Read Jinghpaw Common Language Bible 2009 MARKU 3 Bible Online

MARKU 3 - Jinghpaw Common Language Bible 2009 bible

MARKU 3

¹Dai hpang Yesu gaw tara jawng de kalang mi bai shang wa ai rai nna, dai yang e lata maga mi katsing si ai masha langai mi nga ai.

²Dai yang e Yesu hpe tara n hkan ai ngu nna mara shagun mayu ai masha nkau mi nga ma ai rai nna, Bansa Nhtoi hta dai wa hpe shamai ya na ra ai kun?, nga nna htep kaw nna la yu nga ma ai.

³Yesu gaw dai masha hpe, “Shawa hpawng a man de sa pru tsap rit,” ngu nna tsun wu ai.

⁴Dai hpang shi gaw masha ni hpe, “Anhte a tara hta Bansa Nhtoi e hpa galaw mai ai nga nna ahkang jaw da a ta? Karum la na matu, shing n rai jam jau jaw na matu kun? Masha langai mi a asak hkye la na, shing n rai sat kau na matu kun?,” ngu nna san wu ai. Rai ti mung shanhte gaw hpa langai mi mung n tsun ma ai.

⁵Shanhte a myit ja la nga malu ai hte shut nga ma ai majaw, Yesu gaw myit yawn nna masin pawt let shanhte hpe kayin mada shinggrup yu wu ai. Dai hpang shi gaw lata katsing si ai wa hpe, “Na lata ladawn dat u,” ngu nna tsun wu ai. Dai wa mung shi a lata ladawn dat wu yang, lata mai mat lu ai.

⁶Dai rai nna Hparishe ni gaw tara jawng na pru mat wa nhtawm Herod a hpung [7] masha ni hte kalang ta sa hkrum nna Yesu hpe kaning di sat kau lu na lam ni bawng ban nga ma ai.

⁷Yesu hte shi a sape ni Galile de htawt mat wa ma ai: Galile mung hte Yuda mung na masha wunawng kaba langai mi mung shi kaw hkan nang ma ai;

⁸dai hta n-ga, dai Yerusalem mare Idumea mung hte Yawdan hka sinpraw hkran na ni hte, Turu hte Sidon mare ni a grup yin ginwang hkan na masha wunawng wuwa ni yawng shi galaw dat ai amu lam ni hpe na ma ai majaw Yesu hpang de sa du ma ai.

⁹Shawa masha ni grai law nga ma ai rai nna Yesu gaw shi hpe n ahtu hkra mu ga nga, sape ni hpe shi a matu li kaji langai mi san shajin tawn da ya na hkang da wu ai.

¹⁰Masha law law hpe shi shamai ya nu ai majaw, machyi makaw hkrum ai masha ni law law shi hpe ahtawk la lu hkra nga nna shi kaw anin shadut shang wa ma ai.

¹¹N seng ai nat kap ni masha ni Yesu hpe mu shagu, shi a man e dingnyawm dagup nna, “Nang gaw Karai Kasang a Kasha rai nga ndai!,” nga nna kyek jahtau ma ai.

¹²Yesu gaw, shi kadai rai nga ai ngu ai hpe kadai e mung n tsun shabrawng u ga, n seng ai nat ni hpe shi aja awa hkang da mu ai.

¹³Dai hpang Yesu gaw bum langai de lung wa nna shi kaw hkan nang mayu ai ni hpe mung shi saw shaga mu ai rai nna shanhte shi kaw sa du ma ai.

¹⁴Dai rai nna shi gaw, marai shi lahkawng hpe lata san da nhtawm shanhte hpe kasa ni ngu nna shamying da mu ai. Dai hpang shanhte hpe, “Ngai hte rau nga na matu nanhte hpe ngai lata la made ai hte hkaw tsun dan na matu mung ngai nanhte hpe shangun dat na made ai.

¹⁵Nat ni hpe shaden kau na ahkang aya mung nanhte hpe ngai jaw na made ai,” ngu nna tsun mu ai.

¹⁶Dai marai shi lahkawng hpe shi lata san da nhtawm, (Yesu e Petru ngu nna mying hkawt shamying ya hkrum ai) Simun,

¹⁷Zebedi a kasha Yaku hte Yaku a kanau Yawhan, (shan nau hpe Buanerga, ngu nna mying hkawt shamying wu ai; de a lachyum “mu ngoi ai kasha yan,” ngu ai rai nga ai.)

¹⁸bai Andre, Hpilip, Barhtolume, Mahte, Htawma, Alhpe a kasha Yaku, Htade, Kanani masha Simun hte,

¹⁹Yesu hpe ap kau na Yuda Iskarut hte rai ma ai.

²⁰Dai hpang Yesu gaw nta de wa ai. Shawa masha wunawng kaba langai mi bai sa zuphpawng nga ma ai majaw Yesu hte sape ni shat sha na aten pyi n lu da mu ai.

²¹Masha nkau mi, “Yesu myit n gring mat sai!,” nga nna tsun shajang nga ma ai hpe shi a nta masha ni na ma ai shaloi, shanhte shi hpe woi la nna gawn lajang na matu pru sa wa ma ai.

²²Yerusalem de nna yu wa ai tara sara nkau mi gaw Yesu hpe, “Shi hta Bezebula nat jawn nga ai. Dai nat ni a agyi wa kaw na n-gun atsam hte shi nat ni hpe shaden kau wu ai,” nga nna tsun ma ai.

²³Shing rai Yesu shanhte hpe shaga la nna ga shadawn hku tsun mu ai gaw: ‘‘Satan gaw Satan hpe gara hku shaden kau lu na a ta?

²⁴Mungdan langai mi a kata hta daw hka bra ayai nna shada da gasat hkat ai rai yang dai mungdan gaw n grin nga lu ai.

²⁵Nta dinghku langai mi mung, dinghku kata hta daw hka bra ayai nna shada da gasat hkat ai rai yang dai dinghku n grin nga lu ai.

²⁶Dai hte maren Satan a mungdan mung, daw hka bra ayai ai rai yang, n grin nga lu ai hte hkrat sum htum mat na sha rai nga ai.

²⁷“N-gun ja ai wa hpe shawng n gyit hkang da ai sha shi a nta de shang nna shi a arai ni hpe n kashun la lu ai; shi hpe gyit hkang da ngut jang she shi a nta hpe hpya la lu na rai nga ai.

²⁸Ngai nanhte hpe teng teng tsun made ga, shinggyim masha ni a yubak mara yawng hte hte, shanhte tsun shut ai n hkru n kaja ai ga mahkra a matu, mara raw dat kau ya lu nga ai.

²⁹Rai ti mung, dai Chyoi Pra ai Wenyi hpe n hkru n kaja ai shatan n hkan ga tsun ai masha kadai hpe rai ti mung mara raw dat kau ai hkrum lu na n rai. Hpa majaw nga yang, shi gaw htani htana hte seng ai yubak mara galaw nu ai wa rai nga ai,” ngu nna tsun mu ai.

³⁰(Yesu ning nga nna tsun ai lam gaw, masha nkau mi shi hpe, “Shi hta n seng ai nat langai mi rawng nga ai,” nga nna tsun nga ma ai majaw rai nga ai.)

³¹Dai laman Yesu a kanu hte kanau ni du sa wa ma ai. Shanhte shinggan e tsap nna shi hpe shaga ya na matu masha shangun dat ma ai.

³²Shawa masha ni Yesu a grup yin e dung nga ma ai rai nna, shanhte gaw, “Yu u, na nnu hte nnau ni, shinggan e du nga ma ai. Shanhte nang hpe tam nga ma ai,” ngu nna shi hpe tsun mu ai.

³³Yesu gaw, “Nye a kanu gaw kadai rai ta? Nye a kanau ni gaw kadai ni rai nga ma ta?,” ngu nna htan mu ai.

³⁴Bai shi a grup yin e dung nga ai masha ni hpe kayin yu let shi gaw, “Yu mu, ngai nu hte ngai nau ni, nang e rai nga ma ai.

³⁵Karai Kasang a myit ra ai lam hte maren hkan sa galaw ai ni kadai rai ti mung, ngai nau, ngai jan, ngai nu, rai nga ma ai,” ngu mu ai.