Read Jinghpaw Common Language Bible 2009 MARKU 15 Bible Online

MARKU 15 - Jinghpaw Common Language Bible 2009 bible

MARKU 15

¹Jahpawt manap jau jau e, hkinjawng agyi ni gaw, agyi salang ni, tara sara ni hte dai salang kongsi hpawng ting gaw grai tin ai hku bawng jahkrup la nna, Yesu hpe gyit nhtawm, dun mat wa nna, Pilat kaw ap ya mu ai.

²Pilat gaw, “Nang Yuda ni a Hkawhkam rai nga n ni?,” ngu nna shi hpe san wu ai. Yesu gaw, “Nang dai hku tsun nga ndai,” ngu nna htan wu ai.

³Hkinjawng agyi ni mahtang Yesu hpe mara law law shagun nga ma ai.

⁴Dai rai nna Pilat gaw, kalang mi bai Yesu hpe ‘‘Nang hpa mung n htan nga n ni? Shanhte nang hpe shagun tawn ai mara ni yawng hpe madat yu u!,” ngu nna san wu ai.

⁵Yesu chyawm gaw, ga hkaw mi mung bai n htan wu ai rai nna Pilat mau mat nga ai.

⁶Pilat gaw Shalai Wa Ai Poi du shagu mung masha ni hpyi ai bawng masha langai mi dat ya ga ai lai nga lu ai.

⁷Dai ten hta kasu kabrawng nna masha sat ai gumlau ni hte rau htawng e sharen da nga ai masha ni hta Baraba ngu ai wa langai mi mung lawm nga ai.

⁸Shaloi shawa masha ni hpawng la nna poi ten hta shawoi na htung hte maren, shanhte hpe galaw ya na matu Pilat kaw hpyi ma ai.

⁹Pilat gaw, “Nanhte a matu Yuda ni a Hkawhkam hpe ngai dat ya na nanhte ra nga myit ni?,” ngu nna shanhte hpe san mu ai.

¹⁰Hpa majaw nga yang, manawn masham ai a majaw hkinjawng agyi ni Yesu hpe shi a lata de ap kau mu ai lam shi atsawm sha chye ya nga ai.

¹¹Hkinjawng agyi ni chyawm gaw, shanhte a matu Baraba hpe mahtang dat ya u ga, nga nna shawa masha ni hpe myit sharawt ya da mu ai.

¹²Pilat gaw, “Dai rai yang gaw, Yuda ni a Hkawhkam nanhte ngu ai wa hpe ngai kaning di ya na nanhte ra nga myit ta?,” ngu nna bai san mu ai.

¹³Shanhte gaw, “Wudang hta jen da u!,” nga nna bai jahtau ma ai.

¹⁴Rai ti mung Pilat gaw, “Shi n hkru ai mara hpa wa galaw hkrup sata?,” ngu nna san mu ai. Shanhte gaw nsen grau shaja let, “Wudang hta jen da u?,” nga jahtau ma ai.

¹⁵Pilat gaw shawa masha ni hpe myit shapyaw ya mayu ai hte, shanhte a matu Baraba hpe dat ya mu ai. Dai hpang Yesu hpe anu kayat nhtawm jen sat kau na matu ap kau dat mu ai.

¹⁶Shaloi hpyen la ni gaw, Yesu hpe Pilat hkawhkam a Pretori htingnu wang kata de woi wa nna, kaga hpyen la ni yawng hpe mung shaga tawn mu ai.

¹⁷Shanhte gaw hkyeng ai hpun nba Yesu hpe jahpun nna, ju lagup hkri nhtawm shi hpe shagup da mu ai.

¹⁸Dai hpang shanhte gaw, “Yuda ni a Hkawhkam asak galu nga u ga law!,” ngu nna jahpoi asawng hkungga jaw mu ai.

¹⁹Shanhte gaw shi a baw hpe mai-aw tawng hte kayat nna, shi hpe mayen mahtaw bun mu ai hte, lahput hput di let shi hpe nawku mu ai.

²⁰Shi hpe asawng asang di ngut jang, dai hkyeng ai hpun nba hpe shanhte raw kau nna, shi a hpun palawng ni hpe bai jahpun ya mu ai. Dai hpang shi hpe wudang hta jen da na matu shapraw sa wa mu ai.

²¹Lam e rai nga yang, shanhte gaw Kureni mung masha, Alexandru yan Ruhpu a kawa, Simun ngu ai wa hte hkrum ma yang, hpyen la ni gaw shi hpe adip arip di nna Yesu a wudang hpai shangun mu ai.

²²Ya shanhte Golgahta ngu ai shara de Yesu hpe woi sa wa mu ai. (Golgahta a ga lachyum gaw Pungkum shara ngu ai rai nga ai.)

²³Dai shara kaw shanhte gaw Mura ngu ai hte kayau ai sabyi ntsin Yesu hpe jaw lu na shakut mu timung, shi n lu ya mu ai.

²⁴Dai hpang shanhte shi hpe wudang hta jen da nna, shi a hpun palawng ni hpe shanhte hta na kadai wa garan la ang na hpaida da nna garan la ma ai.

²⁵Yesu hpe wudang hta jen da ai ahkying gaw jahpawt hkying jahku rai nga ai.

²⁶Dai hta kaga, shi a mara hpe madun ai laika Yuda ni a Hkawhkam ngu nna wudang ntsa e shakap tawn ma ai.

²⁷Shi hte rau damya lahkawng hpe mung, shi a hkra maga de langai mi, pai maga de langai mi di nna jen da mu ai.

²⁸(Ning re ai lam gaw, tara tawt lai ai ni a jahpan hta shi hpe hti shalawm mu ai nga nna ka da ai ga dik wa u ga she byin wa sai.) [22]

²⁹Lam e lai sa wa nga ai ni mung tinang a baw ni hpe kanga let, “Aha! Nawku Htingnu hpe run kau nna masum ya na laman e bai de da na nga ai wa e!

³⁰Ya wudang na yu hkrat wa nna na a hkum hpe nang hkye la u!,” ngu nna roi asawng mu ai.

³¹Dai hte maren hkinjawng agyi ni hte Tara sara ni mung asawng asang di let, “Masha kaga hpe shi hkye la ai; rai ti mung tinang hkum dai pyi n hkye la lu a hka!

³²Israela hkawhkam Meshia gaw wudang ntsa na yu hkrat wa ai hpe anhte yu yu ga, shing rai yu hkrat wa ai hpe mu lu yang, anhte shi hpe kam sham na ga ai!,” nga nna shada da tsun nga ma ai. Shi hte rau wudang hta jen da hkrum ai yan mung Yesu hpe jahpoi asawng ma ai.

³³Ya shani ka-ang jan pungding madi ai ten kaw nna mungkan ting hta e nsin chyip rai mat ai. Dai gaw hkying hkum masum na ai.

³⁴Shana de hkying masum hta Yesu gaw, “Elo-i, Elo-i, lema sabakhtani?,” ngu nna jahtau wu ai. De a lachyum gaw, “Nye a Karai Wa e, Nye a Karai Wa e, hpa majaw nang ngai hpe kau da nga n ta?,” nga ai rai lu ai.

³⁵Dai makau e tsap nga ai masha nkau mi, dai hpe na mu yang, “Madat yu mu, shi Elia hpe shaga nga ai,” nga ma ai.

³⁶Shanhte hta na marai langai mi gaw sa nna ntsin hkri hpe hka kamu hta tsing chyup la nna mai-aw nren hta shakap wu ai. Dai hpang Yesu a nten hta gawn jaw let, “La yu ga! Shi hpe wudang ntsa na shayu la na matu Elia sa wa na ra ai kun? Anhte yu yu ga!,” nga nna tsun ma ai.

³⁷Yesu gaw nsen kaba hte jahtau let nsa hti mat ai.

³⁸Shaloi Nawku Htingnu e noi nga ai nba grang gaw, ntsa nna ga hkren, ka-ang brang rai ga mat ai.

³⁹Dai wudang saw e tsap nga ai hpyen du wa [23] gaw Yesu gara hku si wa ai lam mu wu yang, “Kaja wa ndai wa gaw Karai Kasang a Kasha nan rai nga ai,” nga nna tsun ai.

⁴⁰Dai kaw numsha nkau mi mung tsan tsan kaw nna yu nga ma ai. Shanhte hta, Magdala Mari, Yaku kaji yan Yosep a kanu Mari hte Salome ni lawm nga ma ai.

⁴¹Shanhte gaw shi Galile mung e naw nga yang, shi kaw hkan nang nna galaw daw ai ni rai nga ma ai. Yerusalem mare de shi hte rau lung wa ai numsha kaga ni law law mung dai yang e nga nga ma ai.

⁴²Ya shana de rai wa sayang, Arimahtia mare na Yosep ngu ai wa sa du ai. Shi gaw shawa tara Kongsi hta lawm nga ai, masha e hkungga hkrum ai hte arawng lu ai masha langai mi rai nna, Karai Kasang a Mungdan de na ra ai hpe myit mada ala nga ai wa mung rai nga ai.

⁴³Ya dai Laban Nhtoi a shawng shani ngu ai, shachyip da ai nhtoi rai nga ai majaw, Yosep gaw Pilat a man de gwi gwi shang nna Yesu a hkum tsawp moi mang hpe hpyi wu ai.

⁴⁴Yesu si mat rau sai hpe na nna Pilat mau mat wu ai. Shi gaw hpyen du wa hpe shaga la nna, Yesu si ai gaw mi wa rai sai kun? San yu wu ai.

⁴⁵Hpyen du wa shana dan ai hpe na la ngut ai hpang, Pilat gaw, Yosep hpe dai moi mang la lu sai lam tsun wu ai.

⁴⁶Yosep gaw lachyit sumpan mari la nna, dai moi mang hpe shayu nhtawm, sumpan hte ahkyen kayawp ngut jang, nlung hta krawk da ai lup hta e bang tawn da wu ai.

⁴⁷Magdala Mari yan Yosep a kanu Mari gaw, dai moi mang tawn da ai shara hpe mu ma ai.