Read Jinghpaw Common Language Bible 2009 MAHTE 9 Bible Online

MAHTE 9 - Jinghpaw Common Language Bible 2009 bible

MAHTE 9

¹Yesu gaw li de shang nna, nawng hpe rap ai hte tinang a mare [1] de du wa ai.

²Shaloi, masha nkau mi gaw, yup ra hta taw nga ai katsing si ai masha langai mi hpe, shi hpang de hpai sa ma ai. Yesu gaw shanhte hta kam sham ai myit gade daram rawng ai hpe mu jang, “Sha e, ngwi pyaw nga n-ga, na a yubak dat kau ya ai hkrum nit dai,” ngu katsing si ai wa hpe tsun wu ai.

³Dai rai nna tara sara nkau mi gaw, “Ndai wa Karai Kasang hpe shatan nhkan ai ga tsun nga ai,” nga nna tinang a kraw kata e tsun ma ai.

⁴Yesu gaw shanhte a myit mang ai hpe chye ya jang, “Nanhte a kraw lawang ni hta e, hpa majaw n kaja ai myit nga myit ta?

⁵Na a yubak dat kau ya sai; shing n rai, rawt hkawm wa u, ning ngu tsun ai ga yan hta, gara mahtang grau tsun loi a ta?

⁶Rai ti mung, “Dai Masha Kasha gaw, ga ntsa e yubak dat kau ya ai ahkang aya lu ai gaw nanhte chye lu myit ga,” nga tsun let, dai katsing si ai wa hpe, “Rawt u, na a hpun nba panep hpai la nna na a nta de wa u!,” ngu wu ai.

⁷Dai masha mung rawt nna shi a nta de wa mat ai.

⁸Dai hpe mu ai shawa masha ni, hkrit kamyin nga ma ai rai nna, shinggyim masha ni hpe ning re ai ahkaw ahkang jaw ai Karai Kasang hpe shakawn shagrau nga ma ai.

⁹Yesu gaw dai shara kaw na sa mat wa yang, shi a kang hta ai sum e dung nga ai Mahte ngu ai kang hta ai wa hpe mu hkrup nna, “Ngai kaw hkan nang rit,” ngu shi hpe tsun wu ai. Shaloi Mahte rawt nna shi kaw hkan nang nga ai.

¹⁰Yesu gaw Mahte a nta e shana shat sha let dung nga yang, kang hta ai ni hte yubak kap ai masha law law wa, Yesu hte shi a sape ni hte rau sha ku hta sa dung lawm nga ma ai.

¹¹Hparishe nkau mi dai hpe mu ma yang, shanhte gaw, “Nanhte a sara gaw kang hta ai ni hte rau hpa rai shat pawng sha a ta?,” nga nna shi a sape ni hpe san mu ai.

¹²Shi gaw dai ga na jang, “Hkam kaja ai ni tsi sara n ra ma ai; machyi ai ni sha ra ma ai.

¹³Dai rai nna, ‘Dusat hkungga jaw ai lam n rai, matsan dum ai lam sha ngai tsaw nga nngai,’ nga ai chyum ga a lachyum hpe chye lu myit ga, sa hkan tam sharin la mu; hpa majaw nga yang, ding hpring ai ni hpe shaga na matu n rai, yubak kap ai ni hpe shaga na matu she ngai sa du ring ngai,” ngu mu ai.

¹⁴Shaloi Hkalup sara Yawhan a sape ni Yesu kaw sa du nna, “Anhte hte Hparishe ni, ya sha ya sha lusha gam gam rai ga ai mi, na a sape ni hpa majaw lusha n-gam nga ma hka?,” ngu mu ai.

¹⁵Yesu gaw shanhte hpe, “La nnan wa a hkungran gawk hte seng ai manaw manang ni gaw, la nnan wa hte rau naw nga nga yang, shanhte yawn hkyen hkrum na ma hka? N rai law! Rai ti mung, la nnan wa hpe shanhte kaw na jahka la kau ya ai nhtoi du na ra ai; dai shaloi shanhte lusha gam na mara ai.

¹⁶Palawng dingsa hpe garai n htun ai sumpan nnan achyen hte kadai n kapa ga ai; shing di yang, sumpan nnan achyen gaw htun wa na ra ai rai nna palawng dingsa hpe gang ai majaw de a je ai hku gaw grau kaba wa ai.

¹⁷Sabyi nnan hpe mung shanhpyi ndum dingsa ni hta kadai mung n bang da ga ma ai; shing di yang sabyi ndum ni kapaw wa ai hte sabyi yun mat nna, sabyi ndum ni hten mat ma ai. Shing rai na malai sabyi nnan hpe ndum nnan hta bang da ma ai rai nna, dai lahkawng yan akaja nga ai.

¹⁸Yesu dai ga shanhte hpe naw tsun nga yang, tara jawng up ai Yuda agyi langai mi shi kaw sa du nna, shi a man e hput di let, “Nye a shayi sha, ya sha si mat sai; rai ti mung nang sa nna shi a ntsa e lata mara ya yang gaw, shi hkrung wa na ra ai,” ngu wu ai.

¹⁹Shing rai Yesu rawt nna, shi a sape ni hte rau, dai wa kaw hkan nang ma ai.

²⁰Ya shi lahkawng ning sai htaw machyi ai numsha langai mi mung Yesu a shingdu maga hku sit sa wa nna palawng ban byau matu hpe ahtawk wu ai.

²¹Dai numsha a kraw kata e mung, “Shi a palawng hpe sha pyi ahtawk lu yang gaw, ngai mai wa lu na rai nga ai,” nga nna tsun nga ai.

²²Yesu mahtang kayin yu nna shi hpe mu wu yang, “Shayi sha e, ngwi pyaw nga n ga, na a kam sham ai gaw nang hpe shamai ya nit dai,” ngu wu ai. Dai ahkying kaw nna nan dai numsha mai mat nga ai.

²³Dai hpang, Yesu gaw dai tara jawng agyi a nta de sa du nna, sumpyi dum ai ni hte sharung shayawt nga ai shawa masha ni hpe mu wu ai.

²⁴Shi gaw, “Yawng yen mu! Dai numsha ma gaw yup pyaw nga ai sha rai nga ai,” ngu mu ai. Shaloi shanhte yawng shi hpe mani asawng kau ma ai.

²⁵Rai ti mung, dai hpawng nga ai ni hpe shapraw kau ai hpang, Yesu dai numsha a gawk de shang nna, ma a lata hpe jum wu ai; shaloi dai numsha ma rawt wa ai.

²⁶Dai lam a shiga gaw dai mung ting hta pri chyam bra wa ai.

²⁷Yesu gaw dai shara kaw na sat sa wa yang, myi kyaw ai masha lahkawng shi kaw hkan nang let, “Dawi a Kasha e, an hpe matsan dum la mi,” nga nna jahtau ma ai.

²⁸Yesu dai nta de shang mat wa yang, dai myi kyaw ai yan shi kaw sa du ma ai rai nna, Yesu gaw, “Ngai nan hpe shamai ya lu na re ngu nna nan kam nga myit ni?,” ngu nna shan hpe san mu ai. Shan mahtang, “Rai sa, Madu e,” ngu mu ai.

²⁹Dai rai nna shan a myi hpe ahtawk nna, “Nan kam sham nga ai hte maren, byin wa malit ga,” ngu mu ai.

³⁰Shaloi shan a myi hpaw wa malu ai. Yesu chyawm gaw, “Kadai mung ndai hpe n chye lu mu ga sadi nga mu,” ngu nna shan hpe aja awa ginhtim da mu ai.

³¹Rai ti mung, shan gaw pru mat wa nna, Yesu a lam shiga hpe dai mung ting hta e shabrawng dat mu ai.

³²Dai yan pru mat wa jang, masha nkau mi gaw n chye shaga ai nat kap ai masha langai mi hpe shi kaw woi jashawn mu ai.

³³Rai ti mung, dai nat hpe shaden kau ai shaloi jang n chye shaga ai wa gaw shaga lu ai. Masha shagu mung mau nga ma ai hte, “Israela amyu hta ndai zawn re ai, galoi mung n mu yu ga ai!,” nga ma ai.

³⁴Rai ti mung Hparishe ni gaw, “Ndai gaw nat ni a agyi wa shi hpe n-gun atsam jaw ai majaw, nat ni hpe shaden kau lu nu ai,” nga ma ai.

³⁵Dai hpang Yesu gaw, mare kahtawng shagu hkan e kawan hkawm nna, shanhte a tara jawng ni hta sharin shaga ya ai hte sumsing lamu Mungdan a Kabu Gara Shiga hpe hkaw dan let, ana ahkya amyu myu hte, machyi makaw amyu myu hpe shamai shatsai ya mu ai.

³⁶Dai shawa hpawng ni hpe shi mu jang, shi shanhte hpe matsan dum da mu ai; hpa majaw nga yang, shanhte gaw sagu rem wa n nga ai majaw ru tsang hkrum ai hte bra mat wa ai sagu ni hte bung nga ma ai.

³⁷Dai rai nna shi a sape ni hpe shi tsun mu ai gaw, “Nmut shang shara law law nga ai, amu galaw na ni mahtang n law ma ai.

³⁸Dai majaw, shi a nmut hta amu galaw na masha shangun dat ya mu ga, mam madu kaw akyu hpyi nga mu,” ngu mu ai.