Read Jinghpaw Common Language Bible 2009 LUKA 6 Bible Online

LUKA 6 - Jinghpaw Common Language Bible 2009 bible

LUKA 6

¹Bansa Nhtoi langai mi hta Madu Yesu gaw, hkaulan mam yi ni hpe ga lai hkawm wa yang, shi a sape ni hkaulan mam nsi di la nna lata hte manai kayup baw sha ma ai.

²Hparishe nkau mi gaw, “Anhte a tara hta tsun da ai Bansa Nhtoi e n mai di ai lam, hpa rai nanhte galaw myit ta?,” nga nna san ma ai.

³Yesu gaw shanhte hpe, “Dawi gaw, shi hte shi kaw hkan nang ai ni kawsi ai shaloi hpa galaw ai lam nanhte n hti yu myit ni?

⁴Shi gaw Karai Kasang a nta de shang nna, hkinjawng ni hta lai nna, kaga kadai n mai sha ai madun da ai muk ni hpe la sha nna, shi kaw hkan nang ai ni hpe mung jaw sha wu ai.

⁵Bai shi gaw Masha Kasha gaw Bansa Nhtoi a Madu rai nga ai,” ngu nna shanhte hpe tsun mu ai.

⁶Bansa Nhtoi kaga hta mung, Yesu gaw, tara jawng langai mi hta shang nna sharin shaga wu ai. Dai yang e hkra lata katsing si ai masha langai mi nga ai.

⁷Tara sara nkau mi hte Hparishe nkau mi gaw, Madu hpe mara shagun lu hkra lam tam mayu ai majaw, Bansa Nhtoi hta dai wa hpe shamai ya na ra ai kun? nga nna shi hpe gyam yu nga ma ai.

⁸Shi chyawm gaw shanhte a myit hpe chye ya wu ai rai nna, lata katsing si ai wa hpe, “Rawt nna nang de pru tsap rit,” ngu wu ai. Dai wa mung rawt nna shawng de sa tsap nga ai.

⁹Shaloi Yesu gaw, “Ngai nanhte hpe san yu made ga, anhte a tara hta, Bansa Nhtoi e hpa baw galaw mai ai ahkang jaw da a ta? Kaja ai amu galaw na, n kaja ai amu galaw na, Masha asak hpe hkye la na, shing n rai, jahten na, gara mahtang mai galaw na a kun?,” ngu nna shanhte hpe tsun mu ai.

¹⁰Madu gaw, dai masha ni yawng hpe mada shinggrup yu nna, dai masha wa hpe, “Na a lata ladawn u,” ngu wu ai; shi mung ladawn nna, shi a lata gaw mai mat lu ai.

¹¹Shanhte chyawm gaw myi di lahpang pawt bu nna, “Yesu hpe kaning di na rai nga a ta?,” nga nna shanhte shada tsun ginrawn hkat nga ma ai.

¹²Dai nhtoi hte hta Madu Yesu gaw akyu hpyi na nga, dai bum de pru sa wa nna, shana tup Karai Kasang kaw akyu hpyi let nga nga ai.

¹³Nhtoi htoi jang, shi a sape ni hpe shi shaga la nna, shanhte hta na marai shi lahkawng hpe kasa ni, ngu nna shamying da mu ai.

¹⁴Dai ni gaw Petru ngu nna Yesu shi e shamying ai Simun hte shi a kanau Andre; Yaku yan Yawhan; Hpilip yan Barhtolume;

¹⁵Mahte yan Htawma; Alhpe a kasha Yaku yan amyu hpe tsaw ra ai Zelutu ngu ai Simun;

¹⁶Yaku a kasha Yuda hte Madu Yesu hpe ap kau ai wa Yuda Iskarut hte rai ma ai.

¹⁷Kasa ni hte rau bum ntsa kaw na yu wa nna, layang e shi a sape hpung kaba hte rau tsap nga ai shaloi, Yuda mung ting hte Yerusalem mare na mung, nammukdara makau na Turu hte Sidon kaw na mung, masha wunawng wuwa kaba sa hpawng nga ma ai.

¹⁸Shanhte shi a ga madat la na hte tinang a machyi makaw ni hpe shamai la na matu sa ma ai. N san seng ai Nat ni a sharu shatsang hkrum ai ni mung mai mat ma ai.

¹⁹Shawa masha ni yawng shi hpe ahtawk lu hkra nga shakut ma ai, hpa majaw nga yang, shi a hkum hta na atsam pru nna mahkra hpe shamai nga ai.

²⁰Yesu gaw shi a sape ni hpe mada yu nna tsun mu ai gaw: “Nanhte matsan mayan ni a lu myit dai, kaning rai nme law, Karai Kasang a Mungdan gaw nanhte a mungdan rai nga malit dai.

²¹Ya kawsi nga ai ni, nanhte a lu myit dai: kaning rai nme law nanhte hkru kat lu na myit dai. Ya hkrap nga ai ni, nanhte a lu myit dai: kaning rai nme law nanhte mani lu na marin dai.

²²Masha ni nanhte hpe n dawng n yawt ai hte dai masha kasha a majaw shadaw jahka di kau nna asawng asang di ai hte, nanhte a mying hpe n hpru n mai ai arai hpe zawn tsun jahpyak hkrum myit yang, nanhte a lu myit dai.

²³Dai zawn hkrum sha ai shaloi, kabu nna gumlawt nga mu, hpa majaw nga yang, sumsing lamu e nanhte a shabrai kaba nga malit dai. Shanhte a kaji kawa ni mung myihtoi ni hpe dai zawn di yu manu ai.

²⁴“Rai ti mung, sut su ai ni nanhte gaw hkrithpa dingnye lu myit dai: hpa majaw nga yang nanhte gaw ndai prat hta grai pyaw ai hku nga lu manit dai!

²⁵Ya hkru kat nga ai ni, nanhte hkrithpa dingnye lu myit dai; hpa majaw nga yang nanhte kawsi ai hkrum na marin dai. Ya mani nga ai ni, nanhte hkrithpa dingnye lu myit dai: kaning rai nme law, nanhte gaw sharung shayawt ai hte hkrap ngu hkrap ngoi ai hkrum na marin dai.

²⁶Masha yawng mayawng nanhte hpe kaja ai ngu nna tsun myit yang, grai hkrithpa dingnye lu myit dai, hpa majaw nga yang, shanhte a kaji kawa ni mung myihtoi masu ni hpe dai hte maren tsun shakawn lai wa yu masai.

²⁷“Rai ti mung, madat la nga ai ni nanhte hpe ngai tsun made ga, nanhte a hpyen ni hpe tsaw ra mu; nanhte hpe n dawng n yawt ai ni hpe kaja ai hku galaw mu.

²⁸Nanhte hpe dagam ai ni hpe shaman ya mu; nanhte hpe aroi arip di ai ni a matu akyu hpyi mu.

²⁹Nanhte a shabyi maga mi bye ya ai wa hpe, maga mi naw ja ya u; na a ntsa palawng la kau ya ai wa hpe na a palawng mung hkum ndang u.

³⁰Nang kaw hpyi ai wa kadai hpe mung jaw u; Marai langai ngai na a arung arai la kau ya ai shaloi bai hkum hpyi mu.

³¹Masha ni hpe nanhte a matu hkan galaw shangun mayu ai zawn, masha ni a matu hkan galaw mu.

³²“Nanhte hpe tsaw ra ai ni hpe sha tsaw ra myit yang gaw, nanhte, Karai Kasang a shaman chyeju gara hku hkam la lu na myit ni? Yubak kap ai ni mung tinang hpe tsaw ra ai ni hpe gaw tsaw ra ma ai.

³³Nanhte hpe kaja ai hku galaw ai ni hpe sha kaja ai hku galaw htang myit yang gaw, nanhte Karai Kasang a shaman chyeju gara hku lu la na myit ta? Yubak kap ai ni mung dai zawn galaw ma ai.

³⁴Bai htang lu na zawn nawn ai ni hpe sha hkoi shap ya myit yang gaw, nanhte Karai Kasang a shaman chyeju gara hku hkam la lu na myit ni? Yubak kap ai ni pyi hkoi ya ai made bai lu la hkra yubak kap ai ni hpe hkoi shap ya ma ai.

³⁵Nanhte chyawm gaw, nanhte a hpyen ni hpe tsaw ra mu; hpa mung lu la na n myit mada ai sha hkoi shap ya mu. Shing rai yang, nanhte shabrai kaba lu na hte, Tsaw Htum ai Karai Wa a kasha ni mung nanhte tai na marin dai; hpa majaw nga yang shi gaw chyeju malap kau ai ni hte, n hkru n hkra re ai ni hpe chyeju galaw mu ai.

³⁶Nanhte a Kawa Karai Kasang matsan dum chye ai hte maren, nanhte mung matsan chye dum mu.

³⁷“Masha ni hpe hkum jeyang myit, shaloi she Karai Kasang mung nanhte hpe n jeyang na ra ai, masha ni hpe mara hkum shagun mu, shing rai yang, Karai Kasang mung nanhte hpe mara n shagun na ra ai. Masha ni hpe mara dat ya mu, shaloi Karai Kasang mung nanhte hpe mara dat ya na ra ai.

³⁸Masha ni hpe jaw mu, shing rai jang Karai Kasang mung nanhte hpe jaw na marin dai, kaja wa hpring kabrat anin garin nna teng man ai dang hte nanhte a lata hta hkap la lu ai made ru jaw bang ya na ra ai; nanhte masha ni hpe hteng ya ai dang hte maren, Karai Kasang gaw nanhte hpe bai hteng ya na marin dai,” ngu nna tsun mu ai.

³⁹Dai hta kaga, ga shadawn mung shanhte hpe tsun mu ai gaw, “Myi n mu ai wa langai mi gaw, kaga myi n mu ai wa langai mi hpe lam n woi madun lu ai; shing rai yang, lahkawng yan nhkun hta di hkrat bang na mara ai.

⁴⁰Sape gaw shi a sara hta grau ai n rai; rai ti mung, sape shagu gaw, shi sharin la ai hpaji hkum hkra sharin la ai hpang, tinang a sara zawn rai na ra ai.

⁴¹“Tinang a myi hta rawng ai hpun tawng hpe shawng n myit yu ai mi, na nhpu nnau wa a myi hta rawng ai nbun hpe hpa rai yu nga n ta?

⁴²Tinang a myi hta rawng ai hpuntawng hpe n mu lu ai wa mi, ‘Hpu nau wa e, na a myi hta rawng ai nbun hpe ngai naw lai kau ya de ga!,’ nga nna hpu nau wa hpe kaning rai tsun lu n ta? Sawt ai wa e! Na a myi hta na hpuntawng hpe shawng la kau u; dai hpang na nhpu nnau wa a myi hta rawng ai nbun hpe lai kau ya na matu nang asan sha mu na rin dai.

⁴³“Kaja ai hpun gaw, n kaja ai asi n si ai; dai hte maren, n kaja ai hpun mung, kaja ai asi n si ai.

⁴⁴Hpun shagu hpe shi a asi hte chye ginhka lu nga ai, hpa majaw nga yang, ju hpun hta maihpang si kadai n di la yu ai; ju singwum hta na mung sabyi si kadai n di la yu ai.

⁴⁵Kaja ai masha gaw, kaja ai arai hte hpring rawng nga ai kraw lawang sut dek hta na kaja ai rai shapraw dan ai; n kaja ai wa mung, n kaja ai sut dek hta na n kaja ai shapraw dan ai, hpa majaw nga yang, kraw hta hpring chyat nga ai kaw na shi a n-gup hte tsun pru nga ai.

⁴⁶“Ngai tsun ai hte maren n hkan galaw myit dai mi hpa rai nanhte ngai hpe Madu e, Madu e, nga myit ta?

⁴⁷Ngai hpang de sa nhtawm, nye a ga ni hpe madat la nna hkan galaw ai wa kadai mung, kaning re ai hte bung ai gaw, ngai nanhte hpe madun dan made ga.

⁴⁸Dai wa gaw, wahpang gaw yang, sung sung htu nna lunghkrung ntsa e npawt gaw ai wa hte bung nga ai. Hka rawt hka tung wa yang, hka hpungla ni dai nta hpe ahtu adawt rai ti mung, ngang ngang kang kang gaw da sai majaw, dai hpe n shamawt lu ai.

⁴⁹Rai ti mung, ga na la nna n hkan galaw ai chyawm gaw, npawt nhpang n gaw ai sha ga man hta wahpang gaw ai wa hte bung nga ai, hka hpungla ni dai nta hpe ahtu adawt nna kadawng daw mat ai, dai nta a hten run mat ai lam gaw hkrithpa kaba rai nga ai!”