Read Jinghpaw Common Language Bible 2009 TARA JAHPRANG 28 Bible Online

TARA JAHPRANG 28 - Jinghpaw Common Language Bible 2009 bible

TARA JAHPRANG 28

¹“Dai ni, ngai nanhte hpe jaw ai shi a hkang da ai ga ni yawng hpe sadi sahka let shadik shatup nhtawm dai MADU nanhte a Karai Kasang a ga hpe madat mara hkan sa myit yang gaw, ndai ginding aga ntsa na masha amyu gale yawng hta nanhte hpe shagrau sha-a na marin dai.

²Dai MADU nanhte a Karai Kasang a ga madat mu; shaloi ndai shaman chyeju nlang nanhte hta hpring tsup wa na ra ai.

³Nanhte nga ai mare ni hte nanhte a yi sun hkauna ni hpe dai MADU shaman chyeju jaw ya na ra ai.

⁴“Kashu kasha matu mara law law hta mung, lamu ga na pru ai nsi naisi law law hta mung, sagu dumsu law law hkai ai hta mung, dai MADU gaw nanhte hpe shaman chyeju jaw ya na ra ai.

⁵“Dai MADU gaw nanhte a nsi naisi ni hte galaw gumrin ai malu masha ni hpe shaman chyeju jaw ya na ra ai.

⁶“Dai MADU gaw nanhte galaw ai lam magup hpe shaman chyeju jaw ya na ra ai.

⁷“Nanhte hpe gumlau hpyen ni htim gasat myit dai shaloi, dai MADU gaw shanhte hpe dang kau na ra ai. Shanhte gaw nanhte hpe lam maga mi kaw nna shang gasat lu ti mung, lam sanit hku hprawng htaw mat wa na mara ai.

⁸“Dai MADU nanhte a Karai Kasang gaw nanhte galaw ai magam amu hpe shaman chyeju jaw ya nhtawm nanhte a mam dum ni hta nai mam nsi naisi hte hpring nga na ra ai. Shi nanhte hpe jaw ai mung hta nanhte hpe shaman chyeju jaw ya na ra ai.

⁹“Dai MADU nanhte a Karai Kasang a ga madat mara let, shi hkang da mada hpe hkan galaw myit dai rai yang, shi ga sadi tawn da nu ai hte maren, nanhte hpe shi a amyu masha majing shatai la na ra ai.

¹⁰Dai hpang Dai MADU gaw nanhte hpe shi a amyu masha majing shatai la na nga, lata la manit dai hpe ga ntsa na masha amyu ni yawng mu lu na mara ai; shaloi shanhte gaw nanhte hpe hkrit kang na mara ai.

¹¹Nanhte hpe jaw na ngu nna nanhte a nji nwa ni hpe ga sadi tawn da ai mungdan hta, kashu kasha law law, dumsu law law hte nai mam nsi naisi hkum sumhpa, dai MADU nanhte hpe n taw n tsang shakat ya na marin dai.

¹²Shi gaw nanhte galaw ai amu bungli yawng hpe shaman ya na nga, sumsing lamu e nga ai sut gan nlang hte hpring ai sut dum kaw na lamu marang hpe aten ladaw shagu jahtu ya na ra ai; nanhte gaw masha amyu baw law law hpe hkoi ya lu na marin dai; rai tim nanhte chyawm gaw kadai kaw na mung hkoi la ra na myit dai n rai.

¹³Dai ni, ngai nanhte hpe jaw ai shi a hkang da ai ga ni yawng hta sadi sahka let madat mara hkan sa myit dai rai yang, dai MADU nanhte a Karai Kasang gaw amyu baw ni hta ningbaw tai shangun na marin dai; hpang hkan ai wa shatai na n rai; nanhte gaw tut nawng ngamu ngamai nna galoi mung hkrat sum na myit dai n rai.

¹⁴Shi a ga hpe galoi mung, madat mara lu na myit dai; rai ti mung kaga hpara ni hpe nawku daw jau lu na myit dai n rai.

¹⁵“Rai ti mung dai ni, ngai nanhte hpe jaw ai shi a hkang da ai ga hte tara ni yawng hpe sadi sahka hte n hkan shatup ai sha, dai MADU nanhte a Karai Kasang a ga hpe n madat ai rai myit yang gaw, ndai n hkru n shawp ai amu yawng nanhte hta byin wa na marin dai:

¹⁶“Nanhte nga ai mare ni hte nanhte a yi sun hkauna ni hpe dai MADU dagam kau na ra ai.

¹⁷“Dai MADU gaw hkainu nsi naisi hte dai ni hte galaw ai nanhte a malu masha hpe dagam kau na ra ai.

¹⁸“Dai MADU gaw nanhte hpe kashu kasha matu mara n law ai hku mung, nsi naisi n ja kat ai hku nna mung, sagu dumsu yam nga n law htam ai hku mung, dagam kau na ra ai.

¹⁹“Dai MADU gaw nanhte galaw ai amu bungli shagu hpe dagam kau na ra ai.

²⁰“Nanhte gaw dai MADU hpe ningdang kau nhtawm n hkru ai amu galaw myit dai rai yang, nanhte tsep kawp hten byak mat nna alawan hten run mat ai aten du hkra, nanhte galaw ai lam magup hta tsin-yam tsindam, kaming kamawng kashuk kashak hte ru yak shoihpa shoirang amu, nanhte a ntsa e du shangun na ru ai.

²¹Shi gaw nanhte madu la hkyen ai mungdan hta langai mi mung n ngam mat hkra nanhte a ntsa e ana zinli langai hpang langai shangun dat na ra ai.

²²Dai MADU gaw nanhte hpe hpyi shan hta bum akawng nna machyi ai, kap chye ai ana ahkya hte nanhte hpe hkra shangun na ra ai; nanhte a nsi naisi ni hpe jahten kau ya ai jan gri ai hte kahtet kang ai nbung ni hpe shangun dat na ra ai. Dai tsin-yam tsindam ni gaw nanhte si htum mat ai aten du hkra nanhte kaw hkan nang na mara ai.

²³Lamu marang mung htu na ra ai n rai; nanhte a lamu ga mung hpri zawn ja hkak mat na ra ai.

²⁴Marang jahtu ya na malai, nanhte jahten kau hkrum ai aten du hkra ga nhpu hte zaibru laru shangun dat ya na ra ai.

²⁵“Nanhte hpe hpyen ai gumlau hpyen ni hpe dai MADU gaw awng padang jaw kau ya na ra ai. Nanhte gaw man maga langai hku sha shanhte hpang de htim sa wa lu myit ti mung, nanhte gaw shanhte kaw na lam maga sanit hku hprawng htaw mat wa na rai myit dai. Ga ntsa na masha amyu baw ni yawng nanhte hta byin ai lam ni hpe yu nna hkrit gari mat na mara ai.

²⁶Nanhte si mat myit dai shaloi, ntsa malen u ni hte matse labye dusat ni nanhte a si mang ni hpe sa sha na mara ai; dai ni hpe jahkrit jahtaw kau lu na masha kadai mung nga na n rai.

²⁷Dai MADU gaw Egutu masha ni hpe galaw ai zawn nanhte a ntsa e shakrwi tu shangun na ra ai. Nanhte a hkum hta mung hpye ai ningma kahpawk ga na ra ai. Machyit hte maru ru ai gaw nanhte hta chyat rai ti mung, nang hpe mai hkra tsi lajang na kadai mung nga na n rai.

²⁸Dai MADU gaw nanhte hpe mana shangun nna, myi amam ai hte kaming kamawng kashuk kashak shabyin dat na ra ai.

²⁹Nanhte gaw myi amam ai wa zawn shani chyingtung e pyi lamawm hkawm na rai myit dai; nanhte gaw nanhte hkawm sa na lam hpe pyi mu tam lu na n rai; nanhte galaw ai hpa lam mung ngamu ngamai shangun lu na n rai. Nanhte gaw dip gamyet sha hkrum nna zingri zingrat kashun kashe du daw sai hkaw sha ahkrum na marin dai; nanhte hpe kadai mung karum la na myit dai n rai.

³⁰“Nanhte gaw num mahtan da ti mung marai langai ngai e hkungran la kau ya na ra ai. Nta gap tawn da ti mung dai hta galoi mung nga lu na myit dai n rai; sabyi sun hkai da ti mung de a asi hpe galoi mung sha lu na n rai.

³¹Na a dumsu hpe na a man e nan sat ti mung, dai ashan loi mi mung sha lu na n rai. Na a lawze dun mat wa ai hpe nang mu dat ti mung, na a lata de nhtang ap ya na n rai. Na a sagu ni gumlau hpyen ni a lata de shang mat wa ti mung, nang hpe karum la na kadai mung nga na ra ai n rai.

³²Nang hkan mada dat yang sha, na a shayi shadang sha ni maigan masha ni a lata hta mayam tai hkrum na mara ai. Na a kashu kasha ni mahkoi bai nhtang wa nhten, nga nna shani shagu myi she tsu tsu rai, kaman lila a matu gawng sharun rai na rin dai.

³³Nang hki ba let galaw shatut da ai nsi naisi yawng hpe maigan masha amyu baw ni htawm la kau ya na ra ai. Nang chyawm gaw dip gamyet sha hkrum ai hte zingri zingrat ahkrum nga na ra ai.

³⁴Nang hkrum hkra ai nni nkri ni a majaw nang hpe mana shangun na ra ai.

³⁵Dai MADU gaw abaw kaw nna lagaw du hkra n chye mai ai shakrwi hte machyi ka-ut shangun ai ningma ni shabyin ya na ra ai.

³⁶“Nanhte mung, nanhte a nji nwa ni mung shawng de garai n sa nga yu ai maigan mung de nanhte hte nanhte a hkawhkam wa hpe dai MADU woi mat wa na ra ai; shing rai dai mung e, hpun hte mung, nlung hte mung galaw ai hpara ni hpe nanhte nawku daw jau na marin dai.

³⁷Dai MADU nanhte hpe shabra kau dat ai mungdan hkan nanhte hta byin hkrum hkra ai lam ni a majaw masha amyu ni yu mau nhtawm mani asawng ai hte ashu kau na mara ai.

³⁸“Nai mam nli law law gat myit ti mung dinggam-yaw ni sha kau na mu ai majaw, kachyi mi sha she shu la lu na rai myit dai;

³⁹sabyi sun hkai sharing tawn ti mung, shingtai ni e sha kau ya na ma ai majaw sabyi si di la lu na n rai myit dai; sabyi ntsin mung lu lu na n rai.

⁴⁰Nanhte nga ai mungdan shara shagu hta tsanlun hpun ni tu nga ti mung, run hkrat mat ai majaw tsanlun sau loi mi pyi lu la na ra ai n rai.

⁴¹Nanhte hta shayi shadang sha ni shaprat ti mung, bawng masha ni tai mat na re ai majaw shanhte hpe shamat kau na marin dai.

⁴²Nanhte a mungdan hta tu ai hpun hte nsi naisi yawng hpe shingtai ni e sha kau na mara ai.

⁴³“Nanhte a mungdan hta nga ai maigan masha ni mahtang daru magam n-gun grau grau rawng wa na mara ai; nanhte chyawm gaw angwi ngwi sha grit mat wa na marin dai.

⁴⁴Shanhte mahtang nanhte hpe hkoi ya na gumhpraw lu na ma ai; rai ti mung, nanhte chyawm gaw shanhte hpe hkoi ya lu na myit dai n rai. Hpang jahtum e, shanhte mahtang nanhte hpe up hkang ai du salang ni tai na mara ai.

⁴⁵“Nanhte gaw dai MADU nanhte a Karai Kasang a ga hpe n madat ai hte nanhte hpe jaw ya ai tara ni yawng hpe n hkan shatup nga myit dai majaw nanhte hpe jahten sharun kau ai aten du hkra ndai tsin-yam tsindam ni yawng nanhte a ntsa e du nna nanhte hte rau anga nga na ra ai.

⁴⁶Dai gaw nanhte a ntsa e mung, nanhte a amyu matu mara ni a ntsa e mung, Karai Kasang a tara jeyang daw dan na prat dingsa na sakse kumla tai nga na ra ai.

⁴⁷Dai MADU gaw nanhte hpe lam magup shaman ya manit dai; rai ti mung nanhte shi hpe kabu gara ai myit hte n daw n jau myit dai.

⁴⁸Dai majaw nanhte hpe ninghkap na matu dai MADU shangun dat ai gumlau hpyen ni hpe mahtang daw jau na rai myit dai; shing rai ra kadawn ai lam shagu hta kawsi hpang gara ai hte singgu krin re ai tsin-yam ahkrum sha nga na rai myit dai. Dai MADU [5]gaw nanhte hten run mat ai aten du hkra nanhte hpe ja ja dip gamyet da na ra ai.

⁴⁹Dai MADU gaw nanhte hpe htim gasat na matu nanhte n chye na ai ga shaga ai masha amyu baw ni hpe mungkan ga htum kaw na shangun dat na ra ai. Shanhte mung galang zawn nanhte hpe htim na mara ai.

⁵⁰Shanhte gaw gumshem nga ma ai rai nna, asak kaji kaba n nga, kadai hpe mung matsan dum ai myit madun dan nga ma ai n rai.

⁵¹Nanhte a yam nga hte nsi naisi ni hpe mung shanhte sha kau ya na mara ai; shaloi nanhte kawsi kyet si na rai myit dai. Shanhte gaw nsi naisi, sabyi ntsin, tsanlun sau, yam nga hpung hte sagu ni hpe nanhte a matu ngam da ya na ma ai n rai; nanhte si mat na marin dai.

⁵²Dai MADU nanhte a Karai Kasang nanhte hpe jaw ya nga ai mungdan na mare shagu hpe shanhte gasat kau na mara ai; nanhte yu kam ai dai tsaw nna ngang ai mare bunghku ni daw agrawp mat na ra ai.

⁵³“Gumlau hpyen ni nanhte a mare ni hpe wang tawn da nna lusha kadawn mat myit dai shaloi mung, myit chyum myit htum hkrum ai shaloi mung, dai MADU nanhte a Karai Kasang nanhte hpe jaw ai kashu kasha ni hpe pyi sha kau na rai myit dai.

⁵⁴Dai zawn wang shinggrup da hkrum ai aten e, nanhte hta nachying sumnung shingdi ai wa pyi myit chyum myit htum hkrum nna lusha kadawn mat ai a majaw shi a kasha majing ni hpe pyi sha kau na wu ai. Shi tsaw ra ai kahpu kanau, madu jan hte naw ngam nga ai kasha ni hpe pyi kam jaw sha na wu ai n rai.

⁵⁵

⁵⁶Grai sut su nna arawng kaba hte hkik hkam ai hku shangai wa nhtawm, ga hta galoi mung n kabye hkawm yu ai dai nachying sumnung shingdi ai numsha pyi, dai hte maren galaw na ra ai. Gumlau hpyen ni mare wang shinggrup da ai shaloi dai numsha gaw myit chyum myit htum hkrum nna lusha kadawn mat ai a majaw tinang shangai ai ma chyangai hte hkritung na ma manang hpe pyi shi hkrai lagyim sha na rai wu ai. Shi tsaw ra ai madu wa hte shi a shayi shadang sha ni hpe pyi gambum karan jaw na wu ai n rai.

⁵⁷

⁵⁸“Ndai laika hta ka da ai Karai Kasang a sharin shaga ai ga yawng hpe sadi sahka hte nanhte n madat ai sha, dai MADU nanhte a Karai Kasang a mauhpa hte hkrit hpa mying ningsang hpe n shagrau n sha-a myit dai rai yang,

⁵⁹nanhte a ntsa e mung, nanhte a matu mara ni a ntsa e mung, galoi mung shamai kau n lu ai hkrit hpa ana zinli hte tsi la n lu ai ana ahkya ni shi dat dat na ra ai.

⁶⁰Shi gaw Egutu mung e nanhte hkrum kadup yu manit dai hkrit hpa ana zinli yawng nanhte a ntsa e lang mi bai du shangun ai hte dai gaw galoi mung shamai shatsai kau lu na myit dai n rai.

⁶¹Shi gaw Karai Kasang a tara ni hte sharin shaga ai laika hta n ka shalawm yu ai ana ahkya hte ana zinli hkum sumhpa yawng hpe mung dat dat na ra ai; nanhte gaw shamyit kau ai hkrum na rai myit dai.

⁶²Dai MADU nanhte a Karai Kasang hkang da ai ga hpe n madat kau myit dai majaw, nanhte gaw sumsing lamu na shagan daram law htam nga myit tim pyi, nanhte hta na loi mi sha ngam nga na marin dai.

⁶³Dai MADU gaw nanhte hpe ngamu ngamai shangun nna shalaw jahtam ai hta kabu sharawng nga ai zawn nanhte hpe shamyit kau nhtawm jahten sharun kau na hta mung kabu sharawng na rai wu ai. Nanhte gaw nanhte madu la hkyen ai mungdan kaw na gawt shapraw kau hkrum na marin dai.

⁶⁴Dai MADU gaw ginding aga htum maga mi kaw nna, ginding aga a maga mi de du hkra masha amyu ni yawng hpang de nanhte hpe shabra kau na ra ai. Shing rai nang hte nanhte a nji nwa ni pyi shawng de galoi mung n nawku yu ai dai hpun nlung hte galaw ai hpara ni hpe nawku daw jau na marin dai.

⁶⁵Nanhte gaw ngwi pyaw sim sa lam hpe kanang e mung mu lu na myit dai n rai; nanhte hpe shaga ai shara kanang e mung nga na n rai; dai MADU mung nanhte hpe masin kahpra ai, myit mada shara n nga ai hte myit daw myit hten ai lam jahkrum na rai wu ai.

⁶⁶Nanhte a asak hkrun lam gaw tut nawng hkrit tsang shara tai nhtawm shani shana hkrit gari ai hte hpring nna si hkrung si htan lam hta ahkawm nga na rai myit dai.

⁶⁷Nanhte a myit masin gaw nanhte mu ai lam magup hta hkrit ai myit hte adawt hkra nga nhtawm, jahpawt shagu, shana du na hpe, shana de shagu jahpawt du na hpe marit nga na rai myit dai.

⁶⁸Dai MADU gaw nanhte hpe Egutu mung de galoi mung bai nhtang sa sana n rai, nga nna shi tsun kau wu tim pyi, sanghpaw li hte nanhte hpe sa shangun na ra ai; dai yang e mayam sa tai na nga, nanhte a gumlau hpyen ni a lata hta tinang hkum nan sa dut ti mung, nanhte hpe kadai mung akaw alaw nga nna ra sharawng na mu ai n rai,” ngu nna tsun wu ai.