Read Jinghpaw Common Language Bible 2009 LUKA 14 Bible Online

LUKA 14 - Jinghpaw Common Language Bible 2009 bible

LUKA 14

¹Bansa Nhtoi langai mi hta, Hparishe ningbaw ningla langai mi a nta e, shat sha na nga, Yesu shang nga yang, masha ni shi hpe htep kaw nna la mada yu nga ma ai.

²Shaloi, hkum hta hka rawng ai ana byin ai majaw, lagaw lata ni bum machyi nga ai masha langai mi Yesu kaw sa ai.

³Yesu gaw, “Jep ai Tara hta Bansa Nhtoi e machyi shamai na ahkang jaw a ni? N jaw a ni?,” ngu nna Tara sara ni hte Hparishe ni hpe san mu ai.

⁴Rai ti mung, shanhte atsin sha nga nga ma ai. Shaloi Yesu gaw, dai masha wa hpe jum la nhtawm, shamai ya nna dat dat wu ai.

⁵Dai hpang shi shanhte hpe, “Nanhte hta na marai langai ngai, tinang a kasha langai mi shing n rai dumsu langai mi Bansa Nhtoi e hka htung hta hkrat bang yang, dai Bansa Nhtoi jang n dun shaw la ai nga na myit ni?,” ngu nna tsun mu ai.

⁶Rai ti mung shanhte gaw ndai lam hte seng nna shi hpe hpa n htan lu ma ai.

⁷Yesu gaw, shaga da ai manam nkau mi, reng grau ai shara ni hpe lata la ai hpe mu wu yang, shanhte yawng hpe ndai ga shadawn hte tsun mu ai:

⁸“Masha langai ngai nang hpe num hkungran poi de shaga yang, reng grau ai shara hta hkum dung et, nang hta grau arawng lu ai wa hpe shi shaga da sai lam byin chye ai.

⁹Nan lahkawng hpe shaga ai manam madu wa sa nna, ‘Ndai wa hpe shara yen ya u,’ nga nna nang hpe tsun kau yang, nang gaw kaya ai hte nem dik ai shara hta htawt dung lu na ndai.

¹⁰Shing rai na malai, masha e shaga yang, nem dik ai shara kaw sa dung u, shaloi nang hpe shaga ai wa sa nna, ‘Jinghku wa e, grau reng ai shara hta sa dung u,’ nga nna tsun na ra ai. Dai gaw, nang hte rau dung nga ai ni mahkra a man e, nang arawng lu na rin dai.

¹¹Tinang hkum hpe shagrau shatsaw ai wa kadai mung, shagrit kau ai hkrum na ra ai; tinang hkum hpe shagrit ai wa kadai mung, shagrau shatsaw ai hkrum na ra ai,”

¹²Dai hpang Yesu gaw, shi hpe shaga ai nta madu wa hpe mung, shi tsun wu ai gaw, “Jahpawt shat, shing n rai, shana shat nang galaw daw ai rai yang, na a jinghku ni, nhpu nnau ni, mayu dama ni, shing n rai, lu su ai htingbu ni hpe hkum shaga et, hpa majaw nga yang, shanhte nang hpe bai shaga daw na mara ai.

¹³Nang lusha poi galaw daw n yang, matsan mayan ni, jahten labye ni, lagaw hten ai ni hte myi kyaw ai ni hpe shaga la u.

¹⁴Shing rai jang, nang a lu ndai, hpa majaw nga yang, shanhte chyeju n htang lu ma ai. Mai kaja ai ni si ai kaw na bai hkrung rawt wa ai shani Karai Kasang bai htang jaw ai hpe nang hkam la lu na rin dai,” ngu wu ai.

¹⁵Shi hte rau dung nga ai masha langai mi dai ga na jang, “Karai Kasang a Mungdan hta lusha poi lawm lu na ni gaw gade sha a lu ai ni rai na rai i?,” ngu nna Yesu hpe tsun wu ai.

¹⁶Yesu gaw dai wa hpe, “Kalang mi na masha langai mi gaw, lusha poi kaba langai mi hkyen wu ai rai nna, masha law law hpe shaga da wu ai.

¹⁷Lusha daw hkying du jang, shaga da sai ni hpe ‘Sa marit, lusha yawng jin ma sai,’ ngu nna shi a shangun ma ni hpe shaga shangun dat wu ai.

¹⁸Rai ti mung dai ni yawng gaw, langai a hpang langai ahkang hpyi ma ai. Shawng na wa gaw, ‘Ngai hkauna langai mi mari tawn se ai rai nna, dai sa yu ra nngai majaw, ngai hpe ahkang naw jaw na matu hpyi nem nngai,’ ngu nna shangun ma hpe hkap tsun wu ai.

¹⁹Langai wa mi gaw, ‘Ngai wutang gap manga mari ni ai rai nna, dai shangun chyam yu ra nngai majaw, ngai hpe ahkang naw jaw rit,’ ngu nna hpyi nem wu ai.

²⁰Langai wa mi mung, ‘Ngai ya sha num hkungran da ni ai majaw, n lu sa nngai,’ ngu wu ai.

²¹“Dai shangun ma wa gaw Madu kaw wa nna dai lam ni mahkra tsun dan wu ai. Dai ga na jang, nta madu wa gaw masin pawt la ai hte shi a shangun ma hpe, ‘Mare na nmaw lam ni hte htingwan lam ni de alawan sa nna, matsan mayan ni hte jahten labye ni, myi kyaw ai ni hte lagaw hten ai ni hpe shaga woi wa rit,’ ngu nna shangun dat wu ai.

²²Gade n na yang shangun ma wa bai wa nna, ‘Madu e, nang shangun ai hte maren galaw ngut se ai, rai ti mung dung shara masha tsawmra mi a matu naw nga nga ai,’ ngu wu ai.

²³Shing nga jang madu gaw, ‘Nam kahtawng hkan na lam kaji kaba de pru sa nna, nye a nta hpring u ga, shanhte hpe adip arip woi bang rit.

²⁴Ngai nanhte hpe tsun made ga, shawng e shaga da ai langai mi mung nye a shana shat chyim yu lu na n rai!,’ ngu nna shangun ma wa hpe tsun dat wu ai,” ngu wu ai.

²⁵Kalang mi na shawa hpung kaba Yesu hte rau sa wa nga yang, shi kayin yu let,

²⁶“Ngai hpang de sa ai wa kadai rai ti mung, tinang a kanu kawa, tinang a madu jan kasha ni hte tinang hkum nan hpe tsaw ra ai hta ngai hpe grau tsaw ra ai wa sha n rai yang gaw, nye a sape n tai lu ai.

²⁷Kadai mung tinang a wudang hpai let, nye a hpang n hkan ai wa gaw, nye a sape n tai lu ai.

²⁸Nanhte hte marai langai mi, wahpang langchyi langai mi gaw mayu yang, dai amu ngut ram hkra shi lu ai gumhpraw law na n law na, hkrat ang ai jahpu hpe dung nna shawng n sawn yu na masha nga a ni?

²⁹Shi dai hku n galaw ai rai yang, shi gaw npawt nhpang jung da ngut ai hpang, dai langchyi hpe galaw shangut lu na wu ai n rai.

³⁰Masha ni mung, ‘Ndai wa gaw, npawt gaw hpang nhtawm, ngut hkra n di lu nu ai,’ nga nna mu ai ni yawng shi hpe mani kau na ma ra ai.

³¹Bai lam mi gaw, hkawhkam langai mi gaw, shi a hpyenla mun mi hte, shi hpe gasat na nga nna hpyenla mun lahkawng hte sa wa ai kaga hkawhkam langai mi hpe hkap gasat na pru sa wa maw yang, shi gaw dai hpyen ni hpe hkap manga lu na daram n-gun rawng n rawng, shawng n nan dung nna daw dan na ra ai.

³²N hkap manga lu na rai yang mung kaga hkawhkam wa tsan tsan e naw nga yang, kasa shangun dat nna, htinglu htinglai na lam hpyi nem na ra ai.

³³Dai hte maren, nanhte hta na tinang a arai nga manga hpe n kau da lu ai wa gaw, nye a sape n tai lu ai,” ngu nna tsun mu ai.

³⁴“Jum gaw kaja nga ai; rai ti mung de a shum ai hkawng mat yang gaw, hpa hte jashum la lu na rai ta?

³⁵Dai gaw lamu ga a matu mung, namhpun di na matu mung, akyu n rawng mat sai rai nna shinggan de kabai kau ga ma ai. Na la na, na tu ai wa gaw, na la u ga!”