Read Jinghpaw Common Language Bible 2009 LUKA 5 Bible Online

LUKA 5 - Jinghpaw Common Language Bible 2009 bible

LUKA 5

¹Lani mi hta Yesu gaw, Genesaret nawng makau e tsap nga yang, shawa masha ni Karai Kasang a mungga madat na nga nna shi a man de lu tsap hkra kaput katut bang wa ma ai.

²Shi gaw nawng hkin-gau e jahkring tawn ai li lahkawng hpe mu wu ai. Nga hkan ai ni chyawm gaw li kaw na pru nna shanhte a sumgawn ni hpe kashin nga ma ai.

³Yesu gaw Simun a li hta shang nhtawm, hkin-gau kaw nna loi mi sit jahka na hpyi wu ai. Yesu dai li hta dung nna shawa masha ni hpe sharin shaga mu ai.

⁴Shi ga tsun htum jang, “Hka sung ai shara de li hpe naw sit nna nga ni hpe rim la lu na matu, nang hte na manang ni a sumgawn ni hpe jahkrat mu,” ngu nna Simun hpe tsun wu ai.

⁵Simun gaw, “Madu e, mana tup anhte shakut ga timung, hpa mung n lu gaw ai; rai ti mung, na a ga majaw, ngai sumgawn jahkrat na we ai,” ngu nna htan wu ai.

⁶Shing rai shanhte jahkrat dat mu yang, nga wunawng kaba magawn la hkrup lu ma ai rai nna sumgawn ni mung je wa magang nga malu ai.

⁷Dai majaw li kaga hta nga ai manang ni hpe, sa karum la na dingsi shaga mu ai. Shanhte mung sa ma ai rai nna, dai li lahkawng yan lup wa magang hkra, bang jahpring mu ai.

⁸Simun Petru gaw, dai byin ai lam mu jang, Yesu a lagaw nhpang e hput di dingnyawm let, “Madu e ngai kaw na wa mat u, ngai gaw yubak kap ai masha rai nga nngai,” ngu wu ai.

⁹Kaning rai nme law, shanhte nga law law magawn la lu ai majaw, shi hte shi kaw hkan nang ai ni yawng mau mahka mat ma ai.

¹⁰Dai hte maren, Simun a manang ni rai nga ai, Zebedi a kasha Yaku yan Yawhan mung mau mat ma ai. Shaloi Yesu gaw, Simun hpe, “Hkum hkrit et, ya kaw nna nang masha ni hpe hkan hkwi na rin dai,” ngu wu ai.

¹¹Dai ni hpe danam e jahkring tawn da nhtawm, shanhte gaw, arai mahkra kau da nna, Yesu kaw hkan nang ma ai.

¹²Lang mi na mare langai mi hta shi nga nga yang, hkum ting manggang ana kap ai masha langai mi nga ai, dai wa gaw Yesu hpe mu jang, dingnyawm dagup nna, “Madu e, nang hkraw n yang gaw, ngai hpe shapra ya lu na rai nga ndai,” ngu nna hpyi nem wu ai.

¹³Yesu gaw lata ladawn nna shi hpe ahtawk let, “Ngai hkraw nga nngai, san pra wa nu,” ngu wu ai. Shaloi jang dai manggang ana mai mat wa ai.

¹⁴Shaloi Yesu gaw, “Dai lam kadai hpe mung n tsun dan ai sha, hkinjawng wa kaw ading tawk wa nna, na a hkum jep yu shangun u. Dai hpang nang mai mat sai lam masha shagu a man e sakse tai na matu Mawshe hkang da ai hte maren, hkungga wa nawng ya u,” ngu nna shi hpe ginhtim dat wu ai.

¹⁵Rai ti mung, shi a lam shiga gaw grau nna kajai gumhkawng ai lam pri rai wa ai hte, shawa masha wunawng wuwa gaw, ga madat na matu mung, shanhte a machyi makaw mai na matu mung, sa hpawng ma ai.

¹⁶Shi chyawm gaw nam mali de lagyim sa mat wa nna, akyu hpyi nga ai.

¹⁷Lani mi hta Yesu sharin shaga nga yang, Galile mung, Yuda mung, kahtawng shagu hkan na hte, Yerusalem mare de na Hparishe ni hte Tara Sara ni sa du dung nga ma ai. Machyi shamai ya na matu Madu Karai Kasang a atsam gaw Yesu hta nga nga ai.

¹⁸Masha nkau mi gaw hkum katsing si ai wa langai mi hpe yupra panep hta hpai sa nna, dai wa hpe Yesu a man e shawn tawn lu hkra shakut yu ma ai.

¹⁹Masha wunawng chyat nga ai majaw, dai wa hpe gara hku mung n shashawn lu mu ai. Dai majaw, shanhte shi hpe nta numgaw ntsa de hpai lung wa nna, galup da ai wut pa hku malawng hkra waw kau nna, shi a yupra panep hte nawng, shawa hpawng ka-ang, Yesu a man e shayawn jahkrat dat mu ai.

²⁰Yesu shanhte hta kam sham ai myit gade daram rawng ai lam mu ai shaloi, katsing si ai wa hpe, “Masha wa e, na a yubak mara ni dat kau ya sade ai,” ngu wu ai.

²¹Shaloi, Tara sara ni hte Hparishe ni gaw, “Ning nga Karai Kasang hpe shut hpyit ai hku tsun shaga ai wa gaw, kadai wa rai ta? Karai Kasang chyu sha yubak dat kau ya lu ai wa rai nga ai!” nga nna shanhte a myit hta ga san san let aru yu nga ma ai.

²²Shanhte myit aru yu ai lam hpe Yesu chye wu ai majaw, “Nanhte hpa rai kraw kata hta dai lam ni myit aru yu nga myit ta?

²³Na a yubak dat kau ya sade ai, ngu ai hte rawt hkawm wa u, ngu ai ga yan hta gara mahtang grau tsun loi a ta?

²⁴Dai Masha Kasha gaw ga ntsa e yubak mara ni hpe dat kau ya ai ahkang aya lu ai gaw, nanhte hpe ya ngai sakse madun na nngai,” ngu mu ai. Shing rai shi gaw, dai katsing si ai wa hpe, “Nang hpe ngai tsun de ga, rawt u, na a nba panep hta hpai nna nta de wa nu,” ngu nna tsun wu ai.

²⁵Shaloi jang shanhte yawng a man e shi rawt nna, shi a yupra hpai la nhtawm, Karai Kasang hpe shakawn kungdawn let, shi a nta de wa mat ai.

²⁶Yawng mayawng gaw, grai wa mau mahka nga nna, hkrit la ai hte Karai Kasang hpe shakawn kungdawn let, “Dai ni anhte mauhpa amu ni mu lu sagaw ai,” nga nna tsun ma ai.

²⁷Dai hpang, shi pru sa wa nna, Lewi ngu ai kang hta ai wa langai mi, kang sum hta dung nga ai hpe mu wu ai. Yesu gaw dai wa hpe, “Ngai kaw hkan rit,” ngu wu ai.

²⁸Lewi gaw rawt nna, arai yawng mayawng kau da nhtawm shi kaw hkan nang nga ai.

²⁹Shaloi Lewi gaw shi a nta e, Yesu a matu lusha poi kaba galaw wu ai, Manam ni hta kang hta ai ni law law hte kaga masha ni shanhte hte rau dung nga ma ai.

³⁰Hparishe nkau mi hte shanhte a hpung hta lawm ai tara sara nkau mi gaw, Yesu a sape ni hpe, “Nanhte hpa rai kang hta ai ni hte kaga yubak kap ai masha ni hte rau, lusha nga myit ta?,” ngu nna san mu ai.

³¹Yesu gaw, “Hkam kaja ai ni tsi sara n ra ma ai, machyi ai ni sha ra ma ai.

³²Ding hpring ai hte arawng sadang lu dum ai ni hpe myit malai lu hkra shaga na, ngai sa du ai n rai; yubak kap ai ni ngu ai kabai kau hkrum ai ni hpe shaga na she, sa du nngai,” ngu nna shanhte hpe htan mu ai.

³³Masha nkau mi gaw, “Yawhan a sape ni lusha ya sha sha gam ma ai hte akyu hpyi ma ai; Hparishe ni a sape ni mung dai hte maren galaw ma ai, rai ti mung na a sape ni gaw, a lu a sha nga ma ai,” ngu nna Yesu hpe tsun mu ai.

³⁴Yesu gaw, “Hkungran ai poi hta la nnan wa hte rau naw nga nga ai ten hta, manam ni hpe lusha gam shangun lu myit ni?

³⁵Rai ti mung, la nnan wa hpe shanhte kaw na jahka la ya ai nhtoi du na ra ai rai nna, dai nhtoi hte hta shanhte lusha gam na mara ai,” ngu nna shanhte hpe tsun mu ai.

³⁶Yesu gaw ga shadawn hte mung shanhte hpe tsun mu ai gaw, “Palawng nnan hta na achyen gang je la nna, palawng dingsa hta kadai n kapa ga ai; shing di yang palawng nnan hpe gang je kau nna, palawng dingsa mung nnan hta na achyen hte n pre na ra ai.

³⁷Sabyi nnan hpe mung sabyi ndum dingsa hta kadai n bang ga ma ai; shing di yang, sabyi nnan gaw ndum ni hpe kapaw je kau nna, sabyi mung yun mat ai hte ndum ni mung hten mat na ra ai.

³⁸Sabyi nnan hpe sabyi ndum nnan hta bang da na rai nga ai.

³⁹Sabyi dingsa lu lu sai wa gaw nnan n ra nu ai; dingsa she grau kaja nga ai, nga nna tsun ai,” ngu mu ai.