Read Jinghpaw Common Language Bible 2009 MARKU 8 Bible Online

MARKU 8 - Jinghpaw Common Language Bible 2009 bible

MARKU 8

¹Dai hpang gade nna yang masha wunawng kaba mi bai sa du zuphpawng nga ma ai. Shanhte hta shahpa, hpa mung n lu mat ma ai shaloi, Yesu gaw shi a sape ni hpe shi hpang de shaga la nna,

²“Ndai masha ni masum ya tup ngai hte rau nga nga ma ai rai nna, ya sha na hpa mung n lu ma ai majaw, ndai masha ni a matu ngai grai matsan dum la nngai.

³Shanhte hpe hpa mung n jaw sha ai sha shanhte a nta de ngai shabawn dat yang gaw, shanhte hkrun lam e ba kalawp mat na ma ra ai, hpa majaw nga yang, shanhte hta na nkau mi gaw grai tsan ai shara kaw na sa wa ai ni rai nga ma ai,” ngu nna tsun mu ai.

⁴Shi a sape ni gaw, “Ndai nam mali hta e, ndai masha ni yawng hte hpe daw jaw na law hkra re ai sha hpa kadai wa kanang na sa tam lu na rai nga a ta?,” ngu nna shi hpe san mu ai.

⁵Yesu gaw, “Nanhte muk gade lu nga myit ta?,” ngu nna san mu ai. Shanhte gaw, “Muk tawng sanit sha nga sai,” ngu mu ai.

⁶Dai rai nna shi gaw, shawa masha ni hpe ga hta dung nga na hkang da mu ai. Dai shaloi dai muk tawng sanit hpe shi la nna, Karai Kasang a chyeju shakawn ngut jang dai ni hpe ahkyep alep nhtawm, shawa masha ni hpe gam jaw na matu sape ni e jaw mu ai; dai hte maren sape ni galaw ma ai.

⁷Nga loi mi sha shanhte lu nga ma ai rai nna, Yesu gaw dai ni a matu chyeju shakawn ngut jang, dai ni hpe mung garan jaw na matu hkang da wu ai.

⁸Shaloi masha shagu sha nna hkru kat lu nga ma ai; sha ai masha ni hkying mali; daram rai nga ma ai.

⁹Dai hpang sape ni gaw ngam ai adaw ahkyep ni ka sanit tup lu lahkawn la mu ai. Dai hpang Yesu gaw shanhte hpe shabawn dat mu ai.

¹⁰Shaloi jang shi a sape ni hte rau hka li langai mi a kata de shang nna Dalmanuhta [18] ginwang de sa mat wa ai.

¹¹Hparishe nkau mi Yesu kaw sa nna shi hte ndang kalang hkat hpang ma ai. Shanhte shi hpe chyam yu mayu da mu ai rai nna, Karai Kasang gaw Yesu hta teng teng amu galaw nga ai lam sakse madun na matu lamu de na lamik kumla langai mi galaw dan na shanhte shi kaw hpyi ma ai.

¹²Rai ti mung Yesu gaw nsa kaba shaw madai let, “Ndai prat na masha ni gaw hpa rai lamik kumla langai mi hpyi ma ai kun? Ngai kaja wa teng teng tsun made ga! Ndai masha ni hpe dai zawn re ai lamik kumla hpa mung madun na mawe ai n rai!,” ngu mu ai.

¹³Madu gaw shanhte kaw na pru mat wa nna, li hta e bai shang nhtawm nawng wora hkran de rap mat wa ai.

¹⁴Sape ni gaw muk law hkra gun na malap kau nna dai li hta shanhte kaw muk tawng langai sha nan ngam ma lu ai.

¹⁵Yesu gaw shanhte hpe, “Nanhte gaw Hparishe ni a matsi hte Herod a matsi hpe sadi let koi gam nga mu,” ngu nna sadi jaw mu ai.

¹⁶Sape ni gaw, “Shi ning nga tsun ai gaw, anhte muk kachyi mi pyi n lu mat ai majaw tsun ai rai nga ai,” nga nna shada da tsun hkat nga ma ai.

¹⁷Shing nga nna tsun nga ma ai hpe Yesu chye wu yang, “Nanhte muk n gun ai lam hpa rai tsun hkat nga myit ta? Ya du hkra nanhte n chye na, n htai lu, la nga myit ni? Nanhte a myit masin ni hpa majaw dai daram azet alet n re ai yup nga malit ta?

¹⁸Nanhte myi tu ti mung, nanhte n mu nga myit ni? Nanhte na tu ti mung nanhte n na nga myit ni?

¹⁹Dai muk tawng manga hpe sha ngai ahkyep alep nna ngai daw jaw ai hpe nanhte n dum myit ni? Dai shaloi sha ngam ai adaw ahkyep ni ka gade hpring hkra nanhte lahkawn la lu myit ta?,” ngu nna san mu ai. Shanhte gaw, “Ka shi lahkawng re,” ngu nna htan mu ai.

²⁰“Dai muk tawng sanit hpe mung, ngai ahkyep alep nna masha hkying mali hpe karan jaw yang, adaw ahkyep ka gade hpring dem rai nga a ta?,” nga nna Yesu bai san mu yang, shanhte gaw, “Ka sanit re,” ngu nna htan mu ai.

²¹“Dai rai yang, nanhte gaw ya du hkra wa n chye na nga myit ni?,” ngu nna shi shanhte hpe san mu ai.

²²Yesu hte sape ni Betsaida de du ma ai. Dai yang e myi kyaw ai masha langai mi hpe masha nkau mi shi hpang de woi sa nna, shi hpe ahtawk ya na hpyi da mu ai.

²³Shi gaw dai myi kyaw ai wa hpe lata hte dun la nna, kahtawng shinggan de woi shapraw nhtawm, shi a myi hpe mayen mahtaw madit nna, shi a ntsa e lata mara da let, “Nang lama ma mu lu da nu ni?,” ngu nna shi hpe san wu ai.

²⁴Shi gaw dawng mada yu nna, “Rai sa, ngai masha ni hpe mu lu se ai, rai ti mung shanhte gaw hpun zawn hkawm nga ma ai,” ngu wu ai.

²⁵Yesu gaw dai masha a myi hta shi a lata bai mara da ya wu ai. Ndai lang aja wa hpaw mada yu dat yang, shi a myi nhtoi majing bai lu la nna nga manga hpe asan sha mu lu nu ai.

²⁶Dai hpang Yesu gaw shi hpe, “Kahtawng de hkum nhtang shang et,” ngu nna hkang da ai hte nta de wa shangun dat wu ai.

²⁷Dai hpang Yesu hte shi a sape ni gaw Kesare Hpilipi mare makau na kahtawng ni de lai hkawm mat wa ma ai. Lam e Yesu gaw, “Masha ni ngai hpe kadai wa re ai nga nna tsun nga ma ta?,” ngu nna san mu ai.

²⁸Shanhte gaw, “Masha nkau mi, nang hpe Hkalup Sara Yawhan re ai, kaga hte gaw, Elia re ai, bai kaga hte gaw, myihtoi ni hta na langai mi rai nga ai, nga ma ai,” ngu nna shi hpe tsun dan mu ai.

²⁹Dai shaloi Yesu gaw, shanhte hpe, “Nanhte mahtang ngai hpe kadai wa re ai, nga nga myit ni?,” ngu nna san mu ai. Petru gaw, “Nang gaw Meshia rai nga ndai,” ngu nna htan wu ai.

³⁰Dai shaloi Yesu gaw, “Nye a lam kadai hpe mung hkum tsun dan myit,” ngu nna shanhte hpe ginhtim hkang da mu ai.

³¹Dai shaloi Yesu gaw, “Dai masha Kasha gaw nni nkri law law wa hkrum nna, agyi salang ni, hkinjawng agyi ni hte tara sara ni e nyet kau ai hkrum na ra ai. Shi hpe sat kau na mara ai, rai ti mung masum ya nhtoi a hpang e shi bai hkrung rawt wa na ra ai,” ngu nna shi a sape ni hpe sharin achyin ya hpang mu ai.

³²Dai lam shanhte hpe dan dan leng leng tsun dan mu ai. Dai rai nna Petru gaw shi hpe shara langai mi de shaga la nna, daru kau magang wu ai.

³³Rai ti mung Yesu gaw kayin wa ai hte shi a sape ni hpe mada yu let, Petru hpe, “Satan e, ngai kaw na pru mat wa u. Na a myit ai lam ni gaw Karai Kasang kaw na n rai, masha kaw na she rai nga lit dai!,” ngu nna daru kau wu ai.

³⁴Dai hpang Yesu gaw shawa masha ni hte sape ni hpe shi hpang de shaga la nna, “Kadai rai ti mung ngai hpang de hkan sa mayu ai wa gaw, tinang hkum hpe ndang kau nna, shi a wudang hpai let, ngai kaw hkan nang ru ga.

³⁵Hpa majaw nga yang, tinang a asak hpe hkye la mayu ai wa kadai mung asak sum na ra ai; rai ti mung nye a majaw hte dai Kabu Gara Shiga a majaw shi a asak sum ai wa chyawm gaw, dai hpe hkye la lu na wu ai.

³⁶Bai, masha gaw ndai mungkan ting hpe madu lu da nna, tinang a asak wenyi sum mat a yang gaw, shi a matu hpa akyu nga lu ta?

³⁷Masha gaw hpa gawng malai hkungga hte wa, tinang a asak hpe hkrang la lu na a ta?

³⁸Masha langai mi gaw, ndai Karai kata nna tara n nga, n hkru n kaja ai prat aten hta e, ngai hte ngai sharin shaga ai mungga hpe kaya nga a yang gaw, dai Masha Kasha gaw shi a Kawa a hpung shingkang dagraw nna chyoi pra ai lamu kasa ni hte nawng du sa wa yang, dai wa hpe kaya kau na ru ai,” ngu nna shanhte hpe tsun mu ai.