Read Jinghpaw Common Language Bible 2009 TARA JAHPRANG 12 Bible Online

TARA JAHPRANG 12 - Jinghpaw Common Language Bible 2009 bible

TARA JAHPRANG 12

¹“Dai MADU nanhte a nji nwa ni a Karai Kasang gaw nanhte hpe jaw ya nga ai mungdan hta nanhte shanu nga ai prat dingsa nanhte madat mara hkan sa na tara ni gaw ndai ni rai nga ai. Dai tara ni hpe madat mara mu.

²Nanhte madu la na mungdan hta masha amyu ni shanhte a karai ni hpe nawku ai dai tsaw ai bum hte kawng ntsa hkan na tsit lali ai hpun npu hkan na shara ni yawng hpe jahten kau lu na rai myit dai.

³Shanhte a tawn hkungri ni hpe agrawp kau ya nna chyoi pra ai nlung shadaw ni hpe mung adawt mani kau ya mu. Shanhte a Ashera hpara num sumla hpe nat kau ya nhtawm dai shara ni hta shanhte galoi mung bai n nawku lu mat hkra shanhte a hpara sumla ni hpe kran daw kau ya mu.

⁴“Ndai masha amyu ni shanhte a karai ni hpe nawku nga ma ai hte maren, dai MADU nanhte a Karai Kasang hpe galaw lu na myit dai n rai.

⁵Dai MADU gaw nanhte amyu bawsang ni yawng a lamu ga hta na shara langai mi hpe lata la na rai wu ai. Amyu masha ni mung shi a man e sa du nhtawm shi hpe nawku na mara ai.

⁶Dai yang e, wan nat na nanhte a shagu hkungga ni hte kaga shagu hkungga ni, nanhte a htam shi hta na htam mi hte hkungga ni, dai MADU hpe ga sadi jaw ai kumhpa ni, jaw mayu ai hkungga ni hte shawng hkrat ai nanhte a sagu dumsu ni hpe mung nawng jau na rai myit dai.

⁷Dai yang e, dai MADU nanhte a Karai Kasang a hpung shingkang hte nanhte hpe shaman ya manit dai majaw nanhte galaw ai mai kaja lam ni hta nanhte hte nanhte a dinghku masha ni lu sha nna kabu gara nga na rai myit dai.

⁸“Dai aten du jang, nanhte galaw yu manit dai zawn galaw lu na myit dai n rai. Nanhte gaw ya du hkra pyi nanhte ra sharawng ai hku nawku nga myit dai.

⁹Hpa majaw nga yang, dai MADU nanhte a Karai Kasang gaw ngwi pyaw sim sa ai hte nanhte nga lu myit ga nga, nanhte hpe jaw ya ai mungdan de nanhte garai n shang sha nga myit dai.

¹⁰Ya nanhte Yawdan hka rap jang, dai MADU nanhte hpe mungdan madu la shangun nhtawm dai yang e nga lu na rai myit dai. Shaloi nanhte a gumlau hpyen ni yawng a lata kaw na shim lum hkra shi nanhte hpe bau sin ya ai a majaw ngwi pyaw sim sa ai hte nga lu na rai myit dai.

¹¹Dai MADU gaw shi hpe nawku na shara langai hpe sha lata san da na rai wu ai; shing rai dai yang e, ngai hkang da mada hte maren wan nat na matu shagu hkungga ni hte kaga hkungga ni, dai MADU a matu nanhte ga sadi jaw ai laksan kumhpa ni hpe la sa lu na rai myit dai.

¹²Dai yang e, nanhte a kashu kasha ni hte mung, nanhte a shangun ma ni hte mung, lamu ga sali n lu ai majaw nanhte a mare ni hta hkan nga ai Lewi masha ni hte mung, shi a man e rau sha kabu gara lu na rai myit dai. Lewi masha ni lamu ga madu lu na n rai nga ai hpe dum mu.

¹³Nanhte lata la ai shara hta nanhte a shagu hkungga ni hpe nawng ya lu na n rai;

¹⁴Nanhte a amyu bawsang langai ngai a lamu ga ngu na, dai MADU lata san da ai shara langai hta chyu sha nanhte nawng jau lu na rai myit dai. Dai yang e, ngai nanhte hpe hkang da manit dai hte maren wan nat na nanhte a shagu hkungga ni hpe chyu sha nawng jau nna kaga amu ni yawng hpe mung galaw lu na rai myit dai.

¹⁵“Rai ti mung nanhte nga ai shara shagu hta nanhte a yam nga ni hpe n dut n dang sat sha lu na rai myit dai. Dai MADU nanhte hpe nhpaw n-ya jaw ya ai hpe sha mai na rai myit dai. Chyahkyi, zau nyi shan ni hpe nanhte sha myit dai zawn htung hte maren san seng ai hte n san n seng ai ni yawng hpe mung sha mai nga myit dai.

¹⁶Shing ngu ti mung asai hpe lusha zawn lang lu na n rai; hka hpe zawn dai sai hpe ga de ru hkaw na rai myit dai.

¹⁷Nanhte a nai mam, sabyi ntsin hte tsanlun namman sau re ai ni kaw na htam shi hta na htam mi, nanhte rem ai sagu dumsu ni hta na shawng hkrat ai kasha alat, dai MADU hpe ga sadi jaw ai kumhpa, nanhte jaw mayu ai hkungga ni hte kaga hkungga ni hpe mung nanhte nga ai shara ni hta sha lu na n rai.

¹⁸Nanhte hte nanhte a kashu kasha ni mung, nanhte a shangun ma ni hte mung, nanhte a mare ni hta hkan nga ai Lewi masha ni hte mung, dai MADU nanhte a Karai Kasang lata san da ai nawku shara hta dai MADU nanhte a Karai Kasang a man e chyu sha dai hkungga ni hte rau sha lu na rai myit dai; shing rai nanhte galaw ai lam magup hta nanhte kabu gara lu na rai myit dai.

¹⁹Nanhte a lamu ga hta nanhte hkrung nga dingsa Lewi masha ni hpe mung n gawn n sawn n galaw kau hkrup myit ga, teng teng sadi nga mu.

²⁰“Shi ga sadi tawn da sai hte maren, dai MADU nanhte a Karai Kasang nanhte a lamu ga hpe shadam dat ya myit dai shaloi, nanhte ra marit ai aten shagu hta shan sha lu na rai myit dai.

²¹Nawku ai shara hte nau tsan myit yang gaw, dai MADU nanhte hpe jaw ya ai sagu dumsu hpe nanhte ra sharawng ai shara hta sat nna, ngai nanhte hpe tsun ni ai hte maren, dai ashan hpe dum nta e nanhte sha mai nga myit dai.

²²Chyahkyi, zau nyi shan sha myit dai zawn htung hte maren san seng ai wa, n san n seng ai wa kadai mung dai ashan hpe mung sha mai na rai nga ai.

²³Asai hta asak rawng nga ai majaw asai naw rawng ai ashan hpe chyu sha n sha lu na rai myit dai. Dai re ai majaw asak hpe ashan hte rau nanhte sha lu na n rai.

²⁴Asai hpe lusha a matu lang lu na n rai; shing rai na malai hka hpe zawn ga de ru hkaw kau na rai myit dai.

²⁵Ndai hkang da ai ga hpe madat mara hkan sa myit dai rai yang, dai MADU awng sharawng wa nna nanhte hte nanhte a matu mara ni ngamu ngamai wa na rai myit dai.

²⁶Nanhte a hkungga ni mung, dai MADU hpe ga sadi jaw da sai kumhpa ni hpe mung, nawku na matu san da ai shara de la sa na rai myit dai.

²⁷Dai MADU a tawn hkungri ntsa e tsep kawp nat kau na shagu hkungga ni hpe nawng jau na rai myit dai. Bai nawng jau ya ai shagu hkungga ni hta na ashan hpe nanhte sha nhtawm, dai asai hpe chyawm gaw tawn hkungri ntsa e ru hkaw kau na rai myit dai.

²⁸Ngai nanhte hpe hkang da ai lam magup hpe sadi sahka hte madat mara hkan sa nga mu. Nanhte gaw jaw ai amu galaw nga myit dai hpe dai MADU nanhte a Karai Kasang ra sharawng nga ai majaw nanhte hte nanhte a matu mara ni yawng ngamu ngamai na rai myit dai.

²⁹“Dai MADU nanhte a Karai Kasang gaw amyu baw ni a mungdan hpe nanhte shang gasat wa ai shaloi dai mungdan hpe madu la lu nna dai mung e shanu nga lu na rai myit dai.

³⁰Dai MADU gaw ndai amyu baw ni hpe shamyit kau ai hpang, nanhte gaw shanhte a nawku htung lailen hta n hkan hkrup myit ga, sadi nga mu; dai gaw si ging ai amu rai nga ai. Shanhte zawn n nawku lu myit ga, shanhte a karai ni hpe kaning rai nawku nga ma ai hpe hkum tam shakut myit.

³¹Shanhte a karai ni hpe nawku ai hta dai MADU n dawng n yawt ai matsat shabat amu yawng hpe galaw mu ai majaw shanhte a karai ni hpe nawku ai zawn dai MADU nanhte a Karai Kasang hpe hkum nawku myit. Shanhte gaw shanhte a kashu kasha ni hpe pyi tawn hkungri ni hta wan hte sak nawng nga ma ai.

³²“Ngai nanhte hpe hkang da made ai hte maren, lam magup hte hpe hkan galaw nga mu; dai tara hta kaga hpa mung jat la lu na myit dai n rai; shayawm mung shayawm kau lu na myit dai n rai.