Read Jinghpaw Common Language Bible 2009 LUKA 12 Bible Online

LUKA 12 - Jinghpaw Common Language Bible 2009 bible

LUKA 12

¹Dai shaloi masha hkying mun hpawng kaput wa ai majaw shada da pyi kabye hkra hkra rai nga ma yang, shi a sape ni hpe, Yesu shawng tsun hpang mu ai gaw, “Hparishe ni a sawt ai myit ngu ai, matsi hpe koi gam nga mu.

²Magap ka-up da ai arai hpa rai tim, hpaw malang dat na ra ai; masha n chye lu hkra makoi da ai lam nga manga mung dan dawng pru wa na ra ai.

³Dai re ai majaw, nsin e nanhte tsun matsun hpe, nhtoi e masha ni na shajang na mara ai; kata gawk e kahte tsun hkat ai ga hpa rai tim, nta numgaw ntsa nna marawn jahtau tsun na ma ra ai.

⁴“Nye a jinghku ni e, nanhte hpe ngai tsun made ga, hkum tsawp hpe sha sat kau lu nna, dai hpang kaga kaning mung bai n di lu ai ni hpe hkum hkrit myit.

⁵Kadai hpe sha hkrit mai ai gaw, ngai nanhte hpe madun dan made ga. Masha hpe sat kau ngut jang, ngarai kata de jahkrat kau na ahkang lu ai Karai Kasang hpe chyawm gaw hkrit nga mu, ngai tsun ai hpe kam mu, shi gaw nanhte hkrit ra ai wa nan rai nga ai!

⁶“U tsa manga hpe pyeksan pyek lahkawng hte dut kau lu ai n rai ni? Dai u tsa langai mi hpe mung Karai Kasang malap kau wu ai n rai.

⁷Nanhte a baw na kara singgawng ni mahkra hpe pyi hti da nu ai. Dai majaw Hkum hkrit myit, U tsa law law hta nanhte grau manu dan nga myit dai.

⁸“Nanhte hpe ngai tsun made ga, kadai rai ti mung masha ni a man e ngai hpe yin la ai wa hpe, Masha Kasha mung dai hte maren Karai Kasang a lamu kasa ni a man e shi hpe yin la na ra ai.

⁹Rai ti mung, masha ni a man e, ngai hpe nyet kau ai wa hpe chyawm gaw, Masha Kasha mung, Karai Kasang a lamu kasa ni a man e, shi hpe nyet kau na ra ai.

¹⁰“Dai Masha Kasha hpe n gup aga hte shut kau ai wa kadai hpe mung mara raw dat ya lu nga ai. Rai ti mung, dai Chyoi Pra ai Wenyi hpe n hkru n kaja ai ga hte tsun shatan ai wa kadai hpe mung mara raw kau ya lu na n rai.

¹¹“Nanhte hpe jeyang na matu tara jawng ni de, shing n rai munggyi ni, ahkang aya lu ai du salang ni hpang de dun wa ai hkrum myit yang, tinang a hkum hpe gara hku makawp maga la na shing n rai nanhte hpa baw tsun na hkum tsang myit.

¹²Hpa majaw nga yang, Chyoi Pra Ai Wenyi gaw, dai ahkying aten hta nanhte hpa tsun mai na hpe sharin ya na ra ai.”

¹³Shawa hpawng kata de na masha langai mi gaw, “Sara e, anhte a kawa htawng kau da ya ai sali arung arai ni ngai e garan ya na matu, ngai hpu wa hpe tsun ya rit,” ngu nna Yesu hpe tsun wu ai.

¹⁴Yesu gaw, “Nye a jinghku wa e, nan nau a ntsa e tara agyi tai ya na ahkang hte sali arai garan ya ai wa tai na, ngai hpe kadai san da a ta?,” ngu nna shi hpe htan wu ai.

¹⁵Dai hpang shanhte yawng hpe mung, shi bai tsun mu ai gaw, “Nammak lawhpa lam amyu myu kaw na nanhte a hkum ni hpe makawp maga koi gam let yu sadi nga mu, hpa majaw nga yang, kadai wa gade sut su nga ti mung, shi a asak majing gaw sutgan law htam wa ai hta rawng nga ai n rai,” ngu mu ai.

¹⁶Dai hpang Yesu gaw ga shadawn ndai hpe tsun dan mu ai, “Kalang mi hta sahti wa langai mi nga ai. Shi a yi hkauna gaw hkai nmai, nsi naisi grai kaja lu ai.

¹⁷Dai wa gaw shi a myit hta, ‘Nye a nsi naisi ni hpe shinggyin bang da na shara n lu nngai, ngai hpa galaw yu na i?,’ nga ai.

¹⁸Bai shi gaw, ‘Ngai ndai hku galaw na we ai; nye a dum dingsa ni hpe ngai run kau nna grau kaba ai ni hpe galaw na we ai, dai ni hta nye a nsi naisi hte kaga sut rai ni mahkra hpe ngai shinggyin da na we ai.

¹⁹Dai hpang, nye a myit masin hpe ning ngu na we ai, gam kaja ai masha wa e! Law law ning a matu nang ra ai arai kaja law law nang shinggyin da lu nit dai rai nna, asak hkrung ai lam hta asan apan rai nga nu, lu nu, sha nu, pyaw pyaw rai nga nu, ngu na we ai,’ nga nna shi hkum hpe shi tsun wu ai.

²⁰Rai ti mung, Karai Kasang gaw, dai wa hpe, ‘Masha angawk e! Dai na jang na a asak hpe dawm la kau ya na ra ai, dai rai nna, nang mahkawng shachyip da ai arai ni gaw gade a matu tai na rai ta?,’” ngu nna tsun wu ai.

²¹“Tinang a matu sutgan mahkawng da nhtawm, Karai Kasang a man e n lu n su ai wa gaw, shing re ai sahti wa hte bung na ra ai,” ngu nna tsun hpungdim wu ai.

²²Dai hpang Yesu gaw sape ni hpe, “Dai re ai majaw, ngai nanhte hpe tsun made ga, hpa lu hpa sha na nga nna asak a matu, hpa bu hpa hpun na nga nna hkum hkrang a matu hkum tsang nga myit.

²³Asak gaw lusha hta grau ahkyak nga ai hkum hkrang gaw bu hpun palawng ni hta grau ahkyak nga ai.

²⁴U hka ni hpe yu nna myit yu mu; shanhte n gat n hkai, n dan n shu ma ai. Shanhte gaw sut rai bang da na gawk ni, mam dum ni n lu ma ai, rai ti mung, Karai Kasang gaw dai ni hpe sha hpa jaw da mu ai. Nanhte gaw u ni hta grau nna hpu ging nga myit dai n rai ni?

²⁵Nanhte hta na kadai wa mi myit tsang ai hte, tinang a asak aprat hpe shaning loi mi galu hkra jat la lu myit ni?

²⁶Kaji htum ai lam langai mi hpe pyi n di lu myit dai rai yang, kaga lam ni hpe hpa rai myit tsang nga myit ta?

²⁷Nampan ni kaning rai kaba wa ai hpe yu yu mu, shanhte gaw amu mung n galaw ma ai, shanhte a matu hpun palawng mung n da ma ai. Rai ti mung, ngai nanhte hpe tsun made ga, Shawlumon pyi shi a hpung shingkang sutgan mahkra hte ndai nampan langai mi zawn tsawm hkra bu hpun lu ai n rai.

²⁸Ai n kam ai baw e, dai ni nga nna hpawt de wan mang hta kabai bang nna nat kau ai nam na tsingdu ni hpe Karai Kasang shing rai shabu jahpun da ai rai yang gaw, dai hta n ga nanhte yawng hpe jahpun na myit dai n rai ni?

²⁹“Dai majaw nanhte hpa lu hpa sha na, ung ang ai myit hkum rawng myit:

³⁰(Hpa majaw nga yang, ndai mungkan hta nga ai Tara mai gan amyu ni dai lam ni hta galoi mung myit tsang nga ma ai.) Dai lam ni nanhte hta ra nga ai hpe nanhte a Kawa chye ya nga ai.

³¹Nanhte gaw shi a mungdan hpe mahtang tam nga mu, shaloi dai lam ni nanhte hpe jaw na marin dai.

³²Sagu hpung kaji e, hkum hkrit et; hpa majaw nga yang, dai mungdan nanhte hpe jaw na, nanhte a Kawa myit ra sharawng nga ai.

³³Nanhte lu ai arai ni yawng dut kau nna lu ai gumhpraw, matsan mayan ni hpe karan jaw mu, tinang a matu dingsa n chye ai gumhpraw jan galaw nna, lagut n du, manut e mung n jahten kau lu ai, sumsing lamu e n htum n wai chye ai sutgan kyem da nga mu.

³⁴Hpa majaw nga yang, nanhte a sutgan nga ai kaw, nanhte a myit masin mung nga na malit dai.

³⁵“Anhte jin jin rai nga na matu nshang e shingkyit kyit nna pyengdin ni hpe shachyi da mu.

³⁶Hkungran poi de nna tinang a madu bai wa nna chyinghka wa akawk yang kalang lata hpaw ya na matu ala nga ai shangun ma ni zawn rai nga mu.

³⁷Dai madu du wa yang maja nga mala ai hpe, madu hpe wa mu lu shangun ai shangun ma ni gaw a lu ma ai. Ngai nanhte hpe tsun made ga, shi a ntsa palawng hpe raw nna, shanhte hpe sha ku grup dung shangun nna galaw daw na ra ai.

³⁸Yuptung hpawa e rai ti mung, u goi mahka rai ti mung shing rai maja nga ma ai hpe wa mu mu yang gaw, dai shangun ma ni a lu ma ai.

³⁹Nta madu wa gaw gara ahkying aten hta lagut sa na hpe lama chye lu ai rai yang, shi amaja nga nna, shi a nta hpe tawk htu waw shang shangun na wu ai n rai nga ai hpe chye nga mu.

⁴⁰Nanhte mung, kup kup chyip chyip rai a maja nga mu, hpa majaw nga yang, nanhte n dum n mi rai, n myit mada ai ahkying hta e, dai Masha Kasha du sa na ra ai, ngu nna tsun mu ai.”

⁴¹Petru gaw, “Madu e, ndai ga shadawn gaw, anhte hpe sha tsun ai rai ni?, shing n rai masha hkum shagu hpe tsun ai rai ni?,” ngu nna san wu ai.

⁴²Dai Madu gaw, “Dai rai yang gaw, kangka ai hte hpaji rawng ai shangun ma gaw kadai wa rai na rai ta? Nta Madu wa e, shangun ma ni hpe up hkang na hte, aten du jang lusha karan jaw na san da hkrum ai wa rai nga ai.

⁴³Shi a madu bai du yang, shing rai galaw nga la ai shangun ma gaw, a nga ai.

⁴⁴Kaja wa ngai nanhte hpe tsun made ga, nta madu gaw dai wa hpe shi a arai mahkra a ntsa e up hkang na matu san da na wu ai.

⁴⁵Rai ti mung, dai shangun ma wa gaw, nye a madu bai du wa na naw na la nga ai, nga nna shi kraw hta myit nga let, shangun ma num, la manang ni hpe, anu ajin di ai hte, lu nga sha nga nna, chyaru nang nga ai shaloi,

⁴⁶dai wa n myit mada ai shani, n dum n chye ai ten hta nta madu wa du wa nna, nhtum nni adup kau nhtawm, kangka sadi sahka ai lam n nga ai ni hkam la lu na ari kamhtaw hpe hkam la shangun na ra ai.

⁴⁷“Tinang a madu hpa baw galaw na hpe ra sharawng ai lam chye nga da ninglen, dai galaw na matu tinang dai n hkyen shachyip da ai shangun ma kadai hpe rai ti mung ri tawng hte aja awa anu kayat nna ari jaw ai hkrum na ra ai.

⁴⁸Rai ti mung, tinang a madu hpa baw ra ai hpe n chye ai sha, anu kayat ging ai amu galaw ai shangun ma hpe gaw, loi mi sha anu kayat ai hkrum na ra ai. Chyeju galaw ai lam law law hkam la ai wa kaw na, law law hpyi na ra ai; grau nna kam ai hte ap ya da hkrum ai wa kaw na grau law hkra bai hpyi na ra ai.

⁴⁹“Ga ntsa de wan jahkru dat na, ngai du sa ring ngai; dai wan ja jang chyi kap sai rai taw gaw, ngai hpa n dawt shara nga na a ta?

⁵⁰Ngai hkam la na hkalup langai mi naw nga ai; dai garai n hkam hkam gaw, ngai nachying myit nni nkri hkrum nga nngai.

⁵¹Mungkan de ngwi pyaw simsa ai lam jaw na matu, ngai du sa ai zawn nawn myit ni? Ngai nanhte hpe tsun made ga, dai hku n rai, shabra na she, du sa ring ngai.

⁵²Ya kaw nna, masha marai manga nga ai nta dinghku hta, marai lahkawng maga mi, marai masum gaw maga mi rai nna shada da myit n hkrum hka bra na mara ai.

⁵³Kawa ni gaw shadang sha ni hte, shadang sha ni gaw kawa ni hte, kanu ni gaw shayi sha ni hte, shayi sha ni gaw kanu ni hte, kamoi ni gaw kanam ni hte, kanam ni gaw kamoi ni hte, shada da n htan shai nna hka bra na ma ra ai,” ngu mu ai.

⁵⁴Shawa masha ni hpe mung, shi tsun mu ai gaw, “Nanhte gaw sinna maga de sumwi dung ai mu yang, marang htu na ra ai, nga nna kalang ta tsun chye myit dai, dai hte maren mung, byin byin rai nga ai.

⁵⁵Dingda nbung nbung wa yang, jan ja na ra ai, nga ga myit dai, dai hte maren mung byin ga nga ai.

⁵⁶Sawt ai masha ni e, lamu hte ga man a lam yu nna du hkra ladaw hpe chye tak maram ginhka lu myit dai, dai re ai mi, ndai prat na lachyum hpe hpa rai n chye na lu myit ta?

⁵⁷“Tara rap ra ai lam byin na matu tinang dai tinang hkum hpe hpa rai n dawdan nga myit ta?

⁵⁸Nang hpe marai langai ngai hka jun nna, shi nang hpe tara rung de woi sa wa ai shaloi, lam e naw rai nga yang, shi hte mung rawng ai lam hpe pyaw hkra htingram shakut kau u, dai n rai yang, hka madu gaw nang hpe tara agyi wa a man de dun sa nna ap kau na ra ai rai nna, palik ni nang hpe htawng hta bang tawn na mara ai.

⁵⁹Nang hpe ngai tsun de ga, Hka pyeksan lap mi mung n ngam hkra, garai n wa ma ma gaw, dai kaw nna nang pru wa lu na ndai n rai.”