Read Jinghpaw Common Language Bible 2009 TARA JAHPRANG 26 Bible Online

TARA JAHPRANG 26 - Jinghpaw Common Language Bible 2009 bible

TARA JAHPRANG 26

¹“Dai MADU nanhte a Karai Kasang nanhte hpe jaw ai mungdan hpe madu la lu nna dai mung e shanu nga myit dai hpang,

²nanhte shu la lu ai shawng myin ai nsi naisi amyu shagu hpe ka hta bang nna nawku shara de la sa lu na rai myit dai.

³Dai aten na hkinjawng agyi hpang de sa nhtawm shi hpe, ‘Anhte hpe jaw na nga, anhte a ji wa ni hpe ga sadi jaw da sai mung de ngai shang lu ni ai gaw dai MADU nye a Karai Kasang a majaw rai nga ai hpe ya ngai yin la ni ai,’ ngu nna tsun na rai wu ai.

⁴“Dai hkinjawng wa mung nang kaw na ka la nhtawm dai MADU nanhte a Karai Kasang a tawn hkungri man e tawn da na rai wu ai.

⁵Dai hpang ndai ga ni hpe dai MADU a man e hti shakrai na rai ndai: ‘Nye a kaji kawa gaw Egutu mung de sa nga na matu shi a dinghku hpe woi yu wa ai malet nhprang Aramiyan masha rai nga ai. Shanhte dai mung de yu sa ai aten hta n law nga ti mung galu kaba ai hte n-gun atsam rawng nna law htam ai amyu tai wa masai.

⁶Egutu masha ni mung anhte hpe nhtum nni zingri zingrat ai hte aja awa mayam shatai kau mi ai.

⁷Shaloi anhte mung anhte a ji wa ni a Karai Kasang dai MADU kaw karum la na matu hpyi jahtau saga ai. Dai rai nna anhte hkrum sha ai nni nkri, yak hkak jam jau lam hte nchyi nmu lam ni hpe mu ai hte na ya mi ai.

⁸Shi a galu kaba ai daru magam n-gun hte atsam, mauhpa law law hte lamik kumla ni, hkrit hpa amu ni hpe madun nhtawm Egutu mung kaw na anhte hpe shaw woi wa mi ai.

⁹Shi gaw anhte hpe ndai mung de woi wa nna ndai ngamu ngamai ai hte ningru ningja ai ga jaw ya mi ai.

¹⁰Dai rai nna shi ngai hpe jaw ai shawng shu la lu ai nsi naisi dai MADU hpang de ya ngai la sa ring ngai law.’ “Dai hpang dai MADU a man e ka dai nawng let dai yang e nawku na rai wu ai.

¹¹Dai MADU nanhte a Karai Kasang nanhte hpe jaw ya ai mai kaja ai amu a majaw, na a dinghku masha ni hte mung, shing re ai poi hta shang lawm ai nang hta shanu nga ai Lewi masha ni hte maigan masha ni rau chyeju jawm shakawn lu na rai myit dai.

¹²“Masum ning ladu wa hkrum shagu, na a nsi naisi htam shi hta na htam mi shinggyin tawn nhtawm, Lewi masha ni hte maigan masha ni, jahkrai nmai ni hte gaida gaina ni hpe jaw na rai myit dai; shaloi shawa hpung ting hta shanhte hkru hkru kat kat sha lu na rai mu ai.

¹³Ndai amu ni hpe nang galaw ai shaloi dai MADU hpe, ‘Nang hkang dat nit dai hte maren Lewi masha ni hte maigan masha ni, jahkrai nmai ni hte gaida gaina ni hpe ngai jaw da sai dai chyoi pra ai htam shi hta na htam mi hpe nye a nta hta ngam da lu na n rai; htam shi hte seng ai na a hkang da mada ga ni hpe ngai n madat ai sha malap kau nga nngai n rai.

¹⁴Sharung shayawt ai hkrum yang, dai hta tawn jaw ai lusha hpe ngai sha we ai n rai; ngai hta htung hte maren n san n seng nga yang, nye a nta na arai hpa hpe mung ngai la shapraw we ai n rai; si sai masha a tsu hpe hkungga ngai nawng ya we ai n rai. O MADU e, ngai gaw na a ga madat ni ai; htam shi hta na htam mi hte seng ai nang hkang da mada ngai galaw ni ai.

¹⁵Sumsing lamu, na a chyoi pra ai shara kaw na gum yu nhtawm na a amyu masha Israela hpe shaman ya mi law. anhte a kaji kawa ni hpe nang ga sadi jaw da sai dai sut su nna ningru ningja ai lamu ga hpe shaman ya mi law,’ ngu na rai ndai.

¹⁶“Shi a tara ni yawng hpe hkan sa madat mara na matu dai MADU nanhte a Karai Kasang, dai ni nanhte hpe hkang da manit dai rai nna na a myit masin mahkra hte sadi sahka let hkan shatup lu na rai myit dai.

¹⁷Dai MADU hpe nanhte a Karai Kasang rai nga ai ngu nna mung, shi hkang da ai ga hpe hkan sa madat mara na ngu nna nanhte ga sadi tawn da manit dai mung, shi a tara ni yawng hpe shatup nhtawm shi hkang da mada yawng hpe galaw na ngu nna mung, dai ni, nanhte yin la nga manit dai.

¹⁸Shi gaw nanhte hpe ga sadi tawn da nu ai hte maren, chyoi pra ai amyu masha shatai la na matu mung, shi nanhte hpe hkang da nga ai tara ni yawng hpe hkan sa shatup na matu mung, dai MADU nanhte hpe dai ni hkap la nga manit dai.

¹⁹Shi hpan da sai masha amyu baw danghta hta shi a mying ningsang hpe shakawn kungdawn let galu kaba kajai gumhkawng shangun na marin dai. Shi tawn da ai ga sadi hte maren nanhte gaw shi a chyoi pra ai amyu masha majing tai na marin dai.”