Read Jinghpaw Common Language Bible 2009 MARKU 7 Bible Online

MARKU 7 - Jinghpaw Common Language Bible 2009 bible

MARKU 7

¹Yerusalem mare kaw na du sa ai Hparishe ni hte Tara sara nkau mi Yesu kaw sa zup nga ma ai.

²Yesu a sape nkau mi gaw nawku htung lai hku nna n san n seng awu asin re ai ngu ai lata ni hte shanhte a shat sha nga ma ai dai gaw, shawa masha ni hkan sa nang ai Hparishe ni htet da ai htung lai hte maren lata n kashin ma ai hpe ngu ai rai nga ai. (

³Hpa majaw nga yang, Hparishe ni hte Yuda masha nkau mi gaw, jiwa ni a sharin shaga da ai htung lai ni hpe hkap la nna hkan sa nga ma ai rai nna, lata ni hpe atsawm sha n shin kau yang gaw shanhte shat n sha ga ma ai;

⁴gat de na mari wa ai hpa hpe rai ti mung shanhte shawng n kashin kau ai [14] n sha yu ma ai. Bai gawm ni, di ni, magri wan ni, yup ku ni [15] hpe atsawm sha kashin kau ra ai hte seng ai kaga htung lai ni law law hpe mung hkan sa nga ma ai.)

⁵Dai rai nna Hparishe ni hte Tara sara ni gaw, “Na a sape ni, hpa rai ji wa ni a sharin shaga hkrat wa ai ga madat hpe n hkan ai, htung lai hku nna awu asin re ai lam ni hte nan, shat sha nga ma ta?,” ngu nna Yesu hpe san mu ai.

⁶Yesu gaw, “Nanhte a lam, Esaia myihtoi htoi da ai ga gaw kaja wa teng nga a hka! Nanhte gaw sawt ai masha ni rai nga myit dai. Dai majaw shi gaw: ‘Ndai amyu ni gaw, tinang a nten hte ngai hpe hkungga lara ma ti mung, shanhte a myit masin gaw kaja wa ngai hte tsan gang nga malu ai.

⁷Shanhte ngai hpe nawku ai gaw shanhte a matu kaman lila rai nga ma lu ai, hpa majaw nga yang, shanhte gaw masha e galaw tawn ai tara ni hpe sha Karai Kasang a tara ni re ai zawn htawn sharin shaga nga ma ai!,’ nga nna Karai Kasang tsun ai hpe ka da nga ai.

⁸“Nanhte gaw Karai Kasang a hkang da ai ga hpe kau da nhtawm, masha a ga madat hpe sha hkan nga myit dai,” ngu mu ai.

⁹Matut nna Yesu gaw, “Nanhte gaw tinang a sharin shaga ai lam hpe hkan sa nga lu na matu Karai Kasang a tara hpe shinggan kau ai lai gaw grai ram la nga myit hka!

¹⁰Hpa majaw nga yang, ‘Na nnu yan nwa hpe hkungga lara di u, kanu kawa hpe matsa ai ga tsun ai wa gaw teng teng si u ga,” nga nna Mawshe hkang da sai.

¹¹Rai ti mung nanhte gaw, masha langai mi kanu shing n rai kawa hpe karum na matu jai lang lu ai arai lama ma lu ai rai ti mung, ‘Ndai arai gaw Korban rai nga ai,’ (de a lachyum, Karai Kasang kaw sak nawng kau sai Karai Kasang hte seng ai arai she re) nga nna tsun ai wa kadai mung,

¹²tinang a kanu kawa hpe karum na matu lit n nga sai, ngu nna sharin hkum kau nga myit dai.

¹³Ndai lai hku, nanhte masha kaga ni hpe jaw ginlen ai sharin shaga ai lam hte Karai Kasang a mungga hpe shamat shaprai kau nga myit dai. Dai hte bung ai lai kyang ni law law hpe mung nanhte naw hkan sa galaw nga myit dai,” ngu nna shanhte hpe tsun mu ai.

¹⁴Yesu gaw shawa masha ni hpe lang mi bai shaga la nna, shanhte hpe, “Nanhte yawng ngai tsun ai hpe madat nna chye na la mu.

¹⁵Masha a shinggan maga de nna shi a kata de shang wa nhtawm masha hte nawku htung tara hku nna n san n seng awu asin[16] di kau lu ai arai hpa mung n nga ai.”

¹⁶(Na tu ai wa gaw na la u ga, [17] ngu nna tsun mu ai.)

¹⁷Yesu gaw shawa masha ni hte hka nna nta de shang wa yang shi a sape ni, dai ga shadawn lachyum hpa re ai lam san ma ai,

¹⁸Yesu gaw shanhte hpe, “Nanhte gaw masha kaga ni hta jan nna machye machyang loi mi pyi n rawng nga myit ni! Shinggan de nna masha langai mi a kata de shang wa ai hpa rai ti mung masha hpe kaja wa awu asin, di kau lu ai n rai.

¹⁹Hpa majaw nga yang, dai gaw shi a myit masin kata de shang wa ai n rai shi a kan kata de shang wa ai hte hkum tsan ai shara de bai pru wa ai,” ngu nna tsun mu ai. (Ndai lam ning nga nna tsun ai hte, Yesu gaw, shat shatmai amyu yawng hpe mai sha nga ai,) ngu nna tsun ndau ai lam rai nga ai.

²⁰Bai matut nna Yesu gaw, “Masha a hkum kata kaw nna pru wa ai arai mahtang, masha hpe awu asin di kau nga ai.

²¹Hpa majaw nga yang, masha a myit kata de nna n kaja ai myit mang ai lam ni pru wa nna, dai gaw shi hpe n hkru n kaja ai arawn alai lam ni hkan sa galaw na, masha arai lagu na, masha sat na,

²²masha num shaw na, nammak lawhpa ai myit rawng na hte kaga n hkru n kaja ai lam amyu myu, masu hkalem ai, n shawp n kap re ai lam, n ju n dawng ai, shatan n hkan ai, gumrawng ai, myit n su ai lam ni hpe galaw shangun nga ai.

²³Ndai n hkru n kaja ai lam ni yawng gaw masha langai mi a kata na pru wa nna shi hpe awu asin di kau da wu ai,” ngu nna tsun mu ai.

²⁴Shaloi dai yang na shi pru mat wa nna Turu mare makau lamu ga shara hkan du pru sa wa ai. Nta langai mi hta e shi shang nna, shi dai kaw nga ai lam marai langai ngai chye kau na shi n ra nga ai, rai ti mung shi makoi nga lu ai n rai.

²⁵N seng ai nat kap ai shayi sha kaji lu ai numsha langai mi gaw, Yesu a lam na lu nna, shaloi jang shi kaw sa nhtawm, shi a lagaw nhpang e dingnyawm nga ai.

²⁶Dai numsha gaw Suri mung na Hpiniki buga e shangai wa ai Grik amyu shayi numsha langai mi rai nga ai. Shi gaw shi a shayi sha kaw na nat hpe shaden kau ya na matu hpyi nem nga ai.

²⁷Rai ti mung Yesu gaw, “Ma ni hpe shawng shat hkru hkra jaw ga. Ma ni a shat la nna gwi ni hpe kabai jaw na n mai nga ai,” ngu nna shi hpe tsun wu ai.

²⁸Dai numsha mahtang, “Madu e, sha ku npu na gwi ni pyi ma ni a ahkyep alep ni hpe sha ga ma ai!,” ngu nna shi hpe htan wu ai.

²⁹Dai rai nna Yesu gaw shi hpe, “Nang dai hku htan ai ga a gawp e, nta de wa nu, nat gaw na a shayi sha kaw na pru mat sai hpe nang mu na rin dai!,” ngu wu ai.

³⁰Shi nta de bai wa ai rai nna, dai ma gaw shi kaw na nat kaja wa pru mat sai majaw yup ku ntsa asim sha kaleng taw nga ai hpe mu wu ai.

³¹Dai hpang Yesu gaw Turu buga jarit kaw nna pru wa yang, Sidon hpe mung, mare shi a lamu ga ngu ai Dekapoli ginwang ka-ang hku ga lai di sa wa nhtawm, Galile nawng de sa du ma ai.

³²Masha nkau mi gaw, na lahpang nna ma-a ai masha langai mi hpe shi hpang de woi sa wa nna, dai wa a ntsa e lata mara ya na, hpyi nem ma ai.

³³Dai rai nna Yesu gaw, dai wa hpe masha hpawng kaw na shi hpe hkrai sha shim ai shara de shapraw la nhtawm, dai wa a na lashing hku shi a layung achyaw bang ya ai hte, mayen mahtaw nhtawm shi a shinglet hpe mung ahtawk ya wu ai.

³⁴Dai hpang Yesu gaw lamu de mada yu let, aja wa nsa kaba shaw madai nna, dai masha wa hpe ‘‘Eph-hpa-hta,” ngu wu ai, dai gaw ‘‘Hpaw wa u!,” nga ai rai lu ai.

³⁵Shaloi jang shi a na bai na lu nna, ga n mai shaga hkra shing dang da ai shinglet lakang hpyan mat nna yak ai lam hpa n nga ai sha ga shaga hpang lu nu ai.

³⁶Dai hpang Yesu gaw, dai lam kadai hpe mung n tsun dan mu ga, masha ni hpe ginhtim da mu ai. Rai ti mung, je ginhtim magang je tsun hkai dan shajang ma ai.

³⁷Dai byin ai lam hpe na lu ai masha yawng mayawng gaw nachying wa mau mahka mat ma ai rai nna, “Shi gaw lam yawng mayawng hte hpe mai kaja ai hku galaw lu nga ai! Na lahpang ai ni hpe na lu shangun nna, n chye shaga ai ni hpe ga tsun shangun lu ai!,” nga nna tsun shajang ma ai.