Read Jinghpaw Common Language Bible 2009 TARA JAHPRANG 30 Bible Online

TARA JAHPRANG 30 - Jinghpaw Common Language Bible 2009 bible

TARA JAHPRANG 30

¹“Ya chyawm gaw nanhte hpe shaman chyeju hte dagam dala hpe lata la na ahkang ngai jaw da made ai. Ndai lam yawng mayawng nanhte hta byin wa ai shaloi, dai MADU nanhte a Karai Kasang nanhte hpe shaden shabra kau dat ai masha amyu baw ni kaw nanhte nga nga myit dai shaloi ngai nanhte hpe lata la shangun ai lam hpe dum wa na marin dai.

²Nanhte hte nanhte a amyu matu mara ni dai MADU hpang de kayin wa nhtawm dai ni, ngai nanhte hpe jaw ya ai hkang da ai ga ni hpe nanhte a myit masin mahkra hte madat mara myit dai rai yang,

³dai MADU nanhte a Karai Kasang gaw nanhte hpe matsan yu dum nhtawm nanhte hpe shaden shabra kau dat ai masha amyu baw ni a lata kaw na nanhte hpe bai woi la ai hte kalang mi bai ngamu ngamai shangun na marin dai.

⁴Mungkan ga a jahtum jut ngu na tsan htum ai shara de shabra kau dat hkrum nga myit tim pyi, dai MADU nanhte a Karai Kasang gaw nanhte hpe bai shinggyin la na rai wu ai.

⁵Shing rai nanhte a nji nwa ni lang mi nga lai wa yu sai mungdan hpe bai madu la lu nna shanhte hta grau ngamu ngamai shangun ai hte law htam shangun na marin dai.

⁶Nanhte hpe mung, nanhte a amyu matu mara ni hpe mung madat mara chye ai myit masin, dai MADU nanhte a Karai Kasang jaw ya na ra ai rai nna nanhte a myit masin kraw lawang mahkra hte shi hpe tsaw ra lu na rai myit dai; shing rai dai mungdan hta nanhte anga nga lu na rai myit dai.

⁷Shi gaw ndai dagam dala lam yawng, nanhte hpe n dawng n yawt ai hte dip gamyet sha nga ai nanhte a gumlau hpyen ni hpang de nhtang jahkrum dat na rai nna,

⁸dai ni, ngai nanhte hpe jaw ai shi a hkang da ai ga hpe nanhte madat mara let hkan shatup na rai myit dai.

⁹Dai MADU gaw nanhte galaw ai amu yawng mayawng hta nanhte hpe ngamu ngamai shangun nhtawm mayat maya shangun na marin dai. Nanhte a yi sun hkauna ni mung nsi naisi nhpaw n-ya shapraw ya na ra ai. Shi gaw nanhte a nji nwa ni hpe ngamu ngamai shangun nu ai zawn nanhte hpe mung kabu gara ai hte ngamu ngamai shangun na ra ai;

¹⁰rai ti mung shi a sharin shaga ai ndai laika hta ka da ai tara ni yawng hpe hkan shatup nhtawm shi a ga hpe madat mara na rai myit dai. Shaloi nanhte a myit masin kraw lawang mahkra hte shi hpang de kayin wa na myit dai.

¹¹“Dai ni, ngai nanhte hpe jaw ai ndai hkang da ai ga gaw nanhte n hkan lu hkra nau wa yak la ai n rai; nanhte n hkan dep nang lu na myit dai n rai.

¹²Dai gaw sumsing lamu ntsa e nga nga ai n rai; Nanhte gaw, ‘Dai hpe na lu nna madat mara lu hkra, anhte a matu kadai wa lung wa nhtawm dai hpe la yu wa lu na a ta?,’ nga nna san shara n nga nga ai.

¹³Shing n rai, dai gaw nammukdara wora hkran maga de nga nga ai dai hpe anhte na mai nna, madat la lu hkra, kadai wa nammukdara hpe rap di na rai ta?,’ nga nna nanhte san mai nga myit dai n rai.

¹⁴N rai law, dai gaw ndai yang e nanhte hte rau nga nga ai, dai hpe nanhte chye nga myit dai; dai hpe nanhte bai tsun lu nga myit dai; dai rai nna ya jang, dai ga hpe madat mara mu.

¹⁵“Kaja ai hte n kaja ai hpe mung, asak hkrung ai hte si hkrung si htan lam hpe mung lata la na ahkang, dai ni, ngai nanhte hpe jaw nga nngai.

¹⁶Dai ni, ngai nanhte hpe jaw ai, dai MADU nanhte a Karai Kasang a hkang da ai ga hpe madat mara nna, shi hpe tsaw ra ai hte shi a ga hpe madat mara let shi a tara ni yawng hpe hkan shatup myit dai rai yang, nanhte gaw ngamu ngamai wa nhtawm masha amyu baw law law a amyu tai wa lu na marin dai. Shing rai nanhte madu la hkyen ai mungdan hta dai MADU nanhte a Karai Kasang nanhte hpe shaman ya na ra ai.

¹⁷Rai ti mung hkang da ai ga hpe n madat ai sha, shi a ga hpe lale nna kaga hpara ni hpe nawku na nga, lam dam mat wa ai rai yang chyawm gaw,

¹⁸nanhte shamyit kau ai hkrum nna nanhte madu la hkyen ai Yawdan hka a wora hkran na mungdan hta asak galu hkra nga lu na myit dai n rai; nanhte hpe ya ngai sadi jaw nga nngai.

¹⁹Ngai gaw nanhte hpe asak hkrung lam hte si hkrung si htan lam, Karai Kasang a chyeju hte Karai Kasang a dagam dala lam hpe lata la na lam, jaw ya nga nngai. Dai rai nna shing re ai lam hpe lata la nna sumsing lamu hte ginding aga hpe sakse da ya nngai. Dai majaw asak hkrung lam hpe mahtang lata la mu.

²⁰Dai MADU nanhte a Karai Kasang hpe tsaw ra mu; shi a ga madat mara let shi hta sadi dung nga mu. Nanhte a nji nwa Abraham, Isak hte Yaku hte hpe shi jaw ai ga sadi mungdan hta nanhte hte nanhte a amyu matu mara ni anga nga lu na marin dai,” ngu nna tsun wu ai.