Read Jinghpaw Common Language Bible 2009 MAHTE 6 Bible Online

MAHTE 6 - Jinghpaw Common Language Bible 2009 bible

MAHTE 6

¹Nanhte hpa galaw ai hpe masha ni mada mu lu mu ga, shawa a man e sha nanhte a nawku htung hte seng nna galaw daw ra ai amu ni hpe n galaw myit ga, sadi nga mu; shing n rai yang gaw, sumsing lamu hta nga ai nanhte a Kawa kaw na hpa shabrai mung nanhte n lu na myit dai.

²“Dai rai nna ra kadawn nga ai masha langai mi hpe lama ma alu jaw n-yang gaw, masha ni zawn, tara jawng ni hte lam hkan e tinang hkum dan dawng hkra pahtau hkum dum myit. Ngai nanhte hpe teng teng tsun made ga, shanhte gaw tinang a shabrai yawng lu la manu ai,

³Nang mahtang alu jaw n-yang gaw, na a hkra lata galaw ai amu hpe na a pai lata n chye lu u ga;

⁴dai shaloi she, na a alu jaw ai amu gaw, n dan n leng ai amu tai nna, n dan n leng ai hku galaw ai amu hpe mu lu ai na Nwa gaw, nang hpe bai htang na rin dai.

⁵Nanhte akyu hpyi myit yang, sawt ai masha ni zawn hkum rai myit! Shanhte gaw masha shagu shanhte hpe mu lu mu ga, tara jawng ni hta, mare lam mashe ni hta tsap nga nna akyu hpyi nga na tsaw nga ma ai. Nanhte hpe ngai teng teng tsun made ai gaw, shanhte tinang a shabrai lu la manu ai.

⁶Rai ti mung nanhte mahtang akyu hpyi ai shaloi, nta kata gawk de shang nna, chyinghka hpe la da nhtawm, myi hte n mu lu ai nanhte a Kawa kaw hpyi mu; n dan n leng ai hku galaw ai amu hpe mu lu ai nanhte a Kawa gaw, nanhte hpe bai htang jaw na marin dai.

⁷Nanhte akyu hpyi ai shaloi maigan masha ni zawn lachyum n pru ai ga ni tsun kahtap htap hkum rai myit, dai maigan masha ni gaw shanhte galu galang akyu hpyi ai majaw, shanhte a hpara ni madat ya na zawn nawn nga ma ai.

⁸Nanhte chyawm gaw shanhte hte hkum bung nga myit, nanhte a Kawa gaw nanhte garai n hpyi kaw nna pyi, nanhte hta hpa ra nga ai hpe chye ya nga chyalu rai nga ai.

⁹Dai rai nna nanhte ning ngu akyu hpyi mu: ‘Sumsing lamu na anhte a Wa e, Na a mying nsang chyoi pra nga lit ga,

¹⁰Na a mungdan du wa ru ga, Lamu tang hta na a myit dik nga ai hte maren, ga ntsa e mung dik lit ga law;

¹¹Anhte hta ra ai lusha, dai ni anhte hpe jaw mi;

¹²Masha ni anhte hpe shut ai mara, anhte raw kau ya ai zawn, anhte a mara hpe mung raw kau ya mi;

¹³Agung alau nga ai de anhte hpe n sa shangun ai sha, n kaja ai lam hta na mung shaw la mi law, (N gawn tawa hpe hkang ai ahkang hte hpung shingkang arawng sadang gaw, htani htana nang hta anga nga u ga law) Amen.

¹⁴“Nanhte gaw masha ni nanhte hpe shut hpyit ai mara ni hpe raw kau ya myit yang gaw, sumsing lamu na nanhte a Kawa mung, nanhte a mara ni hpe raw kau ya na myit dai.

¹⁵Rai ti mung nanhte gaw masha ni shut hpyit ai hpe nanhte n raw kau ya myit yang gaw, nanhte a Kawa mung, nanhte a shut hpyit ai hpe n raw kau ya na myit dai.

¹⁶“Nanhte lusha gam myit yang, sawt ai masha ni zawn yawn kanyung ai myi man nsam hkum shapraw myit. Shanhte gaw tinang lusha gam nga ai lam shadan dan mayu nna, shanhte a myi man hpe jasum ma ai. Nanhte hpe ngai teng teng tsun made ga, shanhte tinang a shabrai yawng lu la manu ai.

¹⁷Nang mahtang lusha gam n-yang gaw, na a myi man myit kau nna, na a kara sau chya nna masit kau u.

¹⁸Shing rai nang lusha gam nga ai hpe masha kaga ni n chye ya lu ai sha, n mu lu ai shara e nga ai na Nwa chyu sha chye ya na ra ai rai nna, n dan n leng ai shara hta e nang galaw ai amu hpe mu ai na Nwa gaw nang hpe htang jaw na rin dai.

¹⁹“Manut hte nhkan e sha jahten nhtawm, lagu lagut ni tawk htu nna lagu la lu ai, dinghta ga ntsa e, nanhte a matu sutgan hpe hkum mahkawng da mu.

²⁰Shing rai na malai, manut hte nhkan e n sha jahten lu nna, lagu lagut ni e mung n tawk htu lu ai hte n lagu la lu ai, sumsing lamu hta e nanhte a matu sutgan hpe mahkawng da mu.

²¹Hpa majaw nga yang, na a sutgan nga ai kaw na myit masin galoi mung nga na ra ai.

²²“Myi gaw hkum a matu pyengdin langai mi zawn rai nga ai; na a myi asan sha rai nga yang gaw, na a hkum ting htoi san nga na ra ai.

²³Rai ti mung na a myi n kaja nga yang gaw, na a hkum ting nsin sin nga na ra ai. Dai rai nna nang hta rawng ai nhtoi nsin tai mat yang gaw, dai nsin gaw gade htat nga a hka!

²⁴“Kadai rai ti mung, madu lahkawng a nchyang n tai lu ai; shi gaw langai mi hpe n dawng nna langai wa hpe tsaw ra na wu ai; langai mi hta sadi dung nna, kaga hpe n kaw n law di na wu ai. Nanhte Karai Kasang hpe mung, mungkan ga a sutgan hpe mung rau chyang lu na myit dai n rai.

²⁵“Dai rai nna ngai nanhte hpe tsun made ai gaw, asak hkrung nga lu na matu hpa lu hpa sha na, shing n rai hkum hkrang a matu hpa bu hpa hpun na lam hkum tsang myit; dai asak gaw lu sha hta, hkum hkrang gaw hpun palawng ni hta grau hpu ging nga ai n rai ni?

²⁶Ntsa malen na u ni hpe mada yu mu, shanhte nli n gat n dan ma ai, mam dum ni hta mung n mahkawng bang da ma ai. Shing re ai ni hpe pyi, sumsing lamu na nanhte a Kawa gaw, shanhte hpe lusha jaw da nga ai! Nanhte gaw dai u ni hta grau nga myit dai n rai ni?

²⁷Nanhte hta na kadai rai ti mung, myit tsang ai hte tinang a prat hpe loi mi galu jat shangun lu myit ni?

²⁸“Bai hpun palawng ni a matu hpa rai myit tsang nga myit ta? Nam na nampan ni kaning rai tu kaba wa ma ai hpe yu nna myit sumru yu nga mu; shanhte gaw magan bungli mung n galaw, shanhte a hpun palawng a matu ri mung n ri ma ai.

²⁹Rai ti mung, ngai nanhte hpe tsun made ai gaw, lu su dik ai Hkawhkam Shawlumon pyi dai nampan ni hta na langai mi zawn tsawm htap hkra bu hpun lu ai n rai.

³⁰Karai Kasang hta kam sham ai myit n law ai masha baw e! Dai ni nga nna, hpawt de wan mang hta kabai bang kau ai nam na tsingdu hpe pyi Karai Kasang shing rai jahpun da ai rai yang gaw, dai hta grau nna nanhte hpe jahpun na myit dai n rai ni?

³¹Dai re ai majaw anhte hpa sha na, hpa lu na, hpa bu hpa hpun na i? nga nna myit hkum ru hkum tsang nga myit.

³²Ndai lam ni gaw Karai Kasang hpe n kam n sham ai tara maigan ni hta myit tsang ai lam ni rai nga malu ai. Ndai yawng mayawng hte hpe nanhte ra nga myit dai gaw, Sumsing lamu na nanhte a Kawa chye ya nga ai.

³³Shing rai na malai nanhte gaw, shi a mungdan hte shi a ding hpring ai lam hpe shawng tam nga mu; shaloi dai kaga ra ai nlang hte hpe shi nanhte hpe kahtap jaw na marin dai.

³⁴Dai rai nna, hpawt ni na matu myit hkum tsang myit; hpawt ni na hte seng ai myit tsang ai lam ni gaw hpawt ni na matu law nga ai. Lani mi na ru tsang ai gaw, dai shani na matu ram nga ai.