Read Jinghpaw Common Language Bible 2009 TARA JAHPRANG 20 Bible Online

TARA JAHPRANG 20 - Jinghpaw Common Language Bible 2009 bible

TARA JAHPRANG 20

¹“Gumlau hpyen ni hpe nanhte htim gasat sa wa ai shaloi, gumra hte hpyen leng ni hpe mung, nanhte hta grau law ai hpyen luksuk ni hpe nanhte mu myit dai shaloi, shanhte hpe hkum yu hkrit myit. Nanhte hpe Egutu mung kaw na shaw woi wa ai dai MADU nanhte a Karai Kasang gaw nanhte hte rau rai nga na ra ai.

²Nanhte hpyen garai n htim hpang yang, hkinjawng wa shawng de sit sa nhtawm,

³hpyen luksuk hpe, ‘Israela masha ni e, madat mu! Dai ni, nanhte majan pa de rawt sa wa nga myit dai. Nanhte a gumlau hpyen ni hpe hkum hkrit myit, myit mung hkum yu htum myit; hkum kajawng hkum kahpra nga myit.

⁴Dai MADU nanhte a Karai Kasang gaw nanhte hte rau sa wa nga ai rai nna shi nanhte hpe awng padang jaw ya na ra ai,’ ngu nna tsun na rai wu ai.

⁵“Shaloi du salang ni mung masha ni hpe, ‘Nta gap ti mung dingshawn garai n shang ai ndai yang e kadai nga nga a ta?, nga ai rai yang, shi gaw nta de wa na rai wu ai. Dai n rai, majan pa e shi sat kau ai hkrum yang, marai langai ngai shi a nta hpe dingshawn shang na rai wu ai.

⁶Sabyi sun hkai ti mung asi di la na ahkang garai n lu ai kadai wa ndai yang e nga nga a ta?, nga ai rai yang, nta de shi naw wa na rai wu ai. Shing n rai shi gaw majan pa e sat kau hkrum jang, marai langai ngai e shi a sabyi ntsin hpe kabu gara lu kau na ra ai.

⁷Hkungran na matu numsha hpe mahtan da ai wa ndai yang e kadai nga nga a ta?, nga ai rai yang, shi gaw nta de naw wa na rai wu ai. Shing n rai majan pa e shi sat kau ai hkrum jang, shi mahtan da ai numsha hpe marai langai ngai e hkungran la na rai wu ai,’ ngu nna tsun na rai ma ai.

⁸Dai du salang ni mung masha ni hpe, ‘Hkrit ai myit rawng nna myit htum mat ai masha ndai yang e kadai nga nga a ta?, nga ai rai yang, shi gaw nta de naw wa na rai wu ai. Shing n rai yang, kaga masha ni a myit masa hpe jahten kau ya na rai wu ai,’ ngu nna tsun mu ai.

⁹Dai du salang ni hpyen luksuk hpe ga tsun ngut jang, masha hpung shagu hpe woi awn na matu ningbaw ni hpe lata san da na rai ma ai.

¹⁰“Mare langai hpe htim gasat myit dai shaloi, dai mare masha ni hpe asum jaw kau na ahkaw ahkang shawng jaw na rai myit dai.

¹¹Shanhte asum jaw nna mare chyinghka hpaw dat ya ai shaloi, shanhte yawng gaw nanhte a mayam ni tai mat nna, laja lana re ai amu nanhte a matu gun hpai ya na rai ma ai.

¹²Rai ti mung dai mare masha ni asum n jaw ai sha nanhte hpe hkap gasat mu ai rai yang chyawm gaw nanhte a luksuk hte dai mare hpe wang tawn mu.

¹³Dai MADU nanhte a Karai Kasang dai mare hpe ka-up la na matu nanhte hpe ap ya ai shaloi, mare masha shagu hpe sat kau na rai myit dai.

¹⁴Dai hpang numsha ni hte ma kaji ni, yam nga hpung ni hte mare hta nga ai arai yawng mayawng hpe nanhte a matu la mai nga myit dai. Dai MADU nanhte hpe jaw manit dai gumlau hpyen ni madu ai arai shagu hte hpe mung madu la lu na rai myit dai.

¹⁵Dai gaw nanhte shanu nga na mungdan hte tsan gang ai mare ni hpe shing di na rai myit dai.

¹⁶“Rai ti mung, dai MADU nanhte a Karai Kasang nanhte hpe jaw ya nga ai mungdan na mare ni hpe madu la myit dai shaloi, masha shagu hpe sat kau na rai myit dai.

¹⁷Hiti, Amori, Hkanani, Perizi, Hiwi hte Yebusi masha ni yawng hpe dai MADU nanhte hpe hkang da sai hte maren, tsep kawp shamyit kau na rai myit dai.

¹⁸Shanhte a hpara ni hpe nawku ai shaloi shanhte galaw ai matsat shabat lam nanhte hpe sharin ya nna dai MADU hpe yubak n galaw shut kau shangun myit ga, shanhte hpe shamyit kau na rai myit dai.

¹⁹“Mare langai madu la na matu nanhte shakut let, aten na na wang tawn da myit dai shaloi, namsi hpun ni hpe kran daw kau lu na myit dai n rai. Dai hpun ni gaw nanhte a gumlau hpyen ni n rai nga ai majaw dai ni hpe hkum jahten kau myit; de a namsi ni hpe nanhte sha lu na rai myit dai.

²⁰Kaga hpun ni hpe chyawm gaw nanhte mai kran kau nga ai; mare hpe gasat dang la lu ai aten du hkra, dai ni hpe kaduk kum ai hta akyu jashawn lang mu.