Read Jinghpaw Common Language Bible 2009 TARA JAHPRANG 27 Bible Online

TARA JAHPRANG 27 - Jinghpaw Common Language Bible 2009 bible

TARA JAHPRANG 27

¹Dai hpang Mawshe hte Israela amyu hta na ningbaw ni gaw amyu masha ni hpe, “Dai ni, ngai nanhte hpe jaw ya ai ga matsun ni yawng hpe hkan sa madat mara nga mu.

²Nanhte Yawdan hka rap di nna dai MADU nanhte a Karai Kasang nanhte hpe jaw ya ai mungdan de shang wa ai shani hta nanhte gaw nlung kaba nkau mi hpe sharawt shadun nhtawm dai ni hta ing gade hte chya da let,

³dai hta e ndai tara hte sharin achyin ga ni yawng ka da na rai ndai. Dai MADU nanhte a nji nwa ni a Karai Kasang, nanhte hpe ga sadi jaw da nu ai hte maren, dai sut su nna ningru ningja ai mungdan de nanhte shang sha nna,

⁴Yawdan hka a wora hkran de rap kawt myit dai shaloi, dai ni ngai nanhte hpe sharin matsun nga nngai hte maren, dai nlung ni hpe Ebala Bum hta sharawt jung nna ing gade hte chya da na rai myit dai.

⁵De a ntsa e hpri arai hpa mung n lang ai sha, nlung hte galaw ai tawn hkungri gaw na rai myit dai;

⁶hpa majaw nga yang, dai MADU nanhte a Karai Kasang a matu nanhte gaw ai tawn hkungri shagu hpe n daw n ga la ra ai nlung ni hte galaw na rai myit dai. Nanhte gaw dai hta e wan nat na matu shagu hkungga ni hpe nawng jau na rai myit dai;

⁷Nanhte gaw dai yang e mahku hkungga ni nawng jau nhtawm lu sha let, dai MADU nanhte a Karai Kasang a man e chyeju shakawn lu na rai myit dai.

⁸Ing gade hte chya da ai nlung dai ni hta Karai Kasang a tara mungga shagu hte hpe dan dan pra pra ka da na rai myit dai,” ngu nna tsun mu ai.

⁹Dai hpang Mawshe gaw Lewi hkinjawng ni hte rau Israela amyu masha ni hpe, “Israela amyu masha ni e, atsin sha nga nna, nye a ga madat mu. Dai ni, nanhte gaw dai MADU nanhte a Karai Kasang a amyu masha ni tai nga manit dai;

¹⁰dai re ai majaw, dai ni, ngai nanhte hpe jaw ya ai shi a tara ni yawng hpe hkan shatup let, shi a ga hpe madat mara hkan sa nga mu,” ngu nna tsun mu ai.

¹¹Dai hpang Mawshe gaw Israela amyu masha ni hpe,

¹²“Nanhte Yawdan hka rap kawt ai hpang, amyu masha ni hpe shaman ga tsun ai shaloi, Gerizim Bum ntsa e tsap na amyu bawsang ni gaw Simun, Lewi, Yisahka, Yosep hte Benyamin ni rai nga ai.

¹³Dagam dala ga tsun ai shaloi Ebala Bum e tsap na amyu bawsang ni gaw, Rubin, Gad, Ashe, Zebulun, Dan hte Naphtali ni rai nga ai.

¹⁴Shaloi Lewi masha ni gaw ndai ga ni hpe nsen ja ja hte jahtau tsun na rai ma ai.

¹⁵“ ‘Dai MADU gaw hpara sumla nawku ai htung hpe n dawng nga ai rai nna, nlung, hpun hte nhprang arai ni hte tawk nhtawm dai hpe makoi magap nawku ai wa kadai mung Karai Kasang kaw na dagam dala hkrum wu ga law.’ “Shaloi Amyu masha ni yawng gaw, ‘Amen!,’ ngu nna htan na rai ma ai.

¹⁶“ ‘Kanu kawa hpe n kaw n law di ai wa kadai mung Karai Kasang jaw ai dagam dala hkrum u ga law.’ “Shaloi Amyu masha ni yawng gaw, ‘Amen!,’ ngu nna htan na mara ai.

¹⁷“ ‘Htingbu wa a lamu ga jarit bandung sit kau ya ai wa kadai mung Karai Kasang jaw ai dagam dala hkrum u ga law.’ “Shaloi Amyu masha ni yawng gaw, ‘Amen!,’ ngu nna htan na mara ai.

¹⁸“ ‘Myi n mu ai wa hpe lam woi shadam ai wa kadai mung Karai Kasang jaw ai dagam dala hkrum u ga law.’ “Shaloi Amyu masha ni yawng gaw, ‘Amen!,’ ngu nna htan na mara ai.

¹⁹“ ‘Maigan masha ni, jahkrai nmai hte gaida gaina ni lu la ang ai shanhte a ahkaw ahkang ni hpe hkum pat shadang da ya ai wa kadai mung Karai Kasang jaw ai ari hkrum sha u ga law.’ “Shaloi Amyu masha ni yawng gaw, ‘Amen!,’ ngu nna htan na mara ai.

²⁰“ ‘Kawa a madu jan ni hte nga sha let, kawa a sari jahpoi ya ai wa kadai mung Karai Kasang jaw ai dagam dala hkrum u ga law.’ Shaloi amyu masha ni yawng gaw, ‘Amen!,’ ngu nna htan na mara ai.

²¹“ ‘Dusat yam nga hte kanawn ai wa kadai mung Karai Kasang jaw ai dagam dala hkrum u ga law.’ “Shaloi amyu masha ni yawng gaw, ‘Amen!,’ ngu nna htan na mara ai.

²²“ ‘Kawa a shayi sha, kanu daw ai shayi sha ngu ai tinang a kanau kana hte nga sha ai wa kadai mung Karai Kasang jaw ai dagam dala hkrum u ga law.’ “Amyu masha ni yawng gaw, ‘Amen!,’ ngu nna htan na mara ai.

²³“ ‘Tinang a kani hte nga sha ai wa kadai mung Karai Kasang jaw ai dagam dala hkrum nga u ga law.’ “Amyu masha ni yawng gaw, ‘Amen!,’ ngu nna htan na mara ai.

²⁴“ ‘Masha lagyim sat ai amu shut hpyit ai wa kadai mung Karai Kasang jaw ai dagam dala hkrum u ga law.’ “Amyu masha ni yawng gaw, ‘Amen!,’ ngu nna htan na mara ai.

²⁵“ ‘Mara n lu ai wa hpe sat na matu gumhpraw la sha da ai wa kadai mung Karai Kasang jaw ai dagam dala hkrum u ga.’ “Amyu masha ni yawng gaw, ‘Amen!,’ ngu nna htan na mara ai.

²⁶“ ‘Karai Kasang a tara hte sharin shaga ai ga ni yawng hpe n hkan shatup ai wa kadai mung Karai Kasang jaw ai dagam dala hkrum u ga law.’ “Shaloi, amyu masha ni yawng gaw, ‘Amen!,’ ngu nna htan na mara ai.