Read Jinghpaw Common Language Bible 2009 MARKU 5 Bible Online

MARKU 5 - Jinghpaw Common Language Bible 2009 bible

MARKU 5

¹Yesu hte shi a sape ni gaw Galile nawng wora hkran na Gerasa [8] mung de shanhte du ma ai.

²Yesu li kaw na pru wa ai shaloi jang, n seng ai nat kap ai masha langai mi gaw lup lungpu hkan nga hkawm ai kaw na pru nhtawm Yesu hpe sa tau wu ai. Dai masha wa hta n seng ai nat rawng nga ai rai nna,

³lup ni hta nga hkawm nga ai. Kadai mung shi hpe hpri sumri hte gara hku mung n gyit da lu ma ai.

⁴Law law lang shi a lagaw lata ni hpe hpri sumri hkang hkyihkyang ni hte gyit da yu mu ti mung, lang shagu hpri sumri ni hpe gang dut kau ai hte shi a lagaw na hkang hkyihkyang ni hpe agrawp malan kau wu ai. Shi n-gun nau ja ai majaw kadai mung shi hpe n shani la lu ma ai.

⁵Shi gaw shani shana dai lup ni hte kawng hkan e nga nga nna, jahtau marawn let shi hkum hpe shi nan nlung hte arin aran di nna jahpye la wu ai.

⁶Yesu hpe tsan tsan kaw nna mu wu yang, shi gat sa nna, shi a man e dingnyawm dagup nawku ai hte,

⁷“Tsaw htum ai Karai Kasang a Kasha Yesu e! Nang ngai hpe hpa di mayu n ta? Nang ngai hpe n zingri n ga, Karai Kasang a marang e nang hpe ngai hpyi nem, nngai law!,” ngu nna nsen kaba hte jahtau wu ai.

⁸(Ndai zawn nga nna tsun ai lam gaw, Yesu shi hpe, “N seng ai nat e, ndai masha kaw na pru mat wa u!,” nga nna hkang da nu ai majaw rai nga ai.)

⁹Dai majaw Yesu gaw, “Na a mying hpa rai lit ta?,” ngu nna shi hpe san wu ai. Shi gaw, “Anhte law law wa rai nga ga ai majaw, nye a mying Legion [9] rai nga li ai!,” ngu nna shi hpe htan wu ai.

¹⁰Dai hta kaga, dai buga kaw na shanhte hpe n gawt shapraw kau mu ga, matut nna Yesu hpe hpyi nem mu ai.

¹¹Ya dai kawng lanem hkan e, wa wunawng kaba langai mi kanaw sha nga ma ai.

¹²Dai rai nna, n seng ai nat ni gaw, “Anhte dai wa ni hta shang lu u ga, shangun dat mi,” ngu nna Yesu hpe hpyi nem nu ai.

¹³Shaloi shi shanhte hpe wa ni hta shang na ahkang jaw dat mu ai. N seng ai nat ni mung, masha wa kaw na pru wa nna wa ni hta shang ma ai. Wa wunawng ting yawng rai yang hkying lahkawng daram dai n-gam mahka kaw nna nawng de yawng rut gat ru bang nna marit si mat ma ai.

¹⁴Wa ni hpe hkan rem ai ni chyawm gaw, hprawng gat mat wa nna, dai mare hte kahtawng hkan e, dai shiga tsun shabra dat ma ai. Masha ni mung dai byin wa sai amu hpe hpu yu na matu pru sa wa ma ai.

¹⁵Shanhte Yesu kaw du ma yang, shawoi nat law law lawm ai legion nat kap ai masha wa gaw, hpun palawng atsawm sha bu hpun nna, shawoi na myit kaja hte dung nga la ai hpe shanhte mu mu ai rai nna, shanhte yawng hkrit kahpra mat ma ai.

¹⁶Dai lam mu chye ai ni mung, dai nat kap ai masha hte wa ni hta kaning rai byin sai lam masha ni e hkap hkai dan mu ai.

¹⁷Dai rai nna shanhte a buga na pru mat wa na lam Yesu hpe shanhte hpyi nem ma ai.

¹⁸Yesu dai li hta shang wa nga yang, nat kap lai wa sai wa gaw, “Ngai hpe nang kaw hkan nang shangun rit!,” ngu nna Yesu hpe hpyi nem wu ai.

¹⁹Rai ti mung Yesu gaw shi hpe ahkang n jaw ai sha, dai wa hpe, “Na a nta de wa nna dai Madu nang hpe gade wa matsan dum nna karum sai lam na nta masha ni hte manaw manang ni hpe wa tsun dan su,” ngu nna tsun dat wu ai.

²⁰Dai majaw shi pru wa nna, Yesu shi hpe gade wa karum sai lam Dekapoli mung na mare shi hkan e tsun dan mu ai. Na la ai ni yawng mayawng mau mahka nga ma ai.

²¹Yesu hte sape ni gaw hka nawng a wora hkran de bai rap mat wa ma ai. Dai nawng makau de masha wunawng kaba shi kaw sa hpawng ma ai.

²²Dai nawng makau e shi naw nga nga yang, Yairu mying ai tara jawng agyi langai mi sa du nna Yesu hpe mu hkrup jang, shi a lagaw nhpang e dingnyawm nna,

²³“Nye a shayi sha kaji grai machyi nna si wa magang nga ai. Shi mai tsai wa nna hkrung nga u ga, shi a ntsa e lata mara ya na matu sa wa rit!,” ngu nna akroi anoi hpyi nem wu ai.

²⁴Shaloi Yesu gaw Yairu hte rau hkan nang sa wa ai. Masha wunawng kaba mung shi kaw hkan gumbawm nang nna shi hpe kanawng matep hkra mu ai.

²⁵Dai yang e, shi lahkawng ning tup grai sawng ai hku sai htaw machyi ai numsha langai mi mung lawm nga ai.

²⁶Shi gaw tsi sara ni law law a lata hta nni nkri law law hkrum ai hte tsi lajang yu sai. Shi lu malu ja gumhpraw ni mung ma mat sai; rai ti mung mai wa na malai grau grau chyawm sawng wa lu ai.

²⁷Shi gaw Yesu a lam na wu yang, dai shawa hpawng de shi sa du nhtawm Yesu a shingdu de htep sa wa nna,

²⁸“Shi a hpun palawng ni hpe sha pyi ngai ahtawk lu taw gaw, ngai mai lu na ring ngai,” nga nna shi dai tsun nga ai.

²⁹Numsha gaw Yesu a palawng hpe ahtawk wu ai shaloi jang, shi a sai htaw ai lam hkring mat nna shi a ana mai mat sai hpe shi hkum dai dum chye wu ai.

³⁰Yesu gaw, shi hta na atsam pru wa sai hpe, shi kalang ta chye wu ai majaw, shawa hpawng de kayin nna, “Nye a hpun palawng hpe kadai ahtawk hkra a ta?,” ngu nna san mu ai.

³¹Dai rai nna, shi a sape ni gaw, “Shawa masha ni nang kaw gumbawm nang nna nang hpe kanawng matep hkra nga ma ai hpe nang mu nga nna mi, ngai hpe kadai ahtawk hkra a ta? nga nna hpa rai san n ta?,” ngu nna shi hpe htan mu ai.

³²Rai ti mung Yesu gaw, shi hpe kadai ahtawk hkra sai lam chye lu na matu grup yin de mada yu nga ai.

³³Dai numsha chyawm gaw, shi hta gara hku hkam sha lu sai lam dum chye ai majaw, hkrit gari let sit sa nna, shi man e dingnyawm nhtawm teng ai lam yawng mayawng Yesu hpe tsun dan wu ai.

³⁴Yesu gaw, “Nye a shayi sha e, na a kam sham ai myit gaw nang hpe shamai ya nit dai. Ngwi pyaw ai hte wa su, na a machyi ai atsu atsam mai wa nu ga,” ngu nna tsun dat wu ai.

³⁵Yesu ndai lam naw tsun nga yang, Yairu a nta na masha nkau mi sa du nna, “Na a shayi sha si mat sai. Dai sara hpe hpa rai naw shatsang nga na rai ta?,” ngu mu ai.

³⁶Yesu mahtang, dai sa tsun ai ga hpe na ai rai tim hpa n nawn ya ai sha, “Hkum hkrit et, kam sham ai myit sha rawng nga u,” ngu nna tara jawng agyi wa hpe tsun wu ai.

³⁷Shaloi Petru, Yaku hte Yaku a kanau Yawhan hta kaga, kadai hpe mung shi hte rau hkan nang sa na ahkang n jaw mu ai.

³⁸Ya, Yairu a nta de du ma yang kaming kamawng, hkrap ngu hkrap ngoi ai hte sharung shayawt rai nga ma ai hpe shi mu mada wu ai.

³⁹Nhku de shang wa nna, “Nanhte hpa rai ndai zawn kaming kamawng, hkrap ngu hkrap ngoi rai nga myit ta? Ma gaw si ai n rai-shi gaw yup pyaw nga ai sha re,” ngu shanhte hpe tsun mu ai.

⁴⁰Shanhte chyawm gaw shi hpe mani asawng kau mu ai; Shi mahtang shanhte yawng hpe shaden kau ngut jang, dai ma a kanu yan kawa hte sape ni marai masum hpe shaga la nna dai ma taw nga ai gawk de shang wa ma ai.

⁴¹Dai ma a lata hpe shi jum da nna, “Talitha, koum,” [10] ngu wu ai. (De a lachyum gaw, “Mahkawn ma e rawt u, ngu nna ngai tsun de ai,” nga ai re.)

⁴²Shaloi jang, dai mahkawn gaw rawt nna gawam hkawm hpang wu ai. (Shi a asak gaw shi lahkawng ning rai nga lu ai.) Shing rai byin ai shaloi, shanhte grai mau mahka mat ma ai.

⁴³Rai ti mung Yesu gaw, dai lam kadai hpe mung n tsun mu ga, aja awa ginhtim hkang da mu ai; dai hta kaga, “Ma hpe shahpa lama ma jaw mu,” nga nna shi htet da mu ai.