Read Jinghpaw Common Language Bible 2009 LUKA 1 Bible Online

LUKA 1 - Jinghpaw Common Language Bible 2009 bible

LUKA 1

¹Tsaw ra ai Htawhpilu [1] e: Anhte kam sham hkap la nga ai nawku htung a byin lai wa sai npawt nhpang lam ni hpe kaja dik ai hku ka lajang da ai masha law law wa nga masai.

²Dai lam ni hpe shawng npawt kaw nna, tinang myi hte mu yu sai, dai Kabu Gara Shiga hkaw tsun ai ni tsun dan ai hte maren shanhte ka lajang da masai.

³Ngai mung dai lam ni mahkra hpe nnan byin wa ai kaw nna npawt ndung hkren azin ayang san sagawn la ngut ai hpang arawng lu ai Htawhpilu e, na a matu matut manoi hkrak jaw ai hku Madu Yesu galaw ai hte sharin shaga ai lam ni hpe ka da yang mai na re ngu nna myit lu nngai.

⁴Nang chye da sai lam shagu a teng man ai lam hpe hkum tsup ai hku chye shangun mayu ai majaw, ndai laika hpe ka da nngai.

⁵Yuda mung[2] up ai Herod hkawhkam a lakhtak e, Abia hkinjawng hpung hta lawm ai Zahkaria mying ai hkinjawng langai mi nga ai. Shi a madu jan a mying gaw Elisabet rai nna, shi mung hkinjawng Arun amyu lakung hta na rai nga ai.

⁶Dai yan gaw Karai Kasang a man e ding hpring ai yan rai nga ma ai. Shan gaw Madu a jep ai tara nga manga hte hkang da mada yawng hpe htep lahti hkan nang ma ai.

⁷Rai ti mung, Elisabet gaw maudung rai nga ai majaw kasha n shaprat wu ai. Shan lahkawng asak aprat mung kaba ma sai.

⁸Lani mi na Zahkaria gaw shi lawm nga ai hkinjawng hpung hta lit ang ai hte maren, Nawku Htingnu kata e shani shagu galaw ang ai daw jau ai amu gun hpai nga ai.

⁹Dai Madu a Nawku Htingnu hta Chyoi Pra ai gawk kata na tawn hkungri ntsa e manam pyaw ai baw shang nat nawng na matu hkinjawng htung hte maren, hpaida hte lata la ai hta ang wu ai.

¹⁰Dai manam pyaw ai baw nat nawng nga ai ahkying hta, nawku ai shawa masha ni nlang hte gaw, shinggan e akyu hpyi let nga nga ma ai.

¹¹Shaloi dai Madu a lamu kasa langai mi gaw, manam pyaw ai nat nawng ai hkungri a hkra maga de, shi hpe tsap shadan dan wu ai.

¹²Zahkaria gaw dai mu jang kajawng nna hkrit kahpra mat ai.

¹³Rai ti mung, dai lamu kasa tsun ai gaw, “Zahkaria e, hkum hkrit et; Karai Kasang gaw na a akyu hpyi ai ga hpe madat ya nit dai rai nna, na madu jan Elisabet gaw shadang sha langai mi shangai na ra ai, nang shi hpe Yawhan ngu nna shamying ya na rai ndai.

¹⁴Na a matu kabu gara ai hte ngwi pyaw ai lam tai na ra ai; shi shangai wa ai majaw masha lan lak mung kabu gara na mara ai.

¹⁵Kaning rai nme law, shi gaw dai Madu a man e galu kaba wa na ra ai; sabyi hte chyaru shi lu na n rai; kanu a hkritung nna pyi, Chyoi Pra ai Wenyi hte hpring na ra ai.

¹⁶Israela kashu kasha ni law law hpe, shanhte a Madu Karai Kasang hpang de shi kayin wa shangun na mu ai.

¹⁷Yawhan gaw, dai Madu a shawng e du sa ai wa rai nna myihtoi Elia zawn n-gun atsam rawng nna galu kaba wa na ra ai. Shi gaw kawa ni hpe kasha ni hte bai htingram ya nna n madat n mara nna je hpre ai masha ni hpe ding hpring ai ni a hpaji ningli bai lu la shangun na ra ai. Shi gaw dai Madu a matu lajang shachyip da chyalu rai hkra, Madu mazing da ai amyu masha ni hpe hkyen lajang ya na ra ai,” ngu nna Zahkaria hpe tsun wu ai.

¹⁸Shaloi Zahkaria gaw, “Dai gaw ngai kaning di chye lu na we ta? Ngai dingla ni ai, nye a madu jan mung aprat kaba sali ai,” ngu nna lamu kasa hpe htan wu ai.

¹⁹Lamu kasa gaw, “Ngai gaw Karai Kasang a man e tsap nga ai Gabriela rai nga nngai; nang hpe tsun dan u nga nna, ndai Kabu Gara Shiga tsun shana ya na ngai hpe shangun dat ni ai.

²⁰Yu u, dai ahkying du yang dik wa na ra ai nye a ga sadi hpe nang n kam ndai majaw, dai amu byin ai du hkra, ga n tsun lu ai ma-a na rin dai,” ngu nna shi hpe tsun wu ai.

²¹Dai aten hta shawa masha ni gaw Zahkaria hpe ala nga nna, Nawku Htingnu nhku e na na rawng nga mat ai hpe mau ma ai.

²²Shi pru wa yang shanhte hpe ga n tsun lu ai rai nna, dai nawku htingnu nhku e shingran mu nu ai hpe shanhte chye ya ma ai, shi gaw shanhte hpe ga hkaw mi mung n shaga lu ai rai nna, shi a lata hte dingsi dan let nga nga ai.

²³Ya shi daw jau ai amu a nhtoi gu jang shi nta de bai wa mat ai.

²⁴Dai hpang shi a madu jan Elisabet na-um nasin hkum rai wa nna nta kaw na n pru ai shata manga tup up rawng nga ai.

²⁵Ya Elisabet gaw, “Jahtum e, Madu ngai hpe karum la ni ai; masha ni a man e ngai hkrum ai sari jahpoi shatan nhkan hpe karum la ni ai; masha ni a man e ngai hkrum ai sari jahpoi shatan nhkan hpe yawng yeng seng kau ya ni ai,” nga nna tsun ai.

²⁶Elisabet na-um na sin hkum shata kru du ai shaloi, Karai Kasang gaw lamu kasa Gabriela hpe, Galile ginwang, Nazaret mare de shangun dat wu ai.

²⁷Dai lamu kasa gaw, Dawi a amyu hta na Yosep ngu ai wa mahtan da ai mahkawn hpang de mungga gun sa ai. Dai mahkawn a mying chyawm gaw Mari ngu ai rai nga ai.

²⁸Lamu kasa gaw Mari kaw du jang, “Chyeju nga lit ga, nang a lu ndai, dai Madu gaw nang hte rau nga nga ai rai nna shaman chyeju kaba nang hpe jaw nit dai,” ngu wu ai.

²⁹Mari dai ga a majaw masin kahpra nna, “Ndai shachyen ai ga gaw, kaning nga ai ga rai na ra i?,” nga nna myit aru yu nga ai.

³⁰Shaloi dai lamu kasa gaw, “Mari e, hkum hkrit et, nang Karai Kasang a man e myi man pa nit dai.

³¹Yu u, nang na-um nasin rai wa nna shadang sha shangai na rin dai; shi a mying hpe Yesu ngu nna shamying ya na ru ai.

³²Dai wa gaw galu kaba wa na ra ai rai nna, Tsaw Htum ai wa a kasha ngu, shi hkam la la na ru ai; Madu Karai Kasang mung, shi kawa Dawi a tingnyang shi hpe jaw na wu ai.

³³Shi gaw Yaku a aru arat ni a ntsa e htani htana a up nga na ra ai; shi a mungdan mung htum ngu ai nga na n rai,” ngu nna shi hpe tsun wu ai.

³⁴Shaloi Mari gaw, “Dai gaw kaning rai byin na rai ta? Ngai hkawn jet sha naw rai nngai,” ngu nna lamu kasa hpe tsun wu ai.

³⁵Dai lamu kasa gaw, “Chyoi Pra ai Wenyi na a ntsa e du nna, Karai Kasang a atsam nang hpe shingnip ka-up na ra ai; dai re ai majaw, shangai wa na ra ai wa hpe Karai Kasang a Kasha ngu nna shamying ai hkam la na ra ai.

³⁶Dai hta kaga, yu u, na a amyu jan Elisabet mung, gumgai rai sayang, shadang sha na-um na sin hkum rai nga nna, maudung[3] num ngu nna shamying hkrum ai jan hta ya shata kru rai wa sai.

³⁷Kaning rai nme law, Karai Kasang n galaw lu ai lam hpa mung n nga ai,” ngu nna htan wu ai.

³⁸Shaloi Mari gaw, “Yu u, Madu a shangun ma jan ngai rai nga nngai; na a ga hte maren ngai hta rai wa u ga,” ngu wu ai. Shaloi dai lamu kasa gaw shi kaw na wa mat ai.

³⁹Gade n na ai nhtoi hte hta e, Mari gaw, Yuda mung na bum ga e nga ai mare langai mi de alawan rawt sa wa ai.

⁴⁰Dai de du jang Zahkaria a nta de shang nhtawm Elisabet hpe hkrum shaga wu ai.

⁴¹Mari hkrum shaga ai ga Elisabet na jang, shi a hkritung na ma gaw gumlawt nga ai.

⁴²Elisabet mung Chyoi Pra ai Wenyi hte hpring nna nsen kaba hte jahtau let, “Numsha ni hta nang a lu ndai law; na a hkritung na ma mung a lu lit dai law;

⁴³Nye Madu a kanu ngai kaw sa du ai gaw, hpa chyeju ahkaw ahkang kaba wa rai na rai i?

⁴⁴Yu u, na a hkrum shaga ai ga nsen ngai na lu ai hte rau nye hkritung na ma gaw kabu gara ai hte gumlawt li ai.

⁴⁵Kam sham ai numsha gaw a lu ai; kaning rai nme law, dai Madu kaw nna shi hpe tsun ai ga gaw dik wa na ra ai,” nga ai.

⁴⁶Shaloi Mari gaw, “Nye a myit masin dai Madu hpe shagrau li ai;

⁴⁷Nye wenyi mung ngai hpe hkye hkrang la ai Madu Karai Kasang hta kabu gara li ai,

⁴⁸Madu gaw shi a shangun ma jan a grit nem nga ai hpe mu mada ya nu ai. Yu u, ya kaw nna shu mashi shu masha prat dingsa, ngai hpe a lu ai jan, ngu na mani ai,

⁴⁹daru magam atsam rawng ai Karai Kasang gaw, ngai hpe galu kaba ai galaw ni ai. Shi a amying nsang chyoi pra lu ai;

⁵⁰shi hpe hkrit kamyin ai ni a ntsa e, shu mashi shu masha prat du hkra matsan dum ai myit a madun nga ai.

⁵¹Shi a lahpum hte atsam pra di nna, gumrawng ai ni hpe tinang a myit hte maw mawn ai lam ni hte hpawn shabra kau nu ai.

⁵²Shi gaw n'gun atsam rawng ai hkawhkam ni hpe jahkrat kau nna, myit gyip grit nem nga ai ni hpe shagrau ya nu ai.

⁵³Kawsi hkrum ai ni hpe kaja ai hte jahkru shakat nna, sut su ai ni hpe kaman dat dat nu ai.

⁵⁴Anhte a ji wa ni hpe jaw da sai ga sadi hte maren, shi a shangun ma Israela hpe lanu lahku nu ai.

⁵⁵Shi gaw shi a matsan dum ai myit Abraham hte aru arat ni yawng hpe tut nawng madun dan na matu adum nga ai!” nga ai.

⁵⁶Mari chyawm gaw Elisabet hte rau shata masum dang nga nhtawm, nta de bai wa mat ai.

⁵⁷Shaloi Elisabet gaw shangai nhtoi gu nna, shadang sha langai mi shangai wu ai.

⁵⁸Dai Madu gaw shi a chyeju chyalai shi hpe madun dan nu ai lam, htingbu ni hte mayu dama ni na ma ai rai nna, shi hte rau kabu gara ma ai.

⁵⁹Ya matsat ya nhtoi hta e dai ma hpe matu gadoi na matu shanhte sa ma ai rai nna, shi a kawa a mying hte maren Zahkaria ngu nna shamying mayu ma ai.

⁶⁰Kanu mahtang, “N rai, Yawhan ngu na re,” ngu nna htan wu ai.

⁶¹Shanhte gaw, “Na bawsang ni hta shing nga mying ai langai mi mung n nga ai,” ngu nna shi hpe tsun mu ai.

⁶²Shaloi, dai ma hpe kaning ngu shamying mayu ai kun? nga nna kawa hpe dingsi san ma ai.

⁶³Shi gaw gamgu pa hpyi la nna, “Shi a mying Yawhan rai lu ai,” ngu nna ka dan wu ai.

⁶⁴Dai hkring mi hta shi a n-gup hpaw ai hte shinglet yan nna ga bai lu shaga nu ai rai nna Karai Kasang hpe shakawn kungdawn nga ai.

⁶⁵Dai re ai majaw, shanhte a makau grup yin hkan na ni nlang hte hta hkrit ai myit rawng wa ai rai nna, dai shiga ni mahkra Yuda Mung ting hta kajai gumhkawng wa ai.

⁶⁶Dai shiga na ai masha shagu mung, tinang a kraw kata e dai hpe myit sumru yu nna, “Ndai ma gaw, kaning re ai wa rai na ra ai i?,” nga ma ai, kaning rai nme law, dai Madu a n'gun atsam gaw shi a ntsa e nga nga ai lam dan leng nga ai.

⁶⁷Shaloi Yawhan a kawa Zahkaria gaw Chyoi pra ai Wenyi hte hpring wa nna, myihtoi ga hku tsun wu ai gaw:

⁶⁸“Dai Madu Israela a Karai Kasang hpe shakawn kungdawn shagrau sha-a nga ga law! Shi a amyu Israela hpe karum la na kawan yu sa nna shanhte hpe shalawt dat nu ai.

⁶⁹Shi a shangun ma Dawi a aru arat hta na anhte a matu n-gun atsam rawng ai Hkye la Madu jaw ya mani ai.

⁷⁰Chyaloi nhkoi kaw nna shi a chyoi pra ai myihtoi ni a n-gup hte ga sadi jaw da sai hte maren,

⁷¹anhte a hpyen ni hte anhte hpe n ju n dawng ai ni yawng a lata na hkye hkrang la mani ai.

⁷²Shi gaw anhte a ji wa ni hpe shi a matsan dum lama ai lam madun dan nna, shi a chyoi pra ai ga shaka hpe dum nga na ra ai.

⁷³Anhte a ji wa Abraham hpe dagam da ai ga hte maren, shi gaw anhte hpe anhte a hpyen ni a lata na hkye la nna shi hpe, hkrit ai myit n rawng ai sha daw jau shangun na matu ga sadi jaw da mani ai.

⁷⁴

⁷⁵Shing rai anhte gaw, anhte a prat dingsa shi a man e chyoi pra nna ding hpring ai ni tai nga na ga ai.

⁷⁶“Ma e, nang gaw Tsaw Htum Ai Wa a myihtoi ngu nna shamying ai lam hkam la nna, shi a lam lajang na matu, shi a shawng numshawn e sa wa na rin dai.

⁷⁷Nang gaw shi a amyu masha ni hpang de sa nna shanhte a mara ni hpe dat kau ya nna hkye hkrang la na ra ai lam tsun dan na rai ndai.

⁷⁸Anhte a Karai Kasang gaw tsaw ra matsan dum ai myit hte hpring tsup nga ai: shi a hkye hkrang la ai chyeju nhtoi gaw lamu ntsa na jan shingkang zawn anhte a ntsa e du nna;

⁷⁹nsin hte si ai shingnip kata e dung nga ai ni yawng hte hpe lamu na nhtoi jahtoi ya na ra ai,” nga ai. Anhte a sat lagaw ni hpe ngwi pyaw ai lam de woi sa wa na ra ai.

⁸⁰Dai ma gaw gawng shingyan kaba wa nna wenyi atsam hpring let, Israela masha ni kaw dan pru ai nhtoi du hkra, nam mali hkan e nga nga ai.