Read Jinghpaw Common Language Bible 2009 LUKA 21 Bible Online

LUKA 21 - Jinghpaw Common Language Bible 2009 bible

LUKA 21

¹Yesu gaw grup yin de dap mada dat yu nna, Nawku Htingnu na sut dek hta lu su ai ni alu sa bang shajang nga ma ai hpe mu wu ai.

²Magri hkyeng dingsen lahkawng sha bang ai grai matsan mayan re ai gaida jan langai mi hpe mung shi mu wu ai.

³Yesu gaw, “Nanhte hpe ngai teng teng tsun made ga, ndai matsan mayan re ai gaida jan gaw, kaga ni yawng hta grau law bang nu ai.

⁴Hpa majaw nga yang, kaga ni gaw tinang a n taw n tsang lu ai hta na jan ai shawang kumhpa hpe bang dat ma ai, rai ti mung, matsan ai jan rai nga ai shi gaw, shi a matsan mayan re ai hta na, asak bau na n ngam da hkra, lu malu yawng bang dat nu ai,” ngu mu ai.

⁵Sape ni nkau mi gaw, dai Nawku Htingnu gaw reng tsawm ai nlung ni hte mung, Karai Kasang hpe alu jaw tawn ai alu kumhpa, arung arai ni hte mung, mawn sumli tawn nga ai majaw gade tsawm htap nga a hka.

⁶Yesu gaw, “Ndai nanhte mu nga ai arai ni yawng nlung langai mi pyi, ndai kaw mi na shi a shara hta n mara nga lu na aten du na ra ai, nlung tawng shagu run kabai jahkrat kau ai hkrum na ra ai,” ngu mu ai.

⁷Shanhte gaw, “Sara e, dai galoi rai na rai ta? Dai byin na aten du wa magang sai lam kumla madun na matu hpa baw byin wa na rai ta?,” nga nna san ma ai.

⁸Yesu gaw, “Nanhte hkalem masu kau ai n hkrum myit ga, sadi nga mu, hpa majaw nga yang, masha law law wa nye a mying hte paw pru nna, ‘Ngai gaw shi rai nngai; Jahtum nhtoi du ra ai; nga nna tsun na mara ai. Shanhte a hpang hkum hkan nang myit.

⁹Hpyen gasat ai lam ni hte gumlau rawt ai lam ni na yang hkum hkrit myit; dai lam ni shawng byin lu na rai nga ai, rai ti mung, dai ni gaw, jahtum nhtoi ni ra ai ngu mayu ai garai n rai nga ai,” ngu nna tsun mu ai.

¹⁰Bai shi shanhte hpe tsun mu ai gaw, “Masha amyu mi hte amyu mi, mungdan mi hte mungdan mi shada da hpyen gasat hkat na mara ai.

¹¹Hkrit hpa nnang nawn kaba ni mung, hkuwa kaba ni mung, shara shagu hta ana zinli ni mung byin na ra ai, lamu de na laklai ai hkrithpa arai ni hte lamik kumla kaba mung, pru na ra ai.

¹²Dai lam ni yawng garai n byin yang, masha ni gaw nanhte hpe rim la nna zingri zingrat di nhtawm, tara jawng ni hta jeyang nna htawng bang kau na matu ap kau ai hkrum na myit dai hte nye a mying a majaw hkawhkam ni hte du ni a man de du na marin dai.

¹³Dai gaw nanhte a matu Kabu Gara Shiga sakse hkam na ahkaw ahkang kaja tai na ra ai.

¹⁴Dai majaw, tinang hkum hpe makawp maga la na matu, kaning ngu nna tsun htan na ngu ai hte seng nna myit n ru ra hkra shawng kaw nna tinang a myit ni hpe daw dan shatawng da nga mu.

¹⁵Hpa majaw nga yang, nanhte tsun ai ga hpe nanhte a hpyen ni n lu dangrang, n lu tsun ninghkap hkra kaning ngu tsun na ngu ai ga ni hte nyan hpaji ngai nanhte hpe jaw na made ai.

¹⁶Nanhte a kanu kawa ni, kahpu kanau ni, mayu dama ni hte jinghku jingyu ni e pyi ap kau ai hkrum na marin dai, nanhte hta nkau mi hpe sat kau na mara ai.

¹⁷Nye a majaw nanhte hpe masha ni yawng n ju n dawng na mara ai.

¹⁸Rai ti mung, nanhte a kara singgawng langai mi pyi hten lu na n rai.

¹⁹Nanhte gaw dakring dalang rai ngang ngang tsap nga mu, shaloi nanhte hkye hkrang la ai hkrum na marin dai.

²⁰“Yerusalem mare hpe hpyen hpung ni e wang kawan da ai hpe, nanhte mu myit yang, dai mare gade n na yang, jahten kau ai hkrum na ra ai hpe dum chye mu.

²¹Dai shaloi e, Yuda mung hta nga ai ni gaw, bum ga de hprawng mat wa mu ga, mare kata e nga ai ni gaw mare shinggan de pru wa mu ga; mungdan kata hkan nga ai ni hpe mare kata de hkum shang shangun mu ga.

²²Hpa majaw nga yang, Chyum Laika ni hta tsun da ai lam ni yawng mayawng dik wa lu na matu mara, ‘Jeyang daw dan nna ari jaw ai Nhtoi ni rai na ra ai.’

²³Dai nhtoi hte hta na-um na sin re ai num ni hte, ma chyu naw chyu ai kanu ni a matu grai hkrithpa yak hkak lam rai na ra ai, hpa majaw nga yang, ndai mung a ntsa e hkrit hpa kyin dut kaba, ndai amyu a ntsa e Karai Kasang a pawt bu ai ari du na ra ai.

²⁴Nkau mi gaw nhtu hte sat kau hkrum nna, kaga ni gaw bawng hku masha amyu shagu ni e mungdan kaga ga de rim woi mat wa ai hkrum na mara ai rai nna, maigan amyu ni a matu Karai Kasang ladaw da ai nhtoi htum ai shani du hkra, Yerusalem mare gaw maigan amyu ni e kabye dip up da ai hkrum na ra ai.

²⁵“Dai shaloi e, jan shata, shagan ni hta laklai ai lamik kumla ni dan pru na ra ai. Ga ntsa e mungdan ni yawng gaw, panglai hkaleng ni a wu kadu ai nsen majaw hkrit kajawng ai hte myit ru myit tsang hkrum na mara ai.

²⁶Masha ni gaw mungkan ting hta byin wa na ra ai amu ni hpe tau myit yu nna hkrit wa ai majaw htan mat na mara ai, hpa majaw nga yang, sumsing lamu ganghkau a atsam ni gaw shanhte a shara kaw na shamu shamawt gari ashun wa na mara ai.

²⁷Dai shaloi e Masha Kasha gaw, daru magam atsam, hpung shingkang kaba hte nawng, sumwi hta du sa ai hpe shanhte mu na mara ai.

²⁸Dai lam ni byin hpang wa jang, rawt tsap nna baw ni hpe sharawt mada yu mu; hpa majaw nga yang, nanhte hpe hkye hkrang la na aten ni wa ra ai.”

²⁹Dai hpang Yesu shanhte hpe ndai ga shadawn hte tsun mu ai gaw, “Maihpang hpun hte kaga hpun ni yawng hpe myit yu mu.

³⁰Shanhte a lap hkalung ni prut wa magang ai hpe mu jang, nlum ta ni wa ra ai, nga nna nanhte chye myit dai.

³¹Dai hte maren, dai lam ni byin hpang wa ai hpe nanhte mu myit yang, Karai Kasang a Mungdan du ra ai hpe chye na nga mu.

³²“Ya pra nga ai ndai amyu ni yawng garai n si mat yang, dai ni yawng mayawng byin mat na ra ai hpe dum chye nga mu.

³³Sumsing lamu hte ginding aga lai mat wa na ra ai, rai ti mung, nye a ga ni gaw n lai mat na li ai.

³⁴“Nanhte gaw, lu lai, sha lai, chyaru nang ai, dinghta asak hkrung lam a matu myit ru myit tsang ai lam ni hte nanhte hpe n ka-up dang kau u ga, sadi hte nga nga mu. Dai n rai yang, dai tara dawdan ai nhtoi gaw mahkam htim ai zawn nanhte a ntsa e akajawng sha dan pru na ra ai.

³⁵Hpa majaw nga yang, dai nhtoi gaw ga ntsa shara shagu hta nga nga ai masha ni yawng a ntsa e shing rai du na ra ai.

³⁶Nanhte gaw dai byin wa na ra ai lam ni yawng hpe lai di nna lawt lu na n-gun atsam lu la myit ga hte Masha Kasha a man e tara daw dan hkam na matu tsap lu ging ai ni tai lu myit ga akyu hpyi nga let amaja nga mu,” ngu mu ai.

³⁷Yesu gaw dai nhtoi ni hta shani shanang Nawku Htingnu e sharin shaga nga nna, shana de du wa jang, Tsanlun ngu ai bum de pru sa nna sa nga nga re ai.

³⁸Masha ni yawng mung, Yesu a sharin shaga ai ga madat na nga nna Nawku Htingnu de jahpawt jau jau Madu kaw sa ma ai.