Read Jinghpaw Common Language Bible 2009 TARA JAHPRANG 25 Bible Online

TARA JAHPRANG 25 - Jinghpaw Common Language Bible 2009 bible

TARA JAHPRANG 25

¹“Israela masha lahkawng shada da ga law hkat ai majaw tara rung de amu sa shawk ma ai rai yang, langai mi hpe mara n kap ai wa ngu nna mung, bai kaga wa hpe mara lu ai wa ngu nna mung tsun na rai myit dai.

²Mara lu ai wa mahtang shingna kayat hkam na matu daw dan hkrum wu ai rai yang, tara agyi wa gaw dai wa hpe shagum tawn nna shi shut ai mara hte ging dan ai made kayat na rai wu ai.

³Shi hpe mali shi lang hta n jan ai sha dam hkawn jaw mai nga ai; dai hta jan kayat ai rai yang, shi hpe yawng a man e manu n shadan ai hku tai nga ai.

⁴“Mam kabye ai dumsu n-gup pat ya lu na n rai.

⁵“Dinghku sut gan langai hta jawm shanu ai hpu nau lahkawng hta na langai wa mi, matu mara n nga ai si mat yang, shi a gaida jan hpe dinghku kaga na masha wa hte hkungran lu na n rai; si mat sai wa a kanau wa mahtang hkungran la na lit nga nga ai.

⁶Israela amyu hta kahpu a amyu matu matut grin nga hkra, shawng shangai ai shadang sha gaw si mat sai wa a kasha rai nga ai ngu nna myit nawn la na rai nga ai.

⁷Rai ti mung si mat sai wa a kanau mahtang karat hpe n hkungran hkraw ai rai yang, dai numsha gaw mare ningbaw ni a man de sa nhtawm, ‘Nye a madu wa a kahpu kanau gaw Israela amyu masha ni hta shi kahpu kanau a matu mara matut ya na lit hpe ningdang kau nga ai,’ ngu nna sa tsun dan na rai wu ai.

⁸Dai hpang mare ningbaw ni gaw dai wa hpe shaga la nna tsun dan na rai ma ai; shi mung karat hte hkungran na matu naw ningdang nga ai rai yang gaw,

⁹shi a karat jan mahtang mare ningbaw ni a man e shi kaw sit sa nhtawm shi a kyepdin maga mi raw kau ya nna, shi a myi man hta mayen mahtaw bun ya let, ‘Tinang a kahpu kanau a matu mara matut ya na n hkraw ai wa hpe ning di ga ai,’ ngu nna tsun na rai wu ai.

¹⁰Shi a dinghku hpe mung Israela amyu ting hta, ‘Kyepdin raw hkrum ai wa a dinghku,’ ngu nna shamying na rai ma ai.

¹¹“Lasha lahkawng anut hkat nga yang, langai mi a madu jan mahtang madu wa hpe karum la na nga, kaga la wa a la hkrang sa manat da ya ai rai yang,

¹²shi hpe matsan n yu dum ai sha shi a lata daw kau ya na rai ndai.

¹³Nanhte gaw joi jang hte shadawn shadang ni lang ai shaloi mawp sha na hkum maw myit.

¹⁵Dai MADU nanhte a Karai Kasang nanhte hpe jaw ai mungdan hta asak galu nga myit ga, teng man ai joi si hte ding man ai shadawn shadang hpe lang na rai myit dai.

¹⁶Dai zawn mawp lu mawp sha ai masha ni hpe dai MADU n dawng nga ai.

¹⁷“Nanhte Egutu mung na pru wa myit dai shaloi, Amalek masha ni nanhte hpe kaning rai hkap galaw kau nga ai hpe adum nga mu.

¹⁸Shanhte gaw Karai Kasang hpe mung n chye hkrit ma ai. Nanhte n-gun kya nhtawm ba kalawp nga myit yang, hpang kaw na htim gasat ma ai rai nna hpang hkrat ai ni yawng hpe hkap sat kau ma ai.

¹⁹Dai re ai majaw dai MADU nanhte a Karai Kasang nanhte hpe jaw ai mungdan hta nanhte a grup yin hkan nga ai gumlau hpyen ni yawng a lata kaw na nanhte hpe sim sa shangun myit dai shaloi, Amalek masha ni yawng hpe teng teng sat kau lu na rai myit dai; Shanhte hpe kadai mung loi mi pyi dum lu sana n rai; dai hpe malap kau lu na myit dai n rai.