Read Jinghpaw Common Language Bible 2009 LUKA 22 Bible Online

LUKA 22 - Jinghpaw Common Language Bible 2009 bible

LUKA 22

¹Ya Matsi n rawng ai Muk sha ai poi ngu ai Shalai wa ai Poi aten du na ni wa sai.

²Hkinjawng agyi ni hte Tara sara ni gaw, mung masha ni hpe hkrit da mu ai majaw, Yesu hpe kadai n chye ai sha sat kau na lam langai mi tam nga ma ai.

³Dai shaloi sape shi lahkawng hta lawm nga ai Iskarut ngu ai Yuda a myit masin hta Satan shang wa sai.

⁴Dai majaw Yuda gaw pru wa nhtawm, Hkinjawng Agyi Kaba ni hte Nawku Htingnu sin ai hpyen du ni kaw Yesu hpe kaning di ap kau ya na lam shanhte hte sa bawng ban wu ai.

⁵Shanhte kabu ai hte Yuda hpe gumhpraw jaw na ngu nna myit hkrum ma ai.

⁶Yuda mung dai hpe myit hkrum nna, masha ni n chye ai sha Yesu hpe shanhte a lata de ap kau lu na mai ang ai ahkaw ahkang ginwan kaja tam nga ai.

⁷Matsi n rawng ai Muk sha ai poi ten hta Shalai wa ai Poi lusha a matu sagu kasha ni hpe sat nawng na nhtoi du ra ai.

⁸Yesu gaw, Petru yan Yawhan hpe, “Anhte sha na matu Shalai wa ai Poi hpe sa shachyip lajang magang mu,” ngu nna shangun dat mu ai.

⁹Dai yan gaw, “An hpe kanang e shachyip lajang da shangun mayu n ta?,” ngu nna shi hpe san mu ai.

¹⁰Shi gaw, “Nan mare de shang wa yang, ntsin di bu hpai ai la langai mi hte hkrum na marin dai. Shi kaw hkan nang wa nna, shi shang ai nta hta hkan shang mu.

¹¹Nta madu hpe, ‘Nye a sape ni hte Shalai wa ai Poi sha lu na manam gawk kanang rai ta?,’ nga nna sara gaw nang hpe san shangun dat ai, ngu nna tsun mu.

¹²Shaloi shi gaw jahting shachyip tawn ai ntsa gawk kaba langai mi nan hpe madun na ra ai. Dai kaw shachyip lajang da na rai myit dai,” ngu nna tsun dat mu ai.

¹³Dai sape yan pru sa wa ma yang, Yesu tsun dat ai hte maren, mu ma ai rai nna, Shalai Wa ai Poi shachyip da ma ai.

¹⁴Ya aten du jang, Yesu gaw sape ni hte rau sha ku e dung nga ai.

¹⁵Madu gaw, “Ngai nni nkri garai n hkrum yang, nanhte hte rau, Shalai Wa ai Poi sha na ngai grai sharawng da we ai.

¹⁶Hpa majaw nga yang, ngai nanhte hpe tsun made ga, ndai poi galaw ai lam a shatawng shada ai gaw, Karai Kasang a Mungdan hta ndai poi bai galaw ai ten hta she hkum tsup ai lachyum pru wa na re, Dai aten garai n du du gaw, ngai dai hpe bai n sha na ni ai,” ngu nna tsun mu ai.

¹⁷Shaloi Yesu gaw, gawm la nna shakawn ngut jang, “Ndai la nna nanhte shada da garan lu mu,

¹⁸ngai nanhte hpe tsun made ga, Karai Kasang a Mungdan garai n du dingsa ya kaw nna ndai sabyi ntsin hpe ngai n lu na ni ai,” ngu mu ai.

¹⁹Shaloi shi muk tawng la nna shakawn ngut jang, dai hpe ahkyep alep nna shanhte hpe jaw let, “Ndai gaw nanhte a matu ya kau ai, nye a hkum rai li ai, ngai hpe adum nga na matu, ndai galaw mu,” ngu mu ai.

²⁰Dai hte maren shana shat sha ngut jang, dai gawm hpe mung shi la nhtawm, “Ndai gaw nanhte a matu ru kau ai, nye a asai hta gaw da ai Karai Kasang a ga shaka ningnan rai nga ai.

²¹Rai ti mung, “Yu mu, ngai hpe ap kau na wa gaw, ndai sha ku hta ngai hte rau rai nga ai.

²²Masha Kasha gaw Karai Kasang e san da ai hte maren, si hkam na rai nga ai; rai ti mung shi hpe ap kau ai wa hta hkrithpa dingnye lu na ra ai,” ngu mu ai.

²³Shaloi sape ni gaw, shanhte hta na kadai wa ndai lam galaw na ra ai kun? nga nna shada da san hkat nga ma ai.

²⁴Sape ni gaw, shanhte hta na kadai wa mahtang kaba htum nga ai kun? nga nna shada da tsun shajang pru wa ma ai.

²⁵Yesu gaw shanhte hpe, “Tara mai gan ni a hkawhkam ni gaw, mung masha ni a ntsa e atsam hte up hkang lu ma ai. Daru magam ahkang aya lu ai ni mung, tinang a hkum hpe, ‘Amyu masha ni a jinghku ni ngu nna hkungga shagrau nga ma ai.’

²⁶Rai ti mung, nanhte shada da gaw dai hku n mai rai ang ai. Nanhte hta kaba dik ai wa gaw, asak kaji dik ai wa zawn rai u ga; ningbaw tai ai wa gaw, shangun ma zawn rai u ga.

²⁷Kadai mahtang grau kaba a ta? Sha dung nga ai wa kun? Shing n rai galaw jaw ai wa kun? Sha dung nga ai wa re ai n rai ni? Rai ti mung ngai gaw, nanhte hta na galaw jaw ai wa zawn rai nga nngai.

²⁸“Nanhte gaw, ngai gunglau hkrum ai ten ni ting hta ngai hte rau nga nna hkrum katut sai ni rai nga myit dai.

²⁹Dai re ai majaw, nye Wa gaw ngai hpe up hkang na ahkang aya jaw ai zawn, ngai mung nanhte hpe, up hkang na ahkang jaw made ai.

³⁰Nye a mungdan hta, nye a sha ku e nanhte ngai hte rau lusha lu na marin dai hte tingnyang ni hta dung nna Israela amyu shi lahkawng hte hpe up nga lu na marin dai.

³¹“Simun, Simun! Madat yu u! Nanhte hpe kaja ai hte n kaja ai garan ginhka na matu hkauna galaw ai wa gaw hkaulan mam hpe numhkaw hte mam gu hking ginhka ai zawn, nanhte yawng mayawng hpe jep sagawn na matu Satan wa gaw ahkang lu da nu ai.

³²Rai ti mung, na a kam sham ai myit n hten lit ga ngu nna, nang Simun a matu ngai akyu hpyi da ni ai. Shing rai nang ngai hpang de bai kayin dum wa yang, na nhpu nnau ni hpe shangang shakang ya lu na rai ndai.”

³³Simun gaw, “Madu e, ngai gaw htawng de rai ti mung, si hkam na de rai ti mung, nang hte rau sa na matu jin nga chyalu rai nga nngai,” ngu nna htan wu ai.

³⁴Yesu gaw, “Petru e, ngai nang hpe tsun de ga, dai na pyi, u garai n goi yang, nang ngai hpe n chye nngai nga nna masum lang nyet kau na rin dai,” ngu wu ai.

³⁵Dai hpang Yesu gaw shi a sape ni hpe tsun mu ai gaw, “Gumhpraw sumbu, nhpye, hkyepdin n gun n lang ai sha, ngai nanhte hpe shangun dat ai shaloi, nanhte hta lama ma ra kadawn ai lam nga malit ni?,” ngu nna san mu yang, “Hpa mung n ra ga ai,” ngu mu ai.

³⁶Yesu gaw, “Rai ti mung ya gaw, gumhpraw sumbu, nhpye, lu ai wa gaw la gun u ga; nhtu n lu ai wa gaw hpun palawng kaba dut nna mari u ga.

³⁷Hpa majaw nga yang, ngai nanhte hpe tsun made ga, ‘Dai wa gaw tara tawt lai ai ni hta lawm nga ai,’ nga nna nye a lam ka da ai hte maren, ngai hta byin na ra ai. Dai gaw nye a lam ka da ai chyum ga hte maren byin nga sai majaw rai nga ai,”

³⁸Sape ni gaw, “Madu e, yu u! Nang e nhtu lahkawng nga nga ai,” ngu nna tsun mu yang, Yesu gaw, “Dai hte ram sai,” ngu nna shanhte hpe tsun mu ai.

³⁹Yesu gaw Mare na pru nna, shawoi galaw ga ai hte maren, Tsanlun Bum de sa mat wa ai; sape ni mung shi kaw hkan nang ma ai.

⁴⁰Dai shara de du jang, shi shanhte hpe, “Nanhte gunglau ai hta n lawm mat myit ga, akyu hpyi nga mu,” ngu nna tsun da mu ai.

⁴¹Dai hpang shi gaw, sape ni nga ai kaw nna nlung kabai hkap daram gang hkra sa nhtawm, lahput hput di let,

⁴²“Wa e, nang ra n yang gaw, ndai nni nkri ngu ai gawm hpe ngai kaw na shalai kau ya e; rai ti mung ngai ra ai hku n rai, nang ra ai hku she rai u ga,” ngu nna hpyi wu ai.

⁴³Dai shaloi, lamu de na lamu kasa langai mi shi kaw dan pru nna, shi hpe sa shalan n-gun jaw ya wu ai.

⁴⁴Myit masin hta dik hkra nni nkri hkrum nga ai majaw, shi grau nna akyu hpyi shaja wu ai. Shi a salu salat mung sai kahte ni zawn ga de hkrat lu ai.

⁴⁵Akyu hpyi ai kaw na rawt nna sape ni kaw wa yu yang, shanhte gaw myit yawn myit ba mat ai hte yup nga ma ai hpe wa mu wu ai.

⁴⁶Madu gaw, “Hpa rai yup nga myit ta? Gunglau ai de n lawm mat myit ga, rawt nna akyu hpyi nga mu,” ngu nna shanhte hpe tsun mu ai.

⁴⁷Yesu ga naw tsun nga yang, sape shi lahkawng hta lawm ai Yuda lam woi nna masha wunawng du sa wa ma ai. Shi gaw Yesu kaw sit sa nna Madu hpe pup wu ai.

⁴⁸Rai ti mung, Yesu gaw, “Yuda e, kalang mi pup ai hte Masha Kasha hpe ap kau n ni?,” ngu nna shi hpe tsun wu ai.

⁴⁹Yesu hte rau nga ai sape ni gaw, hpa baw byin wa hkyen nga ai ngu ai hpe tau chye ma ai majaw, “Madu e, anhte nhtu hte kahtam na rai ni?,” ngu nna san mu ai.

⁵⁰Shanhte hta na marai langai mi gaw, hkinjawng agyi a mayam langai mi hpe kahtam mu ai rai nna, dai wa a hkra maga ana di mat lu ai.

⁵¹Rai ti mung Yesu gaw, “Dai ram sai!” ngu nna tsun ngut jang, dai mayam a na hpe ahtawk nna shamai ya wu ai.

⁵²Dai hpang Yesu gaw, shi hpe rim la na du sa ai hkinjawng agyi ni, Nawku Htingnu sin ai hpyen du ni hte agyi salang ni hpe, “Nanhte gaw gumlau langai mi hpe rim la ai zawn ngai hpe rim la na matu, nhtu ni dawhkrawng ni hte rai nna pru sa wa marin ni?

⁵³Ngai shani shagu Nawku Htingnu e, nanhte hte rau nga nga yang, nanhte ngai hpe hpa rai n rim myit ta? Rai ti mung ndai ahkying gaw nanhte a ahkying rai nga ai hte nsin a n-gun atsam up ai aten mung rai nga ai,” ngu mu ai.

⁵⁴Shanhte gaw Yesu hpe rim la nna Hkinjawng Kaba wa a nta de woi bang wa mu ai. Petru mung tsan tsan kaw nna hkan nang nga ai.

⁵⁵Ya masha ni nta wang ka-ang e wan wut nna hpawng dung nga ma yang, Petru mung shanhte a ka-ang e dung lawm nga ai.

⁵⁶Shangun ma numsha ni, wan htoi ai kaw dung nga ai hpe mu ma yang, shi hpe azi yu nna, “Ndai wa mung Yesu hte rau nga ai wa rai nga ai,” ngu wu ai.

⁵⁷Rai ti mung Petru gaw, “Num nang e, dai wa hpe ngai n chye nngai,” ngu nna nyet kau wu ai.

⁵⁸Dai hpang loi hkring rai jang, la langai mi Petru hpe matsing nna, “Nang mung shanhte hta na langai mi rai nga ndai!,” ngu wu yang, Kanang, ngai n rai nngai!

⁵⁹Hkying hkum mi daram na ai hpang, langai wa mi mung, “Kaja wa teng teng hpa sawn shut shara n nga ai, ndai wa mung Yesu hte rau rai nga ai, hpa majaw nga yang, Galile masha shi rai taw nga ai!” nga nna atik anang tsun wu ai.

⁶⁰Petru gaw, “La nang e, nang hpa tsun nga ai hpe ngai n chye nngai!” ngu wu ai. Shing nga naw tsun nga yang, u la langai mi goi sai.

⁶¹Shaloi Madu gaw kayin nna, Petru hpe mada yu wu ai. Dai rai nna Petru gaw, “Dai na pyi u garai n goi yang, nang ngai hpe masum lang nyet kau na rin dai,” nga nna Madu shi hpe tsun ai ga dum dat wu ai.

⁶²Shaloi Petru gaw shinggan de pru nna ja ja hkrap nga ai.

⁶³Yesu hpe jum sin nga ai ni mung, shi hpe asawng asang di nna anu kayat mu ai.

⁶⁴Shi a man magap kau ya nhtawm, “Tak yu u, nang hpe htwi ai gaw, kadai wa rai ta?,” ngu nna san mu ai.

⁶⁵Shanhte lam kaga law law hku nna shatan nhkan roi rip ai ga tsun ma ai.

⁶⁶Nhtoi htoi jang, Yuda amyu masha ni a ningbaw rai nga ai salang ni, hkinjawng agyi ni hte Tara sara ni hpawng ma ai. Yesu hpe dai kongsi hpawng de woi wa nna, shanhte a man de jashawn nhtawm,

⁶⁷“Nang gaw Meshia rai nga n ni? Anhte hpe tsun dan mi,” ngu mu ai. Yesu gaw, “Ngai tsun timung nanhte kam na myit dai n rai.

⁶⁸Ngai san timung nanhte htan na myit dai n rai.

⁶⁹Rai ti mung Masha Kasha gaw, ya kaw nna daru magam hpung shingkang rawng ai Karai Kasang a hkra maga de dung nga lu na ra ai,” ngu nna shanhte hpe tsun mu ai.

⁷⁰Shaloi shanhte yawng gaw, “Dai rai yang, nang gaw Karai Kasang a Kasha rai nga n hka i?,” ngu nna san mu ai. Shi gaw, “Ngai re ai, nga nna nanhte nan tsun nga myit dai,” ngu nna shanhte hpe htan mu ai.

⁷¹Shaloi shanhte gaw, “Anhte hpa sakse mi naw ra nga ga ta! Shi a n-gup na nan anhte dai na lu saga ai!” nga ma ai.