Read Jinghpaw Common Language Bible 2009 MARKU 6 Bible Online

MARKU 6 - Jinghpaw Common Language Bible 2009 bible

MARKU 6

¹Yesu gaw dai shara na pru mat wa nna shi a buga mare de wa du ai. Shi a sape ni mung shi kaw hkan nang nga ma ai.

²Bansa Nhtoi hta tara jawng e shi sharin shaga hpang nga ai. Dai yang e masha law law wa nga nga ma ai rai nna, shi a sharin shaga ai lam hpe na lu ai ni yawng mau mahka mat ma ai. Ndai wa gaw, “Dai hpaji atsam hpe kanang na lu la wu ai kun? Shi lu ai hpaji machye machyang gaw hpa baw hpaji rai nga a ta? Shi gaw lamik kumla ni hpe gara hku galaw lu ai kun?

³Shi gaw Mari a kasha laksama wa rai nga ai hte Yaku, Yosep, Yuda, Simun ni a kahpu shi rai nga ai n rai ni? Shi a kajan ni mung anhte hte rau nang e nga nga ma ai n rai ni?,” nga nna san ma ai. Shing rai shanhte shi a lam myit kataw nna shi hpe n hkap la ma ai.

⁴Yesu gaw shanhte hpe, “Myihtoi gaw, tinang a buga hta tinang a mayu dama ni hte, tinang a nta dinghku masha ni hta lai nna gara shara kaw mung shagrau hkungga hkrum nga ai,” ngu nna tsun mu ai.

⁵Shi gaw dai mare hta machyi makaw re ai masha nkau mi a ntsa e lata mara nna shamai ya ai hta kaga, dai yang e lamik kumla hpa mung shi n galaw lu wu ai.

⁶Dai masha ni hta makam masham n nga ai majaw, shi grai mau nga ai. Dai hpang, grup yin hkan na kahtawng ni hta e, shi kawan hkawm nna, masha ni hpe sharin shaga nga ai.

⁷Shaloi dai sape shi lahkawng hte hpe shi shaga la nhtawm, marai lahkawng yep yep di nna shangun dat mu ai. N seng ai nat ni hpe dang kau lu na ahkang shi shanhte hpe jaw mu ai.

⁸Bai shi gaw, “Shanhte hpe dawhkrawng langai mi hta lai nna hkrun lam a matu, lusha mung, htingpa mung, shingkyit sumbu ni hta gumhpraw mung, hkum gun hkum lang myit.

⁹Hkyepdin ni din mu, rai ti mung palawng lahkawng n kahtap hpun ai sha sa wa mu,” ngu nna matsun dat mu ai.

¹⁰Dai hta n-ga, “Gara mare hta rai ti mung, nanhte hpe shawng hkap la ai nta hta, dai mare kaw na pru wa ai nhtoi du hkra dai kaw anga nga mu.

¹¹Nanhte mare langai ngai de du nna dai mare kaw na masha ni nanhte hpe n hkap la nna nanhte hpe n madat n mara nga ma yang gaw, nanhte a lagaw lahpan hta kap ai ga nhpu hpe ahpu sharun kau da nna dai shara kaw na pru mat wa mu. Dai gaw shanhte hpe sadi jaw ai lam tai na ra ai.’’ ngu nna kahtap tsun dat mu ai.[11]

¹²Shaloi shanhte pru sa nna, masha ni hpe shanhte a yubak mara ni kaw na kayin wa lu na lam hkaw dan mu ai.

¹³Shanhte gaw nat law law ni hpe shaden kau mu ai hte machyi masha law law ni a ntsa e Tsanlun sau hte chya ya nna shanhte hpe shamai shatsai ya mu ai.

¹⁴Yesu a lam shiga shara shagu dan hkung chyam bra wa ai rai nna Herod [12] hkawhkam gaw dai lam mahkra hpe na lu wu ai. Masha nkau mi gaw, Yesu hpe, “Hkalup Sara Yawhan si ai kaw na bai hkrung rawt wa ai wa re! Dai majaw she shi gaw lamik kumla ni hpe galaw lu nga ai,” nga nna tsun ma ai.

¹⁵Kaga ni mahtang, “Shi gaw Elia rai nga ai, bai kaga ni gaw, moi na myihtoi langai mi zawn, myihtoi bai paw pru ra ai,” nga shajang ma ai.

¹⁶Dai lam Herod na lu ai shaloi, “Ndai wa gaw Yawhan nan rai sai! Ngai shi hpe htau sat kau se ai, rai ti mung shi bai hkrung wa ra ai!,” nga nna tsun ai.

¹⁷Hpa majaw nga yang Herod shi nan Yawhan hpe rim la shangun nhtawm htawng hta gyit bang nna sharen da nu ai. Herod shing rai galaw ai lam gaw, shi a kanau Hpilip a madu jan Herodia hpe hkungran la ai majaw rai lu ai.

¹⁸Yawhan gaw Herod hpe, “Nang gaw na nnau a madu jan hpe n mai hkungran la ai!,” ngu nna daru ru di da wu ai.

¹⁹Dai majaw Herodia gaw Yawhan hpe n ju da wu ai hte sat kau mayu wu ai, rai ti mung Herod a majaw shi hpa n di lu wu ai.

²⁰Yawhan gaw, ding hpring ai hte chyoi pra ai wa rai nga ai hpe Herod chye wu ai majaw, shi hpe hkrit kamyin ai hte makawp maga nga ai. Herod gaw Yawhan a sharin shaga ai ga na lu ai ten shagu shi a myit hta grai ung ang shangun ai rai tim, shi a ga na la na grai ra nga ai.

²¹Hpang jahtum Herodia gaw shi a matu ahkaw ahkang kaja lu la wu ai. Herod a shangai nhtoi shani hta e, shi gaw asuya ningbaw ningla ni, hpyen du kaba ni, hte Galile mung na dan hkung ai mung masha agyi salang ni yawng a matu shana shat sha poi langai mi galaw daw nga ai.

²²Dai shana, shat sha poi de Herodia a shayi sha[13] shang nna ka hkalum nga ai rai nna Herod hte shi hte rau dung nga ai manam ni hpe yu ra shangun da mu ai. Shing rai Hkawhkam wa gaw numsha hpe, “Nang hpa baw ra n ta? Nang tsaw matsaw hpa rai ti mung ngai nang hpe jaw na de ai,” ngu nna tsun wu ai.

²³Dai hta n-ga, “Nang ngai kaw hpyi mahpyi, nye a mungdan ka-ang hkup du hkra pyi ngai nang hpe jaw na de ai,” ngu nna law law dagam tsun wu ai.

²⁴Dai rai nna dai numsha pru wa nhtawm, shi a kanu hpe, “Ngai hpa hpyi na we ta?,” ngu nna san wu yang, kanu gaw, Hkalup Sara Yawhan a baw hpe hpyi u,” ngu wu ai.

²⁵Shaloi jang dai numsha gaw, hkawhkam wa hpang de tin tin shang nna, “Hkalup Sara Yawhan a baw hpe ban hta e bang nna nang ngai hpe ya jang jaw na, ngai ra nga nngai!,” ngu nna hpyi wu ai.

²⁶Hkawhkam wa chyawm gaw, ja ja myit yawn nga timung, rau dung rau hpawng nga ai manam ni a man e shi dagam tsun kau ai ga ni a majaw numsha hpe shi n ningdang kau lu wu ai.

²⁷Dai re ai majaw hkawhkam wa gaw, sin nga ai hpyen la langai mi hpe kalang ta shangun dat nna, Yawhan a baw hpe la sa na hkang dat wu ai.

²⁸Shaloi hpyen la wa sa wa nna, htawng hta na Yawhan a baw hpe daw nhtawm ban hta e la wa nna dai numsha hpe ya dat wu ai: numsha mung kanu hpe dai ap ya wu ai.

²⁹Yawhan a sape ni dai lam na mu yang, shanhte sa nna, dai moi mang hpe la mat wa nhtawm lup hta e bang da ma ai.

³⁰Kasa ni gaw Yesu kaw wa zup nna, shanhte galaw sai lam hte sharin shaga ai lam yawng mayawng shi hpe shana dan mu ai.

³¹Shawa masha ni law law sa sa wa wa rai nga ma ai majaw Yesu hte shi a sape ni shat sha na aten pyi n lu da mu ai. Dai rai nna shi gaw shanhte hpe, “Anhte nan shim ai shara langai ngai de pru wa saga, dai yang e anhte hkrai rai na rai nna nanhte loi mi hkring sa la lu na rai nga ai,” ngu nna tsun mu ai.

³²Dai rai nna shanhte hkrai li langai mi hte machyi shim ai shara langai mi de pru sa wa ma ai.

³³Rai ti mung shanhte pru sa mat wa ai hpe masha law law mu mada dat nna shanhte kadai ni re ai hpe kalang ta chye yu mu ai majaw; mare shagu hkan na ni hkarang lam hku shawng de gat lai sa wa nna Yesu hte sape ni a shawng e dai shara de du ma ai.

³⁴Yesu li kaw na pru lung wa yang, masha wunawng kaba hpe shi mu mada wu ai shaloi shanhte gaw sagu rem ai wa n lawm ai sagu ni zawn rai nga ma ai majaw shi a myit masin hta shanhte hpe matsan dum ai myit hte hpring nga lu ai; dai rai nna shi shanhte hpe lam law law sharin shaga hpang wu ai.

³⁵Ya jan du wa magang sayang, sape ni Madu kaw sit sa nna, “Ya jan grai du mat wa sai, ndai yang masha n nga ai nam mali shara mung rai nga ai.

³⁶Dai rai nna grup yin kahtawng ni hte yi sun hkan na nta dinghkrai ni de shanhte a matu shahpa lama ma sa mari la mu ga, masha ni hpe shabawn dat u,” ngu nna tsun mu ai.

³⁷Yesu gaw, “Nanhte nan shanhte hpe sha hpa lama ma jaw mu,” ngu nna htan wu ai, shanhte gaw, “Anhte sa nna gumhpraw lap lahkawng tsa hte shanhte hpe muk mari jaw na rai kun?,” ngu nna shi hpe san mu ai.

³⁸Dai rai nna Yesu gaw, shanhte hpe, “Nanhte muk gade lu nga myit ta? Sa yu mu,” ngu nna san mu ai. Shanhte chye jang, “Muk tawng manga hte nga lahkawng sha rai nga ai,” ngu nna shi hpe tsun mu ai.

³⁹Yesu gaw, “Dai Masha ni yawng hpe hpung hte hpung di garan nna tsit lali ai tsingdu pa e dung nga shangun na matu sape ni hpe htet da wu ai.

⁴⁰Shing rai masha ni gaw latsa tsa hte manga shi shi di nna yan mi hte yan mi dung nga ma ai.

⁴¹Shaloi dai muk manga hte nga lahkawng hpe shi la nna lamu de mada yu let Karai Kasang kaw chyeju shakawn wu ai. Muk tawng ni hpe shi ahkyep alep nhtawm shawa masha ni hpe garan jaw na matu shi a sape ni e jaw da mu ai. Shi gaw dai nga lahkawng hpe mung shanhte yawng gu hkra garan jaw mu ai.

⁴²Masha shagu sha nna hkru kat ma ai.

⁴³Dai hta n ga, ngam nga ai muk hte nga ahkyep alep ni hpe sape ni hkan lahkawn la yang, mung ka shi lahkawng hpring dem rai nga ai.

⁴⁴Muk sha ai ni chyawm gaw lasha hkrai hkying manga ting rai nga ma ai.

⁴⁵Yesu gaw shawa masha ni hpe shabawn dat nga yang, shi a sape ni hpe mung shaloi jang li hta shang nna shi a shawng e nawng wora hkran Betsaida mare de rap sa wa shangun dat mu ai.

⁴⁶Shawa masha ni hpe shakram dat ngut jang akyu hpyi na matu bum langai mi de shi lung wa sai.

⁴⁷Shana du yang, dai li gaw nawng ka-ang e rai nga ai. Yesu chyawm gaw shi chyu sha hkarang kawng e rai nga ai.

⁴⁸Nbung hpe ninghkap nna yak yak hkak hkak rai li hpe shap ra ai majaw sape ni kyin nga ma ai hpe shi mu mu yang, jahpawt hkying masum hte kru lapran nawng ntsa e hkawm let shanhte hpang de shi sa du ai. Madu gaw shanhte hpe lai kau da na hkyen nga ai.

⁴⁹Rai ti mung shanhte gaw shi nawng ntsa e lam hkawm nga ai hpe mu mu yang, “Dai gaw minla she rai nga ai!,” ngu nna shanhte myit nawn ai hte jahtau marawn ma ai.

⁵⁰Shanhte shi hpe mu lu ma yang hkrit kahpra mat ma ai. Shaloi jang shi shanhte hpe ga shaga nna, “Ngwi pyaw nga myit ga!, ngai she rai nngai. Hkum hkrit myit!,” ngu mu ai.

⁵¹Dai hpang dai li de, shi shanhte kaw shang nna dai nbung num mat wa ai, Sape ni nachying wa mau mahka nga ma ai.

⁵²Hpa majaw nga yang, dai masha hkying manga hpe muk daw jaw ai lam a lachyum majing hpe shanhte n chye na nga ma ai hte shanhte a machye machyang gaw dai hpe chye na na atsam n nga malu ai.

⁵³Shanhte nawng hpe rap nna Genesaret ngu ai danam de du ma yang, dai yang e shanhte a li hpe gyit dun kau da mu ai.

⁵⁴Dai li hta na shanhte pru wa ai shaloi jang masha ni Yesu hpe chye yu dat mu ai.

⁵⁵Dai rai nna, shanhte gaw ginwang ting gat kahkrang hkawm nhtawm machyi makaw hkrum ai ni hpe hpun nba panep ni hte nawng, shi nga ai lam na lu ai shara shagu de, hpai sa du ma ai.

⁵⁶Dai hta kaga, Yesu sa du hkawm ai shara shagu, mare, kahtawng ningchyawng hkan na masha ni gaw machyi ai masha ni hpe gat shara ni de woi sa nna shi a hpun palawng ban byau matu sha pyi shanhte hpe ahtawk la shangun na matu ahkang hpyi nem ya mu ai: Shi hpe ahtawk lu ai ni yawng nan, mai tsai mat wa ma ai.