Read Jinghpaw Common Language Bible 2009 LUKA 3 Bible Online

LUKA 3 - Jinghpaw Common Language Bible 2009 bible

LUKA 3

¹Kehta[5] Tiberi hkaw dung ai shi manga ning hta, Yuda mung e Pontu Pilat gaw munggyi aya hta, Galile mung e Herod gaw du aya hta, Ituri hte Trakuni ginwang hta e Herod a kanau Hpilip gaw du aya hta, Abili mung e Lusanu gaw du aya hta, rai shajang nga ma ai.

²Dai ten hta Anna yan Kayahpa gaw hkinjawng agyi aya hta rai shajang ma ai shaloi, Karai Kasang a mungga gaw nam mali e Zahkaria a kasha Yawhan kaw du ai.

³Shi gaw Yawdan hka ginwang shara shagu hkan e du hkawm let, “Nanhte a yubak mara ni kaw na myit malai lu nna hkalup hkam la mu, shaloi she Karai Kasang gaw nanhte a yubak mara ni hpe raw dat kau ya na ra ai,” nga nna hkaw tsun nga ai.

⁴Myihtoi Esaia Laika hta ka da sai hte maren ning nga nga ai: “Nam mali kata e masha langai mi jahtau ai nsen gaw, “Dai Madu a matu lam lajang da mu! Shi a lam masun ni hpe shading da mu!

⁵Hkaraw hkamwam shagu kaput lu na rai nga ai, Bum hte kawng shagu hpe daw shara kau lu na rai nga ai; Magaw ai lam ni hpe shading lu na rai nga ai, machyawk marawk re ai lam ni hpe shara lu na rai nga ai.

⁶Shaloi, masha amyu ni yawng gaw, Karai Kasang a hkye hkrang la ai lam mu lu na mara ai!’”

⁷Dai majaw, Yawhan a lata hta hkalup hkam la na pru sa wa ai shawa masha ni hpe shi tsun mu ai gaw, “Pu htum[6] amyu ni e, Karai Kasang kaw na du magang ra ai yubak a ari hta na hprawng lawt lu myit ga, nanhte hpe kadai shadum myit ta?

⁸Dai majaw nanhte a yubak mara ni kaw na myit malai kayin wa sai ngu nna tsun lu hkra re ai lam hkan sa galaw mu. Abraham[7] gaw anhte a ji wa rai nga ai, nga nna nanhte shada da hkum tsun myit; nanhte hpe ngai tsun made ga, Karai Kasang gaw ndai nlung ni hpe la nna shi a matu kashu kasha ni hpe hpan shapraw dat lu ai.

⁹Dai nwa gaw, hpun ni hpe ru kaw nna hkawt kran kau na matu hkyen da chyalu rai nga sai, dai rai nna, asi kaja n si ai hpun shagu hpe kran daw kau nna, wan hta kabai bang kau na rai nga ai,” ai.

¹⁰Shaloi shawa masha ni, “Dai rai taw gaw, anhte kaning rai na rai ta?,” nga nna shi hpe san ma ai.

¹¹Shi shanhte hpe htan mu ai gaw, “Palawng lahkawng lu ai wa gaw, n lu ai wa hpe karan u ga, shat lusha lu ai wa mung dai hte maren jaw u ga,” ngu mu ai.

¹²Kang hta ai ni nkau mi mung hkalup hkam la na sa nna, “Sara e, anhte gara hku galaw na rai ta?,” nga nna shi hpe san ma ai.

¹³Shi gaw, “Nanhte hta la na shadang tawn ai hta jan nna hkum hta la myit,” ngu nna shanhte hpe tsun mu ai.

¹⁴Hpyenla ni mung, “Anhte wa gaw kaning rai na rai ta? Anhte hpa rai ta?,” nga nna shi hpe san ma ai. Shi gaw, “Kadai wa kaw na mung adip arip di nna, gumhpraw hkum kashun la myit, n tara ai hku mara hkum shagun myit, nanhte lu ai shabrai hte myit dik dum nga mu,” ngu nna shanhte hpe tsun mu ai.

¹⁵Masha ni chyawm gaw, shanhte a myit mada ai lam law wa ai hte, “Yawhan gaw Meshia wa mi hkoi rai nga ai kun?,” nga nna yawng mayawng gaw tinang a kraw kata e shi a lam myit sumru shajang nga ma ai.

¹⁶Shing rai Yawhan gaw, “Ngai gaw nanhte hpe hka hte hkalup jaw made ai; rai ti mung, ngai hta atsam grau rawng ai wa gaw sa wa ra ai; shi a kyepdin sumri raw na pyi ngai n ging nngai. Shi gaw Chyoi Pra ai Wenyi hta mung, wan hta mung, nanhte hpe hkalup jaw na ra ai.

¹⁷Shi a lata hta shi hkuwawn lang nna shi a mam ni mahkra hpe yit jasan kau nhtawm, mam gu hpe shi a dum hta shinggyin da na ra ai, nsan hpe chyawm gaw galoi mung n krip ai wan hta nat kau na ra ai,” ngu nna shanhte hpe tsun mu ai.

¹⁸Shingrai Yawhan gaw, kaga lam amyu myu hku nna mung, dai Kabu Gara Shiga hkaw tsun ai hte shanhte a lam ni galai shai wa shangun na matu shadum jahprang da mu ai.

¹⁹Rai ti mung, munggyi Herod gaw shi a kanau Hpilip a madu jan Herodia hpe kashun la ai hta n ga, shi galaw ai n hkru n kaja ai amu kaga law law hte seng nna mung, daru sharin ai hkrum wu ai.

²⁰Dai hpang, Herod gaw Yawhan hpe rim la nna htawng hta sharen da ai hte shawng de na hta grau sawng ai mara galaw wu ai.

²¹Masha yawng hkalup hkam la ngut ai hpang, Yesu mung hkalup hkam la nhtawm, akyu hpyi nga yang, lamu hpaw malang wa nna,

²²Dai Chyoi Pra ai Wenyi gaw hkrang dan dan shi a ntsa e hkrudu zawn yu hkrat wa nna, “Nang gaw nye a tsaw ra ai Kasha rai nga ndai; nang hta ngai sharawng awng nngai law,” nga nna lamu de na nsen du pru ai.

²³Yesu amu galaw hpang ai shaloi asak sumshi ning daram rai wa sai; shi gaw masha ni a myit yu ai hte maren, Yosep a kasha rai nga ai; Yosep gaw Heli a kasha Heli gaw Mahtat a kasha, rai nga ai.

²⁴Mahtat gaw Lewi a kasha; Lewi gaw Melhki a kasha, Melhki gaw Yanna a kasha; Yanna gaw Yosep a kasha rai nga ai.

²⁵Yosep gaw Matahtia a kasha; Matahtia gaw Amu a kasha; Amu gaw Nahum a kasha; Nahum gaw Esali a kasha; Esali gaw Nagai a kasha;

²⁶Nagai gaw Maat a kasha; Maat gaw Matahtia a kasha; Matahtia gaw Semai a kasha; Semai gaw Yosek a kasha; Yosek gaw Yoda a kasha;

²⁷Yoda gaw Yawhan a kasha; Yawhan gaw Resa a kasha; Resa gaw Zerubabela a kasha; Zerubabela gaw Salahtila a kasha; Salahtila gaw Neri a kasha;

²⁸Neri gaw Melhki a kasha; Melhki gaw Adi a kasha; Adi gaw Kusam a kasha; Kusam gaw Elamadam a kasha; Elamadam gaw Era a kasha;

²⁹Era gaw Yesu a kasha; Yesu gaw Elieza a kasha; Elieza gaw Yawrim a kasha; Yawrim gaw Mahtat kasha; Mahtat gaw Lewi a kasha;

³⁰Lewi gaw Simun a kasha; Simun gaw Yuda a kasha; Yuda gaw Yosep a kasha; Yosep gaw Yawnam a kasha; Yawnam gaw Eliakim a kasha;

³¹Eliakim gaw Melia a kasha; Melia gaw Mena a kasha; Mena gaw Matahta a kasha; Matahta gaw Nahtam a kasha; Nahtam gaw Dawi a kasha;

³²Dawi gaw Yese a kasha; Yese gaw Obed a kasha; Obed gaw Bua a kasha; Bua gaw Sala a kasha; Sala gaw Nasun a kasha;

³³Nasun gaw Admin a kasha; Admin gaw Arni a kasha; Arni gaw Hezron a kasha Hezron gaw Hparet a kasha; Hparet gaw Yuda a kasha;

³⁴Yuda gaw Yaku a kasha; Yaku gaw Isak a kasha; Isak gaw Abraham a kasha; Abraham gaw Htera a kasha; Htera gaw Nahora a kasha;

³⁵Nahora gaw Serak a kasha; Serak gaw Ragu a kasha; Ragu gaw Hpelek a kasha; Hpelek gaw Ebera a kasha; Ebera gaw Sala a kasha;

³⁶Sala gaw Kainam a kasha; Kainam gaw Arhpaza a kasha; Arhpaza gaw Shem a kasha; Shem gaw Noa a kasha; Noa gaw;

³⁷Lamek a kasha; Lamek gaw Mahtusela a kasha; Mahtusela gaw Enuk a kasha; Enuk gaw Yared a kasha; Yared gaw Mahalalela a kasha; Mahalalela gaw Kainam a kasha;

³⁸Kainam gaw Enusha a kasha; Enusha gaw Shet a kasha; Shet gaw Adam a kasha; Adam gaw Karai Kasang a kasha rai nga ai.