Read Jinghpaw Common Language Bible 2009 MARKU 1 Bible Online

MARKU 1 - Jinghpaw Common Language Bible 2009 bible

MARKU 1

¹Ndai gaw Karai Kasang a Kasha[1] Yesu Hkristu a lam Kabu Gara Shiga rai nga ai.

²Myihtoi Esaia a laika hta ka da nga ai hte maren: “Karai Kasang gaw, ‘Na lam lajang magang na matu nye a kasa hpe na a shawng e ngai shangun dat na we ai.’

³Nam mali kata e masha langai mi jahtau nga ai nsen gaw, ‘Dai Madu a matu lam lajang da mu; shi hkawm sa wa na matu lam hpe malang hkra shading mu!, nga ai,’” nga nna tsun hpang ai.

⁴Shing rai nam mali e Yawhan paw pru nna, hkalup[2] jaw ai hte hkaw tsun nga ai. Shi gaw, “Nanhte a yubak mara ni kaw na kayin wa nna hkalup hkam la mu, shing rai yang Karai Kasang gaw nanhte a yubak mara ni hpe raw dat kau ya na ra ai,” ngu nna masha ni hpe tsun mu ai.

⁵Yawhan hkaw tsun ai ga hpe madat la na matu Yerusalem mare hte Yuda mung hkan na masha ni law law pru sa wa ma ai. Shanhte gaw tinang a yubak mara ni hpe yin la ma ai rai nna, shi shanhte hpe Yawdan hka hta hkalup jaw mu ai.

⁶Yawhan gaw gawla-uk mun hte da ai hpun palawng bu hpun nna, shi a nshang e shanhpyi shingkyit kyit nga ai, shi a lusha gaw dinggam-yaw hte nam na lagat ntsin rai nga lu ai.

⁷Shi gaw shawa masha ni hpe, “Nye a hpang e du sa na ra ai wa gaw, ngai hta grau kaba ai wa rai nga ai. Shi a kyepdin sumri ni hpe gum raw ya na pyi ngai n ging n dan nngai.

⁸Ngai gaw nanhte hpe hka hta hkalup jaw made ai, rai ti mung shi gaw nanhte hpe Chyoi Pra ai Wenyi hta hkalup jaw na marin dai,” ngu nna hkaw tsun mu ai.

⁹Dai hpang gade nna yang, Yesu gaw, Galile ginwang Nazaret mare kaw nna sa du ai hte Yawhan a lata hte Yawdan hka hta e hkalup hkam la wu ai.

¹⁰Shaloi jang dai hka hta na pru lung wa yang, sumsing lamu hpaw malang wa nna dai Wenyi gaw hkrudu langai mi zawn shi a ntsa e yu hkrat wa ai hpe shi mu wu ai.

¹¹Lamu de na mung, “Nang gaw, nye a tsaw ra ai shadang sha rai nga ndai; nang hta ngai sharawng awng nga nngai,” nga nna nsen ngoi pru ai.

¹²Shaloi jang dai Wenyi gaw shi hpe nam mali de sa wa shangun dat wu ai.

¹³Dai yang e nhtoi mali shi ya tup shi nga nga ai rai nna Satan e gunglau ai hpe shi hkrum nga ai. Dai yang e nam na matse labye dusat ni mung nga nga ma ai, rai ti mung lamu kasa ni sa du nna shi hpe galaw daw ma ai.

¹⁴Yawhan hpe htawng hta rim bang kau ai hpang, Yesu gaw Galile mung de sa du nna Karai Kasang kaw na Kabu Gara Shiga hkaw tsun dan mu ai.

¹⁵Shi gaw, “Dai aten ladaw dik wa ai hte, Karai Kasang a mungdan gaw ni wa magang ra ai! Nanhte a yubak mara ni kaw na kayin wa nna Karai Kasang a Kabu Gara Shiga hpe kam sham nga mu!,” ngu nna hkaw dan mu ai.

¹⁶Galile Nawng makau e Yesu garet hkawm nga yang, nga hkan sha ai masha marai lahkawng hpe shi mu hkrup wu ai. Dai yan gaw Simun hte Andre yan nau rai nna sumgawn langai mi hte nga hkan nga ma ai.

¹⁷Yesu gaw shan hpe, “Ngai kaw hkan marit, masha hpe hkan hkwi na matu, ngai nan hpe sharin ya made ga,” ngu mu ai.

¹⁸Shaloi jang shan gaw sumgawn ni hpe kau da nna shi kaw hkan nang ma ai.

¹⁹Bai, shi loi mi shawng de hkawm sa wa yang Zebedi a kasha Yaku yan Yawhan hkan nau lahkawng hpe mu wu ai. Shanhte gaw dai li hta e, shanhte a sumgawn ni hpe kapa nna lajang shajin nga ma ai.

²⁰Yesu gaw shan hpe mu mada ai hte rau shan hpe shaga mu ai rai nna, nchyang ni hte rau li hta rawng nga ai shan a kawa Zebedi hpe kau da nna Yesu kaw hkan nang ma ai.

²¹Yesu hte shi a sape ni Kaperna-um mare de sa du ma ai rai nna, hpang shani Bansa Nhtoi e Yesu gaw tara jawng de shang nna sharin shaga nga ai.

²²Shi a sharin shaga ai lam hpe na la ai masha ni gaw mau mat ma ai, hpa majaw nga yang, shi gaw tara sara ni zawn n rai, ahkaw ahkang atsam hte sharin shaga nga ai.

²³Shaloi jang n san n seng ai nat kap ai masha langai mi tara jawng de shang wa ai.

²⁴Dai wa gaw, “Nazaret wa Yesu e, anhte nang hte hpa seng ga ta? Anhte hpe jahten kau na matu nang sa du n ni? Nang kadai re ai hpe ngai chye nga nngai, nang gaw Karai Kasang a Chyoi Pra ai Wa rai nga ndai!,” nga nna marawn jahtau ai.

²⁵Shaloi Yesu gaw, “Atsin sha nga u, shi kaw na pru mat wa u!,” ngu nna shi hpe daru kau wu ai.

²⁶N seng ai nat gaw dai masha hpe aja wa bu lashan shangun nna, nsen kaba hte kyek jahtau let shi kaw na pru mat wa ai.

²⁷Masha ni yawng mung mau mahka mat nna, “Ndai gaw hpa rai nga a ta? Sharin shaga ai lam ningnan lama mi rai nga a ni? Ndai masha wa hta n seng ai nat ni hpe hkang da ai lam ni jaw na daru magam ahkang aya nga nga ai rai nna, shanhte shi hpe madat mara nga ma ai,” nga nna shada da tsun ma ai.

²⁸Shaloi jang Yesu a lam shiga ni gaw Galile mung shara shagu hkan e chyam bra mat wa ai.

²⁹Dai hpang Yesu hte sape ni gaw Yaku yan Yawhan hte rau tara jawng na pru wa nhtawm, Simun yan Andre a nta de ding tawng sa shang ma ai.

³⁰Simun a kani hkum kahtet nna yup ra e machyi taw nga ai. Yesu du sa wa ai hte rau dai lam shi hpe tsun dan mu ai.

³¹Shaloi shi sit sa nna, shi a lata hte jum let machyi ai jan hpe sharawt wu ai. Shing rai shi hta hkum kahtet ai kawp mat nna, shi shanhte hpe galaw daw mu ai.

³²Ya, jan shang wa ai hpang shana ahkying du jang, masha ni gaw machyi makaw hkrum ai ni hte nat kap ai masha ni yawng hte hpe Yesu kaw woi sa ma ai.

³³Mare ting na masha ni yawng dai nta ndaw e sa hpawng de nga ma ai.

³⁴Yesu gaw ana ahkya amyu myu hte machyi ai masha law law hpe shamai ya nna, nat law law hpe mung shaden kau mu ai. Shi kadai rai nga ai hpe shanhte chye nga ma ai majaw, shi shanhte hpe ga tsun na ahkang n jaw mu ai.

³⁵Hpang jahpawt manap jau jau e, nhtoi garai n htoi yang shi yup rawt nna nta na pru mat wa ai. Shi gaw mare kata na pru nhtawm machyi shim ai shara de sa wa nna dai yang e akyu hpyi nga ai.

³⁶Simun hte shi a manang ni gaw pru sa nna Yesu hpe hkan tam hkawm nga ma ai.

³⁷Shanhte shi hpe mu jang, “Masha shagu nang hpe tam nga ma ai,” ngu nna tsun mu ai.

³⁸Rai ti mung Yesu gaw, “Ndai grup yin kaga mare kahtawng ni hta e ngai naw hkaw tsun ra nga ai majaw anhte sa wa saga: hpa majaw nga yang de a matu she ngai sa du ring ngai,” ngu mu ai.

³⁹Shing rai shi gaw Galile mung ting kawan hkawm nna tara jawng ni hta hkaw tsun dan let nat ni hpe shaden kau mu ai.

⁴⁰Manggang kap ai masha langai mi Yesu kaw sa nna, lahput hput di let, “Madu e, nang hkraw n yang gaw, ngai hpe shamai shatsai ya lu na rai nga ndai,” ngu nna shi hpe hpyi nem wu ai.

⁴¹Yesu gaw matsan dum [3] ai hte shi a lata ladawn nna ahtawk let, “Ngai hkraw nga nngai, san pra wa nu!,” ngu nna htan wu ai.

⁴²Shaloi jang, dai wa hta kap ai manggang ana mai tsai mat nna shi asan apra rai mat ai.

⁴³Dai hpang Yesu gaw dai wa hpe aja awa tsun htet nhtawm kalang ta tin tin wa kau shangun wu ai.

⁴⁴Shi hpe shing nga tsun ngut ai hpang, shi gaw, “Madat u, ndai byin ai lam kadai hpe mung hkum tsun dan et, rai ti mung hkinjawng wa kaw nang ading tawk wa nhtawm, na a hkum hpe jep yu shangun u. Dai hpang, nang mai tsai san pra mat sai lam masha law law a man e sakse tai na matu Mawshe htet da ai hte maren hkungga wa nawng u,” ngu nna htet matsun dat wu ai.

⁴⁵Rai ti mung dai masha wa gaw pru mat wa nna dai shiga hpe shara shagu aja awa hkai dan ai hte kajai gumhkawng dat wu ai rai nna Yesu gaw mare kata de dan dan leng leng n shang lu wu ai. Mare de shang na malai, masha katsi ai shara hkan e nga nga ai: shara magup hkan na masha ni mung shi kaw sa du ma ai.