Read Jinghpaw Common Language Bible 2009 TARA JAHPRANG 16 Bible Online

TARA JAHPRANG 16 - Jinghpaw Common Language Bible 2009 bible

TARA JAHPRANG 16

¹Shalai Wa Ai Poi hpe Abi shata hta galaw let, dai MADU nanhte a Karai Kasang hpe shagrau sha-a nga mu;

²Dai MADU nanhte a Karai Kasang hpe shagrau sha-a ai Shalai Wa Ai Poi lusha a matu san da ai nawku shara de sa nna sagu dumsu langai ngai sat na rai myit dai.

³Nanhte dai lusha sha myit dai shaloi matsi bang ai muk sha lu na myit dai n rai; nanhte gaw Egutu mung kaw na tin shapun rai pru mat wa myit dai shaloi nanhte galaw manit dai zawn matsi n bang ai muk sanit ya tup sha lu na rai myit dai. Dai muk sha mu; dai hpe nni nkri muk ngu nna shamying na rai myit dai. Nanhte hkrung nga dingsa nni nkri shara ngu ai Egutu mung kaw na nanhte hpe woi shapraw wa ai nhtoi hpe adum nga na rai myit dai.

⁴Nanhte a mungdan hta kadai mung tinang a nta e sanit ya tup matsi lang lu na n rai. Nnan shana de sat ai yam nga ashan hpe dai shana jang sha lu na rai myit dai.

⁵“Dai MADU nanhte a Karai Kasang nanhte hpe jaw ai mungdan na san da ai nawku shara hta kaga, Shalai Wa Ai Poi a matu yam nga ni hpe sat lu na myit dai n rai. Egutu mung kaw na nanhte pru wa ai shani ngu na shana de jan shang wa mahka e dai hpe nawng ya na rai myit dai.

⁷Ashan hpe nawku shara langai hta sha shadu nna sha na rai myit dai; shing rai hpang jahpawt e nta de nhtang wa na rai myit dai.

⁸Nanhte gaw kru ya tup matsi n bang ai muk sha na rai myit dai. Shing rai sanit ya ngu na shani hta dai MADU nanhte a Karai Kasang hpe nawku na zup hpawng hpawng na rai nna, dai shani e amu bungli galaw lu na myit dai n rai.

⁹“Nsi naisi shu hpang ai aten kaw nna bat sanit tup hpe nanhte hti la nhtawm,

¹⁰dai nhtoi gu jang, dai MADU nanhte a Karai Kasang nanhte hpe shaman ya ai made hta na jaw mayu ai hkungga la sa let shi hpe shagrau sha-a na matu Nmut Shang Poi galaw na rai myit dai.

¹¹Tinang a kashu kasha, shangun ma ni hte nanhte a mare hta nga ai Lewi masha ni, maigan masha ni, jahkrai nmai ni hte gaida gaina ni yawng dai MADU a man e rau sha kabu gara nga mu. Ndai amu hpe nawku daw jau ai shara langai hta sha galaw mu.

¹²Egutu mung e nanhte mayam tai yu manit dai hpe hkum malap kau myit; dai rai nna ndai hkang da ai ga ni hpe nanhte teng teng madat mara hkan sa lu na rai myit dai.

¹³“Nanhte a nsi naisi, nai mam yawng kabye adup nna sabyi ntsin shup la ngut jang, Sum Poi hpe sanit ya tup galaw na rai myit dai.

¹⁴Nanhte a kashu kasha ni, shangun ma ni, nanhte a mare hkan nga ai Lewi ni, maigan masha ni, jahkrai nmai ni hte gaida gaina ni hte kabu gara lu na rai myit dai.

¹⁵San da ai nawku shara langai hta sha ndai poi hpe sanit ya tup galaw let, dai MADU nanhte a Karai Kasang hpe shagrau sha-a na rai myit dai. Dai MADU gaw nanhte a nai mam shu la ai hpe mung, nanhte shachyen ai amu magup hpe mung shaman ya nit dai majaw kabu gara nga na rai myit dai.

¹⁶“Laning mi hta masum lang ngu na san da ai nawku shara langai hta Shalai Wa Ai Poi, Nmut Shang Poi hte Sum Poi ni hpe galaw myit dai shaloi nanhte a amyu bawsang hta na lasha ni yawng dai MADU hpe nawku na matu sa lu na rai ma ai.

¹⁷Dai MADU nanhte a Karai Kasang shaman chyeju jaw ya manit dai hte maren, lasha shagu mung tinang jaw ya lu ai made kumhpaw kumhpa la sa na rai nga ai.

¹⁸“Dai MADU nanhte a Karai Kasang nanhte hpe jaw ai mare shagu hta tara agyi ni hte kaga du salang ni hpe san tawn na rai myit dai. Dai masha ni gaw amyu masha ni hpe myi man n lata ai sha, tara jeyang na rai ma ai.

¹⁹Tara jeyang ai lam hta n teng n man ai hku myi man tau ya ai lam madun lu na myit dai n rai; mayun kumhpa ni la sha lu na ma ai n rai; dai gaw hpaji rawng ai ni hte ding man ai ni a myi hpe shamak kau ya nhtawm shanhte a tara daw dan ai lam hpe shut kau shangun nga ai.

²⁰Dai MADU nanhte a Karai Kasang nanhte hpe jaw ai mungdan madu la nna, dai mung e matut asak hkrung nga lu myit ga gaw, rap ra ai hte teng man ai tara hku tut nawng jeyang lu na rai myit dai.

²¹“Dai MADU nanhte a Karai Kasang a matu nanhte galaw da ai tawn hkungri makau e hpun hte galaw ai Ashera karai num a sumla hpe jung da lu na myit dai n rai.

²²Hpara sumla nawku na nga, nlung shadaw shadun lu na n rai; dai MADU gaw dai ni hpe n dawng nga ai.