Read Jinghpaw Common Language Bible 2009 LUKA 19 Bible Online

LUKA 19 - Jinghpaw Common Language Bible 2009 bible

LUKA 19

¹Yesu gaw Yerihko mare de shang nna ga lai sa wa nga ai.

²Dai yang e, Zake mying ai kang hta ai agyi langai mi nga ai; dai wa gaw sut su ai wa rai nga ai.

³Shi gaw, Yesu kadai wa re ai mu lu hkra nga nna tam shakut nga ai, rai ti mung masha wunawng chyat nga ai hte, shi nan mung hkum kaji ai masha rai nga ai majaw, n mu lu wu ai.

⁴Dai majaw, Yesu hpe mu lu hkra shawa masha ni a shawng e gat lai nna, Yesu lai sa wa na ra ai lam makau na lakum hpun hta lung dung nga ai.

⁵Yesu dai shara de du yang, shi dap mada yu nna, “Zake e, alawan yu wa rit, dai ni ngai na nta e hkring manam na nngai,” ngu nna shi hpe tsun wu ai.

⁶Shaloi, Zake alawan yu wa nna, kabu gara ai hte Yesu hpe hkap hkalum la wu ai.

⁷Dai hpe mu ai masha ni yawng gaw, “Ndai masha wa gaw, Yubak kap ai wa langai mi a nta hta shang manam sai,” nga nna aput angun nga ma ai.

⁸Zake rawt tsap nna, “Madu e, nye a sut rai ka-ang hkup matsan mayan ni hpe ngai garan jaw na we ai; bai langai ngai hpe ngai mawp sha kau ai rai yang gaw, htam mali ngai bai wa na we ai,” ngu nna Madu hpe tsun wu ai.

⁹Shaloi Yesu gaw, “Dai ni ndai nta hta hkye hkrang la ai lam pru sai, hpa majaw nga yang, shi mung Abraham a kasha rai nga ai.

¹⁰Masha Kasha gaw mat mat ai ni hpe hkan tam nna hkye hkrang la na du sa ai rai nga ai,” ngu nna Zake hpe tsun wu ai.

¹¹Dai lam ni hpe masha ni madat nga ma yang, Yesu gaw shanhte hpe ga shadawn langai mi hte tsun wu ai. Yesu gaw Yerusalem mare de du na ni sai majaw mung, Karai Kasang a Mungdan gaw alawan dan pru magang ra ai nga nna myit sawn la shajang nga ma ai.

¹²Dai majaw shi gaw, “Kalang mi na arawng lu ai masha langai mi nga ai. Shi gaw tsan ai mungdan langai mi de hkawhkam aya sa hkam la na sa wa na maw nga ai, dai hpang shi a nta buga de bai wa na hkyen nga ai.

¹³Shi garai n pru sa wa yang, shi a shangun ma ni marai shi hpe shaga la nhtawm, ja dengga langai hpra, shanhte hpe ap ya da nna, ‘Ngai bai wa ai du hkra ndai hte hpaga ga mu,’ ngu nna shanhte hpe hkang da mu ai.

¹⁴Ya, shi a mung masha ni shi hpe n dawng da mu ai rai nna, shanhte gaw shi a hpang e kasa ni hpe hkan shangun dat nhtawm, ‘Ndai wa anhte a hkawhkam tai na anhte n ra ga ai,’ ngu nna tsun shangun mu ai.

¹⁵“Dai wa gaw hkawhkam aya hkam la nna bai du wa ai. Shi gaw shaloi jang, arang ap ya da sai shangun ma ni hpaga ga nna amyat gade kap sai chye lu hkra nga nna shanhte hpe shaga na hkang dat wu ai.

¹⁶Shawng na wa sa du nna, ‘Madu e, nang jaw da ai ja dengga langai mi hta amyat dengga shi bai lu la se ai,’ ngu nna tsun wu ai.

¹⁷Shaloi madu gaw, ‘Ara, kaja ai shangun ma e! Nang gaw amu kaji hta kangka nit dai majaw, ngai nang hpe mare shi a ntsa e up hkang sha shangun na de ai,’ ngu nna tsun wu ai.

¹⁸Lahkawng ngu na shangun ma wa mung sa nna, ‘Madu e, nang jaw da ai ja dengga langai mi hta amyat ja dengga manga bai lu se ai,’ ngu wu ai.

¹⁹Madu gaw dai wa hpe mung, ‘Nang mare manga a ntsa e up hkang nu,’ ngu wu ai.

²⁰“Bai kaga shangun ma langai wa mi gaw sa nna, ‘Madu e, ndai na a ja dengga rai nga ai; hpajet hte ngai makai da nngai.

²¹Kahti gari rai nna grai yak ai wa nang rai nga ndai majaw, ngai nang hpe hkrit nngai. Nang gaw, tinang n madu ai arai hpe magawn la chye ai wa, tinang n gat n hkai ai kaw na dan la ga ndai,’ ngu wu ai.

²²N hkaw n shawp n kaja ai shangun ma e! Na a n-gup na ga hku hkan nna ngai nang hpe jeyang de ga! Ngai gaw kahti gari rai nna grai yak ai wa rai nga nngai hte, tinang n madu ai arai magawn la nna, n gat n hkai ai kaw na dan la ga nngai hpe nang chye nga ndai.

²³Rai sa, dai rai yang, nye a gumhpraw hpe hpa majaw gumhpraw dum hta n bang da n ta? Shing rai ngai bai nhtang wa ai shaloi, amyat hte hpawn ngai bai lu la na rai nga ai.

²⁴“Dai hpang shi gaw makau e tsap nga ai ni hpe, ‘Dai ja dengga shi kaw na dawm la kau nna dengga shi lu ai shangun ma wa hpe jaw jat mu,’ ngu nna tsun mu ai.

²⁵Dai ni gaw, ‘Madu e, shi gaw joi shi lu nga sai,’ ngu mu ai.

²⁶Hkawhkam wa gaw, nanhte hpe ngai tsun made ga, “Loi sha mi lu ai wa kadai hpe mung, grau nna pyi naw jat jaw na rai nga ai; rai ti mung hpa mung n lu ai wa kaw na chyawm gaw, shi lu ai kachyi sha mi hpe pyi naw la kau na rai nga ai,” ngu mu ai.

²⁷Dai hta kaga, ya shanhte a ntsa e ngai hkawhkam tai nna up na n ra ai nye a hpyen ni hpe shaga dun wa nna, nye a man e sat kau maru,’ ngu nna hkang dat mu ai.

²⁸Dai lam hpe tsun ngut jang, shanhte a shawng e Yerusalem mare de lung wa ai.

²⁹Ya, Tsanlun bum na Bethpage kahtawng hte Behtani kahtawng de du magang jang, shi sape lahkawng hpe shi a shawng de shangun dat nna,

³⁰“Nan a shawng na kahtawng de sa masu; dai de shang jang, gade e lang mi mung garai n jawn yu ai lawze kasha langai mi dun nga la ai hpe nan mu na mu ai, dai hpe raw nhtawm dun wa marit.

³¹Masha langai ngai, ‘Dai hpa di raw nga myit ta?,’ nga nna nan hpe san wa yang, ‘Madu dai hpe ra ai da,’ ngu nna htan mu,” ngu nna matsun dat mu ai.

³²Shangun dat ai hku sa wa ma yang, lam shagu Madu tsun dat ai hte maren sa mu ma ai.

³³Dai lawze kasha hpe raw nga yang, de a madu ni gaw, “Dai lawze kasha hpe hpa rai raw nga myit ta?,” ngu nna shanhte hpe san mu ai.

³⁴Shan gaw, “Madu dai hpe ra ai da,” ngu nna htan mu ai.

³⁵Shaloi shan gaw, dai lawze kasha hpe Yesu hpang de dun wa nna, shanhte hpun nba mara nhtawm, Yesu hpe shajawn mu ai.

³⁶Shing rai shi jawn sa wa nga yang, masha ni gaw tinang ni a hpun nba ni hpe lam ntsa e hkan nep ya ma ai.

³⁷Ya Yerusalem mare du magang yang na Tsanlun bum kadawng yu ai shara kaw du yang, shi a sape hpung masha ni yawng gaw, shanhte mu yu sai magam atsam amu ni yawng a majaw, kabu gara let nsen kaba hte Karai Kasang hpe chyeju dum let shakawn kungdawn ma ai gaw:

³⁸“Madu a mying nsang hte du sa ai hkawhkam wa hpe Karai Kasang shaman ya u ga law! Sumsing lamu e ngwi pyaw ai hte, Tsaw htum ai shara e Karai Kasang a hpung shingkang rawng nga u ga law!” nga ma ai.

³⁹Dai shaloi, shawa hpawng kata na Hparishe nkau mi gaw, “Sara e, na a sape ni hpe atsin sha nga na matu hkang da u,” ngu nna Yesu hpe tsun mu ai.

⁴⁰Yesu gaw, “Ngai nanhte hpe tsun made ga, ndai ni atsin sha nga ma yang gaw, nlung ni shanhte dai jahtau na mara ai,” ngu nna htan wu ai.

⁴¹Shi gaw Yerusalem mare hte grau ni wa nna, dai mare hpe mu mada ai shaloi, de a matu shi hkrap nna,

⁴²“Mare nang e, ngwi pyaw sim sa ai lam lu la na matu hpa baw ra nga ai ngu ai hpe dai ni nang chye lu wu taw gaw law! Rai ti mung ya gaw nang dai hpe n mu n chye lu ndai!

⁴³Na a hpyen ni nang hpe kaduk ni hte dap jung nna wang da let, lam maga shagu pat shingdang da ai aten du wa na ra ai.

⁴⁴Shanhte gaw nang hpe mung, na a bunghku ni a kata e rawng nga ai masha ni hpe atsai awai jahten kau ai nhtoi gaw nang kaw pru na ra ai rai nna, nang hta nlung langai mi a ntsa e langai mi pyi n mara ngam nga lu hkra rai na ra ai. Hpa majaw nga yang, nang gaw Karai Kasang nang hpe hkye la na matu du sa ai aten hpe n dum n chye ndai,” ngu wu ai.

⁴⁵Dai hpang Yesu gaw Nawku Htingnu de shang nna, arai dut ai hpaga masha ni hpe shaden kau magang let,

⁴⁶shanhte hpe tsun da mu ai gaw, “Dai Chyum Laika ni hta mung, Karai Kasang gaw, ‘Nye a nta hpe akyu hpyi ai nta ngu nna shamying lu na rai nga ai,’ nga nna ka da nga ai. Rai ti mung nanhte gaw, ndai nta hpe damya lungpu shatai da myit dai,” ngu mu ai.

⁴⁷Shi gaw shani shanang Nawku Htingnu e sharin shaga let nga nga ai. Hkinjawng kaba ni, Tara sara ni Yuda amyu masha ni a ningbaw ningla ni mahtang gaw, shi hpe sat kau mayu da mu ai,

⁴⁸Rai ti mung shanhte gaw shi hpe kaning di na lam n mu mu ai, hpa majaw nga yang, shawa masha ni yawng hte gaw ga hkaw mi mung n jahkrat kau mayu hkra shi a sharin shaga ai ga madat noi nga nga ma ai.