Read Jinghpaw Common Language Bible 2009 MAHTE 3 Bible Online

MAHTE 3 - Jinghpaw Common Language Bible 2009 bible

MAHTE 3

¹Dai ladaw a laman e, Hkalup sara Yawhan paw pru nna, Yuda nam mali hkan e,

²shi gaw, “Sumsing lamu a mungdan du magang ra ai majaw, nanhte a yubak mara ni kaw na myit malai lu mu!” nga nna hkaw tsun hpang wu ai.

³“Dai Madu a matu lam lajang da mu, Shi a matu, hkawm sa wa na lam masun ni hpe shading mu, nga nna nam mali kata e masha langai mi jahtau nga ai,” nga nna myihtoi Esaia tsun ai wa gaw Yawhan hpe nan ngu ai rai nga ai.

⁴Dai Yawhan gaw, gawla-uk mun hte da ai nba hpe bu hpun nna shanhpyi shingkyit hpe nshang e kyit da nga ai. Shi a lusha gaw, dinggam-yaw hte nam na lagat ntsin rai nga lu ai.

⁵Yerusalem mare na masha ni, Yuda mung ting na ni hte Yawdan hka makau ginwang shara magup hkan na masha ni shi hpang de pru sa ma ai.

⁶Shanhte gaw tinang a yubak mara ni hpe shapraw shadan yin la ma ai majaw, Yawhan gaw shanhte hpe Yawdan hka hta hkalup jaw mu ai.

⁷Hparishe ni hte Saduke ni law law wa hkalup hkam la na nga nna shi kaw sa wa ma ai hpe Yawhan mu wu yang, shi shanhte hpe, “Pu htum amyu ni e, Karai Kasang kaw na du magang ra ai ari hta na hprawng lawt mat lu myit ga, nanhte hpe kadai tsun shadum da myit ta?,” ngu nna tsun mu ai.

⁸Dai majaw, nanhte a yubak mara ni kaw na myit malai lu nna kayin wa sai lam nanhte a arawn alai hte madun dan mu!

⁹Abraham gaw anhte a kaji kawa rai nga mali ai nga nna tsun nga ai hte sha nanhte a yubak mara a ari kaw na lawt lu na zawn hkum nawn myit, nanhte hpe ngai tsun made ga, Karai Kasang gaw ndai nlung ni hpe la nna Abraham a matu kashu kasha ni hpe hpan shalat lu nga ai!

¹⁰Hpun ni hpe ru npawt kaw nna kran daw kau na matu ningwa hpe hkyen tawn da chyalu rai nna, asi kaja n si ai hpun shagu hpe kran daw kau nna, wan hta kabai bang kau na ra ai.

¹¹Nanhte myit malai lu sai lam madun na matu ngai nanhte hpe hka hta hkalup jaw made ai, rai ti mung, nye a hpang e du sa na ra ai wa gaw nanhte hpe Chyoi Pra ai Wenyi hta mung, wan hte mung hkalup jaw na myit dai. Shi gaw ngai hta grau galu kaba nga ai rai nna, shi a kyepdin gun na pyi ngai n ging n dan nngai.

¹²Shi a lata hta mam yit jasan na matu hkuwawn shi lang da nga ai. Shi a mam chyarang hpe shi yit jasan nhtawm, shi a mam gu hpe gaw mam dum hta shinggyin bang da nna, mam nsan hpe gaw galoi mung n krip ai wan hta nat kau na ru ai, ngu mu ai.

¹³Dai aten e Yesu gaw, Yawhan a lata hta hkalup hkam la na nga, Galile mung kaw nna, Yawdan hka makau e nga ai Yawhan hpang de du sa wa ai.

¹⁴Rai ti mung Yawhan gaw, Yesu a myit ai lam galai kau ya na matu, “Ngai mahtang she nang kaw nna hkalup hkam la na ra nga nngai, nang mahtang ngai kaw du sa rin ni?,” ngu nna shi hpe hkap ndang let tsun wu ai.

¹⁵Shaloi Yesu gaw, “Ya dai shabyin ya rit, hpa majaw nga yang, ding man ai lam shagu hpe shadik lu u ga, an a matu sut nga mali ai,” ngu nna shi hpe htan wu ai: shaloi shi hpe dai lam shabyin ya wu ai.

¹⁶Ya, Yesu hkalup hkam la ngut ai hte rau, dai hka hta na byawn hprang rai lung wa ai. Dai shaloi lamu hpaw malang wa nhtawm, Karai Kasang a Wenyi gaw hkrudu langai mi zawn yu hkrat wa nna shi a ntsa e dung nga ai hpe shi mu wu ai.

¹⁷Dai hpang, “Ndai wa gaw ngai sharawng awng nga ai, ngai tsaw ra ai Kasha rai nga li ai,” nga nna lamu de na nsen ngoi pru wa ai.