Read Jinghpaw Common Language Bible 2009 LUKA 24 Bible Online

LUKA 24 - Jinghpaw Common Language Bible 2009 bible

LUKA 24

¹Laban shani jahpawt nhtoi mahka de, dai numsha ni gaw, shanhte lajang da ai manam pyaw ai baw la gun nna lup de sa wa ma ai.

²Shanhte gaw, dai lup mahka kaw na nlung galau mat nga ai hpe mu ma ai.

³Dai rai nna, shanhte shang yu yang, dai Madu Yesu a moi mang hpe n mu ma ai.

⁴Shing re ai majaw shanhte mau ung ang let tsap nga ma yang, akajawng sha tu kabrim ai bu hpun palawng bu hpun ai masha lahkawng shanhte a man e tsap nga ma ai.

⁵Dai numsha ni hkrit kajawng nna ga de gum dagup taw nga ma ai. Dai yan gaw, “Hkrung nga ai wa hpe si ai ni nga ai shara kaw hpa rai tam nga myit ta?

⁶Shi nang e n nga sai, shi hkrung rawt wa sai. Shi Galile mung e naw nga yang, nanhte hpe shi kaning nga tsun ga ai hpe dum mu:

⁷Masha Kasha gaw Yubak kap ai ni a lata de ap kau ai hkrum nna, wudang hta jen da ai hkrum ngut jang, masum ya nhtoi hta bai hkrung rawt wa na ra ai lam nanhte e tsun da ai ga hpe myit dum mu,’” ngu nna shanhte hpe tsun mu ai.

⁸Shaloi shanhte gaw, Yesu a ga ni hpe dum nna,

⁹lup de na bai wa nhtawm, sape shi langai hte hte, kaga masha ni yawng hpe wa tsun dan mu ai.

¹⁰Dai numsha ni gaw, Magdala Mari, Yoana, Yaku a kanu Mari, hte rai ma ai, shanhte hte rau nga ai numsha kaga ni mung, kasa ni hpe dai lam ni tsun dan mu ai.

¹¹Rai ti mung Kasa ni gaw, numsha ni tsun ai ga hpe kaman ga zawn nawn nna n kam ya ma ai.

¹²Rai ti mung Petru gaw rawt nna lup de gat sa wa nhtawm, gum yu yang, sumpan ni hta lai nna kaga hpa mung n mu wu ai. Shing rai, byin wa sai lam hpe mau let nta de bai wa ai.

¹³Dai shani e nan, Yesu a hpang hkan nang ai ni hta na marai lahkawng gaw Yerusalem nna mai sanit daram tsan ai Ema-u ngu ai kahtawng de sa wa ma ai.

¹⁴Shing rai shan gaw, dai byin mabyin ni yawng a lam, shan shada da tsun jahta hkat nga ma ai.

¹⁵Shing rai tsun chyai nna shada da bawng ban san hkat let sa wa nga ma yang, Yesu gaw shi hkum dai sit sa nna, shan hte rau sa wa ai.

¹⁶Shan gaw shi hpe mu ma ai; rai ti mung lama ma a majaw shi re ai hpe n chye ma ai.

¹⁷Yesu gaw shan hpe, “Nan hkawm sa wa let shada da tsun chyai nga ai lam gaw, hpa lam rai ta?,” ngu nna san mu ai. Shan gaw yawn ai myi man hte hkring tsap nga ma ai.

¹⁸Shan hta na Hkaleopa ngu ai wa gaw, “Yerusalem mare de du sa wa ai manam ni hta, Yerusalem mare e ya hte lai wa sai nhtoi grai wa n na ai laman byin lai wa sai lam ni hpe n chye ai masha gaw nang chyu sha rai n hka i?,” ngu nna htan wu ai.

¹⁹Shi gaw, “Hpa lam ni rai ta?,” ngu nna bai san mu yang, shan gaw, “Nazaret mare na Yesu a lam rai nga ai; Ndai wa gaw myihtoi langai mi rai nna, Karai Kasang a man e mung, masha yawng a man e mung shi tsun ai hte galaw ai lam shagu hta n gun atsam rawng ai wa rai nga ai ngu nna myit sawn da hkrum ai wa rai nga ai.

²⁰Anhte a hkinjawng agyi ni hte du salang ni shi hpe sat kau na daw dan nna ap kau nhtawm, wudang hta jen sat kau manu ai.

²¹Anhte chyawm gaw, dai wa gaw Israela amyu hpe shalawt dat na ra ai wa rai na re! ngu nna myit mada ga ai. Shing rai, dai lam ni byin lai wa ai pyi gaw, dai ni masum ya na wa sai.

²²Anhte a hpung hta lawm nga ai numsha nkau mi, anhte hpe wa shamau mi ai; shanhte jahpawt manap jau jau lup de sa yu yang,

²³shi a moi mang hpe n mu ma ai. Shanhte bai wa nna, ‘Dai Madu hkrung nga ai!,’ nga nna tsun dan ai lamu kasa ni dan pru ai shingran langai mi mu ma ai lam wa tsun shana mi ai.

²⁴Anhte a hpung na nkau mi mung, lup de sa wa yu ma yang, numsha ni tsun ai hte raw sha sa mu nna, shi hpe chyawm gaw n mu ma ai,” ngu nna htan mu ai.

²⁵Dai shaloi Yesu gaw, “Myihtoi ni htawn tsun ai ga mahkra hpe kam sham na matu myit bawnu lanyan dik ai masha angawk ni e!

²⁶Meshia gaw shi a hpung shingkang hta garai n shang ningngai yang, shing re ai nni nkri hpe hkam ra ai n rai ni?,” ngu nna tsun mu ai.

²⁷Bai Yesu gaw, Mawshe ka da ai kaw nna myihtoi ni ka da ai Chyum Laika ni hta na, shi a lam ka da ai ga ni yawng shan hpe tsun hpaw dan mu ai.

²⁸Ya dai yan sa wa ai kahtawng de du magang yang, Madu gaw shawng de naw lai sa wa na zawn rai nga ai.

²⁹Rai ti mung shan gaw, “An hte rau shang nga ga; jan mung du mat wa sai, nsin mung sin wa ra ai,” ngu nna shi hpe akroi anoi saw mu ai. Dai majaw shan hte rau nga na shi shang wa ai.

³⁰Shi gaw shan hte rau shat sha na dung nga yang, muk la nna shaman nhtawm, ahkyep alep di ngut jang, shan hpe jaw mu ai.

³¹Shaloi shan a myi hpaw nna, Madu Yesu re ai hpe dum chye ma ai. Rai ti mung shi gaw shan a man kaw na mat mat wa ai.

³²Shan gaw, “Hkrun lam e, Madu an hte ga shaga nna Chyum Laika ni a ga lachyum tsun hpaw dan ai shaloi, an a myit masin kata hta wan hkru nga ai zawn kadau kadap nga mali ai, n rai ni?,” nga nna shada da tsun ma ai.

³³Shan gaw shaloi jang alawan rawt nna, Yerusalem mare de bai wa ma yang, sape shi langai hte kaga ni hpawng nga mala ai hpe wa mu ma ai.

³⁴Hpawng nga ai ni gaw, “Kaja wa Madu gaw hkrung rawt wa sai! Shi gaw Petru hpe shadan dan nu ai,” nga nna tsun nga mala ai.

³⁵Dai shaloi shan lahkawng mung, lam e rai nga yang byin ai lam ni hte, muk ahkyep jaw ai shaloi, shi re ai chye lu ai lam ni, tsun sanglang dan ma ai.

³⁶Shan lahkawng dai lam shanhte hpe tsun dan nga yang, akajawng sha Madu shi hkum nan shanhte a ka-ang e tsap nga nna, “Nanhte ngwi pyaw nga myit ga!,” ngu nna shanhte hpe tsun mu ai.

³⁷Shanhte gaw, minla jahkrit nga ai ngu myit la nna hkrit gari nga ma ai.

³⁸Rai ti mung shi gaw, “Nanhte hpa rai kajawng nga myit ta? Hpa rai nanhte a myit ni hta ung ang ai lam ni pru wa nga malit ta?

³⁹Nye a lata ni hte lagaw lahpan ni hpe yu nna, ngai nan rai nga nngai hpe chye yu na myit dai. Ngai hpe masawp yu mi; minla ngu ai gaw, ngai hpe nanhte mu ai zawn ashan hte nrut nra rawng ai n rai.

⁴⁰Shing nga shanhte hpe tsun nhtawm, shi a lagaw lata ni hpe madun dan mu ai.

⁴¹Shanhte gaw, kabu ai hte garai n kam lu ai, naw mau nga yang, Madu gaw, “Nanhte nang e shahpa lama ma lu da mu ni?,” ngu nna shanhte hpe san mu ai.

⁴²Shaloi shanhte gaw, nga kakang daw mi shi hpe jaw mu ai.

⁴³Shi gaw dai hpe la nna, shanhte a man e sha dan mu ai.

⁴⁴Shaloi Yesu gaw, “Mawshe a Tara hta mung, myihtoi ni a laika ni hta mung, nye a lam hte seng nna ka da nga ai lam ni yawng mayawng, dik wa lu na ra ai, ngu nna nanhte hte rau nga nga yang, ngai nanhte hpe tsun ni ai,” ngu nna shanhte hpe tsun mu ai.

⁴⁵Dai hpang sape ni, dai Chyum Laika ga ni hpe chye na lu na matu shanhte a myit nyan jahpaw ya mu ai.

⁴⁶Madu gaw, “Chyum Laika hta Meshia gaw nni nkri hkam nna masum ya du ai nhtoi e, si ai kaw na bai hkrung rawt wa na ra ai.

⁴⁷Shi a mying nsang hte, yubak mara dat ya kau na lam hte myit malai lu na lam shiga hpe Yerusalem kaw nna masha amyu baw shagu hpe hkaw tsun lu na, nga nna ka da nga ai.

⁴⁸Nanhte ni gaw ndai lam ni a sakse ni rai nga myit dai.

⁴⁹Ngai nan, nye Wa a ga ndat nanhte a ntsa de shangun dat na nngai. Rai ti mung nanhte gaw, ntsa de na Chyoi Pra ai Wenyi a n-gun atsam dagraw hkam la lu ai nhtoi du hkra, mare hta naw la nga mala,” ngu nna shanhte hpe tsun mu ai.

⁵⁰Dai hpang shanhte hpe mare kaw na Behtani kahtawng hte tawtap du hkra woi sa nna dai shara hta, shaloi, shi a lata ni sharawt nna, shanhte hpe shaman ya mu ai.

⁵¹Shing rai shanhte hpe shaman ya nga yang, shi shanhte kaw na hka mat wa nna sumsing lamu de woi shalun la ai hkrum wu ai.

⁵²Shanhte chyawm gaw shi hpe nawku nna, grai kabu gara let, Yerusalem mare de bai wa nhtawm;

⁵³Karai Kasang hpe shakawn kungdawn let, Nawku Htingnu e, tut nawng anga nga ma ai.