Read Jinghpaw Common Language Bible 2009 MARKU 2 Bible Online

MARKU 2 - Jinghpaw Common Language Bible 2009 bible

MARKU 2

¹Ya nhtoi tawng marang mi na wa ai hpang, Yesu gaw Kaperna-um mare de bai du wa ai. Shi nta e nga nga ai lam shiga masha ni na shajang ma ai.

²Dai majaw masha ni law law shi kaw sa zuphpawng nga ma ai rai nna, shara n nga mat ai gaw nta chyinghka lam ndaw pyi n ngam hkra rai nga ai. Yesu gaw shanhte hpe mungga hkaw tsun dan nga ai.

³Dai shaloi hkum katsing si ai wa langai mi hpe masha marai mali Yesu kaw hpai sa mu ai.

⁴Masha wunawng sa hpawng chyat nga ai majaw shanhte gaw dai wa hpe shi kaw n jashawn lu mu ai. Dai majaw shanhte gaw nta numgaw ntsa de bai lung wa nna Yesu a ntsa ang ang na nta galup da ai wut pa ni hpe kayen gaw kau nna hku shawaw la nhtawm, dai wa hpe shi a yupra panep hte hpawn sumri hte shayu jahkrat dat mu ai.

⁵Yesu gaw shanhte hta kam sham ai myit gade daram rawng nga ai hpe mu jang, “Sha e, na yubak dat kau ya sai,” ngu nna katsing si ai wa hpe tsun wu ai.

⁶Dai yang e tara sara nkau mi dung nga ma ai rai nna, “Ndai wa gaw ndai zawn nga nna kaning rai tsun gwi ai kun? Dai gaw Karai Kasang hpe n kaw n law shatan n hkan galaw ai lam rai nga ai.

⁷Karai Kasang chyu sha yubak mara ni hpe dat kau ya lu ai wa rai nga ai nga nna shanhte dai shanhte myit la nga ma ai.

⁸Yesu gaw shanhte hpa baw myit nga ai lam hpe kalang ta chye ya ai majaw shi gaw, “Nanhte hpa rai dai zawn re ai lam ni myit aru yu nga myit ta?

⁹Ndai hkum katsing si ai wa hpe, ‘Na yubak dat kau ya sade ai,” shing n rai, ‘Rawt u, na yupra panep hta hpai nna hkawm wa su, ngu nna tsun na gara mahtang grau loi nga a ta?’

¹⁰Masha Kasha gaw ga ntsa e, yubak dat kau ya ai ahkang aya lu ai wa re ai lam ya ngai nanhte hpe madun dan made ga,” ngu nhtawm dai hkum katsing si ai wa hpe,

¹¹“Ngai nang hpe tsun de ga, rawt u, na a yupra rai hta hpai nna nta de wa nu!,” ngu nna tsun wu ai.

¹²Shanhte yawng la yu nga ma yang, dai masha wa rawt nna, shi a yup ra rai hta hpai let tin tin pru mat wa ai. Shanhte yawng mau mahka mat ma ai hte, Karai Kasang hpe shakawn kungdawn let, “Anhte galoi mung ndai zawn re ai n mu yu ga ai,” nga nna tsun ma ai.

¹³Yesu gaw Galile nawng makau de bai pru sa mat wa ai. Shawa masha ni shi hpang de du sa ma ai rai nna shi shanhte hpe sharin shaga hpang mu ai.

¹⁴Yesu matut nna hkawm sa mat wa yang, Alhpe a kasha kang hta ai Lewi ngu ai wa hpe shi a kang hta ai sum e dung nga ai hpe mu hkrup wu ai. Yesu gaw, “Ngai kaw hkan nang rit,” ngu nna shi hpe tsun wu yang, Lewi mung rawt nna Madu a hpang hkan nang nga ai.

¹⁵Dai hpang gade nna yang, Yesu gaw shi a sape ni hte rau Lewi a nta e shat sha nga ai. Kang hta ai ni law law hte yawng e jawm kabai kau hkrum ai masha ni [4] mung shi kaw hkan nang nga ma ai rai nna, law law wa Yesu hte rau shat sha ai ku hta dung lawm nga ma ai.

¹⁶Hparishe ni hte Tara sara nkau mi gaw, Yesu shing rai kang hta ai ni hte kabai kau hkrum ai masha ni a hpawng hta shat rau jawm sha nga ai hpe mu ma ai shaloi, shi a sape ni hpe, “Hpa majaw shi dai zawn re ai masha ni hte rau lu sha nga ai kun?,” nga nna san ma ai.

¹⁷Yesu dai hpe na wu yang, “Hkam kaja ai ni tsi sara n ra ma ai, machyi ai ni sha ra ma ai. Ding hpring nna hkungga ging dum ai ni hpe shaga na matu n rai, yubak lu ai ngu nna kabai kau hkrum ai ni hpe shaga na matu she ngai sa du nngai,” ngu nna shanhte hpe tsun mu ai.

¹⁸Kalang mi na ten hta Hkalup Sara Yawhan hte Hparishe ni a sape ni lu sha gam nga ma ai. Masha nkau mi Yesu kaw sa nna, “Hkalup Sara Yawhan hte Hparishe ni a sape ni gaw lusha gam ma ai; rai ti mung na a sape ni mahtang hpa rai lusha n gam nga ma ta?,” ngu nna san mu ai.

¹⁹Yesu gaw, “Hkungran ai la nnan wa a manaw manang ni gaw la nnan wa hte rau nga nga ai ten hta lusha gam lu na rai ma ni? Kaja wa n rai law! la nnan wa shanhte hte rau naw nga nga ai laman e, shanhte lusha gam na ma ai n rai.

²⁰Rai ti mung la nnan wa hpe shanhte kaw na jahka la kau ya ai nhtoi du na ra ai; dai nhtoi hta e shanhte lu sha gam na mara ai.

²¹“Kadai mung sumpan chyen nnan hte palawng dingsa hpe n kapa ga ma ai, hpa majaw nga yang, dai sumpan chyen nnan htun wa nna dai dingsa hpe gang je kau na ra ai rai nna, de a je mat ai hkang gaw grau kaba wa ai.

²²Sabyi nnan hpe mung, shanhpyi sabyi ndum dingsa ni hta n bang ga ma ai, hpa majaw nga yang, sabyi gaw sabyi ndum ni hpe kapaw je kau nna sabyi hte ndum ni hten sum mat na rai nga ai. Shing di na malai, sabyi nnan hpe sabyi ndum nnan ni hta ru bang lu na rai nga ai.”

²³Dai hpang Bansa Nhtoi hta e, Yesu gaw shi a sape ni hte rau hkaulan mam yi ni hpe lai di sa wa nga ma yang sape ni gaw hkaulan mam nsi ni hpe di la ma ai.

²⁴Dai rai nna Hparishe ni gaw, “Yu u, Bansa Nhtoi hta e n galaw mai ai amu hpe shanhte hpa rai galaw nga ma ta?,” ngu nna Yesu hpe tsun mu ai.

²⁵Shaloi Yesu gaw, “Dawi hte shi a manang ni lusha kadawn nna, kawsi hkrum nga ai shaloi hpa baw galaw ma ai lam kalang mi muk n hti yu myit ni?

²⁶Hkinjawng agyi Abiahta a lakhtak e, Dawi gaw Karai Kasang a nta [5] de shang nna anhte a tara hte maren hkinjawng ni sha n rai yang gaw, kadai mung n mai sha ai madun da ai muk [6] hpe sha nna shi a manang ni hpe mung dai muk jaw sha yu sai n rai ni?,” ngu nna tsun mu ai.

²⁷Dai hpang Yesu gaw, “Laban Nhtoi gaw masha a mai kaja lam a matu galaw da ai rai nna masha gaw Laban Nhtoi a matu hpan da sai n rai.

²⁸Dai rai nna Masha Kasha gaw Bansa Nhtoi a Madu mung rai nga ai,” ngu nna shanhte hpe tsun mu ai.