Read Jinghpaw Common Language Bible 2009 TARA JAHPRANG 24 Bible Online

TARA JAHPRANG 24 - Jinghpaw Common Language Bible 2009 bible

TARA JAHPRANG 24

¹“Lasha langai ngai num hkungran la nna nga sha nhtawm, shi n yu htuk dum ai lam lama ma hpe mu tawn ai a majaw n ra sharawng mat wu ai rai yang, jahka ai laika ka jaw let shi a nta kaw na dat dat na rai wu ai.

²Dai hpang shi gaw kaga lasha langai hte hkungran ai ngu ga,

³hpang na la wa mung shi hpe n tsaw n ra ai rai yang, jahka laika ka jaw nhtawm shi a nta kaw nna shabawn kau dat na rai wu ai. Shing n rai dai numsha a hpang na madu wa si mat ai rai rai,

⁴kaning re ai lam hku mi rai rai, shawng na dai num a madu wa shi hpe bai hkungran la lu na n rai; dai numsha hta awu asin rai sai ngu myit nawn la na rai wu ai; dai n rai, dai numsha hpe shi bai hkungran la ai rai yang, dai gaw dai MADU hpe n sawn n sang di ai rai nga ai. Dai MADU nanhte a Karai Kasang nanhte hpe jaw ai mungdan hta shing re ai hkrit hpa yubak hpe shut hpyit lu na myit dai n rai.

⁵“Dinghku nnan shang ai lasha gaw hpyen amu hte shawa bungli gun hpai lu na n rai; shi gun hpai nga ai lit kaw na pyi laning mi hkring sa la na ahkang nga nga ai. Shi gaw nta e madu jan hte pyaw pyaw nga lu na rai wu ai.

⁶Masha langai mi hpe arai lama ma shap jaw ai shaloi nsi naisi rin ai htumrin ni hpe pahkam rai zawn tang la lu na n rai; dai gaw asak bau ai malu masha hkyen lajang ya ai dinghku arai hpe tang ai hku ang nga ai.

⁷“Israela hpu nau langai ngai hpe rim makoi da nna, shi a mayam shatai la ai, shing n rai mayam hku dut sha kau dat ai wa kadai mung sat kau ai hkrum na rai wu ai. Ndai hku nna dai n shawp n kap ai amu hpe nanhte yeng seng kau na rai myit dai.

⁸“Manggang ana nang kaw kap nga ai shaloi, Lewi hkinjawng ni nang hpe tsun matsun ai hku teng tup hkan galaw nhtawm, ngai shanhte hpe tsun matsun da ni ai hku hkan sa na rai myit dai.

⁹Nanhte Egutu mung na pru wa myit dai shaloi, dai MADU nanhte a Karai Kasang gaw Miriam hpe hpa galaw kau sai lam adum nga mu.

¹⁰“Masha langai ngai hpe arai lama ma hkoi ya ai shaloi, nang hpe jaw na ngu nna pahkam hkam da ai palawng galu hpe shi a nta kaw na shang la lu na n rai;

¹¹shinggan e ala nga u, shi nan dai pahkam arai nang kaw la shapraw ya na rai wu ai.

¹²Dai wa matsan mayan re ai rai yang gaw, dai pahkam arai hpe lana mi pyi la da ya lu na n rai;

¹³Shi mung myit pyaw ai hte yup la lu u ga, shana de shagu nhtang ya na rai ndai; shaloi shi nang hpe chyeju dum nna dai MADU nanhte a Karai Kasang mung ra sharawng na rai wu ai.

¹⁴“Na a mare langai ngai hta nga ai Israela hpu nau shing n rai maigan masha hta rai tim, matsan mayan re ai hte ra kadawn nna nchyang amu galaw sha ai shangun ma hpe masu hkalem sha lu na ndai n rai.

¹⁵Jan garai n shang yang, shani shagu na shi a shabrai jaw lu na rai ndai; shi gumhpraw ra nga ai majaw dai lu la ging ai hpe shi myit mada nga wu ai. Nang shi hpe n jaw ai rai yang, dai MADU hpe shi jahtau na ra ai rai nna yubak mara lu na rin dai.

¹⁶“Kasha ni shut hpyit kau ai ru hka amu a majaw kanu kawa ni si ai hkrum na n rai; kanu kawa ni shut hpyit kau ai ru hka amu a majaw kashu kasha ni si ai hkrum na n rai; tinang nan shut hpyit kau ai ru hka amu a majaw tinang nan si lu na rai nga ai.

¹⁷“Maigan masha ni hte jahkrai nmai ma ni a ahkaw ahkang ni hpe hkum pat shingdang da ya lu na n rai; gaida jan a hpun palawng hpe hkoi jaw gumhpraw a matu pahkam arai shatai kau ya lu na n rai.

¹⁸Nanhte Egutu mung e mayam tai yu manit dai hpe mung, dai MADU nanhte a Karai Kasang nanhte hpe shalawt la manit dai hpe mung adum nga mu; dai re ai majaw ndai hkang da ai ga ngai nanhte hpe jaw ya ma sade ai.

¹⁹“Na a nai mam nsi naisi ni hpe shu la ai shaloi, nang dan da sai hkauling nkau mi n hta la hkrup kau ai rai yang, dai hpe bai hkan hta la lu na n rai; dai gaw maigan masha, jahkrai nmai hte gaida gaina ni a matu ngam da lu na rai ndai; dai MADU na a Karai Kasang mung nang galaw ai lam magup shaman ya na ra ai.

²⁰Na a tsanlun si ni hpe lang mi hkan hta la ngut jang, naw ngam ai ni hpe bai hkan hta la lu na n rai; dai gaw maigan masha wa, jahkrai nmai hte gaida gaina ni a matu rai nga ai.

²¹Sabyi si ni hpe lang mi di shinggyin la ngut jang, lahkawng lang ngu na nlim bai nhtang gut la lu na n rai; naw si ngam ai gaw maigan masha wa, jahkrai nmai hte gaida gaina ni a matu rai nga ai.

²²Nanhte Egutu mung e mayam tai yu manit dai hpe galoi mung hkum malap kau nga myit; dai re ai majaw ndai hkang da ai ga ngai nanhte hpe jaw ya made ai.