Read Jinghpaw Common Language Bible 2009 LUKA 23 Bible Online

LUKA 23 - Jinghpaw Common Language Bible 2009 bible

LUKA 23

¹Dai shaloi hpawng nga ai hte yawng rawt nna Yesu hpe Pilat hpang de woi bang mu ai.

²Shanhte gaw, “Ndai wa gaw, anhte a amyu hpe lam woi shadam ai hte, hkawseng kaw hkanse bang na lam hkum da nna, shi hkum dai hkawhkam rai nngai, nga nna tsun nga ai hpe anhte mu ga ai,” ngu nna shi hpe mara shagun mu ai.

³Pilat gaw Yesu hpe, “Nang Yuda masha ni a hkawhkam rai nga n ni?,” ngu nna san wu ai. Yesu gaw, “Nang tsun ai hte maren rai nga nngai,” ngu nna shi hpe htan wu ai.

⁴Shaloi Pilat gaw, “Ndai wa hta mara ngai n mu nngai,” ngu nna hkinjawng agyi ni hte shawa masha ni hpe tsun mu ai.

⁵Rai ti mung shanhte mahtang grau nna ja ai nsen hte, “Ndai wa gaw Yuda mung ting hte Galile mung kaw nna, ya ndai kaw du hkra sharin shaga nga ai hte, mung masha ni hpe woi kabrawng wu ai,” nga nna tsun anin shadut ma ai.

⁶Pilat gaw dai na jang, shi gaw, “Ndai wa Galile masha re a ni?,” nga nna san ai.

⁷Herod up ai Galile ginwang na masha re ai lam chye jang, Yesu hpe Herod hpang de sa dat wu ai. Dai aten gaw, Herod shi nan Yerusalem mare e du taw nga ai aten re.

⁸Herod gaw, Yesu hpe mu jang grai kabu nga ai: hpa majaw nga yang, shi a lam na yu ai rai nna Madu Yesu hpe mu hkrum mayu ai gaw grai na sai. Shi gaw, Yesu madun ai lamik kumla langai mi mu mayu ai na la salu ai.

⁹Dai rai nna Herod gaw, Yesu hpe ga san ni law law san wu ai. Rai ti mung Yesu ga hkaw mi pyi n htan ya wu ai.

¹⁰Hkinjawng agyi ni hte Tara sara ni gaw shawng de pru tsap nna, shi hpe aja awa mara shagun ai lam galaw nga ma ai.

¹¹Herod hte shi a hpyen ma ni Yesu hpe n kaw n law aroi arip jahpoi asawng di nna reng ai hpun palawng jahpun nhtawm, Pilat hpang de bai nhtang sa shangun dat mu ai.

¹²Dai shani Herod yan Pilat gaw shada da bai hkau hkat mat ma ai. Shawng de gaw shada da myit kraw n ngawn hkat ma ai.

¹³Pilat gaw hkinjawng agyi ni, Yuda du agyi salang ni hte mung masha ni hpe shaga jahpawng shangun wu ai.

¹⁴Dai hpang, “Ndai wa gaw, mung masha ni hpe lam woi shadam ai wa re,” nga nna shi hpe nanhte ngai kaw woi sa myit dai, ya ngai ndai wa hpe nanhte a man e jep san yu yang, nanhte shagun ai mara lam hpa mung, ndai wa hta ngai n mu we ai.

¹⁵Herod mung hpa mara n mu wu ai. Shi gaw, ndai wa hpe anhte hpang de sa dat shangun ra ai, dai rai nna, ndai wa gaw, si ging ai amu hpa mung n galaw wu ai.

¹⁶Dai majaw, ngai shi hpe anu kayat sharim nna dat na we ai,” ngu nna shanhte hpe tsun mu ai.

¹⁷Pilat hkawhkam gaw, Shalai wa ai Poi shagu hta, shawa masha ni a matu bawng masha langai ngai hpe shalawt dat ya ai htung lai shi hta nga lu ai. [14]

¹⁸Shing nga jang, shawa masha ni gaw, “Dai wa hpe sat kau u! Baraba hpe dat ya mi!,” nga nna jawm jahtau ma ai.

¹⁹(Baraba gaw, mare e gumlau ai amu hte masha sat ai amu a majaw, htawng hkrat nga ai wa rai nga ai.)

²⁰Pilat gaw Yesu hpe dat dat mayu wu ai rai nna, shawa masha ni hpe bai shaga tsun mu ai.

²¹Rai ti mung shanhte gaw, “Dai wa hpe wudang hta jen da u! Wudang hta jen da u!,” nga nna jahtau nga ma ai.

²²Pilat gaw masum lang ngu na bai tsun mu ai gaw, “Ndai wa n hkru ai amu hpa galaw hkrup sata? Shi hta si ging ai mara hpa mung ngai n mu we ai, dai majaw ngai shi hpe anu kayat sharim nna dat dat na we ai,” ngu nna shanhte hpe tsun mu ai.

²³Shanhte mahtang nsen kaba hte jahtau nna, Yesu hpe wudang hta jen da na lam atik anang hpyi ma ai majaw, hpang jahtum shanhte hpyi ai lam lu la mat wa manu ai.

²⁴Dai majaw Pilat gaw, shanhte hpyi ai hte maren, Yesu a ntsa e daw dan ya mu ai.

²⁵Shing rai Pilat gaw, shanhte hpyi ai hte maren, gumlau ai hte masha sat ai amu a majaw htawng hkrat ai wa hpe dat dat ya nna, Yesu hpe gaw shanhte ra ai hku ap kau ya dat wu ai.

²⁶Ya hpyen la ni Yesu hpe shapraw sa wa ma yang, nam kahtawng de nna mare de sa wa nga ai Kureni mung masha Simun ngu ai wa langai mi hte hkrum ma ai. Shanhte shi hpe rim la nhtawm, wudang jahpai nna Yesu a hpang e hkan sa shangun mu ai.

²⁷Masha wunawng kaba shi a hpang e hkan nang ma ai, dai ni hta, shi a majaw hkrap ngu hkrap ngoi sharung shayawt nga ai numsha ni nkau mi mung lawm nga ma ai.

²⁸Yesu gaw shanhte hpang de kayin nna, “Yerusalem shayi sha ni e, nye a majaw hkum hkrap myit, nanhte hkum dai hte nanhte a nshu nsha ni a matu hkrap nga mu.

²⁹Hpa majaw nga yang, ‘Ma n lu yu ai num, na-um nasin n rai yu ai hkum hte chyu n jaw yu ai kanu ni gaw a lu ma ai,’ nga nna masha ni tsun na ten du na ra ai.

³⁰Dai nhtoi hta, masha ni gaw, bum ni hpe, ‘Anhte a ntsa e daw gamyet myit!,’ kawng ni hpe, ‘Anhte a ntsa e ka-up mi!,’ nga nna mung, shanhte hpyi shaga shajang na ma ra ai.

³¹Hpun katsing nga yang pyi dai lam ni ndai zawn byin ai rai yang, hkraw mat ai aten hta hpa byin wa na rai ta?,” ngu mu ai.

³²Dai shaloi damya lahkawng hpe mung Yesu hte rau sat kau na matu woi shapraw sa wa mu ai.

³³Ya pungkum ngu ai kawng du jang, shanhte gaw Yesu hpe mung, damya yan hpe mung, shi a hkra maga de langai mi, pai maga de langai mi di nna wudang hta jen da mu ai.

³⁴Yesu gaw, “Wa e, shanhte a mara hpe dat kau ya mu, shanhte galaw ai lam hpe shanhte n chye nga ma ai,” nga ai. Shanhte gaw, shi a hpun palawng ni hpe mung hpaida da nna garan la ma ai.

³⁵Shawa masha ni gaw mada yu let tsap nga ma yang, Yuda agyi salang ni gaw mani jahpoi asawng let, “Masha kaga ni hpe shi hkye la ga ai; Karai Kasang e lata la ai Meshia shi nan rai yang mung, shi hkum shi hkye la u ga,”

³⁶Hpyen la ni mung sit sa nna, ntsin hkri ladawn jaw nhtawm,

³⁷“Nang Yuda ni a hkawhkam rai n yang gaw, na hkum hpe nang hkye la u!,” ngu nna roi asawng jawng kau ma ai.

³⁸Shi a ntsa e mung, “Ndai wa gaw Yuda ni a hkawhkam rai nga ai,” nga nna laika ka shakap da ma ai.

³⁹Wudang hta noi nga ai damya langai wa mi mung, “Nang gaw Meshia n rai n ni? Na hkum dai hte an hpe mung hkye la mi!,” ngu nna roi adawk dat wu ai.

⁴⁰Langai wa mi chyawm gaw, “Nang mung ndai wa hte maren daw dan ai hkrum da ninglen, Karai Kasang hpe pyi n hkrit n ni?

⁴¹An gaw tinang a mara majaw hkrum ging ai hte maren, daw dan ai hkrum ga ai: ndai wa chyawm gaw, n sun n ang shut ai amu hpe mung n galaw ai wa rai nga ai,” nga nna dai wa hpe daru let htan wu ai.

⁴²Shing nga nhtawm shi gaw, “Yesu e, hkawhkam hku nna du sa ai shaloi, ngai hpe dum rit law!,” ngu nna hpyi wu ai.

⁴³Shaloi Yesu gaw, “Ngai nang hpe teng teng tsun de ga, dai ni jang, ngai hte rau Hparadisu e nga lu na ndai ngu nna ngai ga sadi jaw de ai,” ngu nna shi hpe htan wu ai.

⁴⁴Ya aten gaw shani ka-ang hkying shi lahkawng [15] daram rai nga ai. Dai aten kaw nna shana de hkying masum du hkra jan a nhtoi nip mat wa ai majaw, mung ting nsin chyip rai mat ai.

⁴⁵Nawku Htingnu na nba grang mung ka-ang brang rai ga mat ai.

⁴⁶Yesu gaw, “Wa e! Na a lata de nye a wenyi ap ya de ai!” nga nna nsen kaba hte jahtau wu ai. Shing nga tsun ngut jang, nsa hti mat ai.

⁴⁷Shing rai byin ai lam hpe hpyen latsa up ai du wa mu wu yang, “Kaja wa ndai wa gaw masha kaja langai mi she rai nga ai!,” nga nna Karai Kasang hpe shagrau sha-a wu ai.

⁴⁸Dai lam yu na nga nna sa hpawng nga ai shawa masha ni mung, shing rai byin ai lam hpe mu mu yang, tinang a sinda ni hpe adup nna yawn hkyen let bai wa ma ai.

⁴⁹Yesu hte hkau chyap chye hkat ai masha mahkra hte, Galile mung kaw nna hkan nang ai numsha ni gaw, dai lam ni hpe yu na matu tsan e tsap nga ma ai.

⁵⁰Yuda mung na Aramahti ngu ai mare kaw na, Yuda mung bawng salang hpung hta lawm ai Yosep mying ai wa langai mi nga ai. Dai wa gaw mai kaja ai hte hkungga ging ai masha langai mi rai nna Karai Kasang a Mungdan du sa wa na ra ai lam hpe myit mada nga ai wa mung rai nga ai.

⁵¹Shi gaw Yuda amyu mung bawng salang hpung hta lawm ai wa langai mi rai nga ai rai ti mung, shanhte a bawng daw dan ai hte galaw ai lam hpe myit n hkrum lawm wu ai.

⁵²Shi gaw Pilat kaw shang nna Yesu a hkum tsawp moi mang hpe hpyi wu ai.

⁵³Dai hpang moi mang hpe shayu la nna, lachyit sumpan hte ahkyen kayawp nhtawm, kadai hpe mung garai n bang yu ai nlung hta tawk da ai lup hta bang tawn da wu ai.

⁵⁴Ya laban manga ya [16] rai nna Bansa Nhtoi du magang ra ai.

⁵⁵Galile mung nna Yesu kaw hkan nang ai numsha ni mung, Yosep a hpang e hkan nang nna, dai lup hpe mung, Yesu a moi mang hpe dai hta kaning di bang da ai hpe mung mu ma ai.

⁵⁶Dai hpang shanhte nta de wa nna manam pyaw ai baw hte mura sau lajang da ma ai. Bansa Nhtoi gaw dai jep ai Tara hte maren hkring sa ma ai.