhte a matu dat ya na ra nga myit ta?,” ngu nna shawa masha ni hpe san mu ai. Shanhte gaw, “Baraba hpe ra ga ai!,” ngu nna htan mu ai.

²²Pilat gaw, “Dai rai yang gaw, Meshia ngu ai Yesu hpe ngai kaning di na we ta?,” ngu nna shanhte hpe san mu ai. Shanhte yawng, “Wudang hta jen sat kau u!,” ngu ma ai.

²³Rai ti mung Pilat gaw, “Dai rai yang gaw, shi n hkru ai hpa wa galaw hkrup sata?,” ngu nna san mu ai. Shanhte chyawm gaw, “Wudang hta jen kau u!,” nga nna nsen htum hkra marawn jahtau bu ma ai.

²⁴Pilat mahtang gaw, hpa hku mung n dang lu ai hte kabring kabrawng byin wa na masa hpe mu ai majaw, ntsin la nna shawa ni a man e lata hpe kashin let, “Ndai wa si ai gaw ngai hta lit n nga ai, ndai gaw nanhte galaw ai she rai malit dai,” ngu mu ai.

²⁵Dai rai nna dai shawa masha yawng gaw, “Dai wa si ai majaw, anhte hte anhte a kashu kasha ni a ntsa e lit mara nga mali ga law!,” nga nna htan ma ai.

²⁶Dai shaloi, Pilat gaw Baraba hpe shanhte a matu dat ya mu ai. Yesu hpe mahtang shi kayat nna, wudang hta jen sat kau na matu ap kau dat wu ai.

²⁷Shaloi Pilat a hpyen ma ni gaw, Yesu hpe munggyi a htingnu nhku de woi wa mu ai rai nna, hpyen la dap ran langai mi ting gaw Yesu a man e grup di nna jahpawng tawn da mu ai.

²⁸Shanhte shi a hpun palawng ni hpe raw kau ya nna hkyeng ai nsam rawng ai nba lawai ya mu ai.

²⁹Dai hpang shanhte gaw ju lakung ni hte janmau langai mi galaw hkri la nhtawm shi a baw hta shagup ya mu ai, shi hkra lata hta mung kumba ginlang yan mi jum shangun mu ai. Dai hpang shanhte shi a man e lahput hput di let shi hpe jahpoi asawng nna “Yuda ni a Hkawhkam e, nang asak galu n ga law!,” ngu mu ai.

³⁰Bai shanhte shi hpe mayen mahtaw bun nhtawm, dai kumba yan hpe shanhte la nna, shi a baw hpe kayat ya mu ai.

³¹Shanhte shi hpe asawng asang di ngut jang, dai nba hpe shanhte raw kau nna, shi a hpun palawng hpe bai jahpun ya mu ai. Dai hpang wudang hta jen da na shapraw sa wa mu ai.

³²Shanhte pru sa wa nga ma yang, shanhte gaw Kureni masha Simun mying ai masha langai mi hpe mu hkrum nna, Yesu a wudang hpai ya u ga, shi hpe adip arip di nna hpai shangun mu ai.

³³Ya, Golgahta ngu ai pungkum kawng mying ai shara de shanhte du jang,

³⁴hka ai tsi hte kayau ai ntsin lu u ga, shanhte shi hpe jaw mu ai, rai ti mung shi chyim yu nna n kam lu wu ai.

³⁵Shi hpe wudang hta jen da ngut jang, shanhte shawun hpaida da ai hte shi a hpun palawng ni hpe jawm garan la mu ai.

³⁶Dai hpang dai yang e shanhte dung nga nna shi hpe sin da mu ai.

³⁷Shi a baw ntsa e, “Ndai wa gaw Yuda ni a Hkawhkam Yesu rai nga ai,” ngu nna shi a mara madun ai laika hpe shanhte ka shakap da ma ai.

³⁸Shaloi e, shi hte rau damya lahkawng hpe mung, hkra maga de langai mi, pai maga de langai mi, wudang hta jen da mu ai.

³⁹Lam e lai sa wa ai ni mung, shi hpe shatan nhkan di nna, tinang a baw ni hpe kanga let,

⁴⁰Nawku Htingnu hpe run kau nna, masum ya laman bai gaw gap da na nga ai wa e, na hkum hpe nang hkye la u, nang Karai Kasang a Kasha rai n yang gaw, wudang hta na yu hkrat wa u!,” ngu mu ai.

⁴¹Hkinjawng agyi ni, tara sara ni hte salang ni mung dai hte maren shi hpe asawng asang di mu ai.

⁴²“Shi gaw masha ni hpe hkye la ga ai, rai ti mung shi hkum nan hpe gaw n hkye la lu a hka! Shi gaw Israela Hkawhkam n rai nga a ni? Ya shi wudang hta na yu wa a yang gaw, anhte shi hpe kam sham na ga ai.

⁴³Shi gaw Karai Kasang hpe kam hpa nna, ‘Ngai gaw Karai Kasang a Kasha rai nngai!,’ nga nna shi tsun ai. Rai sa, dai rai yang gaw ya Karai Kasang shi hpe hkye la mayu nga ai kun? Anhte yu yu ga!,” nga ma ai.

⁴⁴Shi hte rau jen da hkrum ai damya yan pyi gaw dai hte maren shi hpe jahpoi asawng mu ai.

⁴⁵Shani ka-ang jan pungding madi ai ten kaw nna shana de hkying masum du hkra, mung ting hta e nsin sin chyip rap rai mat ai.

⁴⁶Shana de hkying masum daram hta Yesu gaw nsen kaba hte “Elo-i Elo-i lema sabak htani,” nga nna jahtau ai. De a lachyum gaw, “Nye a Karai Wa e, nye a Karai Wa e, hpa rai nang ngai hpe kau da nga n ta?,” nga ai rai lu ai.

⁴⁷Dai makau e tsap nga ai ni nkau mi dai hpe na mu yang, “Shi Elia hpe shaga nga ai,” nga ma ai.

⁴⁸Shaloi jang, shanhte hta na marai langai mi gat sa nna, hka kamu la nhtawm, ntsin hkri hta tsing la nna, dai hpe kumba yan matu hta shakap nhtawm lu shangun na shakut ma ai.

⁴⁹Rai ti mung kaga ni mahtang, “Nga nga nu ga, Elia shi hpe sa hkye la na ru ai kun? Yu yu ga!,” nga ma ai.

⁵⁰Bai Yesu gaw nsen kaba hte jahtau let shi a nsa hti mat lu ai.

⁵¹Shaloi, Nawku Htingnu na nba grang gaw ntsa de nna htumpa hkren lahkawng brang ga mat ai. Ginding aga mung ashun awam wa nna, lunghkrung ni ga mat wa ma ai.

⁵²Lup ni mung hpaw mahka wa nna si mat sai Karai Kasang a masha ni law law wa bai hkrung rawt wa ma ai.

⁵³Shanhte gaw lup ni hta na pru wa shajang nna, Yesu si ai kaw na bai hkrung rawt wa ai hpang, dai chyoi pra ai mare de shang ma ai rai nna, dai kaw masha law law wa shanhte hpe mu ma ai.

⁵⁴Ya hpyen la dap kung langai mi up ai du wa hte shi hte rau Yesu hpe sin nga ai hpyen la ni gaw nnang nawn hte byin mabyin ni hpe mu mu yang, shanhte hkrit kahpra nna, “Kaja wa ndai wa gaw Karai Kasang a Kasha nan rai nga ai,” nga ma ai.

⁵⁵Galile mung kaw nna Yesu kaw hkan nang wa ai hte shi hpe galaw daw ai numsha ni law law mung, dai shara e nga nga ma ai rai nna, tsan tsan kaw nna ayu nga ma ai.

⁵⁶Shanhte hta Magdala Mari, Yaku hte Yosep a kanu Mari, hte Zebedi a madu jan ni lawm nga ma ai.

⁵⁷Ya, shana de du jang, Aramahti mare na Yosep mying ai sutsu ai wa langai mi sa du ai. Shi mung Yesu a sape langai mi rai nga ai.

⁵⁸Shi gaw Pilat hpang de shang nna, Yesu a hkum tsawp moi mang hpe hpyi wu ai. Shaloi Pilat gaw dai wa hpe ap ya dat na ahkang jaw wu ai.

⁵⁹Dai rai nna Yosep dai hpe la nhtawm lachyit sumpan hte ahkyen kayawp nna,

⁶⁰Yosep shi nan a matu lunghkrung lungrawk hta krawk da ai lup ningnan hta e bang tawn da wu ai. Dai hpang lung byen kaba mung, dai lup a mahka e shi galau pat da nna wa mat ai.

⁶¹Dai yang e Magdala Mari hte kaga Mari yan lup de man yawng let tawtap e dung nga ma ai.

⁶²Hpang shani, Yuda ni a Laban Nhtoi rai nga ai dai laban kru ya du ai shaloi, hkinjawng agyi ni hte Hparishe ni Pilat hpang de sa zuphpawng nna,

⁶³“Madu e, ndai masu hkalem ai wa naw hkrung nga yang, masum ya nhtoi hta e ngai bai hkrung rawt wa na nngai, nga nna shi tsun ai hpe anhte dum sagaw ai.

⁶⁴Dai majaw shi a sape ni shi hpe sa lagu la nhtawm, ‘Si mat ai kaw na bai hkrung rawt wa sai ngu nna shawa masha ni hpe n tsun lu hkra, masum ya nhtoi tup dai lup hpe sin nga mu ga,’ hkang da u: shing n rai yang gaw, shawng na masu hkalem ai lam hta hpang na mahtang grau sawng na ra ai,” ngu mu ai.

⁶⁵Pilat gaw nanhte hpyen hpung langai mi shaga la nna, “Shim lu ai made shim hkra lup hpe sa sin shangun tawn mu,” ngu nna shanhte hpe tsun dat mu ai.

⁶⁶Dai rai nna shanhte lup de sa wa nna dai chyinghka pat da ai lungbyen hpe dazik dawk ai hte lup hpe malawm magawm di nna pat da nhtawm, sin langa ni hpe sin shangun mu ai.