Read Jinghpaw Common Language Bible 2009 TARA JAHPRANG 29 Bible Online

TARA JAHPRANG 29 - Jinghpaw Common Language Bible 2009 bible

TARA JAHPRANG 29

¹Ndai gaw Moba mung e du nga ai Israela amyu masha ni hte dai MADU Mawshe hpe hkang da let shagrin da ai ga shaka ladaw ni rai nga ai. Dai yawng gaw Sina Bum e shanhte hte dai MADU tawn da nu ai ga shaka hpe jat da ai lam rai nga ai.

²Mawshe mung Israela amyu masha ni yawng hpe shaga hpawng da nhtawm shanhte hte shi a mung du salang ni hpe, “Egutu hkawhkam hte shi a mungdan ting na du salang ni hpe kaning di kau nu ai hpe nanhte nan mu manit dai.

³Dai MADU galaw dan sai hkrit hpa htawkdang ana, lamik kumla hte mauhpa amu kaba ni hpe nanhte mu manit dai.

⁴Rai ti mung dai ni du hkra nanhte hkrum hkra yu manit dai, dai mahkrum madup nanhte hpe chye na hkawn hkrang shangun ai n rai.

⁵Dai MADU nanhte hpe nam mali hku mali shi ning tup woi wa myit dai shaloi, nanhte a hpun palawng hte hkyepdin ni, galoi mung n tsam n htum mat myit dai.

⁶Nanhte gaw sha na matu muk, lu na matu sabyi ntsin hte chyaru n lu myit dai rai ti mung, shi gaw nanhte a Karai Kasang rai nga ai lam nanhte hpe sharin shaga na nga nanhte hta ra kadawn nga ai lam ni hpe dai MADU jaw ya nu ai.

⁷Anhte gaw ndai shara de pru sa wa ai shaloi, Heshbon Hkawhkam Sihon hte Bashan Hkawhkam Oga anhte hpe hkap gasat na nga pru sa wa ma ai. Rai ti mung anhte gaw shanhte hpe dang kau lu nna,

⁸anhte gaw shanhte a lamu ga la nhtawm, Rubin hte Gad amyu bawsang ni hte Manashe amyu bawsang chyen mi hpe sali ga hku karan ya saga ai.

⁹Nanhte galaw ai lam magup hta awng dang lu myit ga, ga shaka ndai ni yawng hpe sadi dung ai hte madat mara hkan sa na rai myit dai.

¹⁰Nanhte a ningbaw ni hte du salang ni, nanhte hta na lasha, numsha ni hte ma kaji ni,

¹¹nanhte hta hkan nga nang nna nanhte a matu hpun hta, hka ja ya ai maigan masha ni ngu na yawng gaw, dai MADU nanhte a Karai Kasang a man e dai ni, tsap nga myit dai.

¹²Dai MADU nanhte a Karai Kasang hte nanhte galaw da nga ai ndai ga shaka hte de a amu lit ni hpe hkap la na matu dai ni, hkan shatup shaja na rai myit dai.

¹³Nanhte a kaji kawa ni rai nga ai Abraham, Isak hte Yaku ni hpe shi ga sadi jaw da nu ai hte maren, shi a amyu masha shatai la na matu mung, nanhte a Karai Kasang tai nga na matu mung, dai MADU gaw ya jang, nanhte hpe shagrin da na rai wu ai.

¹⁴Ndai ga shaka hte ndai magam lit ni hpe dai MADU gaw nanhte hte sha tawn da nga ai n rai;

¹⁵dai ni, shi a man e tsap nga ai anhte yawng hte mung, ya aten garai n shangai wa ai anhte a matu mara ni hte mung shi tawn da nga ai.

¹⁶“Egutu mung e kaning rai nga nga ai mung, kaga masha amyu baw ni a lamu ga hku kaning rai ga lai mat wa ai mung, nanhte adum nga myit dai.

¹⁷Hpun, nlung, aja gumhpraw ni hte galaw tawn ai shanhte a matsat shabat re ai hpara sumla ni hpe nanhte mu manit dai.

¹⁸Kaga masha amyu baw ni a hpara hpe nawku daw jau na nga, dai ni, ndai yang e tsap nga ai numsha lasha dinghku hte amyu bawsang ni kadai mung dai MADU anhte a Karai Kasang kaw na teng teng yit mat wa lu na myit dai n rai. Dai gaw agung hte hka ai hpun tu pru wa ai ru npawt zawn rai nga ai.

¹⁹Ndai dagam ga hpe dai ni, ndai yang e na ai ni lam shagu shi hte mai kaja na re ngu shi nan myit hkawn da tim, myit ja ai hte shi a lam shi hkawm ai rai yang, dai gaw kaja ai rai ti mung, n kaja ai rai ti mung nanhte yawng hpe shamyit kau na wu ai.

²⁰Dai MADU gaw dai zawn re ai wa hpe mara dat ya na wu ai n rai; shing rai na malai, dai MADU a hkru nga ai pawt sindawng ai gaw shi a ntsa e grung nga nhtawm dai MADU shi hpe tsep kawp shamyit kau ai aten du hkra, ndai laika hta ka matsing da ai tsin-yam tsindam yawng mayawng shi a ntsa e ru bun na wu ai.

²¹Dai MADU gaw shi hpe Israela amyu bawsang ni yawng kaw nna shapraw kau nhtawm dai MADU shi a sharin shaga ai ga ni hpe ka da ai ga shaka a dagam dala lam yawng hte maren, shi a ntsa e ru yak tsin-yam tsindam shapraw dat na wu ai.

²²“Dai MADU nanhte a mungdan ntsa hta shabyin dat ai ru yak tsin-yam tsindam hte nni nkri ni hpe htawm hpang prat ban ni paw pru wa na nanhte a matu mara ni hte sumtsan mung na maigan masha ni sa mu na mara ai.

²³Dai pa layang ni shakrin shakraw shara tai mat nna kan hte jum hkrai pri rai mat nhtawm dai shara hkan e hpa mung hkai mai na n rai; tsingdu tsingman ni pyi tu na n rai. Shaloi nanhte a mungdan gaw dai MADU masin kahtet nna pawt sindawng ai a majaw jahten kau ai Sodom, Gomora, Adma hte Zeboim mare ni zawn tai mat na ra ai.

²⁴Dai hpang mungkan ga ting gaw, ‘Dai MADU gaw hpa majaw shanhte a mungdan hpe dai hku galaw kau wu ni? Shi a hkrit hpa masin kahtet ai gaw kaning re ai mi rai nga ai kun?,’ ngu nna san na mara ai.

²⁵Shaloi de a mahtai gaw, ‘Dai MADU gaw shanhte hpe Egutu mung kaw nna woi shapraw wa mu ai shaloi, shanhte a kaji kawa ni a Karai Kasang hte tawn da ai ga shaka hpe amyu masha ni jahten sharun kau mu ai majaw mung,

²⁶shanhte galoi mung n nawku lu na rai nga ai ngu nna dai MADU hkum pat da ai hpara shaje ni hpe shanhte daw jau nga ma ai majaw mung rai nga ai.

²⁷Dai rai nna shi a amyu masha ni hte shanhte a mungdan hpe dai MADU pawt sindawng wu ai rai nna dai laika hta ka da ai tsin-yam tsindam ni hpe shapraw dat wu ai.

²⁸Dai MADU a masin kahtet let pawt sindawng ai gaw grung wa ai rai nna, de a majaw shanhte hpe mungdan kaw nna shaw shapraw kau nhtawm maigan mung de gawt shapraw kau wu ai rai nna dai yang e dai ni du hkra nga nga ma ai,’ ngu nna htan na rai ma ai.

²⁹“Dai MADU anhte a Karai Kasang lam nkau mi hpe makoi magap da nga ai. Rai ti mung shi a tara hpe shapraw dan ai rai nna anhte hte anhte a amyu matu mara ni dai hpe htani htana madat mara hkan sa na rai nga ga ai.