Read Jinghpaw Common Language Bible 2009 MARKU 14 Bible Online

MARKU 14 - Jinghpaw Common Language Bible 2009 bible

MARKU 14

¹Ya, Shalai Wa ai Poi hte matsi n rawng ai muk sha ai Azuma poi du na lahkawng ya sha ra sai. Shaloi hkinjawng agyi ni hte Tara Sara ni gaw Yesu hpe kaning di nna makoi magap ai hku rim la nhtawm sat kau lu na lam tam nga ma ai.

²Rai ti mung shanhte gaw, mung masha ni kabring kabrawng rai wa na hpe tsang ai majaw, “Poi laman hta anhte dai n galaw ga,” nga nna shanhte tsun ma ai.

³Yesu gaw Behtani kahtawng na manggang ana kap yu ai Simun a nta e du nga ai. Ya, Yesu lusha sha dung nga yang, numsha langai mi gaw, nachying hpu ging nna manam pyaw ai mura nardu sau jet hpring hkra rawng ai lunghpraw ndum langai mi lang nna shang wa ai. Shi gaw dai hpe gang daw nna Yesu a baw hta e ru bun ya wu ai.

⁴Dai yang na masha nkau mi yu pawt nga ma ai hte, “Ndai zawn manam pyaw ai sau hpe lahpawt lama di kau ai gaw hpa akyu nga ai i?

⁵Dai hpe gumhpraw lap masum tsa hte dut la nhtawm, lu ai gumhpraw hpe matsan mayan ni hpe karan jaw lu na rai nga ai,” nga nna shada da tsun hkat ma ai. Bai numsha hpe mung shanhte aja wa mara shagun daru kau mu ai.

⁶Rai ti mung Yesu gaw, “Dai numsha nga nga u ga! Nanhte hpa rai nna shi hpe shatsang nga myit ta? Shi gaw kaja ai hte tsawm htap ai amu nye a matu galaw nu ai.

⁷Matsan mayan ni gaw nanhte hte rau galoi mung anga nga na ma ai rai nna, nanhte ra ai aten galoi rai tim shanhte hpe karum la lu myit dai. Rai ti mung ngai gaw nanhte hte rau tut nawng nga nga lu na n rai.

⁸Shi gaw shi rai lu ai hte maren galaw nu ai; shi gaw manam pyaw ai sau nye a hkum hta ru bun nna lup makoi na shawng e hkyen lajang ai bungli galaw ya ni ai.

⁹Ngai nanhte hpe teng teng tsun made ai gaw, dai Kabu Gara Shiga hpe mungkan ting hkaw tsun ai shara shagu hta e, shi hpe dum na matu ya shi galaw ai amu hpe hkai dan na maru ai,” ngu nna tsun mu ai.

¹⁰Shaloi sape shi lahkawng hta na langai mi rai nga ai Yuda Iskarut gaw, Yesu hpe hkinjawng agyi ni a lata de ap ya na matu shanhte hpang de pru sa wa ai.

¹¹Shanhte gaw shi sa tsun ai ga hpe na ma yang, kabu gara nga ma ai rai nna shi hpe gumhpraw jaw na ga sadi hkam la ma ai. Dai rai nna Yesu hpe kaning di nna shanhte a lata de ap ya lu na, ahkaw ahkang ginjang kaja tam magang nga ai.

¹²Ya Shalai Wa Ai Sagu Kasha hkungga ni sat nna Matsi n rawng ai Muk sha ai Azuma poi a nnan shani e, Yesu a sape ni gaw, “Dai Shalai wa ai Poi sha na, gara shara hta e na a matu anhte hpe sa shachyip shangun mayu nga n ta?,” ngu nna shi hpe san mu ai.

¹³Shaloi Yesu gaw shi a sape lahkawng hpe, “Dai mare de sa masu, ntsin di bu hpai ai la langai mi gaw nan hpe hkap tau la na ra ai.

¹⁴Shi kaw hkan nang wa mu. Shi shang wa ai nta na nta madu wa hpe nye a sape ni hte rau dai Shalai Wa Ai Poi ngai sha lu na, gawk kanang rai ta? nga nna sara gaw san shangun dat mi ai ngu mu.

¹⁵Shaloi shi gaw, lajang shachyip jahting da ai ntsa gawk kaba langai mi nan hpe madun na ra ai. Dai yang e anhte a matu ra mara shachyip da mala,” ngu nna matsun nhtawm shangun dat mu ai.

¹⁶Dai sape yan pru sa wa nna mare de shang wa ma yang, Yesu shan hpe tsun da mu ai hte maren mu ma ai rai nna, dai Shalai Wa Ai Shana Shat Sha Poi shachyip da ma ai.

¹⁷Ya nrim rim rai yang dai sape shi lahkawng hte rau shi sa du ai.

¹⁸Shanhte sha ku grup dung nna sha nga ma yang, Yesu gaw, “Ngai nanhte hpe teng teng tsun made ga, ngai hte rau sha nga ai, nanhte hta na marai langai mi, ngai hpe ap kau na ra ai,” ngu mu ai.

¹⁹Sape ni myit yawn nna, langai hte langai, “Dai wa gaw kaja wa ngai rai na a ni?,” ngu nna Madu hpe san mu ai.

²⁰Yesu gaw, “Dai wa gaw nanhte shi lahkawng hta na langai wa mi rai nna, shi a muk hpe ngai hte rau wan hta tsing manaw sha nga ai wa rai nga ai.

²¹Dai Masha Kasha gaw Chyum Laika ni hta tsun da nga ai hte maren si hkam na ra ai; rai ti mung, dai Masha Kasha hpe ap kau ai wa hta hkrithpa dingnye nga na ra ai. Dai masha n shangai taw gaw, shi a matu grau kaja nga ai,” ngu nna shanhte hpe tsun mu ai.

²²Shanhte sha nga ma yang Yesu gaw muk la nna Karai Kasang a chyeju hpe shakawn let akyu hpyi nhtawm, ahkyep alep nna sape ni hpe jaw let, “Ndai la sha mu, ndai muk gaw nye a hkum rai nga li ai,” ngu nna tsun mu ai.

²³Dai hpang gawm hpe mung shi la nna, Karai Kasang a chyeju hpe shakawn ngut jang, shanhte hpe jaw mu ai; shanhte yawng dai hta na lu ma ai.

²⁴Yesu gaw, “Ndai gaw law law a matu ru kau ya ai, Karai Kasang a ga shaka hpe dazik dawk ya ai nye a asai rai nga li ai.

²⁵Nanhte hpe ngai teng teng tsun made ga, Karai Kasang a Mungdan hta e sabyi nnan hpe ngai lu lu ai nhtoi du hkra, ndai sabyi hpe ngai galoi mung bai lu lu na n rai,” ngu nna tsun mu ai.

²⁶Dai hpang shanhte gaw mahkawn mangoi langai mi mahkawn shakawn ngut jang, Tsanlun bum de pru sa wa ma ai.

²⁷Yesu gaw shanhte hpe, “Nanhte yawng hprawng mat nna ngai hpe kau tawn da na marin dai; hpa majaw nga yang, ‘Karai Kasang gaw sagu rem wa hpe sat kau nna, sagu ni ayai aya bra mat na mara ai,” nga nna Chyum Laika ni hta ka da nga ai.

²⁸Rai ti mung, ngai bai sharawt la hkrum ai hpang e, Galile mung de nanhte a shawng e, sa wa magang na nngai,” ngu nna tsun mu ai.

²⁹Petru gaw, “Kaga ni yawng dai hku galaw ma ti mung, ngai gaw nang hpe galoi mung n kabai kau tawn da na nngai,” ngu nna htan wu ai.

³⁰Yesu gaw Petru hpe, “Ngai nang hpe teng teng tsun de ga, dai na pyi u lahkawng lang garai n goi yang, nang ngai hpe n chye nngai nga nna masum lang nyet kau na rin dai,” ngu nna tsun wu ai.

³¹Petru chyawm gaw, “Nang hte rau ngai si hkra rai ti mung, ngai nang hpe n nyet kau na nngai!,” ngu nna grau nna aja awa tsun wu ai. Kaga ni yawng mung dai hte maren tsun nang ma ai.

³²Getsemane mying ai sun de shanhte du ma ai rai nna, Yesu gaw, “Ngai akyu hpyi nga yang, nanhte nang e dung nga mala,” ngu nna shi a sape ni hpe tsun wu ai.

³³Petru, Yaku, Yawhan hte hpe gaw shi hte rau shaga woi mat wa ai. Shi myit mak wa ai hte myit ru myit tsang ai lam, shi hta byin nna,

³⁴shi shanhte hpe, “Nye a myit masin hta si na daram yawn hkyen ai lam grai kaba nga ai rai nna, dai gaw ngai hpe ganoi noi pyi anyawp dang kau nga ai; nang e nga nga nna amaja nga mala,” ngu nna shanhte hpe tsun mu ai.

³⁵Shi gaw shawng de loi mi shawn lai sa wa nna, shi hkum dai ga hta kabai tawn nhtawm gum dagup let, byin mai yang dai nni nkri hkrum ai aten ladaw shi hta n du u ga, nga nna akyu hpyi nga ai.

³⁶“Wa e, nye a Wa e! Nang gaw yawng mayawng hpe dang di lu nga ndai; ndai nni nkri ngu ai gawm hpe ngai kaw na shalai kau ya rit. Rai ti mung, Ngai ra ai hku n rai, na a myit ra ai hku she rai u ga,” ngu nna akyu hpyi wu ai.

³⁷Dai hpang shi bai wa yu yang sape ni marai masum hte yup pyaw taw nga ma ai hpe wa mu wu ai rai nna, Petru hpe, “Simun e, nang yup pyaw nga n ni? Hkying hkum mi sha pyi maja nga na, n sharang lu myit ni?

³⁸Agung alau ai hta nanhte n shang myit ga, amaja nga let akyu hpyi nga mu: Wenyi gaw Karai Kasang a myit ra ai lam galaw shangun mayu nga ai rai ti mung, hkum shan mahtang gawng kya nga ai,” ngu nna tsun mu ai.

³⁹Shi gaw kalang mi bai sa nna shawng na ga ni hte maren kahtap hpyi wu ai.

⁴⁰Dai hpang sape ni hpang de bai nhtang wa yang, shanhte a myi ni yup shamwi ai a majaw, shanhte naw yup pyaw nga ma ai hpe shi mu wu ai. Shanhte gaw shi hpe kaning ngu htan na mung n chye ma ai.

⁴¹Masum lang ngu na nhtang wa yang, “Nanhte gaw naw yup pyaw nga nna hkring sa la lu nga myit ni? Ram sai! Ahkying aten du sai! Yu mu, dai Masha Kasha gaw yubak kap ai ni a lata hta ap kau ai hkrum na ra ai.

⁴²Rawt mu, anhte sa wa saga. Yu mu, ngai hpe ap kau na masha wa gaw nang e rai nga ai,” ngu nna shanhte hpe tsun mu ai.

⁴³Yesu ga naw tsun nga yang pyi, sape shi lahkawng hta lawm ai Yuda du sa wa ai. Hkinjawng agyi ni, tara sara ni hte agyi salang ni shangun dat ai nhtu hte hkawn lang ai shawa masha ni shi hte rau sa du ma ai.

⁴⁴Yesu hpe hpyen ni a lata de ap kau na wa gaw, “Ngai pup ai masha gaw nanhte ra ai wa nan rai sai. Shi hpe rim la nna atsawm sha hkrak sin let woi mat wa mu,” ngu nna sa rim ai shawa masha ni hpe kumla langai mi jaw tawn da nu ai.

⁴⁵Yuda gaw du ai shaloi jang, Yesu kaw hkre rai sa nna, “Sara e!,” ngu nna shi hpe pup wu ai.

⁴⁶Dai rai nna shanhte gaw shi hpe rim la nna ngang ngang tek da mu ai.

⁴⁷Rai ti mung dai kaw tsap nga ai ni hta na marai langai mi gaw, shi a nhtu shaw nna Hkinjawng Agyi Kaba wa a mayam hpe kahtam nna shi na di mat lu ai.

⁴⁸Dai shaloi Yesu shanhte hpe ga tsun mu ai gaw, “Nanhte gaw tara tawt lai ai wa hpe zawn rim la na matu nhtu hte hkawn lang nna du sa wa marin ni?

⁴⁹Shani shagu nanhte hte rau Nawku Htingnu e sharin shaga let nga nga yang, nanhte ngai hpe n rim la manit dai. Rai ti mung Chyum Laika ni hta ka da nga ai hte maren chyawm gaw dik wa lu na rai nga ai,” ngu nna tsun mu ai.

⁵⁰Dai shaloi sape ni yawng hte gaw shi hpe kau da nna hprawng mat wa ma ai.

⁵¹Shabrang langai mi, lachyit nba sha lawai kau rai nna Yesu kaw hkan nang nga ai hpe shanhte rim la na shakut ma ai.

⁵²Rai ti mung shi gaw dai nba hpe raw malu kau da nna singgu krin hprawng mat wa ai.

⁵³Shaloi Yesu hpe Hkinjawng Agyi Kaba wa a nta de woi wa mu ai rai nna, dai kaw hkinjawng agyi ni, agyi salang ni hte tara sara ni yawng sa hpawng nga ma ai.

⁵⁴Petru gaw tsan tsan e Hkinjawng Agyi Kaba wa a nta wang du hkra hkan nang sa wa ai. Dai kaw sin ai ni hte rau wan mang makau e dung nna wan kra lawm nga ai.

⁵⁵Hkinjawng agyi ni hte salang hpawng ting gaw, Yesu hpe sat kau lu hkra sakse tam nga ma ti mung, hpa mung n mu mu ai.

⁵⁶Marai law law wa, shi a lam masu ai sakse hkam ma ti mung, shanhte a sakse ga ni n hkrum hkraw malu ai.

⁵⁷Shaloi masha nkau mi rawt tsap nhtawm, shi a lam masu ai sakse hkam let tsun ma ai gaw:

⁵⁸“Ndai wa gaw, ‘Masha lata hte galaw da ai ndai Nawku Htingnu hpe ngai run kau nna, masum ya laman e, masha e galaw ai n re ai sha kaga langai mi ngai bai de da na we ai,” nga nna shi tsun ai ga hpe anhte na sagaw ai,” ngu mu ai.

⁵⁹Shaloi pyi gaw shanhte a sakse ga ni hpe hkrum hkra n galaw lu ma ai.

⁶⁰Hkinjawng Agyi Kaba wa gaw shanhte yawng a ka-ang e rawt tsap nna, Yesu hpe, “Ya nang hpe shanhte mara shagun tsun nga ma ai lam hte seng nna nang tsun htan na lam hpa n nga salit ni?,” ngu nna san wu ai.

⁶¹Rai ti mung Yesu gaw atsin sha nga nna ga hkaw mi mung n htan wu ai. Bai Hkinjawng Agyi Kaba wa gaw, “A lu ai Karai Kasang a Kasha, Meshia nang rai nga n ni?,” ngu nna shi hpe san wu ai.

⁶²Yesu gaw, “Ngai rai nga nngai; dai hta kaga, Masha Kasha gaw, daru magam hpung shingkang rawng ai wa a hkra maga de dung nga nna, lamu na sumwi ni hte du sa ai hpe, nanhte mu na marin dai,” ngu wu ai.

⁶³Dai shaloi, Hkinjawng Agyi Kaba wa gaw, shi a palawng ni hpe gang je kau nna, Anhte kaga sakse hpa mi n tam ra saga ai!

⁶⁴Nanhte ndai, Karai Kasang hpe masu matsa jahpoi ai ga hpe na lu manit dai. Nanhte gara hku daw dan na myit ni?,” ngu mu ai. Shanhte yawng gaw Shi mara lu ai lam dan leng sai majaw, si ari jaw ging ai wa re, nga nna shi hpe daw dan mu ai.

⁶⁵Shanhte hta na nkau mi gaw, shi hpe mayen mahtaw bun ai hte, shanhte shi hpe myi bam kau ya nna kayat nhtawm shanhte gaw, “Nang hpe kadai kayat a ta? Tak yu u!,” ngu mu ai. Hkinjawng Agyi Kaba wa a sin langa ni mung shi hpe magra bye kahpret mu ai.

⁶⁶Petru chyawm gaw dai wang kata de naw nga nga ai rai nna, Hkinjawng Agyi Kaba wa a nchyang numsha ni hta langai mi shi a makau de sa du ai.

⁶⁷Dai numsha gaw wan kra nga ai Petru hpe mu wu yang, shi hpe azi yu da nna, “Nang mung, Yesu ngu ai Nazaret masha hte rau nga ga ndai,” ngu wu ai.

⁶⁸Rai ti mung shi nyet kau ai hte, “Ngai n chye nngai, nang hpa tsun nga ai ngu ai hpe ngai n chye na nngai,” ngu htan nhtawm wang chyinghka lam de pru mat wa ai. Dai shaloi jang u kalang mi goi sai.

⁶⁹Dai nchyang numsha shi hpe bai mu jang, grup yin tsap nga ai ni hpe, “Ndai wa mung, shanhte hta na langai mi rai nga ai,” ngu nna kahtap tsun wu ai.

⁷⁰Rai ti mung Petru bai nyet kau wu ai. Dai hpang gade nna yang, grup yin e tsap nga ai ni gaw, Petru hpe, “Shanhte hta lawm ai wa langai mi nang rai nga ndai hpe nang n ningdang lu ndai,” ngu nna shadu tsun wu ai.

⁷¹Shaloi Petru gaw, “Ngai teng man ai ga tsun nga nngai ngu nna dagam n ga! N rai yang, Karai Kasang ngai hpe ari jaw u ga! Nanhte tsun nga ai wa hpe ngai n chye nngai!,” ngu wu ai.

⁷²Shaloi jang dai u lahkawng bat goi nga ai. Dai rai nna Petru gaw, “U lahkawng lang garai n goi yang, nang ngai hpe masum lang nyet kau na rin dai,” nga nna Yesu shi hpe tsun ai ga dum dat ai hte rau hkrap gumpye taw nga ai.