Read Jinghpaw Common Language Bible 2009 MARKU 10 Bible Online

MARKU 10 - Jinghpaw Common Language Bible 2009 bible

MARKU 10

¹Dai hpang Yesu gaw dai shara na pru mat wa nna, Yuda mung de sa mat wa nhtawm, Yawdan hka hpe rap wu ai. Shawa masha wunawng wuwa shi hpang de sa hpawng nga ma ai rai nna galoi mung shi galaw nga ai hte maren shanhte hpe sharin shaga ya mu ai.

²Shaloi Hparishe nkau mi Yesu kaw sa du nna, shi hpe mara rim lu hkra hpaji daw ai hku nna, “Anhte a tara hta, masha langai mi tinang a madu jan hpe jahka kau na ahkang jaw da a ni?, anhte hpe tsun dan mi,” nga nna shanhte san ma ai.

³Yesu gaw, “Mawshe nanhte hpe kaning nga nna hkang da a ta?,” ngu nna ga san hte htan mu ai.

⁴Shanhte gaw, “Madu jan hpe jahka ai laika ka nna, shi hpe shabawn kau na Mawshe ahkang jaw da sai,” ngu mu ai.

⁵Yesu gaw, “Nanhte hpe sharin ya na nanhte a myit ja la nga malit dai majaw, shi nanhte a matu ndai tara ka da nu ai.

⁶Rai ti mung Chyum Laika ni hta tsun da nga ai hte maren, lamu ga nnan lat kaw nna lasha hte numsha hpe shi hpan da nu ai.

⁷De a majaw lasha gaw kanu yan kawa hpe kau da nna shi a madu jan hte rau kanawn mazum [19] nga na ra ai rai nna,

⁸shan lahkawng gaw hkum shan langai sha tai na mara ai. Shing rai shan gaw, lahkawng rai nga ma ai n rai, hkum shan langai sha rai nga ma ai.

⁹Dai rai nna, Karai Kasang matut da nu ai hpe, masha gaw n jahka kau u ga,” ngu mu ai.

¹⁰Shanhte nta nhku de bai shang wa yang, sape ni ndai lam shi hpe bai san mu ai.

¹¹Yesu gaw, “Tinang a madu jan hpe jahka kau nhtawm, num kaga hpe hkungran ai wa kadai mung shi a madu jan hpe shut ai wa rai nga ai.

¹²Dai hte maren, num langai mi mung tinang a madu wa hpe jahka kau nna, kaga la hte hkungran ai rai yang, la shaw ai amu galaw nu ai rai nga ai,” ngu mu ai.

¹³Masha nkau mi gaw ma kaji ni a ntsa e lata mara nna shaman ya mi ga nga nna shi hpang de woi sa ma ai. Rai ti mung sape ni mahtang shanhte hpe daru kau mu ai.

¹⁴Yesu dai hpe mu yang, myit yu pawt nga ai rai nna, “Ma ni hpe ngai hpang de sa shangun maru, shanhte hpe hkum jahkring shingdang da myit, hpa majaw nga yang, Karai Kasang a mungdan gaw, dai zawn re ai ni a mungdan rai nga ai.

¹⁵Nanhte hpe ngai teng teng tsun made ga, kadai rai ti mung, Karai Kasang a mungdan hpe ma kaji langai mi zawn n hkap la ai wa gaw, dai hta e kaja wa n shang lu na ra ai,” ngu nna shanhte hpe tsun mu ai.

¹⁶Shaloi ma ni hpe shi a lata hte pawn la nna, shanhte langai hte langai a ntsa e lata mara let shaman ya mu ai.

¹⁷Yesu bai hkawm sa wa na matu pru sa wa magang nga yang, masha langai mi shi kaw gat sa du nna, shi a man e hput di let, “Mai kaja ai Sara e n htum n wai asak lu la hkra, ngai hpa mi galaw na rai ta?,” ngu nna shi hpe san wu ai,

¹⁸Yesu gaw, “Ngai hpe mai kaja ai hpa rai nga n ta? Karai Kasang hta kaga mai kaja ai kadai mung n nga ai.

¹⁹Jep ai tara hta Masha hkum sat, masha num hkum shaw, hkum lagu, n teng n man ai sakse hkum hkam, maw sha map sha hkum rai et, na nnu yan nwa hpe hkungga lara di u, nga ai hkang da ai ga ni hpe nang chye nga ndai,” ngu nna shi hpe tsun wu ai.

²⁰Dai wa gaw, “Sara e, dai yawng mayawng hte hpe brang ram prat kaw nna ngai hkan se ai,” ngu nna Yesu hpe htan wu ai.

²¹Yesu shi hpe tsaw ra ai hte azi yu let, “Lam langai mi sha nang naw ra nga ndai: nang wa su, nang lu malu hpe dut kau nna, matsan mayan ni hpe karan jaw u. Shing rai jang sumsing lamu ntsa e nang sut gan lu na rin dai; dai hpang ngai kaw sa nna hkan nang rit,” ngu nna shi hpe san wu ai.

²²Dai wa gaw, dai ga na ai shaloi, myi man sum mat nna, myit yawn la ai hte hprang rai wa mat ai, hpa majaw nga yang, shi grai lu su ai wa rai nga ai.

²³Yesu gaw sape ni hpe kayin mada yu nna, “Sut su ai ni gaw, Karai Kasang a mung dan hta shang na gade wa yak la nga a hka!” ngu nna tsun mu ai.

²⁴Sape ni mahtang dai ga ni a majaw mau kajawng nga ma ai, rai ti mung Yesu matut nna shanhte hpe tsun mu ai gaw, “Ngai sha ni e, Karai Kasang a mungdan hta shang na gade wa yak la nga a hka!

²⁵Samyit na hku gawla-uk langai mi gale na matu loi yang loi na nhten! Lu su ai wa langai mi Karai Kasang a Mungdan hta shang na mahtang grau yak la nga ai,” ngu mu ai.

²⁶Dai lam a majaw sape ni gaw mau mak mat ma ai rai nna, “Shaloi gaw kadai wa mi hkye hkrang la ai hkrum lu na rai ta?,” ngu nna shada da san hkat nga ma ai.

²⁷Yesu gaw shanhte hpe azi yu nna, “Dai amu gaw masha n dang di lu ti mung, Karai Kasang gaw dang di lu nga ai, Karai Kasang gaw yawng mayawng hpe dang di lu nga ai,” ngu wu ai.

²⁸Dai shaloi Petru gaw, “Yu u, anhte arai yawng mayawng hpe kau da nna nang kaw hkan nang saga ai,” ngu nna tsun pru wa ai.

²⁹Yesu gaw, “Rai nga ai, nanhte hpe ngai teng teng tsun made ga, nye a matu mara hte dai Kabu Gara Shiga a matu mara; dum nta, kahpu kana, kanu kawa kashu kasha, yi sun hkauna ni hpe kau da ai wa kadai rai ti mung,

³⁰ndai prat hta e zingri zingrat hkrum ai lam ni hte hpawn, dum nta ni kahpu kanau ni, kajan ni, kashu kasha ni hte yi sun hkauna ni hpe htam latsa n ga lu la na ru ai. Dai hta n ga htawm hpang prat e mung n htum n wai asak lu la na ra ai.

³¹Rai ti mung, shawng nga ai ni law law wa, hpang hkrat na mara ai; hpang hkrat ai ni mahtang gaw, shawng na mara ai,” ngu wu ai.

³²Ya Yesu hte shi a sape ni gaw Yerusalem mare de lung wa ai lam e rai nga ma ai. Yesu gaw sape ni a shawng e sa wa nga ai; sape ni mahtang hkrit kahpra bu nga ma ai; hpang e hkan nang ai masha ni mung hkrit nga ma ai. Kalang mi bai sape shi lahkawng hte hpe kaga hkran di shaga la nhtawm, shi hta byin magang ra ai lam ni, shanhte hpe tsun dan mu ai.

³³Shi gaw, “Madat mu anhte Yerusalem mare de lung wa nga ga ai; dai kaw Masha Kasha gaw hkinjawng agyi ni hte Tara Sara ni a lata de ap kau ai hkrum na ra ai. Shanhte shi hpe si na lam daw dan nna maigan amyu ni a lata de ap kau na maru ai.

³⁴Shanhte gaw shi hpe asawng asang di nna, mayen mahtaw bun ai hte, shi hpe anu kayat nhtawm, sat kau na maru ai; rai ti mung masum ya nhtoi a hpang e shi bai hkrung rawt wa na ra ai,” ngu nna tsun mu ai.

³⁵Dai shaloi Zebedi a kasha Yaku yan Yawhan gaw Yesu hpang de sit sa nna, “Sara e, an a matu nang lama mi galaw ya mi ngu nna shangun mayu nga ga ai,” ngu nna tsun ma ai.

³⁶Yesu gaw, “Ngai nan a matu hpa galaw ya na ra nga myit ta?,” ngu nna shan hpe san mu ai.

³⁷Shan gaw, “Nang hpung shingkang hte na a mungdan tingnyang hta dung nna up nga lu ai shaloi, na a hkra maga de langai mi, pai maga de langai mi dung nga lu na ahkang jaw mi,” ngu nna shi hpe tsun mu ai.

³⁸Yesu gaw, “Nan hpa hpyi nga ai hpe, nan n chye nga myit dai, Ngai lu lu na rai nga ai nni nkri ngu ai gawm hpe nan lu lu na rai nga myit ni? Ngai hkam la na rai nga ai hkalup hpe nan hkam la lu na myit ni?,” ngu nna shan hpe san mu ai.

³⁹Shan gaw, “An rai lu na ga ai,” ngu mu ai. Yesu gaw, “Kaja wa ngai lu na rai nga ai gawm hpe nan lu na rai nga myit dai; ngai hkam la lu na rai nga ai hkalup hpe nan hkam la na rai nga myit dai.

⁴⁰Rai ti mung nye a hkra maga hte pai maga de kadai dung lu na ngu nna lata san da na ahkang ngai n lu nngai. Dai gaw, Karai Kasang shi hkyen lajang da ya ai masha ni a matu she rai na rai nga ai,” ngu nna tsun mu ai.

⁴¹Ya kaga sape ni marai shi, dai lam shiga na mu yang, Yaku yan Yawhan hpe masin pawt da mu ai.

⁴²Dai majaw Yesu gaw shanhte yawng hte hpe shaga la nna, “Maigan amyu ni a up hkang ai ni ngu nna sawn la hkrum ai masha ni gaw, mung masha ni a ntsa e daru magam hte reng sha nga ma ai hte, dai ningbaw ningla ni gaw atik anang re ai ahkang aya hpe jai lang nga ma ai hpe nanhte chye nga myit dai,

⁴³Nanhte shada da hta chyawm gaw dai hku rai na n rai: nanhte hta na grau kaba ai wa tai mayu ai wa kadai rai ti mung, shi gaw kaga ni a shangun ma tai lu na rai nga ai.

⁴⁴Bai nna, nanhte hta na nambat langai masha tai mayu ai wa gaw yawng a mayam tai lu na rai nga ai.

⁴⁵Hpa majaw nga yang, dai Masha Kasha wa pyi, masha hpe yam sha na nga nna du sa ai n rai; Masha hpe galaw daw ya na hte shi a asak hpe nawng ya kau nna masha law law hpe hkye mawai shaw la na matu du sa ai,” ngu nna tsun mu ai.

⁴⁶Madu hte sape ni gaw Yerihko mare de du ma ai. Bai Yesu gaw shi a sape ni hte, masha wunawng wuwa kaba hte rau, Yerihko mare de na pru wa ma yang, Timi-yas (Timaeus) ngu ai wa a kasha Bartimi-yas ngu ai myi kyaw nna hpyi sha ai wa langai mi lam makau e dung nga ai.

⁴⁷Shi gaw Nazaret wa Yesu nga nga ai hpe na wu yang, “Dawi a Kasha Yesu e! Ngai hpe matsan dum la e law,” ngu nna hpyi jahtau wu ai.

⁴⁸Masha law law wa shi atsin sha nga mat u ga, shi hpe jet kau mu ai. Rai ti mung shi gaw, Dawi a kasha e! ngai hpe matsan dum la e law,” ngu nna grau jahtau shaja wu ai.

⁴⁹Yesu gaw hkring tsap let, “Shi hpe shaga wa marit,” ngu mu ai. Dai rai nna shanhte gaw dai myi kyaw ai wa hpe shaga wa mu ai. Shanhte gaw, “Myit pyaw kabu nga nu! Rawt u, Shi nang hpe shaga nga ai,” ngu mu ai.

⁵⁰Shi gaw shi a hpun nba raw kau da ai hte, gumlawt rawt nna Yesu hpang de sit sa wa ai.

⁵¹Yesu gaw shi hpe, “Ngai na a matu hpa di ya na nang ra n ta?,” ngu nna san mu ai. Myi kyaw ai wa gaw, “Sara e ngai myi bai mu mayu nngai law,” ngu nna htan wu ai.

⁵²Yesu gaw, hkawm wa su; na a kam sham ai gaw nang hpe shamai ya nit dai,” ngu nna shi hpe tsun wu ai. Dai wa gaw shaloi jang myi mu lu nna Madu sa wa ai lam e shi kaw hkan nang nga ai.